Ɨnû 7 - Ikan feg

Anatì njə̀m imbə̀ʼ bəd 144,000

¹ Anyumə̀ ne anatì njə̀m ze yaya chè, mə̀ ya bàd mbè angirə̀ məkwè ne ya təmi ane tibug te tikwè igun isəg. Mbi yaya kə̰ afim ane tibug te tikwè igun isəg gha imbə̀ʼ afim mɔ̀ʼɔ chè yi igun isəg kə̀ igun tìbà kə̀ chè igun ized.

² Mə ya bàd angirə̀ ndəŋ ne yaya kɔ̀ʼɔ ane aba ze ne nyùmə̀ we dùwə̀. Wì ya nyimi aghi ze ne Ŋwiye we ne yaʼi izɔm we zìyè ineni igun ìmbi bəd angu. Wì ya kyen ane gì ka ka ghàm abə mbè angirə̀ mbe məkwè ne ya beri ika ni zì anə ane ìseg bə̀ zì anə ane tìbà.

³ Wì yaya kyḛ ghà inɔb gha, “Imbə̀ʼ mbə̰ ziye awən anə ane ìseg kə̀ ane tìbà kə̀ ane ized ghò pè ane nyumə̀ ne tì fə zi aneni igun ikəŋi isi abə bəd mbe ne fàʼà abə Ŋwiye.”

⁴ Mə ya zug inun bəd ne wì ya zi aneni igun inɔb. Mbi ya yaʼ chuʼ iki ifibì tì ìghum ikwè chɔ̀b ikwè. Mbi ya yaʼ inga tinəbi Izre te ìghum chɔ̀b ibe.

⁵ Wì ya zì aneni igun bəd chuʼ ìghum chɔ̀b ibe inga inəbi Judà, bə̀ zì igun bəd chuʼ ìghum chɔ̀b ibe inga inəbi Rubèn, bə̀ zì igun bəd chuʼ ìghum chɔ̀b ibe inga inəbi Gàd,

⁶ bə̀ zì igun bəd chuʼ ìghum chɔ̀b ibe inga inəbi Asà, bə̀ zì igun bəd chuʼ ìghum chɔ̀b ibe inga inəbi Naftàli, bə̀ zì igun bəd chuʼ ìghum chɔ̀b ibe inga inəbi Mànasè,

⁷ bə̀ zì igun bəd chuʼ ìghum chɔ̀b ibe inga inəbi Simìyòn, bə̀ zì igun bəd chuʼ ìghum chɔ̀b ibe inga inəbi Levì, bə̀ zì igun bəd chuʼ ìghum chɔ̀b ibe inga inəbi Isakà,

⁸ bə̀ zì igun bəd chuʼ ìghum chɔ̀b ibe inga inəbi Zebulùn, bə̀ zì igun bəd chuʼ ìghum chɔ̀b ibe inga inəbi Jòseb, bə̀ zì aneni fɔrɔ igun bəd chuʼ ìghum chɔ̀b ibe inga inəbi Benjàmen.

Anatì njə̀m imbə̀ʼ inɔ̰ bəd ne yaʼi ikaŋ àbɔ̀ŋɔ

⁹ Anyumə̀ ne anatì njə̀m ze yaya chè, mə yaya nḛ̀, bàd inɔ̰ bəd ne ya yaʼi kwàʼ ìwi kyen, ne chəyi icheg ne tì wə̀d ya taŋ. Bəd mbe yaya nɔ̀ʼɔ̀ inga iben ijìm, inga tinəbi ijìm, inga isiŋi ijìm bə̀ fɔrɔ inga tìngam ijìm. Mbi ya təm imbìghè abə atən ifɔn bə̀ təm imbìghè abə Ŋwan njə̀g. Mbi ya zì ndwi maʼi fu fu bə̀ nyìmi izaŋ.

¹⁰ Mbi yaya kyḛ ane gì ka ka gha, “Àghò, ìwa Ŋwiye we ne chughi igun atən ifɔn tì ìwe Ŋwan njə̀g fə chì awa inga ngəʼ!”

¹¹ Mbè angirə̀ mbe məjìm ne ya təm chè kad atən ifɔn ze, bə̀ chè kad bəd kyen mbe, bə̀ chè kad fɔrɔ ighi izɔm mbe ikwè, mbi ya gùg nɔ̀kì aseg tikubə imbìghè abə atən ifɔn ze, ghùmni Ŋwiye.

¹² Mbi yaya ghùmnə ane ghà gha, “À ya ane! Tì ghumnə awe àghò ìwa Ŋwiye. Tì nàʼ məyakà ine. Àghò bèrì iwe ijìm, bə̀ bèrì ika ijìm ane ighə̀m imɔʼ! À ya ane.”

¹³ Wə̀d mɔ̀ʼɔ abɔ̀ʼ itog bəd mbe ya biri inum gha, “Bəd mbo̰ ne zi ndwi maʼi fu fu àkə mə̀we? Mbi kə nɔ̀ʼi aya?”

¹⁴ Mə ya ywìtì ibo gha, “Masà, Chəyi mə̀ kyeri. À ya àghò kyèri.” Wì ya ghà inum gha, “Aŋa ya bəd mbe ne fə che inga ngəʼ ze ne chè abo, si ya gha, chəyi mbi ku. Mbi fə sò ìtɔb ndwi maʼi inga anəm ze Ŋwan njə̀g ti se fùyə.

¹⁵ Ane, mbɔb mbe itəmi imbìghè abə atən ifɔn Ŋwiye fàʼà ibo tisi fɔrɔ tizimi inga mbàn məd. Məd we ne chùghə igun atən ifɔn biri kùbri awɔb.

¹⁶ Chəyi njèg biri nɔ̀ʼ ywiri zaŋ awɔb. Chəyi adɔʼ mənib biri nɔ̀ʼ ywiri ko awɔb. Chəyi achwi kə̀ isiŋi ne taŋ nɔ̀mɔ̀ biri nɔ̀ʼ ywiri tɔ̀n awɔb,

¹⁷ imbə̀ʼ icheg ne Ŋwan njə̀g we ne yaʼi inga fìghàra atən ifɔn ze biri kyèʼì awɔb icheg wə̀d ne kyèʼè njə̀g; wì biri niŋ awɔb ghò ane àdùrì ne dùwə̀ mənib ne nàʼà ìtḛ̀. Ŋwiye biri fug məsi ijìm ane àzɔb aghə.”