Ɨnû 11 - Ikan feg

Anatì njə̀m imbə̀ʼ bəd məbe ne ya zə̰ ati

¹ Mbi ya nàʼ aməgrì inum ne ya yaʼi icheg fìmbàŋì, si ghà inum gha, “Ndò gho mə̀grì mbàn Ŋwiye ze ne yaʼi igun isəg bə̀ mə̀grì ikwijə̀ŋ àfàtì bə̀ taŋ bəd mbe ne ghùmnə Ŋwiye inga mbàn Ŋwiye ze.

² Si ya gha, imbə̀ʼ àghò məghrə awe ikye ikam mbàn Ŋwiye ze imbə̀ʼ icheg ne mbi fə nàʼ asiŋi ze abə bəd ne kayi mə̀Ju. Mbɔb biri tə̀ʼrì asiŋi ìzḛzḛ ane aməg ìghum ikwè chɔ̀b ibe.

³ Mə biri nàʼ ika abə ìmbum bəd məbe mbe ne ya zə̰ ati. Mbɔb biri zì ndwi ni chwi gha mbɔb ya inga ngəʼ ghò dènì ikən we ne mə̀ biri chà awɔb gha mbe dène ane tituʼ titad tì aba.”

⁴ Mbɔb ya ized olìf ibe fɔrɔ itən inam ibe ne tə̀mə imbìghè abə Anɔŋisəg ne tùmbə̀ isəg.

⁵ Wə̀d mɔ̀ʼɔ mə̀ kə̀b ni zì anə igun inɔb, iywid ya dùwə̀ inɔb ichug tɔ̰̀ ìmbɔb bəd ìpàb. Aŋa ya icheg ne mbɔb biri zweti wə̀d ne kə̀bə̀ ni zì anə igun inɔb.

⁶ Mbɔb bèrì ika ni wùbì àbɔ̀ŋɔ ni ghì gha imbə̀ʼ mbə̀ŋ no yi ka ane nyùmə̀ ne mbɔb mbe ghà ikən Ŋwiye. Mbɔb bə̀ bèrì ika ni bə̀ŋì tigyi ane anəm bə̀ ghì gha tiku ngəʼ ka ka tijìm te nyi igun bəd igun isəg ane nyumə̀ ne mbɔb kɔŋi.

⁷ Anyumə̀ ne mbɔb fə màni ni ghà ikən we, nyam kyen ze ne dùwə̀ inga ibighi kyen we ne chəyi ìnwḭ ya yèʼe màʼ ibid chè awɔb bə̀ zwèti awɔb.

⁸ Ìmbɔb iwu biri bɔngɔ aseg igun inɔnjì ikye aben kyen. Mbi ya bə̀ kàrà aben kyen ze ane Sodòm tì Ijìb. À ya bə̀ angu ne mbi ya kɔ̀mbi Anɔŋisəg igun azed abaʼri.

⁹ Bəd inga isiŋi ijìm tì inga tinəbi tijìm fɔrɔ bəd inga iben ijìm biri nèn ìmbɔb iwu bəd ane ineg itad tì aba. Chəyi mbi biri bḛ gha mbe twəŋi awɔb.

¹⁰ Bəd igun isəg biri taŋ gyendi bə̀ kɔd tiboʼ abə mə̀mbin imbə̀ʼ icheg ne bədkə̀n mbo̰ ne ku yaya chə bəd ne yaʼi igun isəg.

¹¹ Anyumə̀ ne ineg mbe itad tì aba ya che, Ŋwiye ya chà Azwighi ne nàʼ ìtḛ̀, ze yeʼe nyi inga iwu bədkə̀n mbe, mbi gàd nɔ̀ʼ təm titighe. Bəd ne ya bàri bədkə̀n mbo̰ ya bɔ se bìnde.

¹² Ane, bədkə̀n mbe məbe ya zug gì ka ka ikaŋ àbɔ̀ŋɔ ne ya kyḛ gha, “Mbə̀ yèʼe aŋa!” Pàʼ ya bèʼì awɔb ghò ikaŋ àbɔ̀ŋɔ. Ìmbɔb bəd ìpàb ya təm se nḛ̀ icheg ne mbe kɔ̀ʼɔ ghò.

¹³ Kwàʼ anyumə̀ we, ìseg ya ghùd kwàʼ ane ika. Aba amɔʼ inga iba ìghum ane aben kyen ze ya sùyə̀. Bəd chuʼ ìsàmbe ya ku icheg ne isiŋi ya wùri sùyə̀. Àbùʼì bəd ze ne ya pumi yaya se bìnde nàʼà ighumni abə Ŋwiyekɔʼ ne yaʼi ikaŋ àbɔ̀ŋɔ.

¹⁴ Ngəʼ kyen ne pè ane tibe ya mèg. Ngəʼ kyen ne pè ane itad ya se nḛ̀ ni yèʼe.

Anatì njə̀m imbə̀ʼ tàŋ ne pè ane ìsàmbe

¹⁵ Angirə̀ we ne pè ane ìsàmbe ya fə ìzi tì tàŋ. Gì ka ka ti nɔʼ nɔʼ si ghàm ikaŋ àbɔ̀ŋɔ gha, “À ya ìwa Anɔŋisəg fɔrɔ Wə̀d məd we ne məd zɔ̀ʼi si bèrì ika ijìm amad anìŋ ni tùmbì isəg ijìm kwàʼ ane ighə̀m imɔʼ.”

¹⁶ Itog bəd mbe ìghum ibe chɔ̀b ikwè ne ya chughi igun ìmbɔb itən imbìghè abə Ŋwiye ya gundi nɔ̀ŋì tìfe aseg se ghùmnə Ŋwiye gha,

¹⁷ “Tè nàʼ məyakà ine Anɔŋisəg, Ŋwiyekɔʼ, àghò ne yaʼi, ne ya bì yaʼ, imbə̀ʼ icheg ne àghò fə̀ ko se tùmbə̀ bəd məjìm ane ìwe ika kyen.

¹⁸ Bəd mbe ne kayi mə̀Ju məjìm yaya gàŋa. Nyumə̀ fə kòʼ ni chə̀ bəd mbe ne àghò we gàŋa inɔb. Nyùmə̀ fə kòʼ ne àghò biri saʼ bəd ne ya ku, bə̀ nàʼ chùd abə ìmbe bəd àfàʼì ne ya bədkə̀n fɔrɔ abə ìmbe bəd ne ghùmnə ìwe, kə̀ àkə bəd kyen kə̀ ìmbi kwa kwa; Nyùmə̀ fə kòʼ ni nimni bəd mbe ne chìkə̀ isəg.”

¹⁹ Ane, mbi ya si fìʼì mbàn Ŋwiye ze ikaŋ àbɔ̀ŋɔ, bàd gha tìkub mə̀nɔ̀ʼɔ̀ Ŋwiye ya yaʼ angu. Àŋwàŋwaŋ ya ŋwàŋ, isiŋi kùm, mbə̀ŋ kum, isiŋi ghùd, afim ka ka chè, awḛ nɔʼ nɔʼ bə̀ fèndi.