Ɨnû 9 - Ikan feg

¹ Angirə̀ we ne pè ane ità̰ ya fə ìzi tì tàŋ. Mə ya bàd fitəm-məg ne fi fḛ igun isəg. Mbi ya nàʼ afiʼì ane ibighi kyen we ne chəyi ìnwḭ abə fitəm-məg fe.

² Anyumə̀ ne fitəm-məg fe ya fìʼì ibighi kyen we ne chəyi ìnwḭ, ndiʼ ya dù inga kwàʼ icheg ndiʼ ne dùwə̀ inga iywid kyen we ne mbe tɔ̰ itə̰. Ndiʼ ya dù inga ibighi kyen we kə̰ achwi fɔrɔ isiŋi ijìm ikaŋ àbɔ̀ŋɔ, isiŋi si fin.

³ Ngwèmi ya dù inga ndiʼ ze swìʼi igun isəg. Mbi ya nàʼ ika abə ngwèmi te icheg ika mbi tìkafoʼ.

⁴ Mbi ya ghà inɔb gha imbə̀ʼ mbi chìkə awɔb agyen igun isəg kə̀ ized kə̀ iku ighi zu ndəŋ ijìm. Mbɔb ya bèrì ni zì inə̰ məyi igun bəd mbe ne chəyi mbi beri aneni Ŋwiye inɔb igun ikəŋi isi.

⁵ Chəyi ngwèmi te ya beri ni zweti bəd mbo̰. Ti ya bèrì ni chə awɔb ane aməg ata̰. Ngəʼ ne bəd ya chè inga ya tɔ kwàʼ icheg we ne tìkafoʼ ze nɔ̀mɔ wə̀d ze tɔ.

⁶ Ane nyùmə̀ aməg ata̰ ze, bəd biri kə̀b ni ku, si ya gha, chəyi iwu biri yeʼe. Mbi biri kɔ̀ŋ gha nji iwu niŋ awɔb, si ya gha, iwu biri noro yi ane inɔb.

⁷ Ngwèmi te ya yaʼ kwàʼ icheg nyam mə̀kara ne mbi chuʼri ni ghò ane ibid. Iku ighi mɔ̀ʼɔ ne mbi zi igun ìmbɔb itog ya yaʼ icheg ighi atog ifɔn ne mbi tangi ane gol. Ìtɔb tìfe ya yaʼ icheg tìfe bəd.

⁸ Ìtɔb nyɔ̀ŋì atog ya yaʼ kwàʼ icheg nyɔ̀ŋì atog àyi. Àzɔb asɔŋ ya yaʼ kwàʼ icheg àzi àfɔn.

⁹ Mbɔb ya kəndi ìwɔb igo ane ighi mɔ̀ʼɔ ne ya yaʼi kwàʼ icheg itə̰-igo. Ìtɔb tibabì yaya ghàmà kwàʼ icheg aziŋ mbi mətwə̀ ne nyam mə̀kara te sìmè nòtò ghò inab ibid.

¹⁰ Mbɔb ya bèrì tikun ne beri ifin icheg te ne mbi tìkafoʼ mbe te wə̀d inga. Ane, ìtɔb tikun ya nàʼ ika inɔb ni chə bəd ane aməg ata̰.

¹¹ Angirə̀ we ne ya yaʼi ìwɔb ifɔn ne sàʼa awɔb ya we ne yaya nḛ̀ ibighi kyen we ne chəyi ìnwḭ. Ikum we angirə̀ we inga ìngam Hibrù ya Abadòn; àsi ane ìngam bəd ne kayi mə̀Ju ya Àpolìyòn. Àpolìyòn ya ni gha, “Wə̀d ne chìkə̀”

¹² Ngəʼ kyen mbègtog fə chè. Ngəʼ kyen kyen ndəŋ tibe te kiri yeʼe.

¹³ Angirə̀ we ne pè ane tìfughə ya fə ìzi tì tàŋ. Ane, mə̀ ya zug gì mɔ̀ʼɔ ne ya du inga ndɔŋ te tikwè ne yaʼi ane ikwijə̀ŋ àfàtì we ne mbi bɔmi ane gol. Ikwijə̀ŋ àfàtì we ya yaʼ imbìghè abə Ŋwiye.

¹⁴ Gì ze ya ghà abə angirə̀ we ne beri tàŋ gha, “Àghò seri mbè angirə̀ mbe məkwè ne mbi kɔri awɔb nɔ̀ŋì inga igyi kyen we ne mbe kàrà ane Ufrèts, sàŋì.”

¹⁵ Angirə̀ we ya seri mbè angirə̀ mbe məkwè sàŋì. Ŋwiye ya fə chuʼri mbè angirə̀ mbe nɔ̀ŋì gha, inga nyùmə̀ gho̰, bə̀ kwàʼ inga aneg azo̰, bə̀ kwàʼ inga iməg gho̰, fɔrɔ inga fituʼ fo̰, mbe zweti aba afibì inga iba itad ane bəd igun isəg.

¹⁶ Mə ya zug inun mə̀sogyì ne yaya yḛ̀ igun nyam mə̀kara. Mə̀sogyì mbe ya yaʼ akam aki abe.

¹⁷ Mə ya bàd nyam mə̀kara bə̀ bàd mə̀sogyì mbe ne kɔʼi igun inga àmə anatì njə̀m. Mbi ya zì itə̰-igo ne bàŋà icheg inemi iywid, bə̀ fḭ̀yḛ afubri afubri icheg inemi iywid firi, bə̀ bàŋà icheg məwud ghɔ. Itog abə nyam mə̀kara te ya yaʼ icheg itog ìfɔn. Iywid tì ndiʼ fɔrɔ sɔfɔ̀ yaya dùwə̀ inɔb inga ichug.

¹⁸ Ngəʼ ka ka ìto̰ titad ya zweti aba bəd afibì inga iba itad ane bəd igun isəg. Ngəʼ ka ka ìto̰ ya yaʼ iywid tì ndiʼ fɔrɔ sɔfɔ̀ ne yaya dùwə̀ ichug abə nyam mə̀kara te.

¹⁹ Ika nyam mə̀kara te ya yaʼ inɔb inga ichug fɔrɔ inɔb ane tikɔn. Ìtɔb tikɔn ya yaʼ icheg jo ne beri itog. Nyam mə̀kara te yaya cho bəd, zìyè inə̰ ane tikɔn te.

²⁰ Àbùʼì bəd ze ne chəyi ngəʼ ka ka te ya zweti awɔb, ya kiri to̰ awɔb ni bə̀ŋì ìtɔb fìŋ chì ane ighi mbe ne mbi tangi ane ibo. Chəyi mbi ya to̰ anug ni ghumni izwighi tibɔ̀ŋ kə̀ mə̀ŋwiye ne mbi tangi ane gol, kə̀ sibà, kə̀ brons, kə̀ ane ateg kə̀ ane ized. Chəyi tì mə̀ŋwiye mbo̰ ijìm bàd isiŋi, kə̀ zug inug, kə̀ bə̀ yèn.

²¹ Chəyi mbi ya bə̀ŋi fìŋ chì ane anug ne zweti bəd, tì ane anug ne ghì tikaŋi, tì ane anug ni nɔ̀kì mə̀yi kə̀ nɔ̀kì mbaŋà abu abu fɔrɔ ane anug iji.