Jn 16 - Ikan feg

¹ Yeso ya chè imbìghè gha, “Mə fə ghà inug mbo̰ inən ni ghì gha imbə̀ʼ ìwən ibḛfiŋ nɔ̀ʼ bɔd.

² Bəd biri kamni awən inga məchamì Ŋwiye. Nyùmə̀ we yèʼe ne wə̀d ne zwète awən biri kɔndi gha zìye ya fàʼà yaʼ àfàʼì ne Ŋwiye kə̀bi.

³ Bəd biri ghì inən ane imbə̀ʼ icheg ne chəyi mbi kyeri ìmə Mbaʼ, kə̀ bə̀ kyèri amə.

⁴ Mə ya anìŋ fə ghà inug mbo̰ inən imbə̀ʼ nyùmə̀ ghi mə kòʼ, mbə biri wendi gha mə̀ ya fə pati awən. Chəyi mə̀ ya bi ghà inug mbo̰ inən anyumə̀ ne mbə̀ ya ko ni beni abɔ̀ʼ inum imbə̀ʼ icheg ne mə̀ ya yaʼ tì inən.”

Àfàʼì ne Azwighi Ŋwiye ze fàʼà

⁵ Yeso ya ywìrì ghà abə mə̀mə̀nənùg məd gha, “Amad anìŋ, mə̀ ya se ghò amə abɔ̀ʼ wə̀d we ne ya cha amə. Ane, chəyi wə̀d mɔ̀ʼɔ abɔ̀ʼ inən ne biri inum gha, ‹Àghò kə ghò aya?›

⁶ Ibəʼ fə nyi inən inga fìŋ məyi imbə̀ʼ icheg ne mə gha inug mbo̰ inən.

⁷ Mə gha tesiʼ inən gha, mə̀ ya ghò anìŋ imbə̀ʼ mbə̀ jəghə ìchɔ̀mì. Àmə chəyi mə̀ gho, chəyi Àwètìbə̀d biri yeʼe. Ane, mo mə̀ ghò, mə biri chà aməd wì yèʼe.

⁸ Anyumə̀ ne wì yèʼe, wì biri ghì bəd ne yaʼi igun isəg kyeri gha inug mbe ne mbɔb mbe ghìyə̀ ya inug tibɔ̀ŋ, bə̀ kyèri gha ikuchèg Ŋwiye təm kòʼ, bə̀ kyèri gha Ŋwiye biri saʼ bəd ane icheg ne koʼi.

⁹ Wì biri ghì mbi kyeri gha inug mbe ne mbɔb mbe ghìyə̀ ya inug tibɔ̀ŋ imbə̀ʼ icheg ne chəyi mbi nɔŋi ibḛfiŋ igun inum.

¹⁰ Wì biri ghì mbi kyeri gha ikuchèg Ŋwiye təm kòʼ imbə̀ʼ icheg ne mə̀ ya anìŋ ghò abɔ̀ʼ ìmə Mbaʼ, asiŋi ne chəyi tì mbə̰ ywìrì bàd amə.

¹¹ Wì biri bə ghì mbə kyeri gha Ŋwiye we sàʼa bəd ane icheg ne koʼi imbə̀ʼ icheg ne wì fə sɔb isaʼi igun wə̀d we ne tùmbə̀ isəg gho̰.”

¹² Mə bèrì inug nɔʼ nɔʼ ni ghà inən. Si ya gha, inug mbe nɔʼ chè icheg ne tì mbə̰ zug ijìm bə̀ nyìmi inga atog amad anìŋ.

¹³ Anyumə̀ ne Azwighi Ŋwiye ze ne ghìyə̀ bəd kyere tesiʼ biri yeʼe, wì biri chwiye tesiʼ ijìm inən. Chəyi wì biri ya ghàmà yaʼ ane ìwi ighəm. Wì biri ya ghà məyi anug ne wì zughi. Wì biri ghà inug ne kiri yeʼe inən.

¹⁴ Wì biri ghumni amə imbə̀ʼ icheg ne wì biri ya nìŋə inug mbe ne mə ghà ibo, se ghà inən.

¹⁵ Ighi ijìm mbe ne ìmə Mbaʼ beri ya bə̀ ìmbum. À ya aton ze ne mə gha, Azwighi Ŋwiye biri ya nìŋə inug mbe ne mə ghà ibo, se ghà inən.

Ibəʼ biri bə̀ŋə̀ ane igyendi.

¹⁶ Yeso ya chè imbìghè ni ghà inɔb gha, “Chəyi mbə̀ biri ywiri bàd amə ane iki nyumə̀. Àsi ane iki nyumə̀ ndəŋ, mbə biri ywiri bàd amə.”

¹⁷ Mə̀mə̀nənùg məd mɔ̀ʼɔ yaya se bìre mbɔb mbɔb gha, “Ìngam gho̰ ne wì ghami anìŋ kə we jiʼè gha? Wì gha, ‹Chəyi mbə̀ biri ywiri bàd amə ane iki nyumə̀. Àsi ane iki nyumə̀ ndəŋ, mbə biri ywiri bàd amə.› Wì bə̀ gha, ‹À ya imbə̀ʼ icheg ne mə ghò abɔ̀ʼ ìmə Mbaʼ.› ”

¹⁸ Mbi ya chè imbìghè se bìre gha, “Wì kə mə̀ gha, ‹Ane iki nyumə̀› àze kə wì jiʼì gha? Chəyi ìmba itog kiri zḛ ane ìngam gho̰.”

¹⁹ Yeso ya bàd awɔb kyèri àzi aghi gha mbi ya kə̀bə̀ ni biri anug azo̰ ibo. Ane, wì ya si ghà inɔb gha, “Mbə kə anìŋ bìri abə wə̀d imɔʼ imɔʼ abɔ̀ʼ inən ni kyeri aton ane ìngam gho̰ ne mə gha, ‹Chəyi mbə̀ biri ywiri bàd amə ane iki nyumə̀. Àsi ane iki nyumə̀ ndəŋ, mbə biri ywiri bàd amə›?

²⁰ Mə gha tesiʼ inən gha, mbə biri dèg mèʼì məchə. Si ya gha, bəd igun isəg biri ya gyènde. Ibəʼ biri nyi inga ìtən fìŋ. Si ya gha, wi biri si bə̀ŋə̀ ane igyendi.

²¹ Anyumə̀ ne àyi tìbum ko ni nɔmbi, nyɔd məd ya bə yi imbə̀ʼ icheg ne wì kyèri gha à ya nyùmə̀ ne wì biri zug tibuʼ gwi. Si ya gha, anyumə̀ ne wì gwi ìwi ŋwan, wì ya nèbè tibuʼ te imbə̀ʼ icheg ne wì fə gwi.

²² À ya icheg ne ze biri yaʼ tì inən. Amad anìŋ, ibəʼ we inən inga fìŋ. Si ya gha, anyumə̀ ne mə̀ biri ywiri yeʼe, igyendi biri si zweg inən inga fìŋ. Chəyi wə̀d mɔ̀ʼɔ angu ne tì wì chì igyendi we inən inga fìŋ.

²³ Anyumə̀ ne aneg ze biri pè, chəyi mbə̀ biri biri anug mɔ̀ʼɔ inum. Mə ghà ya tesiʼ inən gha, anug ne mbə̀ biri biri abə ìmə Mbaʼ inga ìmə ikum, wì biri fàʼ inən.

²⁴ Pè tèchɔ̀ŋ, chəyi mbə̀ kiri biri anug mɔ̀ʼɔ abə ìmə Mbaʼ inga ìmə ikum. Mbə̰ mə̀ bìri, wì biri fàʼ inən imbə̀ʼ igyendi sweghe inən inga fìŋ.”

²⁵ Yeso ya chè imbìghè ni ghà inɔb gha, “Ka mə jiʼì ghà inug mbo̰ inən ane ìngam məgri, mbə̀ kyeri gha, nyùmə̀ we yèʼe ne chəyi mə̀ biri ywiri ghàm inən ane ìngam məgri. Mə biri ghà inug inən asaŋ asaŋ imbə̀ʼ ìmə Mbaʼ.

²⁶ Anyumə̀ ne aneg ze biri pè, mbə biri biri inug ane ìmə ikum. Chəyi mə̀ ghà gha mə biri biri inug abə ìmə Mbaʼ atog inən.

²⁷ Ìmə Mbaʼ, məd ini kɔ̀ŋ awən imbə̀ʼ icheg ne mbə̀ kɔ̀ŋ aməd, bə̀ bḛ gha à ya məd cha amə.

²⁸ Mə ya nɔ̀ʼ abɔ̀ʼ ìmə Mbaʼ, bɔŋ yeʼe igun isəg. Mə ya anìŋ se nɔ̀ʼɔ̀ amə igun isəg ghò abɔ̀ʼ ìmə Mbaʼ. ”

²⁹ Mə̀mə̀nənùg məd ya si ghà ibo gha “Àghò we ghàmà amad anìŋ, ìwe ìngam dùwə̀ zḛ ina inga itog. Kayi ywìrè yi ìngam məgri we ne àghò we kə̀ ghàmà.

³⁰ Tè kə bàd amad anìŋ gha, àghò kyeri inug ijìm. Ane, chəyi bə̀ aton mɔ̀ʼɔ ne tì wə̀d mɔ̀ʼɔ biri anug ine. Anug azo̰ ghì tì bḛ gha kwàʼ tesiʼ, à ya Ŋwiye cha awe igun isəg.”

³¹ Yeso ya ywìtì gha, “À ya anìŋ mbə̀ kə bḛ!

³² Nyùmə̀ we yèʼe ne mbə̀ biri sàkà. Tesiʼ ya gha, nyùmə̀ we fə yeʼe. Wə̀d imɔʼ imɔʼ biri ghò ini inga achan. Mbə̰ biri waʼ amə tèzìʼì. Si ya gha, chəyi mə̀ biri yaʼi tèzìʼì imbə̀ʼ icheg ne ìmə Mbaʼ we yi tì inum.

³³ Mə fə ghà inug mbo̰ inən anìŋ ni ghì gha mbə̀ chughi ane àbɔrɔ̀bɔd icheg ne mbə̀ yaʼi ane anug amɔʼ tì inum. Mbə̰ biri zə̰ ngəʼ inga isəg gho̰. Si ya gha, mbə̀ nyimbi fìŋ imbə̀ʼ icheg ne, mə fə màʼ ibid chè isəg gho̰.”