Ɨnû 19 - Ikan feg

Anatì njə̀m imbə̀ʼ icheg ne mbi ya ghùmnə Ŋwiye ikaŋ àbɔ̀ŋɔ

¹ Anyumə̀ ne azo̰ tì anug ya chè, mə̀ ya zug aghi mɔ̀ʼɔ ikaŋ àbɔ̀ŋɔ ne ya yaʼi icheg gì inɔ̰ bəd ne yaʼi kwàʼ ìwi kyen. Gì ze yaya ghà ane ika gha, “Tì ghumni Ŋwiye! Məd we pùmnə bəd. Bəd ghumni aməd. Məd bèrì ika!

² Tì ghiyə ane imbə̀ʼ icheg ne məd we sɔ̀bɔ isaʼi igun bəd ane ikuchèg ne taŋ kòʼ. À ya bə̀ ikuchèg tesiʼ. Wì fə zì ichə igun àkwàrì aka ze ne yaya chìkə̀ isəg icheg ne ze yaya nɔ̀kɔ̀ mbaŋà abu abu. Ŋwiye fə zì ichə igun məd imbə̀ʼ icheg ne wì ya zweti bəd àfàʼì Ŋwiye.”

³ Mbi ya ywìrì kyen ghà gha, “Tì ghumni Ŋwiye! Ndiʼ ze ane iywid we ne tɔ̰̀ aməd ze kɔ̀ʼɔ ghò ikaŋ àbɔ̀ŋɔ kwàʼ ane ighə̀m imɔʼ.”

⁴ Itog bəd mbe ìghum ibe chɔ̀b ikwè tì ighi izɔm mbe ikwè ya gundi aseg ghùmni Ŋwiye ne ya yaʼi ichughi igun atən ifɔn. Mbi yaya ghùmnə ghà gha, “À ya ane! Tì ghumni Ŋwiye!”

Anatì njə̀m imbə̀ʼ iteri inami Ŋwan njə̀g

⁵ Gì ya ghàm ane atən ifɔn, ghà gha, “Mbə̀ ghumni ìwa Ŋwiye, mbə̰ bəd àfàʼì məd məjìm. Mbə̰ mbe ne ghùmnə aməd, wə̀d ijìm ghumni aməd, ni ko ane bəd kwa kwa ghò pè ane mbi kyen kyen!”

⁶ Mə ya zug aghi mɔ̀ʼɔ ne ya yaʼi icheg gì inɔ̰ bəd ne yaʼi kwàʼ ìwi kyen. Gì ze ya bə̀ yaʼ kwàʼ icheg ni gha à ya tigyi nɔʼ nɔʼ te jòʼò bə̀ ywìrì yaʼ icheg ni gha à ya mbə̀ŋ ne kùmə̀. Zì ya ghà ane ika gha, “Tì ghumni Ŋwiye! À ya ane imbə̀ʼ icheg ne Anɔŋisəg, ìwa Ŋwiyekɔʼ we se tùmbə̀ isəg.

⁷ Tì taŋ gyendi awa bə̀ nàʼ ighumni abə Ŋwiye, imbə̀ʼ icheg ne nyùmə̀ fə kòʼ ne Ŋwan njə̀g biri nam. Àyi igən məd fə chuʼri ìwi nyɔd.

⁸ Ŋwiye fə nàʼ ndwi àka inun ne mbi tangi ane linèn ibo gha wì ziye. kwàʼ ndwi njàndi njàndi ne zḛ.” (Ndwi àka inun ze ya inug chɔm mbe ne bəd Ŋwiye mbe ne təmi zen mbe ghìyə̀.)

⁹ Angirə̀ we ya ghà inum gha, “Ŋwàʼra anug azo̰. Ŋwiye zì àbɔrɔ̀bɔd igun bəd mbe ne mbi kaʼi ane iteri inami Ŋwan njə̀g.” Angirə̀ we ya ywìrì ghà gha, “Aŋa ya kwàʼ tìngam tesiʼ ne Ŋwiye ghàmi.”

¹⁰ Mə ya zug ane, si gùndi aseg ibo imbìghè ni ghumni aməd. Si ya gha, wì ya ghà inum gha, “Imbə̀ʼ àghò ghiyə awe ane! Mo ya wə̀d àfàʼì abɔ̀ʼ ine tì ìmbe məfi fɔrɔ ìte njàbi te ne ghà tesiʼ imbə̀ʼ Yeso. Ghumni yaʼ Ŋwiye!” Mə ghà ane imbə̀ʼ icheg ne à ya tesiʼ imbə̀ʼ Yeso we ghìyə̀ gha bədkə̀n gha ikən Ŋwiye.

Anatì njə̀m imbə̀ʼ wə̀d ne kɔʼi nyam mə̀kara fu fu

¹¹ Mə ya bàd icheg ne ikaŋ àbɔ̀ŋɔ fiʼe, bə̀ bàd nyam mə̀kara fu fu mɔ̀ʼɔ angu. Mbi ya kàrà mbaŋà ze ne kɔ̀ʼɔ nyam mə̀kara ze ane Wə̀d inug tesiʼ bə̀ kàrà ane Wə̀d ne ghà anug bə̀ fàʼà. À ya wə̀d ne sàʼa bəd bə̀ màʼà ibid ane icheg ne koʼi.

¹² Aghə məd ya icheg inemi iywid. Wì ya zì ighi atog ifɔn nɔʼ nɔʼ igun àzi atog. Wì ya bèrì ikum mɔ̀ʼɔ ne mbi ŋwaʼri igun məd, ne chəyi wə̀d mɔ̀ʼɔ kyeri ikum we chèyi ane məd.

¹³ Wì ya zì ndwi ne mbi ya chùbi inga anəm. Ikum məd ya “Ìngam Ŋwiye”.

¹⁴ Tinɔ̰ mə̀sogyì mbe ne yaʼi ikaŋ àbɔ̀ŋɔ ya zì ndwi àka inun ne mbi tangi ane linèn ne zḛ bə̀ fùyə. Mbɔb ya kɔʼ igun nyam mə̀kara fu fu si bèni abɔ̀ʼ məd.

¹⁵ Ibeg ibid tɔ tɔ ya dù ibo inga ichug. À ya ibeg ibid ne wì biri niŋ màʼ ibid chè iben ijìm angu. Wì biri tùmbì awɔb ane ika ijìm. Wì biri mḭ̀ titam vayìn inga asiŋi ze ne mbe mḭ̀yḛ̀ mənoʼ. Àzo̰ ya chwìye icheg ne Ŋwiyekɔʼ we taŋ gàŋa.

¹⁶ Ikum we ne yaʼi igun ndwi məd bə̀ fɔrɔ igun ìtìb aghog məd ya, “Ifɔn abə məfɔn fɔrɔ Anɔŋisəg abə itog bəd ijìm.”

¹⁷ Mə ya bàd angirə̀ ne ya təmi igun nyùmə̀. Wì ya kyen ane ika ghàm abə tìnən tijìm icheg izam ne yaya fìrè ibə̀m ikaŋ gha, “Mbə̀ yeʼe fète jəg iteri kyen we ne Ŋwiye kàʼi.

¹⁸ Mbə̀ yeʼe kud məfɔn, kud itog bəd igun mə̀sogyì, kud mə̀sogyì, kud nyam mə̀kara, kud bəd mbe ne kɔ̀ʼɔ nyam mə̀kara te, bə̀ kud fɔrɔ bəd məjìm, kə̀ àkə ìbòʼì kə àkə bəd ne yaʼi awɔb ane ìwɔb ighəm, kə̀ àkə bəd kyen kyen kə̀ àkə bəd kwa kwa!”

¹⁹ Mə ya bàd nyam kyen mbègtog ze bə̀ bàd məfɔn igun isəg tì tinɔ̰ ìmbɔb mə̀sogyì. Mbi ya fɔti ni màʼ ibid tì wə̀d we ne kɔʼi nyam mə̀kara ze tì mə̀sogyì məd.

²⁰ Mbi ya gwì nyam kyen ze bə̀ gwì wə̀dkə̀n we ne ghà inug ako ne yaya ghìyə̀ iyeti inug ane ìwi ikum. Wì ya chè anjìm iyeti inug mbe tàmbi bəd mbe ne mbi ya zi aneni ze abə nyam kyen ze igun inɔb bə̀ tàmbi bəd mbe ne yaya ghùmnə aghi-ŋwiye məd. Mbi ya màʼ nyam kyen ze bə̀ màʼ wə̀dkə̀n inug ako we izɔm inga asiŋi ne sɔfɔ̀ we ghìyə̀ iywid kyen bere.

²¹ Anyumə̀ ne mbi ya ghi ane, wə̀d we ne kɔʼi nyam mə̀kara ze ya zweti məfɔn məjìm igun isəg bə̀ zwèti ìmbɔb mə̀sogyì məjìm ane ibeg ibid we ne dùwə̀ ibo inga ichug. Tìnən te tijìm ya kud nyàmnyɔd iwu bəd mbe ìtɔb tibum sweg.