Jn 1 - Ikan feg

Kristo ya Ìngam we ne ghìyə̀ bəd jəghə ìtḛ̀

¹ Bɔŋ Ŋwiye ya ko ni tangi isəg, wə̀d we ne ya Ìngam ya fə se yi angu. Ìngam we ya yaʼ tì Ŋwiye. Ìngam we ya bə̀ Ŋwiye.

² Məd ya yaʼ yi tì Ŋwiye bɔŋ Ŋwiye ya ko ni tangi isəg.

³ Ŋwiye ya chè anjìm məd ni tangi ighi ijìm. Chəyi Ŋwiye ya tangi aghi mɔ̀ʼɔ amɔʼ witì chè anjìm məd bɔŋ tangi.

⁴ À ya Ìngam we we nàʼà ìtḛ̀ abə bəd məjìm. Ane, ìtḛ̀ məd ya nàʼà ìzḛzḛ abə bəd məjìm ni kyeri tesiʼ.

⁵ Ìzḛzḛ we we zùʼə kyèʼè isiŋi abə bəd mbe ne yaʼi inga afub. Chəyi tì afub nimni ìzḛzḛ we ka.

⁶ Ŋwiye ya tɔm wə̀d mɔ̀ʼɔ ne ikum məd ya Jɔn.

⁷ Jɔn gho̰ ya yèʼe ni ghàm abə bəd imbə̀ʼ ìzḛzḛ we. Wì ya ghàm ane ni ghì gha bəd mbe tì mbi kyeri ìzḛzḛ we bə̀ nɔ̀ŋì ibḛfiŋ igun.

⁸ Jɔn gho̰ ya kayi ìzḛzḛ we. Wì ya yeʼe àzi yaʼ ni ghàm inug abə bəd imbə̀ʼ ìzḛzḛ we.

⁹ Ìzḛzḛ gho̰ ya kwàʼ ìzḛzḛ tesiʼ ne yeʼe igun isəg. Wì ya zùʼə abə bəd məjìm.

¹⁰ Məd ya yaʼ inga isəg gho̰ ne Ŋwiye ya che anjìm məd tàngi. Si ya gha, chəyi bəd ya kyeri wə̀d ne məd yaʼi ìwiwən.

¹¹ Wì ya yèʼe pè ghò inga aben məd. Si ya gha, chəyi bəd məd ya niŋi aməd.

¹² Àsi bəd məjìm mbe ne ya niŋi aməd bə̀ nɔ̀ŋì ìwɔb ibḛfiŋ igun məd, wì ya nàʼ ati inɔb gha mbe si yaʼ bɔn Ŋwiye.

¹³ Chəyi mbi yaʼi bɔn Ŋwiye icheg we ne wə̀d-aku we gwìye ŋwan, kə̀ icheg we ne wə̀d-aku we chùʼrə, kə̀ icheg ne we kə̀bə̀. À ya kwàʼ məd Ŋwiye nàʼi ati inɔb gha mbe yaʼ ìmbi bɔn.

¹⁴ Ìngam we ya bə̀ŋə̀ kwàʼ ane wə̀d-aku chughi abɔ̀ʼ ina. Tè bàd icheg ne wì kɔ̀ŋi awa fɔrɔ icheg ne wì chwi tesiʼ imbə̀ʼ Ŋwiye ina. Tè bə̀ bàd ighumni ne wì bèri. À ya ighumni ne Mbaʼ nàʼi abə ìwi ŋwan ne ya məyi iwe imɔʼ.

¹⁵ Jɔn gho̰ ne yaya nàʼà mənib ya ghà inug imbə̀ʼ aməd abə bəd anyumə̀ ne wì yaya ghàmà ane gì ka ka gha, “Aŋa ya wə̀d we ne mə̀ yaya ghàmà imbə̀ʼ aməd gha, ‹Wə̀d mɔ̀ʼɔ we yèʼe inum anjìm ne chè amə. Wì ya fə yaʼ yi angu, bɔŋ mbi ya se gwìye amə.›”

¹⁶ Ìchɔ̀mì məd sweg mànì. Wè ghì gha tì ya jəghə ìchɔ̀mì we mà nyumə̀ ijìm. Məd we bə̀ zìye àbɔrɔ̀bɔd igun ina mà nyumə̀ ijìm anjìm fìŋ chɔm məd ne wì beri igun ina.

¹⁷ Ŋwiye ya chè anjìm Muse nàʼ mə̀nɔ̀ʼɔ̀. Ìchɔ̀mì fɔrɔ tesiʼ si yèʼe anjìm Yeso Kristo.

¹⁸ Chəyi wə̀d mɔ̀ʼɔ ne kweʼì bàd Ŋwiye. À ya məyi Ŋwan we imɔʼ ne yaʼi iban Mbaʼ ne ghi gha bəd kyeri wə̀d ne Ŋwiye yaʼi ìwiwən.

Anug ne Jɔn we ne yaya nàʼà mənib ya gha.

¹⁹ Aneg mɔ̀ʼɔ, itog bəd mə̀Ju ne ya nɔ̀ʼi a Jèrusalèm ya chà bəd mbàn Ŋwiye tì bəd mɔ̀ʼɔ inga inəbi Levì gha mbe gho bìri abə Jɔn gha, “Àghò kə we?”

²⁰ Anyumə̀ ne mbi ya gho pè bìri, chəyi Jɔn ya to̰ ni ywìtì. Wì ya ghà asaŋ asaŋ gha, “Mo kayi Wə̀d we ne Ŋwiye zɔ̀ʼi.”

²¹ Mbi ya si ywìrì bìri ibo gha, “Ane, àghò kə se we? Àghò kə Èlayijà?” Wì ya ywìrì ywìtì gha, “Indèʼ! Mo kayi Èlayijà.” Mbi ya ywìrì bìri ibo gha, “Àghò kə wə̀dkə̀n we ne Ŋwiye ya kàʼi ni chà?” Wì ya bə̀ gha, “Indèʼ!”

²² Mbi ya si ywìrì bìri ibo gha, “Àghò kə se we? Anug ne àghò beri ni ghà imbə̀ʼ ìwe nyɔd àkə gha? Àghò mənyìʼ nàʼ iywitichùg ina ni gha tì niŋ ghò mə̀tì abə bəd mbe ne cha awa.”

²³ Wì ya ghà inɔb gha, “Mo ya wə̀d we ne wə̀dkə̀n Ŋwiye Àzayà ya ŋwàʼri imbə̀ʼ aməd gha, ‹Mo ya wə̀d mɔ̀ʼɔ ne kyḛ inga ibad zɔbi gha, mbə̀ sembe inɔnjì abə Anɔŋisəg.›”

²⁴ Wì ya ywìtì ane, bəd mɔ̀ʼɔ ya bə̀ yaʼ angu ne mə̀Farìsi ya bə tɔm awɔb abə Jɔn.

²⁵ Mbi ya bə̀ si bìri ibo gha, “Àghò mə kayi Wə̀d we ne Ŋwiye zɔ̀ʼi, kə Èlayijà, kə Wə̀dkə̀n we ne Ŋwiye ya kàʼi, aton ne àghò we se nàʼà mənib abə bəd àkə gha?”

²⁶ Jɔn ya ywìtì inɔb gha, “Mə ya nàʼà mənib abə bəd. Si ya gha, wə̀d mɔ̀ʼɔ fə se yi abɔ̀ʼ inən, inga inɔ̰ bəd gho̰, ne chəyi mbə̀ kyeri.

²⁷ Məd ya wə̀d ne yèʼe inum anjìm. Si ya gha, chəyi mə̀ koʼi ane wə̀d ne tì mə zà iniʼ atami məd.”

²⁸ Mbi ya biri inug mbo̰ anìŋ abə Jɔn a Betanì, injḭ igyi Jodàn, asiŋi ne Jɔn yaya nàʼà mənib abə bəd.

Yeso ya Ŋwan njə̀g Ŋwiye

²⁹ Igun aneg abɔ̀ʼ, Jɔn ya bàra Yeso ne we yèʼe ibo imbìghè. Wì ghà abə bəd gha, “Mbə̀ nḛ! Aŋa ya Ŋwan njə̀g Ŋwiye. Məd ya wə̀d we ne wàʼa inug tibɔ̀ŋ bəd.

³⁰ Məd ya wə̀d we ne mə̀ yaya ghàmà imbə̀ʼ aməd gha, ‹Wə̀d mɔ̀ʼɔ we yèʼe inum anjìm ne che amə imbə̀ʼ icheg ne wì ya yaʼ yi angu bɔŋ mbi ya se gwìye amə.›

³¹ Mə yaya ghàmà ane ne chəyi mo inum bi kyèri gha məd ya Wə̀d we ne Ŋwiye ya kàʼi ni chà. Aton ne mə̀ yeʼe se nàʼà mənib ya ni ghì gha mə̀Izre kyeri aməd.”

³² Jɔn ya ghà anug ne wì ya bàri imbə̀ʼ aməd gha, “Mə ya bàd Azwighi Ŋwiye ne ze ya swiʼi ikaŋ àbɔ̀ŋɔ icheg bupə pè nàŋa igun məd.

³³ Chəyi mo inum ya bi kyèri gha məd ya Wə̀d we ne Ŋwiye ya kàʼi ni chà. Si ya gha, anyumə̀ ne Ŋwiye ya tɔmi amə gha mə̀ yeʼe se nàʼà mənib abə bəd, wì ya ghà inum gha, ‹Wə̀d we ne àghò biri bàd Azwighi ze swiʼi ikaŋ àbɔ̀ŋɔ nàŋa igun məd, kyeri gha à ya wə̀d we ne biri nàʼ Azwighi Ŋwiye abə bəd›.

³⁴ Mə fə bàd. Mə ya anìŋ fə bə̀ ghà inən gha, Aŋa ya kwàʼ Ŋwan Ŋwiye.”

Mə̀mə̀nənùg mbègtog ìmbi Yeso

³⁵ Igun aneg abɔ̀ʼ, Jɔn ya ywìrì təm angu tì ìmbi mə̀mə̀nənùg məbe.

³⁶ Anyumə̀ ne Yeso yaya chè, Jɔn ya nèn aməd, si ywìrì ghà inɔb gha, “Mbə̀ nḛ! À ya Ŋwan njə̀g Ŋwiye ywḭyḛ̀.”

³⁷ Anyumə̀ ne mə̀mə̀nənùg ìmbi Jɔn mbe məbe ya zughi ane, mbi ya si bèni abɔ̀ʼ Yeso.

³⁸ Yeso ya ghabri bàd icheg ne mbe bène ibo anjìm. Wì si bìri inɔb gha, “Mbə kə kə̀bə̀ aghə inum anjìm?” Mbi ya ywìtì gha, “Àchwitìnùg, tì ya kə̀bə̀ ni kyeri asiŋi ne àghò ya chùghə.”

³⁹ Wì ya ywìtì gha, “Àmə yaʼ ane, mbə̀ yeʼe bàd.” À ya yaʼ icheg ane mə̀nyùmə̀ məkwè tisi ne mə̀mə̀nənùg mbe ya beni abɔ̀ʼ Yeso ghò a asiŋi ne wì yaya chùghə. Mbɔb ya chughi tì məd anene aneg ze chè.

⁴⁰ Andrò ne ya ifi Sayimùn Pità, ya wə̀d mɔ̀ʼɔ abɔ̀ʼ bəd mbe ne ya zughi anug ne Jɔn ya gha, si bèni abɔ̀ʼ Yeso.

⁴¹ Icheg ne Andrò ya bàra Yeso, wì ya bə̀ndì ghò kwàʼ ati ghò kə̀b Sayimùn ne yaʼi ifi məd, ghà ibo gha, “Tè bàd Wə̀d we ne Ŋwiye zɔ̀ʼi.”

⁴² Ane, Andrò ya niŋ aməd ghò abə Yeso. Yeso ya nèn Sayimùn, si ghà ibo gha, “Ìwe ikum ya Sayimùn, ŋwan Jɔn, si ya gha, mbi biri se kàrà awe ane Sefàs.”

Yeso kàrì Filib tì Nàtanìyè

⁴³ Igun aneg abɔ̀ʼ, Yeso ya fə nɔ̀ŋì inga fìŋ ni ghò a Galìli. Wì ya kɔtɔ Filib, ghà ibo gha, “Yeʼe abɔ̀ʼ inum.”

⁴⁴ Filib ya bə̀ wə̀d a Bèsayidà icheg Andrò tì Pità.

⁴⁵ Filib ya nɔ̀ʼ ghò bàd wə̀d mɔ̀ʼɔ ne ikum məd ya Nàtanìyè, ghà ibo gha, “Tè bàd wə̀d we ne Muse ya ŋwàʼri inug imbə̀ʼ aməd inga mə̀nɔ̀ʼɔ̀, ne bədkə̀n Ŋwiye ya bə̀ ŋwàʼrì inug imbə̀ʼ aməd. Ikum məd ya Yeso. À ya ŋwan Jòseb we a Nazarèd.”

⁴⁶ Nàtanìyè ya biri gha, “A Nazarèd! Tì aghi chɔm mɔ̀ʼɔ dù inga Nazarèd?” Filib ya ywìtì gha, “Àghò yeʼe bàd.”

⁴⁷ Mbi ya nɔ̀ʼ ghò. Kwàʼ icheg ne Yeso ya bàri Nàtanìyè we yèʼe abɔ̀ʼ məd, wì ya ghà imbə̀ʼ aməd gha, “Aŋa ya kwàʼ wə̀d Izre tesiʼ. À ya wə̀d ne chəyi we fùbrə̀ inug.”

⁴⁸ Nàtanìyè ya biri abə Yeso gha, “Àghò kə che iye kyèri amə?” Yeso ya ywìtì gha, “Kyeri gha, mə kə bàd we ìtḭ azed fig bɔŋ Filib se kàrà awe.”

⁴⁹ Nàtanìyè ya kyen gha, “Àchwitìnùg! Àghò ya Ŋwan Ŋwiye! Àghò ya ifɔn mə̀Izre!”

⁵⁰ Yeso ya biri ibo gha, “Àghò kə bḛ anug azo̰ məyi imbə̀ʼ icheg ne mə̀ gha ine gha, mə kə bàd awe ìtḭ azed fig? Àghò biri bàd iyeti inug ne che azo̰.”

⁵¹ Yeso ya si gha, “Mə gha tesiʼ inən gha, mbə biri bàd icheg ne ikaŋ àbɔ̀ŋɔ biri fìʼè igun Ŋwan Wə̀d, bə̀ bàd icheg ne mbè angirə̀ Ŋwiye mbe chè kɔ̀ʼɔ chè swìʼe.”