Jn 14 - Ikan feg

Yeso ya inɔnjì ne ghò abə Mbaʼ məd

¹ Yeso ya ghà abə ìmbi mə̀mə̀nənùg gha, “Imbə̀ʼ mbə̰ sàŋa awən gha anug mɔ̀ʼɔ nàʼ ngəʼ inən. Mbə̀ nɔŋɔ ìwən ibḛfiŋ igun Ŋwiye. Mbə̀ bə nɔ̀ŋì ìwən ibḛfiŋ igun inum.

² Itog nəb nɔʼ inga nəb ìmə Mbaʼ. Àkə kayi ane, nji mə fə ghà inən. Mə ya aniŋ ghò angu ni chuʼri asiŋi inən.

³ Anyumə̀ ne mə̀ fə ghò chuʼri asiŋi inən, mə biri yeʼe ni niŋ awən, imbə̀ʼ mbə̀ yaʼi abɔ̀ʼ inum asiŋi ne mə̀ yaʼi angu.

⁴ Mbə kyèri awən inɔnjì we ne ghò ane asiŋi ze ne mə ghò angu.”

⁵ Tòmas ya biri abə Yeso gha, “Anɔŋisəg, Chəyi tì kyeri asiŋi ne àghò we ghò angu. Tì kə ghi si kyèri inɔnjì iye?”

⁶ Yeso ya ywìtì gha, “Mo ya inɔnjì. Mo ya tesiʼ. Wə̀d ne nàʼà ìtḛ̀ abə bəd ya mo. Chəyi tì wə̀d mɔ̀ʼɔ ghò abə ìmə Mbaʼ, ne chəyi wì che inum anjìm.

⁷ Mbə̰ mə̀ kyèri amə icheg chɔm, nji mbə̰ biri bə kyeri ìmə Mbaʼ. Ni ko tèchɔ̀ŋ se ghò imbìghè, mbə̰ kyèri aməd. Mbə̰ fə bə̀ bàd aməd.”

⁸ Filib ya ghà ibo gha, “Anɔŋisəg, chwi ìwe Mbaʼ ina. Anug ne te kə̀bə̀, à ya məyi àze.”

⁹ Yeso ya ywìtì gha, “Filib, chəyi àghò kiri kyeri amə, ane nyumə̀ gho̰ ne mə chughi tì inən anìŋ? Wə̀d ne bàd amə, fə bàd ìmə Mbaʼ. Àghò kə chè iye ghi gha, ‹Chwi ìwe Mbaʼ ina›?

¹⁰ Àkə chəyi àghò bḛ gha, mə yaʼ ane anug amɔʼ tì ìmə Mbaʼ, ìmə Mbaʼ bə̀ yaʼ ane anug amɔʼ tì inum? Ìngam we ne mə gha inən, à ya ìmə Mbaʼ we ne mə̀ yaʼi ane anug amɔʼ tì məd, nàʼi inum gha mə gha. Chəyi mə̀ ghàmà ane ìmə ighəm. À ya ìmə Mbaʼ we ne mə̀ yaʼi ane anug amɔʼ tì məd we fàʼà inug mbe ne wì kə̀bi.

¹¹ Mbə̀ bḛ anug ne mə̀ gha inən gha, mə yaʼ ane anug amɔʼ tì ìmə Mbaʼ, məd bə̀ yaʼ ane anug amɔʼ tì inum. Mbə̰ mə̀ to̰ awən ni bḛ anug ne mə̀ gha, mbə̀ bḛ məyi imbə̀ʼ iyeti inug ne mbə̀ bàri ne mə fàʼà.”

¹² Mə gha tesiʼ inən gha, “Wə̀d ne nɔŋi ibḛfiŋ igun inum, tengàŋ biri fàʼ inug mbe ne mə fàʼà. Tengàŋ biri fàʼ iyeti inug ne chè mbo̰ imbə̀ʼ icheg ne mə̀ ya anìŋ ghò abə ìmə Mbaʼ.

¹³ Mə biri fàʼ inug mbe ne mbə̀ biri biri ane ìmə ikum, ni ghì gha, bəd ghumni ìmə Mbaʼ anjìm Ŋwan.

¹⁴ Mbə̰ mə̀ bìri anug mɔ̀ʼɔ inga ìmə ikum, mə biri fàʼ anug ze inən.”

Yeso kàʼ gha Mbaʼ məd biri chà Azwighi Ŋwiye

¹⁵ Yeso ya chè imbìghè ni gha, “Mbə̰ mə̀ kɔ̀ŋ amə, mbə̰ biri zugri ìtum tikə.

¹⁶ Mə biri ghì gha, ìmə mbaʼ naʼa Àwètìbə̀d ndəŋ ne biri chughi tì inən ane ighə̀m imɔʼ.

¹⁷ Məd ya Azwighi Ŋwiye, wì biri ghì gha, bəd kyeri tesiʼ imbə̀ʼ Ŋwiye. Chəyi tì bəd igun isəg gho̰ niŋ aməd imbə̀ʼ icheg ne chəyi mbi kweʼì bàd aməd, kə̀ kyère aməd. Àsi awən, mbə biri kyeri aməd imbə̀ʼ icheg ne məd we abɔ̀ʼ inən. Məd we bə̀ inga inən.

¹⁸ Chəyi mə̀ biri sàŋì awən icheg bɔn iti, mə biri ywiri yeʼe bàd awən.

¹⁹ Àsi bùʼ məyi ikə nyumə̀ ne chəyi bəd igun isəg biri ywiri bàd amə. Si ya gha, mbə̰ biri bàd amə. Icheg ne mə̀ yaʼi izɔm, à ya bə̀ icheg ne mbə biri yaʼ izɔm.

²⁰ Aneg ze ghi mə̀ kòʼ, mbə biri kyeri gha mo yaʼ ane anug amɔʼ tì ìmə Mbaʼ. Mbə̰ biri bə kyeri gha mbə̰ mbe ane anug amɔʼ tì inum, mo inum bə̀ yaʼ ane anug amɔʼ tì inən.

²¹ Wə̀d ne zùghə ìtum tikə bə̀ nɔ̀ŋɔ̀, à ya wə̀d ne kɔ̀ŋi amə. Ìmə Mbaʼ biri kɔ̀ŋ wə̀d ne kɔŋi amə. Mo inum biri bə̀ kɔ̀ŋ tengàŋ bə̀ chwi ìmə nyɔd ibo.”

²² Judàs mɔ̀ʼɔ we ne kayi Judàs Ikarìyɔ̀d, ya ghà ibo gha, “Anɔŋisəg, àghò kə ghi chwi ìwe nyɔd ina iye, ne chəyi àghò chwi abə bəd igun isəg?”

²³ Yeso ya ywìtì gha, “Wə̀d mə kɔ̀ŋi amə, wi biri zugri ìtum tikə. Ìmə Mbaʼ biri kɔ̀ŋ aməd. Ìmə Mbaʼ tì inum, tì biri yeʼe chùghi tì məd.

²⁴ Wə̀d ne chəyi wì kɔ̀ŋ amə, chəyi tengàŋ biri zugri ìtum tikə. Inug mbo̰ ne mə ghà inən kayi mə ghàmà ane ìmə ighəm. À ya ìmə Mbaʼ we ne cha amə, gha mə gha.

²⁵ Mə fə ghà inug mbo̰ ijìm inən ne mə̀ kiri yaʼi tì inən.

²⁶ Si ya gha, ìmə Mbaʼ biri chà Àwètìbə̀d ane ìmə ikum. À ya wə̀d ne nàʼà tikə abə bəd. Məd ya Azwighi Ŋwiye. Wì biri chwi inug ijìm inən, bə̀ ghì mbə̰ ya wènde inug ijìm mbe ne mə gha inən.

²⁷ Mə nàʼ àbɔrɔ̀bɔd inən. À ya àmə àbɔrɔ̀bɔd ne mə naʼi inən. Chəyi mə̀ naʼi àbɔrɔ̀bɔd inən icheg ne bəd inga isəg mbe nàʼà. Imbə̀ʼ ìtən fìŋ naʼa yi ngəʼ inən. Imbə̀ʼ mbə̰ bə bɔ awən.

²⁸ Mbə zug icheg ne mə gha, ‹Mə biri zàmbi sàŋì awən, si ya gha, mə biri ywiri yeʼe bàd awən.› Mbə̰ mə̀ kɔ̀ŋ amə, nji mbə̰ biri ya gyènde gha mə ghò bàd ìmə Mbaʼ imbə̀ʼ icheg ne ìmə Mbaʼ chè amə.

²⁹ Mə fə ghà inug mbo̰ inən bɔŋ mbi se dùwə̀, ni ghì gha, anyumə̀ ne mbi du, mbə biri bḛ.

³⁰ Chəyi mə̀ biri ghàm tì inən ane agha ne sa imbə̀ʼ icheg ne wə̀d we ne sàʼa igun isəg gho̰, we yèʼe. Chəyi wì beri ika igun inum.

³¹ Si ya gha, bəd igun isəg beri ni kyeri gha mə kɔ̀ŋ ìmə Mbaʼ, bə̀ kyèri gha mə̀ ya fàʼà məyi anug ze ne wì gha mə fàʼa. Mbə̀ yeʼe tì ko ghò awa.”