Ɨnû 13 - Ikan feg

Anatì njə̀m imbə̀ʼ nyam kyen kyen mɔ̀ʼɔ tibe

¹ Mə ya ywìrì bàd iku nyam kyen mɔ̀ʼɔ ne ya du inga igyi tìbà. Zì ya bèrì ndɔŋ ìghum bə̀ bèrì itog ìsàmbe. Ndɔŋ te ìghum ya bèrì ighi atog ifɔn igun, ndɔŋ tì àzi ndɔŋ tì àzi. Itog mbe ìsàmbe ya bə̀ bèrì tikum ne chàpà Ŋwiye ne mbi ŋwàʼri igun, atog tì ìwi atog tì ìwi.

² Nyam kyen ze ya yaʼ icheg imaŋ. Ighog məd ya yaʼ icheg ìmbi bog baʼ. Ichug məd ya yaʼ icheg ìwi àfɔn. Tìsɔ̀ʼ jo ze ya nàʼ ìwi ika tì àzi atən ifɔn fɔrɔ àzi ati wə̀d kyen abə nyam ze.

³ Atog amɔʼ ane itog mbe ne nyam ze ya beri ya yaʼ icheg ni gha mbe zì ana̰ igun ne tì ze zweti nyam ze. Si ya gha, ana̰ ze ya fə mèg yi. Anug ya chè bəd igun isəg ijìm, mbi se bène abɔ̀ʼ nyam kyen ze.

⁴ Wə̀d ijìm ya ghumni tìsɔ̀ʼ jo imbə̀ʼ icheg ne zì ya nàʼ ìwi ika abə nyam kyen ze. Bəd ya bə̀ ghùmni nyam kyen ze gha, “Àkə we yaʼi icheg nyam kyen izo̰? Àkə we ne tì wì zɔŋ tì nyam kyen izo̰?”

⁵ Mbi ya sàŋì nyam ze zì nɔ̰ nyɔd ghàm inug ne zɔ̀mbɔ̀ Ŋwiye. Mbi ya bə̀ sàŋì gha zì beri ika igun ighi ijìm ane tituʼ titad tì aba.

⁶ Zì ya ko chàpì Ŋwiye tì ikum Ŋwiye tì asiŋi ze ne Ŋwiye we chùghə, bə̀ chàpì fɔrɔ bəd məjìm ne chùghə ikaŋ àbɔ̀ŋɔ.

⁷ Mbi ya sàŋì gha zì zɔŋɔ bəd Ŋwiye bə̀ chè awɔb. Mbi ya bə̀ nàʼ ika ibo igun tinəbi tijìm te ne yaʼi inga iben ijìm tì tìngam bəd məjìm fɔrɔ igun aku bəd ajìm.

⁸ Bəd ne yaʼi igun isəg məjìm biri ghumni nyam kyen ze, chèyi ane bəd mbe ne Ŋwan njə̀g we ne mbi ya zweti ya fə ŋwàʼri ìtɔb tikum inga àŋwàʼrì ze ne wì ŋwàʼri tikum bəd mbe ne biri jəg ìtḛ̀. Wì ya fə ghum ŋwàʼri ane bɔŋ se tànga isəg.

⁹ Wə̀d ne tì wì zug anug, wì zug!

¹⁰ Wə̀d ne mbi fə beri ni gwì aməd mbi biri bə gwì aməd. Wə̀d ne mbi beri ni zweti aməd ane ibeg ibid, wì biri bə̀ ku ane ibeg ibid. Anug azo̰ ya kə̀bə̀ gha bəd Ŋwiye nyimbi fìŋ bə̀ bèrì ibḛfiŋ.

¹¹ Mə ya bàd nyam kyen ndəŋ ne du inga ìseg. Zì ya bèrì ndɔŋ tibe icheg ndɔŋ njə̀g. Zì yaya ghàmà icheg jo tìsɔ̀ʼ.

¹² Zì yaya tùmbə̀ bəd ane ika we ne nyam kyen mbègtog ze ya nàʼi ibo. Zì ya ghì ane ika, bəd gundi aseg məjìm ghùmni nyam kyen mbègtog ze ne ana̰ məd ze ya fə mèghi.

¹³ Nyam kyen ze ne pè ane ibe ya ghì iyeti inug. Zì ya ghì iywid dù ikaŋ àbɔ̀ŋɔ swìʼi yèʼe igun isəg, wə̀d ijìm bad.

¹⁴ Zì ya tambi bəd məjìm igun isəg ane iyeti inug ne zì yaya ghìyə̀ icheg ne nyam kyen mbègtog ze ya nàʼi ika ibo. Nyam kyen ze ya ghà inɔb mbi tangi aghi-ŋwiye nɔ̀ŋì ni ghumni nyam kyen ze ne mbi ya zì ana̰ igun məd ane ibeg ibid, si ya gha chəyi zì ya ku.

¹⁵ Mbi ya sàŋì nyam kyen ze gha zì zwèghe igun aghi-ŋwiye àzi nyam kyen mbègtog, ze si yaʼ izɔm. Zì ya ghì ane ni ghì gha aghi-ŋwiye ze se ghàmà. Mbi ya bə̀ sàŋì gha wì zweti wə̀d ijìm ne chəyi wì ya bḛ ni ghumni aghi-ŋwiye ze.

¹⁶ Nyam kyen ze ya nyimi bəd məjìm ane ika, kə̀ àkə bəd fum kə̀ bəd ikab, kə̀ àkə məfeg kə bəd ne kayi məfeg, zì ya ghì məjìm bḛ ni zì aneni nyam ze igun ìmbɔb iba ibo jəghi kə̀ zì igun ìmbɔb ikəŋi isi.

¹⁷ Chəyi tì wə̀d zon aghi kə̀ fen aghi ne chəyi wì beri aneni ze. Aneni ze ya ikum nyam ze kə̀ à ya nɔmbà ne təmi ane ikum məd.

¹⁸ Anug azo̰ ya kə̀bə̀ gha tì beri iwe. Wə̀d ne beri iwe we tì wì kyèri aton ane nɔmbà nyam kyen ze imbə̀ʼ icheg ne nɔmbà we ya tə̀mə ane ati ikum wə̀d. Nɔmbà we ya aki tìfughə tì ìghum tìfughə chɔ̀b tìfughə.