Ɨnû 5 - Ikan feg

Ŋwan njə̀g fìʼì àŋwàʼrì ze ne mbe kàri kari

¹ Mə ya bàd àŋwàʼrì mɔ̀ʼɔ ne mbe kàri kari ikye abo jəghi abə wə̀d we ne ya chughi igun atən ifɔn. Mbi ya ŋwàʼrì inug inga àŋwàʼrì ze iba ajìm, kad àŋwàʼrì ze, si zì ifeni ane ìnen isiŋi ìsàmbe ni gha imbə̀ʼ wə̀d nɔ̀ʼ fìʼì kirənde mbi nàʼ ika ibo.

² Mə ya bə̀ bàd angirə̀ ka ka mɔ̀ʼɔ ne yaya ghàmà ane gì ka ka gha, “Wə̀d ne koʼi ni chi ìnen we fìʼì àŋwàʼrì ze àkə we?”

³ Si ya gha, chəyi wə̀d mɔ̀ʼɔ ya yaʼi ikaŋ àbɔ̀ŋɔ kə̀ igun isəg kə̀ aton ìseg ne ya kòʼi ni fìʼì àŋwàʼrì ze kə̀ bì nèn inga.

⁴ Mə ya dèg mèʼì məchə imbə̀ʼ icheg ne chəyi wə̀d mɔ̀ʼɔ ne bi kòʼ ni fìʼì àŋwàʼrì ze kə̀ ni bì nèn inga.

⁵ Ane, wə̀d mɔ̀ʼɔ abɔ̀ʼ itog bəd mbe ya ghà inum gha, “Imbə̀ʼ àghò dèghe awe. Nḛ, wə̀d we ne yaʼi icheg Àfɔn inga inəbi Judà, ne yaʼi aghaŋ inga inəbi ifɔn Dèvid, wì fə chè ìmbi bəd ìpàb. Ane, məd kòʼ ni chì isiŋi ìnen mbe ìsàmbe, fìʼì àŋwàʼrì ze.”

⁶ Mə ya bàd Ŋwan njə̀g ne ya təmi inga fìghàra atən ifɔn, inga fìghàra abə ighi izɔm mbe ikwè fɔrɔ itog bəd mbe. Ze ya chwi kwàʼ icheg ni gha mbi ya fə kyemi Ŋwan njə̀g we, si ya gha, wì ya yi izɔm. Wì ya bèrì ndɔŋ ìsàmbe tì aghə ìsàmbe. Aghə ze ìsàmbe ya izwighi mbe ìsàmbe ne fàʼà abə Ŋwiye, ne Ŋwiye ya chà inga isəg ijìm.

⁷ Ŋwan njə̀g we ya ghò niŋ àŋwàʼrì ze ikye abo jəghi abə wə̀d we ne ya chughi igun atən ifɔn.

⁸ Anyumə̀ ne wì ya niŋi àŋwàʼrì ze, ighi izɔm mbe ikwè tì itog bəd mbe ìghum ibe chɔ̀b ikwè, ya gundi aseg imbìghè abə Ŋwan njə̀g we. Wə̀d mɔ̀ʼɔ imɔʼ abɔ̀ʼ inɔb ya nyimi inɔŋi ngyeŋ bə̀ nyìmi ikaŋ ne mbi ya tangi ane gol. Ìnen ya sweg inga ikaŋ mbe. Ìnen we ya ichaʼri Ŋwiye ìwi bəd Ŋwiye.

⁹ Mbi ya zə̀ʼ ikyeg feg gha, “Àghò taŋ kòʼ ni niŋ àŋwàʼrì ze ne mbe kàri kari chì ìnen, fìʼì. À ya ane imbə̀ʼ icheg ne mbi ya kyemi awe. Ane, anjìm anəm ze ne àghò ya tùti igun azed abaʼri, àghò fə zèri bəd chì inga ngəʼ ghì mbi si yaʼ bəd Ŋwiye. Bəd mbo̰ ne àghò zo̰ ya bəd inga tinəbi ijìm, fɔrɔ inga tìngam ijìm, fɔrɔ inga isiŋi ijìm, bə̀ fɔrɔ inga iben ijìm.

¹⁰ Àghò fə ghì mbɔb si yaʼ bəd mbàn ne fàʼà inga àze anug ìfɔ̀n, imbə̀ʼ ni mbi faʼa abə ìwa Ŋwiye. Àghò fə bə̀ ghì gha mbɔb biri tùmbì isəg.”

¹¹ Mə ya ywìrì nèn, si zug gì mbè angirə̀ akam tì akam fɔrɔ chuʼ tì chuʼ. Mbi ya təm chè kad atən ifɔn ze, chè kad ighi izɔm mbe ikwè bə̀ chè kad itog bəd mbe.

¹² Mbi ya zə̀ʼ ikyeg ane gì ka ka gha, “Ŋwan njə̀g we ne mbi ya kyemi we kòʼ gha mbe naʼa ika ibo, nàʼ ighi ibo, nàʼ iwe ibo, nàʼ ighumni ibo bə̀ nàʼ məyakà ibo.”

¹³ Mə ya zug gì ighi ijìm mbe ne Ŋwiye ya tangi ikaŋ àbɔ̀ŋɔ, tangi igun isəg, tangi aton isəg, tangi inga tìbà. Mə ya bə̀ zug gì ighi izɔm ijìm mbe ne yaʼi inga inɔb. Ighi mbe yaya zə̀ʼə̀ ikyeg gha, “Mbə̀ nàʼ ighumni, nàʼ məyakà bə̀ nàʼ ika ibo, məd we ne chughi igun atən ifɔn. Mbə̀ bə ghì ane abə Ŋwan njə̀g kwàʼ ane ighə̀m imɔʼ.”

¹⁴ Ighi izɔm mbe ikwè ya ywìtì gha, “À ya ane!” Itog bəd mbe ya gundi aseg ghùmni Ŋwiye bə̀ ghùmni Ŋwan njə̀g.