Ɨnû 3 - Ikan feg

Ikən we ne Jɔn ya ŋwàʼri abə ifeti bəd Kristo we a Sadìs

¹ Anɔŋisəg ya bə̀ ghà inum gha: “Ŋwàʼra abə angirə̀ we ne kyèʼè ifeti bəd Kristo we a Sadìs gha, ‹Ìngam gho̰ nɔ̀ʼ abə wə̀d we ne nyìme izwighi Ŋwiye mbe ìsàmbe bə̀ nyìme titəm iməg te ìsàmbe. Mə kyèri inug mbe ne àghò we ghìyə̀; mə kyèri gha àghò we ghìyə̀ icheg ni gha àghò we kiri biri izɔm, si ya gha, àghò fə ku.

² Nɔ̀ʼɔ angwḛ, ghì gha aghi ze ne si bùʼ inga ine imbə̀ʼ ze ku yi imbə̀ʼ icheg ne mə fə bàd gha chəyi inug mbe ne àghò we ghìyə̀ kiri bɔŋi mànì imbìghè abə ìmə Ŋwiye.

³ Ane, kɔndi inug mbe ne mbi ya chwiti ine fɔrɔ inug mbe ne àghò ya bə zug, bə̀ŋì ìze fìŋ se zùgrə inug mbe. Àghò mə ton awe ni nɔ̀ʼ angwḛ, mə biri yeʼe icheg iji. Chəyi àghò biri kyeri nyùmə̀ ne mə̀ biri yeʼe.

⁴ Si ya gha, bəd Kristo mɔ̀ʼɔ iki piʼì mbe a Sadìs ne chəyi mbi kiri kɔpi ìwɔb ikuchèg. Mbi biri zì ndwi fu fu se yḛ̀ tì inum imbə̀ʼ icheg ne mbe taŋ kòʼ ni ghì ane.

⁵ Wə̀d ne che àkwàʼrì biri bə zì ndwi fu fu icheg inɔb. Chəyi mə̀ biri nimni ikum məd inga àŋwàʼrì ze ne mbi ŋwàʼri tikum bəd mbe ne biri jəg ìtḛ̀. Mə biri ghà imbìghè abə ìmə Mbaʼ bə̀ ghà imbìghè abə mbè angirə̀ məd gha mə kyèri tengàŋ.

⁶ Wə̀d ne tì wì zug anug, wì zug anug ze ne Azwighi Ŋwiye ze ghà abə tifeti bəd Kristo.›”

Ikən we ne Jɔn ya ŋwàʼri abə ifeti bəd Kristo we a Fìlàdefìyà

⁷ Anɔŋisəg ya bə̀ ghà inum gha: “Ŋwàʼra abə angirə̀ we ne kyèʼè ifeti bəd Kristo we a Fìlàdefìyà gha, ‹Ìngam gho̰ nɔ̀ʼ abə wə̀d ìzḛzḛ we ne yaʼi tesiʼ. Məd bèrì afiʼì ze ne yaʼi àzi ifɔn Dèvid. Wì mə fìʼì nəb, chəyi wə̀d ne tì wì wùbì. Wì mə wùbì nəb, chəyi wə̀d ne tì wì fiʼì.

⁸ Mə kyèri inug mbe ne àghò we ghìyə̀. Nḛ, mə fə fìʼì inuʼ nəb ine ne chəyi tì wə̀d wubì. Mə kyèri gha ìwe ika kə yi, si ya gha, àghò fə ghì inug mbe ne mə̀ ya gha ine. Mə bə̀ kyèri gha, chəyi àghò to̰ amə .

⁹ Nḛ, mə biri ghì gha bəd inug ako mbe ne yaʼi inga ifeti bəd Sàtàn, mbe yèʼe gùndi aseg ine imbìghè, si bḛ gha mə kɔ̀ŋ awe. Mbɔb mbe ghà gha mbɔb ya mə̀Ju, si ya gha, mbɔb kayi mə̀Ju.

¹⁰ Icheg ne àghò fə nyimi fìŋ nyìʼ inug icheg ne mə̀ ya gha ine, mə biri nə̀m awe ane nyùmə̀ we ne ngəʼ biri yeʼe igun isəg ijìm ni kwàʼrì bəd mbe ne yaʼi igun isəg.

¹¹ Mə biri zàmbi yeʼe. Àghò nɔŋɔ fìŋ igun inum, ni ghì gha imbə̀ʼ wə̀d mɔ̀ʼɔ si niŋ yi ineʼi we ne àghò bèri.

¹² Mə biri nɔ̀ŋì wə̀d ne che àkwàʼrì wì yaʼ icheg ìte inga mbàn ìmə Ŋwiye. Chəyi wì biri nɔʼ dù inga mbàn ze. Mə biri ŋwàʼrì ikum ìmə Ŋwiye fɔrɔ ikum ikye aben Ŋwiye igun məd. Ikye aben we ya Jèrusalèm feg we ne Ŋwiye swi ikaŋ àbɔ̀ŋɔ. Mə biri bə ŋwàʼrì ìmə ikum feg igun məd.

¹³ Wə̀d ne tì wì zug anug, wì zug anug ze ne Azwighi Ŋwiye ze ghà abə tifeti bəd Kristo.›”

Ikən we ne Jɔn ya ŋwàʼri abə ifeti bəd Kristo we a Làwùdisìyà

¹⁴ Anɔŋisəg ya bə̀ ghà inum gha: “Ŋwàʼra abə angirə̀ we ne kyèʼrè ifeti bəd Kristo we a Làwùdisìyà gha, ‹Ìngam gho̰ nɔ̀ʼ abə wə̀d we ne ikum məd ya À ya ane. Məd ya ghàmà tesiʼ. Məd ya bə̀ ghìyə̀ inug mbe ne wì gha. Ŋwiye ya chè anjìm məd tàngi ighi ijìm.

¹⁵ Mə kyèri inug mbe ne àghò we ghìyə̀. Chəyi àghò we nɔ̀mɔ̀ kə̀ bə̀ zùyə̀. Mə kə̀b gha àghò ya nɔ̀mɔ̀ kə̀ gha àghò ya zùyə̀!

¹⁶ Ane, icheg ne àghò yaʼi awe yaʼ azabi azabi, ne chəyi àghò we nɔ̀mɔ̀ kə̀ zùyə̀, mə biri chì ìmbum ibo igun ine.›

¹⁷ Àghò we gha, ‹Mo ya wə̀d ighi. Mə bèrì ighi nɔʼ nɔʼ. Chəyi mə̀ cheʼi aghi mɔ̀ʼɔ›. Si ya gha, chəyi àghò kyèri gha àghò ya wə̀d ngəʼ, ne bəd mbe nḛ̀ kə̀nə̀. Chəyi àghò bə kyèri gha àghò ya wə̀d fum ne yaʼi ifəg bə̀ yaʼ tì ìkyèri ikye.

¹⁸ Ane, mə we nàʼà ikə ine gha, àghò zon gol inum, ne yaʼi gol we ne mbi tɔ̰ inga iywid, twi kwàʼ icheg chɔm. Àghò mə ghì ane àghò biri bèrì ighi. Àghò bə zon ndwi fu fu zì imbə̀ʼ chì tìnìrètog we ne bəd fə bàri gha àghò we tì ìkyèri ikye. Zon ifuʼ aghə, zì inga àze aghə imbə̀ʼ ywiri bàd isiŋi.

¹⁹ Mə ya ghàmà kyḛ abə bəd mbe ne mə̀ kɔŋi. Mə ya bə̀ chə bəd mbe ne mə̀ kɔŋi. Ane, nḛ gha àghò zì atog ni ya nɔ̀mɔ̀, bə̀ nḛ gha àghò bə̀ŋì ìze fìŋ chì ane inug tibɔ̀ŋ.

²⁰ Nḛ, mə təm inuʼ nəb se gɔ̀ngɔ. Wə̀d ne zughi ìmə gì, fìʼì inuʼ nəb, mə biri nyi inga nəb tì se fɔrɔ jə̀ghə inɔn.

²¹ Mə biri bḛ gha wə̀d we ne che àkwàʼrì, wì chughi igun atən ifɔn iban inum, kwàʼ icheg ne mə̀ ya bə chè àkwàʼrì bə̀ ghò si chùghi iban ìmə Mbaʼ igun atən ifɔn məd.

²² Wə̀d ne tì wì zug anug, wì zug anug ze ne Azwighi Ŋwiye ze ghà abə tifeti bəd Kristo.”