Ɨnû 18 - Ikan feg

Anatì njə̀m imbə̀ʼ Babilɔ̀n kyen ne buʼə

¹ Mə ya bàd angirə̀ ndəŋ ne ya swiʼi ikaŋ àbɔ̀ŋɔ. Wì ya taŋ bèrì ika. Ìzḛzḛ we ne yaya zùʼə ane məd ya ghì isiŋi ijìm igun isəg zen.

² Wì ya kyen ane gì ka ka ghà gha, “Babilɔ̀n kyen fə buʼə! Wì fə buʼə! Wì fə bə̀ŋə̀ ane asiŋi ne izwighi tibɔ̀ŋ mbe chùghə angu, asiŋi ne izwighi mbe ne chəyi mbi zḛ mbe nə̀mbə̀ angu, asiŋi ne tìnən te ne chəyi ti zḛ tì nyam te ne bəd mbe bà̰ te nə̀mbə̀ angu.

³ Bəd inga iben ijìm fə no mənoʼ ka ka məd. Mənoʼ mbe ya anug ni nɔ̀kì mə̀yi kə̀ nɔ̀kì mbaŋà abu abu. Məfɔn mbe igun isəg fə nɔ̀kì tì məd abu abu. Bəd məjìm igun isəg ne ghìyə̀ iywin fə fòʼ ikab ane ighi nɔʼ nɔʼ məd mbe ne we tàra nyɔd inga.”

⁴ Mə ya zug gì ndəŋ ne ya ghàmi ikaŋ àbɔ̀ŋɔ ghà gha, “Ìmbum bəd, mbə̀ duwə inga məd, imbə̀ʼ mbə̰ nɔ̀ʼ ghì inug tibɔ̀ŋ mbe ne məd we ghìyə̀. Mbə̀ duwə imbə̀ʼ ngəʼ ka ka te ne nyḭ̀yḛ igun məd bə̀ nyi igun inən.

⁵ Inug tibɔ̀ŋ məd fə nɔʼ ghì idum kɔʼ ghò pè ikaŋ àbɔ̀ŋɔ. Ane, Ŋwiye fə wendi inug tibɔ̀ŋ mbe ne məd we ghìyə̀.

⁶ Mbə̀ ghiyə ibo kwàʼ icheg ne wì ya ghi abə bəd ndəŋ. Inug mbe ne wì ya ghi inən, mbə̀ ywite ibo achug abe. Mbə̀ nyamba mənoʼ ka ka aghəm abe nàʼ ibo. Mbə̀ naʼa məyi inga toʼ ze ne wì ya bə nàʼ inən.

⁷ Məd yaya tə̀rə̀ yi bə̀ tàra ìwi nyɔd inga ighi. Ane, mbə̀ taŋ chə aməd bə̀ ghì wì se sɔ̀mnɔ̀. Məd we ghà inga ìzi fìŋ gha, ‹Mo ya àyi ne yaʼi ifɔn. Mo kayi iku-àyi. Ane, chəyi mə̀ biri nɔʼ dèg!›

⁸ Icheg ne məd we ghà ane, aku ngəʼ kyen kyen biri nyi igun məd imɔʼ imɔʼ. Ngəʼ te ya ighɔn, tì àwàrikə̀m fɔrɔ njèg ka ka. Mbi biri tɔ̀n aməd ane iywid imbə̀ʼ icheg ne Anɔŋisəg Ŋwiye we ne sàʼa aməd bèrì ika.”

⁹ Məfɔn mbe igun isəg ne ya nɔ̀ki tì məd abu abu bə̀ tə̀d inga ighi tì məd, mbi biri chwen məsi bə̀ dèg aməd anyumə̀ ne mbi biri bàd ndiʼ ane iywid we ne tɔ̰̀ aməd.

¹⁰ Ngəʼ kyen biri ghì mbɔb bɔ. Mbi biri si təm ane agha ne sa si gha, “Ngəʼ kyen fə nyi igun ine! Ngəʼ kyen fə nyi igun ine, àghò asiŋi kyen, àghò Babilɔ̀n ne yaʼi aben ne beri ika! Ŋwiye fə niŋ məyi awà ifibì chə awe!”

¹¹ Bəd iywin məjìm igun isəg biri chwen məsi bə̀ dèg aməd imbə̀ʼ icheg ne chəyi wə̀d ni zon ighi mbe ne mbe fèndè.

¹² Chəyi wə̀d ni zon ighi mbe ne mbi tangi ane gol, kə̀ sibà, kə̀ ateg àka inun kə̀ bə̀ ane mə̀pə. Chəyi wə̀d ni zon ndwi àka inun te ne mbi baʼi ane linèn, ndwi bàghi, ndwi ne mbi tangi ane sig tì ndwi ne məfɔn mbe zìyè. Chəyi wə̀d ni zon tiku ized ijìm te ne nyòʼro ifɔ chɔm. Chəyi wə̀d ni zon tiku ighi ijìm mbe ne bəd ne beri ibo ìfàʼì chɔm tangi ane asɔŋ sen, ane iku ized àka inun ijìm, ane brons, ane ayòn fɔrɔ ane mabə̀.

¹³ Chəyi wə̀d ni zon tiku ighi te ne nyòʼro ifɔ chɔm icheg sinamɔ̀n, titeti, ìnen, mər fɔrɔ frankinsèns. Chəyi wə̀d ni zon mənoʼ kə̀ məwud, kə̀ aburi ngə̀ŋ mə̀kara, kə̀ kyì, kə̀ mə̀jàkas, kə̀ njə̀g, kə̀ nyam mə̀kara, kə̀ mbi mətwə̀ mbe ne nyam mə̀kara te sùŋə̀. Chəyi wə̀d ni zon ka bèyi bəd mbe ne yaʼi ìbòʼì.

¹⁴ Bəd iywin mbe biri ghà ibo gha, “Ighi chɔm chɔm ijìm mbe ne àghò yaya kə̀bə̀ ni bèrì fə nòrò yi ane ine. Ìmbe ighi njandi njandi ijìm fə nim. Chəyi àghò biri nɔʼ ywiri bàd ighi mbo̰ ijìm!”

¹⁵ Bəd iywin mbe ne yaya fèndè ighi mbo̰ ibo bə̀ bèrè ìzɔb chùd, mbi biri si təm awɔb ane agha ne sa icheg ne mbɔb mbe bɔ gha mbi biri zə̰ ngəʼ icheg məd. Mbi biri chwen məsi bə̀ se dèghè mèʼè məchə gha,

¹⁶ “Ngəʼ kyen fə nyi igun ine! Ngəʼ kyen fə nyi igun ine, àghò aben kyen, ne ìmbe bəd yaya zìyè ndwi àka inun ne mbi baʼi ane linèn, bə̀ zìyè ndwi ne məfɔn mbe zìyè tì ndwi bàghi, bə̀ ghìyə̀ ngwèn ane ndəŋ te ne mbi tangi ane gol, ane ateg àka inun bə̀ fɔrɔ ane mə̀pə!

¹⁷ Ighi mbe ijìm fə nim kwa ane awà fìbì.” Itog bəd igun bəd mbe ne tḭ̀yḛ ibaŋ igyi, tì bəd mbe ne yḛ̀ inga ibaŋ igyi, tì bəd mbe ne tḭ̀yḛ ibaŋ igyi fɔrɔ bəd məjìm mbe ne fàʼà inga igyi, mbi biri təm ane agha ne sa,

¹⁸ si kyen ane gì ka ka anyumə̀ ne mbi ya bàri ndiʼ ane iywid we ne tɔ̰̀ aməd. Mbi biri bàd ane si gha, “Àkə aben zeg ne yaʼi icheg aben kyen azo̰?

¹⁹ Bəd ya kùm agwi igun ìmbɔb itog icheg ne mbi yaya chwḛ məsi bə̀ dèghè. Bəd yaya ghìyə̀ ane ghà ane gì ka ka gha, Ngəʼ kyen fə nyi igun ine! Ngəʼ kyen fə nyi igun ine, àghò aben kyen ne bəd məjìm mbe ne ya beri ibaŋ igyi ya fòʼi awɔb ane ighi mbe ne àghò ya beri! Ighi mbe ijìm fə nim məyi ane awà ifibì.

²⁰ Bəd məjìm mbe ne yaʼi ikaŋ àbɔ̀ŋɔ, mbə̀ gyendi imbə̀ʼ icheg ne Ŋwiye fə nimni aməd! Bəd Ŋwiye tì bədtɔm Kristo fɔrɔ bədkə̀n Ŋwiye, mbə̀ gyendi imbə̀ʼ icheg ne Ŋwiye fə zì isaʼi igun məd imbə̀ʼ inug tibɔ̀ŋ mbe ne wì ya ghi inən!”

²¹ Angirə̀ ne beri ika ya bèʼì iteg kyen ne yaʼi icheg iteg ngə̀ŋ, màʼ inga igyi tìbà. Wì ya màʼ ane gha, “À ya icheg ne tì biri màʼ Babilɔ̀n aseg ane ika. Chəyi bəd biri nɔʼ ywiri bàd aməd.

²² Chəyi bəd biri nɔʼ ywiri boʼ inɔŋi kə̀ nɔ̀ʼ ywìrì zə̀ʼ ikyeg inga ine. Chəyi bəd biri nɔʼ ywiri fə àmbara bə̀ fə tàŋ inga ine. Chəyi wə̀d abo àfàʼì chɔm biri nɔʼ ywiri tangi ighi inga ine. Chəyi bəd biri nɔʼ ywiri ghɔ̀ʼ ighi inga ine.

²³ Chəyi anam biri nɔʼ ywiri zuʼ inga ine. Chəyi mbi biri nɔʼ ywiri ghì inami inga ine. Ìmbe bəd iywin ya yaʼ bəd ne beri ighumni igun isəg. Àghò yaya tàmba bəd inga iben ijìm ane tikaŋì.

²⁴ Anəm bədkə̀n Ŋwiye tì anəm bəd Ŋwiye fɔrɔ anəm bəd məjìm mbe ne mbi ya zweti igun isəg fə zɔʼ awe.”