Ɨnû 14 - Ikan feg

Anatì njə̀m imbə̀ʼ Ŋwan njə̀g tì bəd 144,000

¹ Mə ya nèn inum imbìghè bàd Ŋwan njə̀g ne ya təmi ikaŋ iwum Zayɔ̀n. Məd ya yaʼ tì bəd chuʼ iki ifibì tì ìghum ikwè chɔ̀b ikwè. Mbi ya ŋwàʼrì ikum Ŋwan njə̀g bə̀ ŋwàʼrì ikum Mbaʼ məd ane ìmbɔb ikəŋi isi.

² Mə ya zug gì ne ghàmi ikaŋ àbɔ̀ŋɔ kwàʼ icheg ni gha à ya tigyi nɔʼ nɔʼ te jòʼò bə̀ kwàʼ icheg ni gha à ya mbə̀ŋ ze kùmə̀ kwàʼ ane ika. Gì ze yaya ghàmà kwàʼ icheg ni gha à ya bəd ne bòʼo abin mbe nwìʼe inɔŋi.

³ Bəd mbe chuʼ iki ifibì tì ìghum ikwè chɔ̀b ikwè ya təm imbìghè abə atən ifɔn, imbìghè abə ighi izɔm ikwè mbe fɔrɔ imbìghè abə itog bəd mbe, se zə̀ʼə̀ ikyeg feg. Chəyi wə̀d mɔ̀ʼɔ ne tì wì ya kwembi ikyeg we chèyi ane bəd mbe chuʼ iki ifibì tì ìghum ikwè chɔ̀b ikwè ne Ŋwiye ya zeri awɔb igun isəg.

⁴ Bəd mbo̰ ya bəd mbe ne nɔŋi ìtɔb nyàmnyɔd ti zḛ icheg ne chəyi mbi ya nɔ̀ki mə̀yi abu abu. Bəd mbo̰ ya yaʼ fɔ̀d mbaŋà. Mbi yaya bène abɔ̀ʼ Ŋwan njə̀g isiŋi ijìm mbe ne wì yaya ghò. Mbi fə zeri awɔb inga àbùʼì bəd ze igun isəg, ane nàʼ abə Ŋwiye fɔrɔ abə Ŋwan njə̀g icheg ighi mbègtog ne mbi foʼi a mben.

⁵ Chəyi inug ako kweʼì dù inɔb inga ichug. Chəyi anug tibɔ̀ŋ mɔ̀ʼɔ ne tì wə̀d ya ghà imbə̀ʼ awɔb.

Anatì njə̀m imbə̀ʼ mbè Angirə̀ Mətad

⁶ Mə ya bàd angirə̀ ndəŋ ne fìrè aton ikaŋ àbɔ̀ŋɔ. Angirə̀ we ya bèrì ikən chɔm we ne təmi ane ighə̀m imɔʼ ni ghà abə bəd mbe ne yaʼi igun isəg; abə bəd inga iben ijìm, abə bəd inga tinəbi ijìm, abə bəd inga tìngam aben tijìm bə̀ fɔrɔ abə bəd məjìm isiŋi ijìm.

⁷ Wì ya ghà ane gì ka ka gha, “Mbə̀ bɔ Ŋwiye bə̀ nàʼ ighumni ibo imbə̀ʼ icheg ne nyùmə̀ we ne məd biri saʼ bəd fə kòʼ. Mbə̀ ghumni aməd we ne ya tangi ikaŋ àbɔ̀ŋɔ, tàngi ìseg, tàngi igyi tìbà bə̀ tàngi ìdùrì!”

⁸ Angirə̀ ne pè ane ibe ya beni abɔ̀ʼ ìwi mbègtog we. Wì ya ghà gha, “Babilɔ̀n kyen fə buʼə! Wì fə buʼə! Wì ya ghì iben ijìm no mənoʼ ka ka. Mənoʼ mbe ya ikuchèg we ne mbɔb ya beri ni nɔ̀kì mə̀yi kə̀ nɔ̀kì mbaŋà abu abu.”

⁹ Angirə̀ ne pè ane itad ya beni abɔ̀ʼ inɔb. Wì ya ghà ane gì ka ka gha, “Wə̀d mɔ̀ʼɔ mə̀ ghùmni nyam kyen ze bə̀ ghùmni aghi-ŋwiye məd, mbi mə̀ fə bə̀ zì aneni igun akəŋi isi məd kə̀ igun abo məd,

¹⁰ Ŋwiye biri gaŋ abɔ̀ʼ məd si chə aməd. Ane ya icheg ni gha wì fə zì mənoʼ inga toʼ məd ne chəyi wì nyàmbi, ane ghì gha wì no. Ŋwiye biri chə tengàŋ ane iywid, inga sɔfɔ̀ imbìghè abə mbè angirə̀ ìzḛzḛ fɔrɔ imbìghè abə Ŋwan njə̀g.

¹¹ Ndiʼ ane iywid we ne Ŋwiye we chə awɔb biri se kɔ̀ʼɔ ghò ikaŋ àbɔ̀ŋɔ kwàʼ ane ighə̀m imɔʼ. Kə̀ àkə tisi kə̀ izimi, chəyi àzwètì biri yaʼ abə bəd mbe ne ghùmnə nyam kyen ze bə̀ ghùmnə aghi-ŋwiye məd. Chəyi àzwètì biri bə yaʼ abə wə̀d we ne zi aneni ze ne ya ikum nyam ze igun ìwi nyɔd.”

¹² Ane ya gha, bəd Ŋwiye bèrì ni nyìʼ. Mbe bèrì ni nɔ̀ŋì mə̀nɔ̀ʼɔ̀ Ŋwiye bə̀ bèrì ni nɔ̀ŋì fìŋ igun Yeso.

¹³ Mə ya si zug gì mɔ̀ʼɔ ne ya ghàmi ikaŋ àbɔ̀ŋɔ gha, “Ŋwàʼra gha: Bəd mbe ne ku ni ko amad anìŋ se ghò imbìghè, ne yaʼi ane ifɔti tì Anɔŋisəg, Ŋwiye ziye àbɔrɔ̀bɔd igun inɔb.” Azwighi Ŋwiye ze gha, “E, à ya kwàʼ ane. Mbi biri zwètì ane ìfàʼì mbe ne mbe fàʼà imbə̀ʼ icheg ne inug mbe ne mbi fə ghi biri beni abɔ̀ʼ inɔb!”

Anatì njə̀m imbə̀ʼ icheg ne mbi biri fòʼ ighi igun isəg

¹⁴ Mə ya nèn si bàd pàʼ fu fu mɔ̀ʼɔ. Wə̀d mɔ̀ʼɔ ne ya yaʼi icheg Ŋwan Wə̀d ya chughi igun pàʼ ze. Wì ya zì aghi atog ifɔn ne mbi ya tangi ane gol. Wì ya bə̀ nyìmi ibeg tɔ tɔ ne mbe fòʼò ighi mben angu.

¹⁵ Angirə̀ ndəŋ ya dù inga mbàn Ŋwiye pè kyen ane gì ka ka ghà abə wə̀d we ne chughi igun pàʼ ze gha, “Fòʼo ighi igun isəg ane ibeg we ne àghò nyìmi imbə̀ʼ icheg ne nyùmə̀ ni niŋ ighi fə kòʼ. Ighi mbe ne mbi beri ni niŋ igun isəg fə tə̀n.”

¹⁶ Ane, wə̀d we ne ya chughi igun pàʼ ze ya nwḭ̀ ìfi ibeg igun isəg si fòʼ ighi igun isəg.

¹⁷ Angirə̀ ndəŋ ya dù inga mbàn Ŋwiye ze ne yaʼi ikaŋ àbɔ̀ŋɔ. Wì ya bə̀ bèrì ibeg tɔ tɔ we ne mbe fòʼò ighi angu.

¹⁸ Angirə̀ ndəŋ, ne ya beri ika igun iywid ya dù iban ikwijə̀ŋ àfàtì pè kyen ane gì ka ka ghà abə angirə̀ we ne beri ibeg tɔ tɔ we gha, “Niŋ ìwe ibeg tɔ tɔ we ne mbe fòʼò ighi angu, sɔ̀pi tìtab vayìn ane ized vayìn mbe ne yaʼi igun isəg. Sɔpi imbə̀ʼ icheg ne titam vayìn te ne yaʼi igun isəg fə tə̀n.”

¹⁹ Ane, angirə̀ we ya nwḭ̀ ìwi ibeg, sɔ̀pi tìtab ane ized vayìn mbe ne yaʼi igun isəg. Wì ya feti titam te màʼ inga ibighi kyen ne mbe mḭ̀yḛ̀ mənoʼ inga. Aŋa ya ni chwi icheg ne Ŋwiye we gàŋa.

²⁰ Mbi ya mḭ̀yḛ̀ titam vayìn te inga asiŋi ze ne mbe mḭ̀yḛ̀ mənoʼ vayìn ne kayi inga ikye aben ze. À ya anəm ya du inga titam vayìn te. Anəm ne ya kɔŋi igun asiŋi ze ya yèn icheg mə̀kìlometà aki atad, bə̀ sà ikaŋ icheg metà imɔʼ tì aba.