Ɨnû 22 - Ikan feg

Anatì njə̀m imbə̀ʼ igyi kyen ne mənib məd mbe nàʼà ìtḛ̀

¹ Angirə̀ we ya chwi igyi kyen we ne mənib məd mbe nàʼà ìtḛ̀. Igyi we ya zḛ njànda kwàʼ icheg kristà. Wi yaya dùwə̀ aton atən ifɔn àzi Ŋwiye tì Ŋwan njə̀g.

² Wi yaya kɔ̀ŋɔ chè inga fìghàra inɔnjì we ne yaʼi inga ikye aben we. Azed ze ne nàʼà ìtḛ̀ ya yaʼ iban igyi kyen we iba ijìm. Azed ze ya ko titam aghəm ìghum chɔ̀b ibe igun fituʼ. Ze ya ko ighəm imɔʼ igun iməg. Ibo azed ze ya ghùyə̀ bəd inga iben ijìm.

³ Chəyi aghi ne ndɔ̀n Ŋwiye yaʼi igun biri yaʼ inga ikye aben we. Atən ifɔn àzi Ŋwiye tì Ŋwan njə̀g biri yaʼ inga ikye aben we. Ane, bəd àfàʼì məd biri ghumni aməd.

⁴ Mbɔb biri bàd ìfe Ŋwiye. Mbi biri bə ŋwàʼrì ikum Ŋwiye igun ìmbɔb ikəŋi isi.

⁵ Chəyi izimi biri ywìri yaʼ angu. Chəyi bəd biri ywìri kə̀b anam kə̀ achwi imbə̀ʼ icheg ne Anɔŋisəg Ŋwiye biri yaʼ ìwɔb ìzḛzḛ. Mbɔb biri tùmbì isəg icheg məfɔn kwàʼ ane ighə̀m imɔʼ.

Anatì njə̀m imbə̀ʼ icheg ne Yeso biri ywiri yeʼe

⁶ Angirə̀ we ya ywìrì ghà inum gha, “Ŋwiye we ghà tesiʼ. Ane, tì kòʼ ni bḛ ìngam məd. Anɔŋisəg Ŋwiye ne nàʼà àzi Azwighi abə ìmbi bədkə̀n fə chà ìwi angirə̀ gha wì chwi inug ne biri zàmbi dù abə ìmbi bəd àfàʼì”.

⁷ Yeso gha, “Mbə̀ zug, mə biri zàmbi yeʼe! Ŋwiye zì àbɔrɔ̀bɔd igun bəd mbe ne zùgrə inug mbe ne mbi ŋwaʼri inga àŋwàʼrì azo̰”.

⁸ Mo Jɔn, mə̀ ya zug bə̀ bàd inug mbo̰ ijìm. Anyumə̀ ne mə̀ ya màni ni zug bə̀ bàd inug mbo̰, mə̀ ya gundi aseg imbìghè abə angirə̀ we ne ya chwi inug mbo̰ inum ni ghumni aməd.

⁹ Si ya gha, wì ya ghà inum gha, “Imbə̀ʼ àghò ghiyə awe ane! Mo ya wə̀d àfàʼì icheg ine. Mo ya icheg ìmbe məfi mbe ne yaʼi bədkə̀n Ŋwiye bə̀ fɔrɔ icheg bəd mbe ne zùgrə inug mbe ne yaʼi inga àŋwàʼrì azo̰. Àghò ghumni yaʼ Ŋwiye!”

¹⁰ Wì ya bə̀ ghà inum gha, “Imbə̀ʼ àghò nəmbə awe inug mbe ne mbi ŋwaʼri inga àŋwàʼrì azo̰ imbə̀ʼ icheg ne nyùmə̀ ne inug mbe biri dù fə tinde.

¹¹ Wə̀d ne ghìyə̀ inug tibɔ̀ŋ, wì chè yi imbìghè inga ìmbi inug tibɔ̀ŋ. Wə̀d ne ghìyə̀ izṵ inug, wì bə chè yi imbìghè inga ìmbi izṵ inug. Àsi wə̀d ne ghìyə̀ inug ne təmi kòʼ, wì chè yi imbìghè inga ìmbi inug ne təmi kòʼ. Wə̀d ne ghìyə̀ inug inga ìzḛzḛ, wì bə chè yi imbìghè inga ìmbi inug ìzḛzḛ.”

¹² Yeso ya ghà inum gha, “Zug, mə we se zàmbi yeʼe! Mə biri yeʼe tì chùd ne mə̀ biri nàʼ abə wə̀d imɔʼ imɔʼ icheg ne ìfàʼì wə̀d chwi.

¹³ Mo ya Afà bə̀ yaʼ Omegà. Mo ya Wə̀d mbègtog bə̀ yaʼ Wə̀d ne si nwìyḛ̀. Mo ya Iko bə̀ yaʼ Ìnwḭ”.

¹⁴ Ŋwiye zì àbɔrɔ̀bɔd igun bəd mbe ne fə so ìtɔb ndwi ti zen. Ane, mbɔb fə kòʼ ni chè inuʼ ikam nyi inga ikye aben we, jəg titam ane azed ze ne nàʼà ìtḛ̀.

¹⁵ Bəd mbe ne yaʼi anjìm isəg ane asiŋi ze ya bəd inug tibɔ̀ŋ tì bəd ne ghìyə̀ tikaŋì tì bəd ne nɔ̀kɔ̀ mə̀yi kə̀ nɔ̀kɔ̀ mbaŋà abu abu tì bəd ne zwète mə̀mbin, tì bəd ne ghùmnə mə̀ŋwiye fɔrɔ bəd ne kɔ̀ŋɔ̀ ni ghà inug ako bə̀ kɔ̀ŋɔ̀ ni ghì inug iji.

¹⁶ Mo Yeso, mə chà ìmə angirə̀ gha wì chete inug mbo̰ inən inga tifeti bəd Ŋwiye. Mo ya aghaŋ inga inəbi ifɔn Dèvid. Mo ya icheg Fitəm-məg fe ne zùʼə ane achəg ituʼ.

¹⁷ Azwighi Ŋwiye tì Àyi igən gha, “Yeʼe!” Wə̀d ijìm ne zughi anug azo̰ mənyìʼ bə̀ gha “Yeʼe!” Wə̀d ne adɔʼ mənib ze ko aməd, wì yeʼe no ane mənib mbe ne nàʼà ìtḛ̀. Wì yeʼe no kwàʼ ako ne chəyi wì nàʼi ikab

¹⁸ Mo Jɔn, mə we pàta wə̀d ijìm ne zughi inug mbo̰ ne biri dù icheg ne mbi ŋwaʼri inga àŋwàʼrì azo̰. Wə̀d mɔ̀ʼɔ mə̀ yètì anug mɔ̀ʼɔ igun inug mbo̰, Ŋwiye biri bə yètì aku ngəʼ kyen kyen ze ne mbi ŋwaʼri inga àŋwàʼrì azo̰ igun ngəʼ məd.

¹⁹ Wə̀d mɔ̀ʼɔ mə̀ chì anug mɔ̀ʼɔ inga inug mbe ne mbi ŋwaʼri inga àŋwàʼrì azo̰, chəyi Ŋwiye biri bḛ gha tengàŋ jəg titam ane azed ze ne nàʼà ìtḛ̀. Chəyi Ŋwiye biri bə bḛ gha tengàŋ nyi inga ikye aben ìzḛzḛ we ne mbi ŋwaʼri inga àŋwàʼrì azo̰.

²⁰ Wə̀d we ne ghà inug mbo̰ ijìm, wì gha, “À ya tesiʼ! Mə biri zàmbi yeʼe!” À ya ane, Anɔŋisəg Yeso yeʼe!

²¹ Anɔŋisəg Yeso ghiyə ìchɔ̀mì abə bəd Ŋwiye məjìm. À ya ane.