Ɨnû 4 - Ikan feg

Jɔn bàd anatì njə̀m ne mbe ghùmnə Ŋwiye ikaŋ àbɔ̀ŋɔ

¹ Anyumə̀ ne angirə̀ ya màni ni ghàm imbə̀ʼ tikən te tijìm, mə̀ ya nèn ikaŋ àbɔ̀ŋɔ bàd inuʼ nəb mɔ̀ʼɔ ijə. Mə ya ywìrì zug gì mɔ̀ʼɔ icheg ìzi mbègtog. Gì ze ya ghàm icheg tàŋ ne mbi fə. Zì ya ghà inum gha, “Kɔʼ yèʼe aŋa, mə biri chwi inug ne biri dù ine ane nyùmə̀ gho̰ fə che.”

² Kwàʼ ati ati, Azwighi Ŋwiye ya ghì mə bàd atən ifɔn mɔ̀ʼɔ ikaŋ àbɔ̀ŋɔ ne wə̀d mɔ̀ʼɔ yaʼi igun ichughi.

³ Wə̀d we ne ya chughi igun atən ifɔn ze yaya zḛ njànda icheg iteg mɔ̀ʼɔ ne mbe kàrà ane jaspà kə̀ kàmelìyàn. Tènàbà mɔ̀ʼɔ ne yaʼi icheg aghi mɔ̀ʼɔ ne mbe kàrà ane emeràd ya kad atən ifɔn ze chuʼ.

⁴ Itən ifɔn ndəŋ ìghum ibe chɔ̀b ikwè ya ywìrì kad atən ifɔn ze chuʼ. Itog bəd mɔ̀ʼɔ ìghum ibe chɔ̀b ikwè ne ya zì ndwi fu fu bə̀ zì ighi itog ifɔn ne mbi tangi ane gol ya yaʼ ichughi igun itən ifɔn mbe.

⁵ Àŋwàŋwaŋ yaya ŋwàŋà, gì mbə̀ŋ bə̀ kùmə̀ ane atən ifɔn ze. Inam mɔ̀ʼɔ ìsàmbe yaya bère imbìghè abə atən ifɔn ze. Inam mbe ìsàmbe ya izwighi ìsàmbe mbe ne Ŋwiye bèri.

⁶ Aghi mɔ̀ʼɔ ne yaya zùʼə icheg manə̀m bə̀ ŋwàŋi ŋwaŋi icheg aghi mɔ̀ʼɔ ne mbe kàrà ane kristà ya təm imbìghè abə atən ighumni ze. Ighi izɔm mɔ̀ʼɔ ikwè ya kam atən ifɔn ze iba ijìm. Ighi izɔm mbe ya bèrì aghə imbìghè fɔrɔ anjìm.

⁷ Abɔ̀ʼ ighi izɔm mbo̰ ikwè: àze mbègtog ya icheg àfɔn, àze ne beni abɔ̀ʼ ya icheg pɔ̀ŋ, àze ne ya pè ane itad ya bèrì ìfe icheg ìwi wə̀d, àze ne ya si nwḭ̀yḛ̀ ya icheg izam kyen mɔ̀ʼɔ ne bàrà.

⁸ Ighi izɔm mbo̰ ijìm ya bèrì tibabì tìfughə bə̀ bèrì aghə isiŋi ijìm fɔrɔ aton tibabì. Mbi yaya zə̀ʼə̀ ikyeg tisi ijìm fɔrɔ tizimi ijìm gha, “Anɔŋisəg, Ŋwiyekɔʼ, Àghò zen, Àghò zen, Àghò zen. Àghò ne ya bi yaʼ, ne yaʼi amad anìŋ, ne biri ywiri yeʼe.”

⁹ Ighəm ijìm, ighi izɔm mbo̰ ikwè ya zə̀ʼə̀ ikyeg ghùmnə wə̀d we ne chughi igun atən ifɔn ze bə̀ nàʼà məyakà ibo, məd we ne yaʼi izɔm kwàʼ ane ighə̀m imɔʼ.

¹⁰ Anyumə̀ ne mbɔb mbe ghùmnə aməd we ne chughi igun atən ifɔn ze, itog bəd mbe ìghum ibe chɔ̀b ikwè ya chìyè ìmbɔb ighi atog ifɔn nɔ̀ŋɔ̀ aseg ibo imbìghè, məd we ne yaʼi izɔm kwàʼ ane ighə̀m imɔʼ. Mbɔb ya chìyè ìmbɔb ighi atog nɔ̀ŋì aseg se ghùmnə aməd gha,

¹¹ “Anɔŋisəg, ìwa Ŋwiye, Àghò kòʼ gha mbe ghumni awe bə̀ ghà gha Àghò bèrì ika imbə̀ʼ icheg ne à ya Àghò tàngi ighi ijìm. Ighi ijìm bə̀ yaʼ kwàʼ icheg ne àghò ya kə̀bi gha mbe yaʼ.”