Jn 10 - Ikan feg

Ngam məgri imbə̀ʼ àjənjə̀g

¹ Yeso ya ghà abə ìmbi mə̀mə̀nənùg gha, “Mə ghà kwàʼ tesiʼ inən gha, wə̀d ne chəyi wì nyi inga ikam njə̀g ane inuʼ ikam, ne wì kòʼi yaʼ ane inɔnjì ndəŋ ibəm ikam nyi inga ikam, tengàŋ ya kwàʼ iji ka.

² Wə̀d ne nyḭ̀yḛ inga ikam njə̀g ane inuʼ ikam, məd ya kwàʼ àjənjə̀g tesiʼ.

³ Wə̀d ne fàʼà inuʼ ikam, biri fìʼì inuʼ ikam ibo. Njə̀g məd ya zùghə gì məd, bène abɔ̀ʼ məd icheg ne wì ya kàrà awɔb imɔʼ imɔʼ ane ikum, nìŋə dùwə̀ isəg.

⁴ Anyumə̀ ne wì nìŋi ìti njə̀g tijìm dù isəg, wì ya yḛ̀ ghò imbìghè, ti bène abɔ̀ʼ məd, icheg ne ti fə kyeri gì məd.

⁵ Àsi wə̀d tìsɔ̀ʼ, chəyi tì njə̀g te beni abɔ̀ʼ məd. Ti biri bɔ, nòrò imbə̀ʼ icheg ne, chəyi ti kyeri gì məd ka.”

⁶ Yeso ya ghàm ìngam məgri gho̰ inɔb, si ya gha, chəyi ìmbɔb itog ya zḛ ane anug ne wì yaya ghà inɔb.

Yeso ya àjənjə̀g chɔ̀m

⁷ Yeso ya ywìrì ghà abə mə̀mə̀nənùg məd gha, “Mə ghà kwàʼ tesiʼ inən gha, mo ya kwàʼ inuʼ ikam njə̀g.

⁸ Bəd mbe ne ya bi yèʼe inum imbìghè ya kwàʼ məji ka məjìm. Chəyi njə̀g ya zugri awɔb.

⁹ Mo ya inuʼ ikam. Wə̀d we ne chè inga inum, wì biri pum. Wì biri ya nyḭ̀yḛ, bə̀ chè dùwə̀ ghò kə̀bə̀ agyen.

¹⁰ Iji ya yèʼe ni ji, kə̀ ni zweti, kə̀ ni nimni njə̀g. Mə yèʼe gha, mbə̀ jəg ìtḛ̀, ne ya kwàʼ ìtḛ̀ ne chəyi wi cheʼi aghi mɔ̀ʼɔ ka.”

¹¹ Yeso ya chè imbìghè ghà inɔb gha, “Mo ya àjənjə̀g chɔm. Àjənjə̀g chɔm ya bḛ ni ku imbə̀ʼ ìti njə̀g.

¹² Wə̀d we ne mbi niŋi aməd ane àfàʼì gha wì ya jə njə̀g, kayi məd beri njə̀g te. Wì mə bàd àfɔn ze yèʼe, wì ya nòrò yi, wàʼa njə̀g te. Àfɔn biri pè gwì njə̀g mɔ̀ʼɔ, ta ìtin sàkì.

¹³ Wə̀d we ne mbi niŋi aməd ane àfàʼì bèrì ni nòrò yi imbə̀ʼ icheg ne məd ya mbi niŋi niŋi. Ane, chəyi məd we zìyè atog ni kyèʼrì njə̀g.

¹⁴ Àsi mo, mo ya àjənjə̀g chɔm. Mə kyèri ìtum njə̀g. Ìtum njə̀g bə̀ kyèri amə.

¹⁵ Mə kyèri ìmə Mbaʼ, kwàʼ icheg ne wì bə kyèri amə. Mə fə bḛ ni ku imbə̀ʼ ìtum njə̀g.

¹⁶ Mə bèrì njə̀g ndəŋ ne chəyi awɔb inga inɔ̰ njə̀g gho̰. Mə mənyìʼ niŋ njə̀g te yèʼe abɔ̀ʼ ìto̰. Ti biri bə zug ìmə gì. Ane, njə̀g te tijìm biri si fɔ̀ti ane inɔ̰ imɔʼ bə̀ bèrì àjənjə̀g imɔʼ.

¹⁷ Aton ne ìmə mbaʼ we kɔ̀ŋɔ̀ amə ya gha, mə fə sɔ̀ŋ ìmə ìtḛ̀ ni ku imbə̀ʼ icheg ne mə̀ kyèri gha, Ŋwiye biri ywiri nàʼ ìtḛ̀ inum.

¹⁸ Chəyi tì wə̀d mɔ̀ʼɔ niŋ ìmə ìtḛ̀ ka. À ya mo kɔ̀ŋi ni ku. Mo bèrì ika ni ku bə̀ bèrì ika ni ywiri yaʼ izɔm. Aŋa ya àfàʼì ne ìmə Mbaʼ fə zì inga ìtum tikye ibo.”

¹⁹ Àghàpì ya nyi inga mə̀Ju mbe ne ya zughi inug mbe ne Yeso yaya ghà.

²⁰ Bəd nɔʼ nɔʼ ya ko se gha, “Azwighi tibɔ̀ŋ ze inga məd. Wì ya anìŋ, wì fə be. Àkə aghə ne mbə̰ mbe zùghə ibo?”

²¹ Mbi mɔ̀ʼɔ ya ghà àzɔb gha, “Chəyi tì wə̀d ne beri azwighi tibɔ̀ŋ ghàm iku ìngam gho̰. Tì azwighi tibɔ̀ŋ ghi məfəg bàd isiŋi?”

Mə̀Ju to̰ awɔb Yeso

²² Nyùmə̀ iteri we ne mə̀Ju mbe wènde icheg ne mbi ya ywìrì fìʼì mbàn Ŋwiye a Jèrusalèm ya kòʼ. À ya yaʼ inga nyùmə̀ ifə ka.

²³ Ane, Yeso yaya yèndè yi inga mbàn Ŋwiye inga asiŋi ze ne mbe kàrà ane məkə̀tə̀ Solomùn.

²⁴ Mə̀Ju ya kad məd chuʼ, se bìre ibo gha, “Aton ne àghò we kiri saŋa awa gha tì ya jə̀mə̀ wə̀d ne àghò yaʼi ìwiwən àkə gha? Àghò mə yaʼ Wə̀d we ne Ŋwiye zɔ̀ʼi, fə gha ina asaŋ asaŋ.”

²⁵ Yeso ya ywìtì gha, “Mə ya fə gha inən, si ya gha, chəyi mbə̀ bḛ. Iyeti inug mbe ne mə fàʼà ane ikum ìmə Mbaʼ mbe ghìyə̀ bəd kyere wə̀d we ne mə̀ yaʼi ìwiwən.

²⁶ Chəyi mbə̀ bḛ imbə̀ʼ icheg ne, mbə̰ kayi ìtum njə̀g.

²⁷ Ìtum njə̀g ya zùghə anug ne mə̀ ghà. Mə kyèri ìtum njə̀g. Ti ya bène abɔ̀ʼ inum.

²⁸ Mə ya nàʼà ìtḛ̀ ighə̀m imɔʼ inɔb. Chəyi mbɔb biri nɔ̀ʼ ku nim. Chəyi tì wə̀d mɔ̀ʼɔ chì awɔb inga ìtum tikye abo.

²⁹ Ìmə Mbaʼ we ne nàʼi njə̀g te inum, we chè wə̀d ijìm. Chəyi wə̀d mɔ̀ʼɔ angu ne tì wì bən njə̀g te abə ìmə Mbaʼ.

³⁰ Mo tì ìmə Mbaʼ ya ane anug amɔʼ.”

³¹ Mə̀Ju ya ywìrì gwe ateg ni tumbi məd.

³² Yeso ya ghà inɔb gha, “Mə fə fàʼ iyeti inug nɔʼ nɔʼ ne ìmə Mbaʼ nàʼi ika gha mə fàʼa inən. Àkə ayeti anug azeg inga inug nɔʼ nɔʼ mbo̰ ne mbə̰ mbe kə̀bə̀ ni tumbi mə imbə̀ʼ àzewən?”

³³ Mə̀Ju mbe ya ywìtì ibo gha, “Kayi imbə̀ʼ ayeti inug mɔ̀ʼɔ ne àghò ghi ne te kə̀bə̀ ni tumbi awe. Tì ya kə̀bə̀ ni tumbi awe gha àghò we zɔ̀mbɔ̀ Ŋwiye. Kwàʼ wə̀d-aku icheg ine, àghò we gha, àghò ya Ŋwiye.”

³⁴ Yeso ya ywìtì inɔb gha, “Àkə chəyi mbi ŋwaʼri inga ìmbən mə̀nɔ̀ʼɔ̀ gha, ‹Ŋwiye fə gha, mbə̰ ya mə̀ŋwiye›?

³⁵ Tè kyèri gha, anug ne Àŋwàʼrì Ŋwiye gha, à ya tesiʼ ne chəyi tì wə̀d chɔ̀ʼri. Ane, Ŋwiye ya kàrì bəd mbe ne ya zugri ìngam məd ane mə̀ŋwiye.

³⁶ Àsi mo, ìmə Mbaʼ ya zɔʼ amə chà igun isəg. Mbə̀ kə si chè iye se gha, mə zɔ̀mbɔ̀ Ŋwiye icheg ne mə gha, ‹Mo ya Ŋwan Ŋwiye›?

³⁷ Àmə yaʼ ne chəyi mə̀ fàʼà inug mbe ne ìmə Mbaʼ kə̀bi gha mə fàʼa, imbə̀ʼ mbə̰ nɔŋɔ awən ibḛfiŋ igun inum.

³⁸ Mo mə̀ ya fàʼà inug mbe. Ka chəyi mbə̀ jiʼì kə̀b ni bḛ amə, mbə̀ bḛ yaʼ inug mbe ne mə ghìyə̀. Àze biri ghì mbə kyeri gha ìmə Mbaʼ we ane anug amɔʼ tì inum. Mo inum we bə̀ ane anug amɔʼ tì məd.”

³⁹ Mbi ya ywìrì kə̀b ni gwì aməd. Si ya gha, wi ya nyaʼ, bu yi inɔb ikye abo.

⁴⁰ Yeso ya ghì ane, ywìrì bàni ghò injḭ igyi Jodàn, asiŋi ze ne Jɔn yaya nàʼà mənib abə bəd. Wì ya pè chùghi angu.

⁴¹ Bəd nɔʼ nɔʼ ya ghò bàd aməd. Mbi yaya ghàmà mbɔb mbɔb gha, “Ka chəyi Jɔn we ne yaya nàʼà mənib ya fàʼi ayeti anug, inug mbe ne wì yaya ghàmà imbə̀ʼ wə̀d gho̰ ya kwàʼ tesiʼ.”

⁴² Bəd nɔʼ nɔʼ inga asiŋi ze ya nɔ̀ŋì ibḛfiŋ igun Yeso.