Ɨnû 10 - Ikan feg

Anatì njə̀m imbə̀ʼ angirə̀ ne nyimi àŋwàʼrì kwa kwa ne mbe kàri kari

¹ Mə ya bàd angirə̀ ka ka ndəŋ ne swìʼe ikaŋ àbɔ̀ŋɔ. Pàʼ ya nib məd icheg ndwi màʼi ne wə̀d zi. Tènàbà ya bə̀ dù ikaŋ, chè kad atog ibo. Ìfe məd yaya zḛ kwàʼ icheg achwi. Ighog məd ya yaʼ icheg inemi iywid ne temi kwàʼ icheg ìte.

² Wì ya nyimi àŋwàʼrì kwa kwa ne mbe kàri kari ibo ikye abo. Àŋwàʼrì ze ya yaʼ ifìʼi. Wì ya te àzi aba aghog jəghi igun igyi tìbà bə̀ te àzi aba aghog atəŋ igun ìseg.

³ Wì ya si kyen ane gì ka ka ne yaʼi kwàʼ icheg gì àfɔn. Wì ya kyen ane, mbə̀ŋ kum aghəm ìsàmbe.

⁴ Anyumə̀ ne mbə̀ŋ ze ya kùmi aghəm ìsàmbe, mə̀ ya fə ŋa ŋwàʼrà inug mbe ne mbə̀ŋ ze yaya kùmə̀ ghà inum. Si ya gha, mə̀ ya zug gì mɔ̀ʼɔ ne ya ghàmi ikaŋ àbɔ̀ŋɔ. Gì ze ya gha, “Nɔ̀ŋɔ inug mbe ne mbə̀ŋ ze kùmi ghà ine, ine inga fìŋ. Imbə̀ʼ àghò ŋwaʼra awe aseg, imbə̀ʼ àghò bə gha awe abə wə̀d!”

⁵ Ane, mə̀ ya si bàd angirə̀ we ne ya te àzi aba aghog jəghi igun igyi tìbà bə̀ te àzi aba aghog atəŋ igun ìseg ne wì nɔ̰ àzi abo jəghi ikaŋ àbɔ̀ŋɔ.

⁶ Wì ya nɔ̰ abo ikaŋ ane, bḛ zɔ̀m gha, “Chəyi mbi biri ywìri chìkì nyumə̀.” Wì ya ghàm ane ane ikum Ŋwiye we ne yaʼi izɔm kwàʼ ane ighə̀m imɔʼ, ne ya tangi ikaŋ fɔrɔ ìseg bə̀ tàngi igyi tìbà bə̀ tàngi ighi ijìm mbe ne yaʼi inga isiŋi mbo̰ ijìm.

⁷ “Si ya gha, anyumə̀ we ne angirə̀ we ne pè ane ìsàmbe biri fə ìzi tì tàŋ, Ŋwiye biri fàʼ ìmbi inug mbe ne ya yaʼi inə̀mbi icheg ne wì ya gha abə ìmbi bəd àfàʼì ne ya yaʼi bədkə̀n məd.”

⁸ Ane, gì ze ne mə̀ ya zughi zì ghàmi ikaŋ àbɔ̀ŋɔ ya ywìrì ghàm inum gha, “Ndò niŋ àŋwàʼrì ze ne mbe kàri kari ne yaʼi ifìʼi ikye abo abə angirə̀ we ne təmi igun igyi tìbà fɔrɔ igun ìseg.”

⁹ Mə ya si ghò abə angirə̀ we, pè ghà ibo gha wì naʼa àŋwàʼrì kwa kwa ze ne mbe kàri kari inum. Angirə̀ we ya ywìtì gha, “Niŋ kud! Ze biri taŋ nə̀m ine inga ichug icheg jɔg. Si ya gha, ze biri nàʼ ngəʼ ine inga fibum!”

¹⁰ Mə ya niŋ àŋwàʼrì kwa kwa ze ne mbe kàri kari ibo ikye abo kud. Ze ya nə̀m inum inga ichug icheg jɔg. Si ya gha, anyumə̀ ne mə̀ ya chwaʼi mèrì, ze ya bə̀ŋə̀ se nàʼà ngəʼ inum inga fibum.

¹¹ Ane, mbi ya ghà inum gha, “Àghò biri ywiri chètì ikən Ŋwiye imbə̀ʼ inug mbe ne wì kàʼi abə bəd nɔʼ nɔʼ, fɔrɔ abə iben nɔʼ nɔʼ, fɔrɔ abə bəd inga tìngam nɔʼ nɔʼ, fɔrɔ abə məfɔn nɔʼ nɔʼ.”