Ɨnû 6 - Ikan feg

Ŋwan njə̀g ne fìʼì Ifeni ìnen tìfughə

¹ Mə ya bàd icheg ne Ŋwan njə̀g ya fìʼì afeni ìnen mbègtog inga ifeni mbe ìsàmbe. Anyumə̀ ne wì ya fìʼì afeni ze, mə̀ ya bə̀ zug gì aghi azɔm mɔ̀ʼɔ abɔ̀ʼ ighi izɔm mbe ikwè. Gì ze ya ghàm kwàʼ icheg mbə̀ŋ ne kùmə̀, gha, “Yeʼe!”

² Mə ya nèn bàd nyam mə̀kara fu fu ne təmi inum imbìghè. Wə̀d ne ya yaʼi igun nyam mə̀kara ze ya nyimi ìkyed tì ighɔŋ. Mbi ya nàʼ aghi atog ifɔn ibo. Məd ya kɔʼ igun nyam mə̀kara məd ze dù ghò. Wì yaya yḛ̀ ghò kwàʼ icheg wə̀d ne fə màʼ ibid chè.

³ Anyumə̀ ne Ŋwan njə̀g ya fìʼì afeni ìnen ne pè ane ibe, mə̀ ya zug aghi azɔm ne pè ane ibe inga ighi izɔm mbe ikwè ne ya ghàmi gha “Yeʼe!”

⁴ Ane, nyam mə̀kara ndəŋ ya dù. Zì yaya bàŋà kə̀m. Mbi ya nàʼ ika fɔrɔ ibeg ibid kyen abə wə̀d ne ya yaʼi igun nyam mə̀kara ze gha wì gho chì àbɔrɔ̀bɔd igun isəg, si ghì bəd se kyèmne mə̀mbin.

⁵ Anyumə̀ ne Ŋwan njə̀g ya fìʼì afeni ìnen ne pè ane itad, mə̀ ya zug aghi azɔm ne pè ane itad inga ighi izɔm mbe ikwè ne ya ghàmi gha, “Yeʼe!” Mə ya nèn bàd nyam mə̀kara firi firi. Wə̀d ne ya yaʼi igun nyam mə̀kara ze ya nyimi aməgrì mɔ̀ʼɔ ibo ikye abo.

⁶ Ane, mə̀ ya zug gì mɔ̀ʼɔ ghàmi inga ighi izɔm mbe ikwè. Gì ze ya ghà gha, “Bəd biri zon aburi kyì-kɔ̀ʼ icheg kirè imɔʼ ane ikab àfàʼì aneg amɔʼ. Mbi biri bə̀ zon aburi kyì icheg mə̀kirè mətad ane ikab àfàʼì aneg amɔʼ. Imbə̀ʼ àghò chikə awe mben mə̀Olìf fɔrɔ mben vayìn!”

⁷ Anyumə̀ ne Ŋwan njə̀g ya fìʼì afeni ìnen ne pè ane ikwè, mə̀ ya zug gì aghi azɔm ne si nwìyḛ̀ inga ighi izɔm mbe ikwè. Gì ze ya ghàm gha, “Yeʼe!”

⁸ Mə ya nèn bàd nyam mə̀kara ne ika̰ nyàmnyɔd məd yaʼi icheg agyen zu. Ikum wə̀d we ne ya yaʼi igun nyam mə̀kara ze ya Iwu. Aben iwu bəd ya bə̀ bèni kwàʼ ibo anjìm. Mbi ya nàʼ ika inɔb gha mbe zweti aba bəd amɔʼ inga iba ikwè ane bəd ne yaʼi igun isəg. Mbɔb biri zweti bəd mbo̰ ane ibeg ibid, tì nyumə̀ njèg, tì ngəʼ ka ka, fɔrɔ ane nyam tɔ tɔ te ne yaʼi igun isəg.

⁹ Anyumə̀ ne wì ya fìʼì afeni ìnen ne pè ane ità̰, mə̀ ya nèn aton ikwijə̀ŋ àfàtì, bàd izwighi abə bəd mbe ne mbi ya zweti awɔb anjìm icheg ne mbi yaya chètè Ìngam Ŋwiye fɔrɔ anjìm icheg ne mbɔb ya nyimi anug ni chètì Ìngam Ŋwiye kwàʼ icheg chɔm.

¹⁰ Mbɔb ya biri ane gì ka ka gha, “Atumbisəg, àghò ya Ŋwiye ìzḛzḛ bə̀ Ŋwiye tesiʼ. Agha kə ywìrì sà iye bɔŋ àghò sɔb isaʼi igun bəd igun isəg bə̀ chə awɔb imbə̀ʼ icheg ne mbi ya zweti awa?”

¹¹ Ane, mbi ya nàʼ ndwi màʼi fu fu abə wə̀d imɔʼ imɔʼ abɔ̀ʼ inɔb. Mbi ya bə̀ ghà inɔb gha, mbe ywìrì ghɔ̀m ane iki nyumə̀ iki piʼì ni ghì gha bəd fə màna zwèti inun bəd àfàʼì mbe ne yaʼi icheg inɔb, bə̀ zweti ìmbɔb məfi mbe ne kòʼi ni ku.

¹² Mə ya bàd icheg ne wì ya fìʼì afeni ìnen ne pè ane tìfughə. Ìseg ya ghùd kwàʼ ane ika. Nyùmə̀ ya bə̀ŋə̀ se fḭfḭ icheg ndwi dèg firi. Iməg ya bə̀ŋə̀ se bàŋà kə̀m icheg anəm.

¹³ Titəm-məg ya fendi ti ikaŋ àbɔ̀ŋɔ igun isəg icheg titam azed fig bɔd te fènde anyumə̀ ne afim ka ka chiʼri azed.

¹⁴ Àbɔ̀ŋɔ ya kye icheg àŋwàʼrì ne mbe kàri kari ne mbe kàra chìyè. Tiwum tijìm ya kye. Ikəmi isiŋi ìseg ijìm mbe ne igyi che kad ya bə̀ kye.

¹⁵ Ane, məfɔn mbe igun isəg tì bɔn ìtɔʼ tì mə̀sogyì kyen tì bəd ikab tì bəd ne beri ika, tì məfeg məjìm fɔrɔ bəd məjìm mbe ne yaʼi awɔb atog inɔb ya nòrò ghò nə̀mbì inga tibighi ne yaʼi inga tìgho fɔrɔ aton tìgho ne yaʼi ikaŋ tiwum.

¹⁶ Mbɔb ya kyen abə tiwum fɔrɔ abə tigho gha, “Mbə̀ suyə igun ina. Mbə̀ nəmbə awa abə Wə̀d we ne chughi igun atən ifɔn. Mbə̀ bə nə̀mbì imbə̀ʼ icheg ne Ŋwan njə̀g we gàŋa ina bə̀ kə̀bə̀ ni chə awa!

¹⁷ Aton ya gha, aneg kyen ze ne wì biri gaŋ chə bəd inug tibɔ̀ŋ ze pè. Wə̀d ne tì wì chwed àkə we?”