Ɨnû 12 - Ikan feg

Anatì njə̀m imbə̀ʼ àyi tì tìsɔ̀ʼ jo

¹ Iyeti inug ne che ibo ya dù ikaŋ àbɔ̀ŋɔ. Àyi mɔ̀ʼɔ ya yaʼ angu ne ya zi nyùmə̀ ane ìzi ndwi. Wì ya nɔ̀ŋì ìmbi ighog igun iməg bə̀ zì aghi atog ifɔn ne beri titəm iməg ìghum chɔ̀b ibe.

² Àyi we ya yaʼ tì ibum. Wì yaya nɔ̀mbɔ ni gwi. Tibuʼ te ne wì yaya zùghə ya ghì gha wì se dèghè kwàʼ ane gì ka ka.

³ Ayeti anug ndəŋ ya ywìrì dù ikaŋ àbɔ̀ŋɔ. Tìsɔ̀ʼ jo bàghi mɔ̀ʼɔ ya yaʼ angu. Zì ya bèrì itog ìsàmbe, bèrì ndɔŋ ìghum bə̀ bèrì ighi atog ifɔn ìsàmbe igun itog məd mbe.

⁴ Ikɔn məd ya sìmì aba titəm iməg afibì inga iba itad, màʼ igun isəg. Tìsɔ̀ʼ jo ze ya təm imbìghè abə àyi we ne yaya nɔ̀mbɔ, ni gha wì mə gwi, zìye kud ŋwan məd.

⁵ Àyi we ya gwi ŋwan mbaŋà. Ŋwan mbaŋà we ya we ne beri ni tùmbì bəd məjìm igun isəg ane ika ijìm. Mbi ya zàmbì wèbì ŋwan mbaŋà we ghò tì ìwiwən abə Ŋwiye ghò nɔ̀ŋì igun atən ifɔn məd.

⁶ Àyi we ya nòrò ghò inga ibad zɔbi, asiŋi ne Ŋwiye ya fə tangi ibo, ne à ya asiŋi ne mbi biri kyèʼì aməd ane tituʼ itad tì aba.

Mbè angirə̀ kàmni tìsɔ̀ʼ jo ze ikaŋ àbɔ̀ŋɔ

⁷ Ibid ya ko ikaŋ àbɔ̀ŋɔ. Mayikə̀ ne yaʼi angirə̀ kyen tì ìmbi mbè angirə̀ ya fɔti zɔ̀ŋ tìsɔ̀ʼ jo ze. Tìsɔ̀ʼ jo ze tì ìmbi mbè angirə̀ ya bə̀ fɔ̀ti zɔ̀ŋ Mayikə̀.

⁸ Si ya gha, Mayikə̀ tì ìmbi mbè angirə̀ ya màʼ ibid chè awɔb. Ane, chəyi tìsɔ̀ʼ jo ze tì ìmbi mbè angirə̀ ya ywirì bèrì asiŋi ikaŋ àbɔ̀ŋɔ.

⁹ Mbi ya màʼ tìsɔ̀ʼ jo ze igun isəg, ne ya jo ze ne ya yaʼi te aneg, ne mbe kàrà ane Debrə̀ kə̀ Sàtàn. Mbi ya màʼ aməd tì mbè angirə̀ məd məjìm igun isəg. Jo ze ya tàmba isəg ijìm.

¹⁰ Mə ya zug gì ne ka ikaŋ àbɔ̀ŋɔ. Gì ze ya ghà gha, “Amad anìŋ, Ŋwiye fə chì ìmbi bəd inga ngəʼ. Wì fə chwi ìwi ika. Məd we tùmbə̀ bəd məjìm icheg ifɔn! Amad anìŋ, wə̀d we ne Ŋwiye zɔ̀ʼi fə chwi ìwi ika imbə̀ʼ icheg ne mbi fə chì wə̀d we ne ya təmi imbìghè abə Ŋwiye màʼ igun aseg. Məd ya wə̀d we ne zìyè isaʼi igun ìmba məfi fɔrɔ ìta njàbi ne bḛ Kristo. Məd ya zìyè isaʼi igun inɔb tisi fɔrɔ tizimi.

¹¹ Mbɔb fə màʼ ibid chè aməd anjìm iwu Ŋwan njə̀g bə̀ fɔrɔ anjìm ikən chɔm we ne mbɔb yaya ghà. Chəyi mbi yaya bɔ iwu, ka ya bè anyumə̀ ne mbi yaya kə̀bə̀ ni zweti awɔb.

¹² Ane, ikaŋ àbɔ̀ŋɔ tì wə̀d ijìm we ne yaʼi ikaŋ àbɔ̀ŋɔ, mbə̀ ya gyènde! Si ya gha, ngəʼ kyen biri nyi igun inən, àghò isəg tì àghò tìbà imbə̀ʼ icheg ne Debrə̀ we fə swiʼi yèʼe abɔ̀ʼ inən tì agaŋ kyen. Wì kyèri gha ìwi nyùmə̀ fə tumbə!”

Jo tìsɔ̀ʼ chɔʼ ibɔʼì ighog abə bɔn ane aghaŋ àyi we

¹³ Anyumə̀ ne tìsɔ̀ʼ jo ze ya bàri gha mbi fə màʼ aməd igun isəg, zì ya ko ni kamni àyi we ne ya gwi ŋwan mbaŋà we.

¹⁴ Si ya gha, mbi ya nàʼ tibabì izam kyen abə àyi we. Tibabì te ya yaʼ tibe. Mbi ya nàʼ ibo gha wì bàrà nòrò abə tìsɔ̀ʼ jo ze ghò inga ibad zɔbi, asiŋi ne mbi biri kyèʼì aməd ane tituʼ titad tì aba.

¹⁵ Tìsɔ̀ʼ jo ze ya tù mənib ibo inga ichug kwàʼ icheg igyi kyen ni ghì gha wi beʼe àyi we ghò.

¹⁶ Si ya gha, ìseg ya wètì àyi we. Zì ya fìʼì ìwi ichug mèrì igyi kyen we ne tìsɔ̀ʼ jo ze ya tu.

¹⁷ Tìsɔ̀ʼ jo ze ya gaŋ abɔ̀ʼ àyi we. Ane, zì ya ghò ko ni màʼ ibid tì bɔn ne si bùʼ abə àyi we. Bɔn mbe ya bəd mbe ne nɔ̀ŋɔ̀ mə̀nɔ̀ʼɔ̀ Ŋwiye bə̀ nyìme tesiʼ imbə̀ʼ Yeso kwàʼ icheg chɔm. [

¹⁸ Tìsɔ̀ʼ jo ze ya təm ane adiŋi igyi tìbà.]