Jn 12 - Ikan feg

Àyi mɔ̀ʼɔ zɔʼ Yeso ane məwud a Betanì

¹ Yeso ya pè a Betanì ne ineg ya si bùʼ tìfughə ni nàʼ abə aneg Iteri Chègun. Lazarɔ̀s we ne Yeso ya zwemne ane iwu yaya chùghə a angu.

² Bəd mɔ̀ʼɔ inga aben ze ya tighe ighijəg abə Yeso. À ya Màta yaya nàʼà ighijəg mbe abə bəd. Lazarɔ̀s ya wə̀d mɔ̀ʼɔ abɔ̀ʼ bəd mbe ne ya chughi aseg ghi jəg tì Yeso.

³ Icheg ne mbi yaya jə̀ghə, Mèri ya niŋ chəŋ məwud àka inun ne mbi ya tangi məyi ane nad, zɔʼ ighog ìmbi Yeso inga, bə̀ fug ane ìti nyɔ̀ŋì atog. Ifɔ məwud mbe ya dù, nàmì nəb ijìm.

⁴ Wì ya zɔʼ ane, Judàs Ikarìyɔ̀d ne ya wə̀d mɔ̀ʼɔ inga mə̀mə̀nənùg ìmbi Yeso, ne ya ghò fḛ Yeso, si gha,

⁵ “Aton ne chəyi mbi kə fḛ məwud mbe ane chuʼ ka aki atad, nàʼ ikab angu abə bəd ne chəyi àzɔb àkə gha?” Ikab we ya yaʼ icheg ikab àfàʼì wə̀d ane fituʼ fìbì.

⁶ Chəyi Judàs ya gha ane imbə̀ʼ icheg ne wì ya beri ikɔndi ni wètì bəd ne chəyi àzɔb. Wì ya gha ane imbə̀ʼ icheg ne, məd ya bì iji. À ya məd yaya nyimi àbàn ikab. Ane, wì yaya chìyè ikab inga ikab we, fàʼà ìmbi inug ane icheg ne wì kɔ̀ŋi.

⁷ Yeso ya ywìtì gha, “Imbə̀ʼ àghò naʼa awe ngəʼ abə àyi gho̰. Wì kə̀ nɔ̀ŋì məwud mbo̰ imbə̀ʼ mbi zɔʼɔ mə ane aneg ze ne mbi biri twəŋi mə.

⁸ Bəd mbe ne chəyi àzɔb biri yaʼ abɔ̀ʼ inən aghəm ajìm. Àsi mo, chəyi mə̀ biri yaʼ abɔ̀ʼ inən aghəm ajìm.”

⁹ Inɔ̰ bəd mə̀Ju kwàʼ ìwi kyen ya zug gha Yeso we a Betanì. Ane, mbi ya ghò angu, kayi məyi ni bàd Yeso. Mbi ya kə̀b ni bàd fɔrɔ Lazarɔ̀s we ne Yeso ya zweme ane iwu.

¹⁰ Ane, itog bəd mbàn Ŋwiye ya chuʼri icheg ne mbi biri bə zwete Lazarɔ̀s.

¹¹ Mbi ya chuʼri ni zweti Lazarɔ̀s imbə̀ʼ ayeti anug ne Yeso ya ghi ibo. Mbi yaya kə̀bə̀ ni zweti aməd ane imbə̀ʼ icheg ne, mə̀Ju yaya sàŋà awɔb se nɔ̀ŋɔ̀ ìwɔb ibḛfiŋ igun Yeso.

Yeso nyi a Jèrusalèm icheg ifɔn

¹² Aneg abɔ̀ʼ, inɔ̰ bəd ne ya yaʼi kwàʼ ìwi kyen ne ya ghò ni jəg Iteri Chègun, ya zug gha Yeso we yèʼe a Jèrusalèm.

¹³ Mbi yaya nìŋə izaŋ ighəb ghò ni bɔ̀mbì tì məd. Mbi yaya nè kyḛ gha, “Tè ghùmnə Ŋwiye! Ŋwiye ziye àbɔrɔ̀bɔd igun wə̀d we ne yèʼe ane ikum Anɔŋisəg! Ŋwiye ziye àbɔrɔ̀bɔd igun ifɔn mə̀Izre!”

¹⁴ Yeso ya niŋ ŋwan nyam Jàkas, kɔʼ igun, icheg ne mbi ya ŋwàʼri inga Àŋwàʼrì Ŋwiye gha,

¹⁵ “Bəd a Zayɔ̀n, imbə̀ʼ mbə̰ bɔ awən. Mbə̀ nḛ ìwən ifɔn we yèʼe. Wè kɔʼ igun ŋwan nyam Jàkas.”

¹⁶ Chəyi atog abə mə̀mə̀nənùg məd ya zḛ imbə̀ʼ anug azo̰ ane nyumə̀ we. Si ya gha, anyumə̀ ne Ŋwiye ya zwemne Yeso iwu, ghì bəd se ghùmnə aməd, mbi ya kə wèndi gha, Àŋwàʼrì Ŋwiye ya ghà inug mbe imbə̀ʼ Yeso, ane inug mbe bə̀ dù kwàʼ icheg ne mbi ya ŋwàʼri.

¹⁷ Inɔ̰ bəd we ne ya yaʼi tì məd anyumə̀ ne wì ya kàri Lazarɔ̀s inga iseg, zwemni aməd ane iwu, mbi ya chè imbìghè ni chètì anug ne ya du.

¹⁸ À ya imbə̀ʼ ayeti anug azo̰ ne mbi ya zughi gha Yeso ghì, ne inɔ̰ bəd we ya gho ni bɔ̀mbì tì məd.

¹⁹ Mə̀Farìsi ya se ghàmà mbɔb mbɔb gha, “Mbə̀ nḛ, tì ya anìŋ nìme. Bəd məjìm ya anìŋ se bène awɔb yaʼ abɔ̀ʼ məd!”

Bəd mɔ̀ʼɔ ne kayi mə̀Ju kə̀b ni bàd Yeso

²⁰ Bəd mɔ̀ʼɔ ne kayi mə̀Ju ya yaʼ abɔ̀ʼ bəd mbe ne ya gho a Jèrusalèm ni ghumni Ŋwiye ane nyùmə̀ we ne mbi yaya jə̀ghə Iteri Chègun.

²¹ Bəd mbe ya ghò abə Filib we ne ya nɔ̀ʼi a Bèsayidà inga Galìli, pè ghà ibo gha, “Masà, tì biri kɔ̀ŋ ni bàd Yeso.”

²² Filib ya niŋ anug ze ghò ghà abə Andrò. Ane, məd tì Andrò ya si ghò ghà abə Yeso.

²³ Yeso gha ywìtì gha, nyùmə̀ fə kòʼ ne Ŋwiye biri ghì gha mbe ghumni Ŋwan Wə̀d.

²⁴ Mə gha tesiʼ inən gha, “Fitam kyì mə chəyi fi nyi aseg ku, fi biri tḛ yi kwàʼ tèzìʼì. Fi mə̀ ku, fi ya gwère, kweg, ko titam nɔʼ nɔʼ.

²⁵ Wə̀d we ne ghə̀ʼrə̀ ìwi ìtḛ̀, tengàŋ biri nim ìtḛ̀ we. Àsi wə̀d ne chəyi we ghə̀ʼrə̀ ìwi ìtḛ̀ igun isəg aŋa, tengàŋ biri jəg ìtḛ̀ ighə̀m imɔʼ.

²⁶ Wə̀d mɔ̀ʼɔ mə̀ kə̀b ni fàʼ inum, wì bèrì ni beni abɔ̀ʼ inum. Asiŋi ne mə̀ yaʼi angu, à ya angu ne ìmbum bəd àfàʼì biri bə yaʼ. Ìmə Mbaʼ biri ghumni wə̀d ne fàʼà inum.”

Yeso ghàm anug imbə̀ʼ ìwi iwu

²⁷ Yeso ya ghàm ane, si nɔ̀ʼ gha, “Ìmə fìŋ ze nàʼà ngəʼ inum. Mə kə anìŋ, ghi gha? Tì mə gha, ‹Ìmə Mbaʼ, imbə̀ʼ àghò saŋa awe gha nyùmə̀ ghò yeʼe igun inum?› Indèʼ, mə̀ ya yeʼe igun isəg imbə̀ʼ nyùmə̀ gho̰.

²⁸ Ìmə Mbaʼ, ghìyə gha bəd ghumni awe!” Anyumə̀ ne wì ya ghàmi ane, gì mɔ̀ʼɔ ya ghàm ikaŋ gha, “Mə fə ghì gha bəd ghumni amə. Mə biri ywiri ghì ighəm ndəŋ.”

²⁹ Inɔ̰ bəd we ne ya yaʼi angu ya zug gì ze ne ya ghàmi. Mbi mɔ̀ʼɔ ya gha, “À ya mbə̀ŋ ze kùmə̀.” Mə̀mbin ya gha, “À ya angirə̀ ghàmi ibo.”

³⁰ Yeso ya gha, “Gì ìzo̰ ghàm anìŋ, imbə̀ʼ awən, kayi imbə̀ʼ amə.

³¹ Nyùmə̀ fə kòʼ ne Ŋwiye biri saʼ bəd igun isəg gho̰. Wì biri kamni wə̀d we ne sàʼa isəg gho̰, chì igun isəg.

³² Si ya gha, mbi fə mə nɔ̀ amə ikaŋ, mə biri ghì bəd məjìm yeʼe inum.”

³³ Wì ya ghà anug azo̰ ni chwi iku iwu ne wì biri ku.

³⁴ Inɔ̰ bəd we ne ya yaʼi angu ya gha, “A ze inga mə̀nɔ̀ʼɔ̀ Muse gha, wə̀d we ne Ŋwiye zɔ̀ʼi biri chughi izɔm ane ighə̀m imɔʼ. Àghò kə se gha mbi biri nɔ̰ Ŋwan Wə̀d ikaŋ iye? Ŋwan Wə̀d gho̰ ne àghò we ghà, àkə we?”

³⁵ Yeso ya si ghà inɔb gha, “Ìzḛzḛ we kiri biri abɔ̀ʼ inən ane iki nyumə̀. Mbə̀ che imbìghè ghi ghì inug ane isiŋi ya kiri zḛ, imbə̀ʼ afub nɔ̀ʼ kən awən. Chəyi wə̀d ne yḛ̀ inga afub we kyère asiŋi ne we ghò angu.

³⁶ Ane, mbə̀ zi fìŋ igun ìzḛzḛ we ane isiŋi ya kiri zḛ, imbə̀ʼ ni chughi inga ìzḛzḛ.” Anyumə̀ ne Yeso ya fə mànì ni ghàm, wì ya nɔ̀ʼ sàŋì inɔ̰̀ bəd we, ghò a asiŋi ne chəyi bəd ya kyeri gha məd we angu.

Chəyi mə̀Ju mbe ya bḛ Yeso

³⁷ Yeso ya jiʼì ghì iyeti inug, bəd bàd, si ya gha, mə̀Ju ya kiri to̰ awɔb ni nɔŋi ibḛfiŋ igun məd.

³⁸ Anug azo̰ ya du anìŋ ni ghì gha, ìngam wə̀dkə̀n Ŋwiye Àzayà, we duwə ane tesiʼ gha, “Anɔŋisəg, àkə we ne bḛ ikən we ne te ghà? Àkə abə we ne Anɔŋisəg chwi ìwi ika?”

³⁹ Chəyi tì mbi ya bḛ imbə̀ʼ icheg ne, Àzayà ya ghà ywiri ghà gha,

⁴⁰ “Ŋwiye fə fə̀ghì àzɔb aghə bə̀ ghì ìtɔb fìŋ tu, ni ghì gha chəyi tì mbi bàd isiŋi, chəyi tì mbi bə̀ kyèri anug chɔm. Ane, chəyi mbi biri bə̀ŋì ìtɔb fìŋ yèʼe inum ni ghì gha mə̀ ghuyə awɔb.”

⁴¹ Àzayà ya ghà anug azo̰ anìŋ imbə̀ʼ icheg ne, wì ya fə bàd icheg ne bəd biri ghumni Yeso. Ane, wì ya fə bə̀ ghàm imbə̀ʼ aməd.

⁴² Kwàʼ anyumə̀ we, itog bəd mə̀Ju ya nɔŋi ibḛfiŋ igun məd. Si ya gha, chəyi tì mbi ya bḛ asaŋ asaŋ imbə̀ʼ icheg ne, mbi yaya bɔ gha, mə̀Farìsi bìri kamni awɔb chì inga ichamì Ŋwiye.

⁴³ Itog bəd aben mə̀Ju ya kɔ̀ŋ gha bəd ghumni awɔb chè icheg ne Ŋwiye biri ghumni awɔb.

⁴⁴ Yeso ya ghàm kyen gha, “Wə̀d mə nɔŋi ibḛfiŋ igun inum, kayi məyi igun inum ne wì nɔ̀ŋì ìwi ibḛfiŋ. We fə bə̀ nɔ̀ŋì ibḛfiŋ igun wə̀d we ne cha amə.

⁴⁵ Wə̀d ne bàri amə, wè fə bə̀ bàd wə̀d we ne cha amə.

⁴⁶ Mə ya yèʼe igun isəg icheg ìzḛzḛ, ni ghì gha, imbə̀ʼ wə̀d ne nɔŋi ibḛfiŋ igun inum ywiri chughi yi izimi.

⁴⁷ Bəd mə̀ zug ìmə ikən chəyi mbi zugri ìwiwən chəyi mə̀ biri sàʼ awɔb. Chəyi mə̀ ya yèʼe ni sàʼ bəd igun isəg. Mə ya yeʼe ni pumni awɔb.

⁴⁸ Bəd mbe ne to̰ awɔb awum bə̀ to̰ awɔb anug ne mə̀ ghà, wə̀d ne biri saʼ awɔb we angu. À ya ìngam we ne mə gha, biri saʼ awɔb ane aneg ìnwḭ.

⁴⁹ Chəyi mə̀ ghàmà ane ìmə ighəm. Inug ijìm mbe ne mə ghà, à ya ìmə Mbaʼ we ne cha amə, gha inum gha mə gha. À ya məd bə chwìti icheg ni ghà angu inum.

⁵⁰ Mə kyèri gha, anug ze ne ìmə Mbaʼ we ghà, à ya anug ne nàʼà ìtḛ̀ ighə̀m imɔʼ. Ane, anug ze ne mə ghà, à ya anug ne ìmə Mbaʼ gha inum gha mə gha.”