Ɨnû 8 - Ikan feg

Anug imbə̀ʼ afeni ìnen ne pè ane ìsàmbe

¹ Anyumə̀ ne Ŋwan njə̀g ya fìʼì afeni ìnen ne pè ane ìsàmbe, isiŋi ya nyi zù tizi ikaŋ àbɔ̀ŋɔ chùghi icheg aba awà fìbì.

² Ane, mə̀ ya bàd mbè angirə̀ mbe ìsàmbe ne tə̀mə imbìghè abə Ŋwiye. Mbi ya nàʼ tàŋ ìsàmbe inɔb.

³ Angirə̀ ndəŋ ya yeʼe pè təm ane ikwijə̀ŋ àfàtì tì akaŋ ìnen mɔ̀ʼɔ ne mbi tangi ane gol. Mbi ya nàʼ ìnen nɔʼ nɔʼ ibo gha wì fɔti abɔ̀ʼ tichaʼri Ŋwiye te ne bəd Ŋwiye məjìm naʼi, si tòn igun ikwijə̀ŋ àfàtì we ne mbi tangi ane gol. Ikwijə̀ŋ àfàtì we ya yaʼ imbìghè abə atən ifɔn ze.

⁴ Ndiʼ ane ìnen we ne mbi ya tɔ̰ fɔrɔ tichaʼri Ŋwiye te ne bəd Ŋwiye ya nàʼi ya se dùwə̀ ikye abo abə angirə̀ we se kɔ̀ʼɔ ghò abə Ŋwiye.

⁵ Angirə̀ we ya si chì iywid inga ikwijə̀ŋ àfàtì zì inga akaŋ ìnen ze si màʼ igun isəg. Ane, mbə̀ŋ ya kùm, àŋwàŋwaŋ ŋwàŋ, ìseg chìʼrè kwàʼ ane ika.

Anug imbə̀ʼ taŋ ìsàmbe

⁶ Mbè angirə̀ mbe ìsàmbe ne ya nyimi tàŋ te ìsàmbe ya chuʼri nyɔd ni fə tàŋ te ìsàmbe.

⁷ Angirə̀ mbègtog ya fə ìzi tì tàŋ. Ane, awḛ fɔrɔ iywid ne ya nyàmba tì anəm ya kwebe igun isəg. Aba isəg amɔʼ inga iba itad ya bere. Aba amɔʼ inga iba itad ane ized igun isəg fɔrɔ agyen zu ya bə̀ bère.

⁸ Angirə̀ ne ya beni abɔ̀ʼ ya fə ìzi tì tàŋ. Ane, ìkə̀mi iywid mɔ̀ʼɔ ne yaya bère icheg iwum ya sɔbɔ tùwə̀ inga igyi tìbà. Aba igyi tìbà amɔʼ inga iba itad ya bə̀ŋə̀ se anəm.

⁹ Aba amɔʼ inga iba itad ane ighi izɔm ne yaʼi inga igyi ya ku. Mbi ya chìkì aba amɔʼ inga iba itad ane ibaŋ igyi.

¹⁰ Angirə̀ we ne pè ane itad ya fə ìzi tì tàŋ. Ane, fitəm-məg kyen kyen mɔ̀ʼɔ ne yaya bère ikaŋ àbɔ̀ŋɔ icheg anam ya fen igun aba amɔʼ inga iba itad ane tigyi kyen fɔrɔ ìdùrì.

¹¹ Ikum fitəm-məg fe ya Ànwḭ̀. Aba igyi amɔʼ inga iba itad ya bə̀ŋə̀ se nwḭ̀ nwḭ. Bəd nɔʼ nɔʼ ne ya no mənib nwḭ nwḭ mbe ya ku.

¹² Angirə̀ ne pè ane ikwè ya fə ìzi tì tàŋ, aba nyùmə̀ amɔʼ inga iba itad tì aba iməg amɔʼ inga iba itad fɔrɔ aba amɔʼ inga iba itad ane titəm iməg ya bə̀ŋə̀ se fḭ fḭ. Aba aneg amɔʼ inga iba itad tì aba izimi amɔʼ inga iba itad ya chughi afub.

¹³ Ane, mə̀ ya nɔ̀ atog bàd fìnən kyen mɔ̀ʼɔ icheg izam ne yaya bàrà ibə̀m ikaŋ nè dèghè kwàʼ ane gì ka ka gha, “Wo ngəʼə! Wo ngəʼə! Wo ngəʼ kyen ne biri nyi igun bəd igun isəg anyumə̀ ne mbè angirə̀ mətad mbe ne si nwḭ̀yḛ̀ biri fə ìtɔb tì tàŋ!”