Ɨnû 2 - Ikan feg

Ikən we ne Jɔn ya ŋwàʼri abə ifeti bəd Kristo we a Efesùs

¹ Anɔŋisəg ya ghà inum gha, “Ŋwàʼra abə angirə̀ we ne kyèʼè ifeti bəd Kristo we a Efesùs gha: ‹Wə̀d we ne nyìmi titəm iməg te ìsàmbe inga àzi abo jəghi, ne wì ya yḛ̀ inga itən inam mbe ìsàmbe ne mbi tangi ane gol, wè gha,

² mə kyèri inug mbe ne àghò we ghìyə̀. Mə kyèri icheg ne àghò fə fàʼi ane ika bə̀ kyèri icheg ne àghò fə nyìʼi inug aton ngəʼ. Mə kyèri gha chəyi àghò kɔ̀ŋi ni bàd bəd mbe ne ghìyə̀ inug tibɔ̀ŋ. Mə bə̀ kyèri gha àghò fə kwàʼrì bəd mbe ne gha mbɔb ya bədtɔm ne mbɔb kayi bədtɔm. Àghò fə kwàʼrì ane bàd gha mbɔb ya bəd inug ako.

³ Mə bə̀ kyèri gha chəyi àghò kiri bɔri ni nyìʼ inug bə̀ zə̰ ngəʼ ka ka imbə̀ʼ amə.

⁴ Si ya gha, mə bèrì anug azo̰ imbə̀ʼ awe. Anug ze ya gha, chəyi àghò we ywìrè kɔ̀ŋɔ̀ amə bə̀ kɔ̀ŋɔ̀ bəd icheg ne àghò yaya bè kɔ̀ŋɔ̀.

⁵ Ane, kɔndi icheg ne àghò ya bi yaʼ bɔŋ se bə̀ndə̀ anjìm! Bə̀ŋə ìze fìŋ se ywìrè ghìyə̀ inug mbe ne àghò yaya bè ghìyə̀ a mbègtog. Àghò mə ton awe ni kɔpɔ, mə biri yeʼe ine, pè chì atən anam ze ne àghò we nɔ̀ŋɔ̀ àze anam igun.

⁶ Si ya gha, anug chɔm ne àghò ghi ya gha: àghò bàn inug mbe ne bəd mbe ne beni abɔ̀ʼ Nikolòs mbe ghìyə̀, kwàʼ icheg ne mə bə bàn.›

⁷ Wə̀d ne tì wì zug anug, wì zug anug ne Azwighi Ŋwiye ze ghà abə tifeti bəd Kristo. Mə biri nàʼ ika abə bəd mbe ne bà̰ inug tibɔ̀ŋ gha mbe jəg ane azed ze ne ghìyə̀ gha bəd jəg ìtḛ̀. Azed ze ya inga Paràdayìs Ŋwiye.”

Ikən we ne Jɔn ya ŋwàʼri abə ifeti bəd Kristo we a Sìmayinà

⁸ Anɔŋisəg ya bə̀ ghà inum gha: “Ŋwàʼra abə angirə̀ we ne kyèʼè ifeti bəd Kristo we a Sìmayinà gha, ‹Ìngam gho̰ nɔ̀ʼ abə wə̀d mbègtog ne bə̀ yaʼ wə̀d ne si nwḭ̀yḛ̀, ne ya ku ywìrì zwème ane iwu.

⁹ Mə kyèri icheg ne àghò we zə̰ ngəʼ bə̀ kyèri icheg ne àghò fùmi. Si ya gha, àghò ya wə̀d ikab. Bəd mbe ne gha mbɔb ya mə̀Ju, ne chəyi mbi yaʼi kwàʼ mə̀Ju, mə kyèri inug mbe ne mbɔb mbe ghà ni chìkì ìwe ikum. Mbɔb ya bəd inga ifeti Sàtàn.

¹⁰ Imbə̀ʼ mbə̰ bɔ awən anug ni gha mbə̰ biri zə̰ ngəʼ. Nḛ, Debrə̀ biri zì bəd mɔ̀ʼɔ abɔ̀ʼ inən inga nəb ndəŋ ni zweʼri awən. Mbi biri chɔʼ ìmbən ibɔʼì ighog ane ineg ìghum. Mbə̀ nɔŋɔ ibḛfiŋ igun Kristo ghò pè ane nyumə̀ ne mbi zweti awən. Mə biri nàʼ ìtḛ̀ inən ane ìwən ineʼi.

¹¹ Wə̀d ne tì wì zug anug, wì zug anug ze ne Azwighi Ŋwiye ze ghà abə tifeti bəd Kristo. Wə̀d ne che àkwàʼrì, chəyi iwu we ne pè ane ibe biri bètì aməd.›”

Ikən we ne Jɔn ya ŋwàʼri abə ifeti bəd Kristo we a Pègamùm

¹² Anɔŋisəg ya bə̀ ghà inum gha: “Ŋwàʼra abə angirə̀ we ne kyèʼè ifeti bəd Kristo we a Pègamùm gha, ‹Ìngam gho̰ nɔ̀ʼ abə wə̀d we ne beri ibeg ibid we ne tɔ iba ijìm.

¹³ Mə kyèri asiŋi ze ne àghò we chùghə angu. À ya asiŋi ze ne atən ifɔn àzi Sàtàn yaʼi angu. Si ya gha, àghò nyìmi ìmə ikum ane ìze fìŋ ijìm. Chəyi àghò ya waʼi anug ni nɔŋi fìŋ igun inum, ka bèyi ane nyùmə̀ Antipàs we ne yaya ghà inug imbə̀ʼ amə ane ìzi fìŋ ijìm. Mbi ya zweti aməd inga àzən aben, asiŋi ne Sàtàn we chùghə.

¹⁴ Si ya gha, mə bèrì inug mɔ̀ʼɔ iki piʼi imbə̀ʼ awe. Bəd mɔ̀ʼɔ mbe abɔ̀ʼ inən ne bène abɔ̀ʼ inug mbe ne Balàm yaya chwìte. Balàm ya chwìti ikuchèg abə Balàk ni gha wì febri mə̀Izre imbə̀ʼ mbi jəg ighi mbe ne mbi yaya nàʼà ane ighi àfàtì abə mə̀ŋwiye. Wì ya bə̀ fèbrì awɔb gha mbe nɔkɔ mə̀yi abu abu.

¹⁵ À ya bə̀ ane ne bəd mɔ̀ʼɔ mbe inga inən ne bène abɔ̀ʼ inug mbe ne Nikolòs yaya chwìte.

¹⁶ Ane, bəŋi ìze fìŋ! Àghò mə ton awe ni bə̀ŋə̀, mə biri zàmbì yèʼe ine pè zɔ̀ŋ tì inɔb ane ibeg ibid we ne yaʼi inga ìmə ichug.

¹⁷ Wə̀d ne tì wì zug anug, wì zug anug ze ne Azwighi Ŋwiye ze ghà abə tifeti bəd Kristo. Mə biri nàʼ manà mɔ̀ʼɔ abɔ̀ʼ we ne yaʼi inə̀mbi abə wə̀d ijìm ne che àkwàʼrì. Mə biri nàʼ iteg fu fu ne mbi ŋwàʼri ikum feg igun abə tengàŋ. Chəyi wə̀d mɔ̀ʼɔ ne kyeri ikum we chèyi ane wə̀d we ne nìŋə iteg angu.›”

Ikən we ne Jɔn ya ŋwàʼri abə ifeti bəd Kristo we a Tìyàtirà

¹⁸ Anɔŋisəg ya bə̀ ghà inum gha: “Ŋwàʼra abə angirə̀ we ne kyèʼè ifeti bəd Kristo we a Tìyàtirà gha, ‹Ìngam gho̰ nɔ̀ʼ abə Ŋwan Ŋwiye we ne aghə məd ze bère icheg inemi iywid, ne tikye ighog məd te zùʼə icheg atə̰ brons ne mbe taŋ tòn.

¹⁹ Mə kyèri inug mbe ne àghò we ghìyə̀. Mə kyèri icheg ne àghò kɔ̀ŋi ìmbe məfi fɔrɔ ìte njàbi bə̀ kyèri gha àghò fə nɔ̀ŋì ìze fìŋ igun inum. Mə bə̀ kyèri gha àghò we fàʼà bə̀ nyìʼè inug aton ngəʼ. Ìfàʼì mbe ne àghò si nwḭ̀yḛ̀ fàʼ, mbe chè mbi mbègtog.

²⁰ Si ya gha, mə beri anug mɔ̀ʼɔ imbə̀ʼ awe. Anug ze ya gha, chəyi àghò chɔ̀ʼri inug ìmbi àyi we ne mbe kàrà ane Jesebè. Məd we gha zìye ya wə̀dkə̀n àyi. Məd we chwìte inug ni fèbrì ìmbum bəd àfàʼì gha mbe ghi ifanì inug bə̀ ghì gha mbe jəg tijəg te ne mbe nàʼà ane ighi àfàtì abə mə̀ŋwiye.

²¹ Mə ya nàʼ nyùmə̀ ibo gha wì bəŋə ìzi fìŋ ane ifanì inug mbe ne wì ya ghìyə̀. Si ya gha, wì ya ton yi ni bə̀ŋì.

²² Nḛ, mə biri zì aghɔn igun məd, bə̀ zì ngəʼ kyen igun mbaŋà te ne nɔki tì məd, kirənde mbi bə̀ŋì ìtɔb fìŋ ane inug mbe ne mbe ghìyə̀ tì məd.

²³ Mə biri zweti bəd məd. Tifeti bəd Kristo tijìm biri kyeri gha mo ya wə̀d ne kyèʼrè tikɔndi bəd bə̀ kyèʼrè ìtɔb fìŋ. Mə biri nàʼ chùd abə wə̀d imɔʼ imɔʼ abɔ̀ʼ inən ane inug mbe ne wə̀d we ghìyə̀.

²⁴ Si ya gha, inən mbə̰ mbe ne buʼi a Tìyàtirà, ne chəyi mbə̰ mbe ghìyə̀ inug mbo̰, ne chəyi mbə̀ kiri kwembi inug mbe ne bəd mɔ̀ʼɔ ya gha à ya inug ne yaʼi inə̀mbi imbə̀ʼ Sàtàn, mə ghà inən gha, chəyi mə̀ biri zì mbèʼ ndəŋ igun inən.

²⁵ Mbèʼ ze ne mə̀ biri zì igun inən ya məyi gha mbə̀ che imbìghè ni nɔ̀ŋì fìŋ igun inum ghò pè ane nyùmə̀ ne mə̀ biri ywiri yeʼe.

²⁶ Mə biri nàʼ ika ni tùmbì iben ijìm abə wə̀d ne che àkwàʼrì bə̀ se ghìyə̀ inug mbe ne mə̀ kəbi anene ghò pè ane ìnwḭ.

²⁷ Wì biri tùmbì iben mbe ane ika ijìm kwàʼ icheg ne wə̀d we zwèghe akwighe ìseg ane fìmbàŋì atə̰, sàndi iba iba. Wì biri bèrì iku ika we ne ìmə Mbaʼ nàʼi inum.

²⁸ Mə biri nàʼ fitəm-məg fe achəg ituʼ ibo.

²⁹ Wə̀d ne tì wì zug anug, wì zug anug ze ne Azwighi Ŋwiye ze ghà abə tifeti bəd Kristo.›”