Ɨ̀fàʼì 9 - Ikan feg

Yeso bə̀ŋì Sɔl

¹ Anyumə̀ ne mbi yaya chɔ̀ʼɔ ibɔʼì ighog abə bəd Kristo, Sɔl ya chè imbìghè ni ya sìbè gha zìye biri zweti mə̀mə̀nənùg Anɔŋisəg. Ane, wì ya ghò abə atog wə̀d igun bəd mbàn Ŋwiye ni niŋ àŋwàʼrì.

² Àŋwàʼrì ze ya ni tòʼrì wə̀d ne Sɔl yaʼi abə bəd inga məchamì Ŋwiye mbe a Dàmaskòs. Ze biri ghì mbɔb kyeri gha Sɔl mə̀ bàd bəd mɔ̀ʼɔ angu ne bène abɔ̀ʼ Inɔnjì we ne Yeso yaya chwìte, kə̀ àkə mə̀yi kə̀ àkə mbaŋà, məd we tì wì gwitì awɔb kɔd niŋ ghò a Jèrusalèm ane bəd ndəŋ.

³ Anyumə̀ ne Sɔl ya niŋi àŋwàʼrì ze ghò se tìnde iban Dàmaskòs, ìzḛzḛ njandi njandi mɔ̀ʼɔ ya sàʼà zuʼ igun məd chè kad aməd.

⁴ Wì ya bu igun nyam fen aseg si zug gì mɔ̀ʼɔ ne ya ghà ibo gha, “Sɔl! Sɔl! Aton ne àghò we chɔ̀ʼɔ ìmbum ibɔʼì ighog àkə gha?”

⁵ Sɔl ya biri gha, “Anɔŋisəg, Àghò kə we?” Gì ze ya ywìtì gha, “À ya mo Yeso we ne àghò we chɔ̀ʼɔ ìmbum ibɔʼì ighog.

⁶ Nɔ̀ʼɔ amad anìŋ ghò nyi inga Dàmaskòs. Anyumə̀ ne àghò pe angu, wə̀d mɔ̀ʼɔ biri zən awe mə̀tì anug ne àghò mənyìʼ fàʼ.”

⁷ Mbaŋà te ne yaya yḛ̀ tì Sɔl ya təm mbə̀ŋə. Mbi ya zug gì ze, si ya gha, chəyi mbi ya bàri wə̀d.

⁸ Sɔl ya nɔ̀ʼ aseg, fìʼì aghə, si ya gha, chəyi wì yaya ywìrè bàrà isiŋi. Ane, mbi ya si nyìmi abo ibo, niŋ aməd ghò nyi inga Dàmaskòs.

⁹ Wì ya chughi ineg itad ne chəyi wì yaya bàrà isiŋi. Chəyi wì ya jəghi aghi mɔ̀ʼɔ kə̀ bì no.

¹⁰ Anyumə̀ we, àmə̀nənùg mɔ̀ʼɔ ne ya bḛ Kristo, ne ikum məd ya Ànàniyàs, yaya chùghə a Dàmaskòs. Anatì njə̀m mɔ̀ʼɔ ya chè aməd ne wì ya bàri icheg ne Anɔŋisəg kàri aməd gha, “Ànàniyàs!” Wì ya ywìtì gha, “Anɔŋisəg, mo gho̰.”

¹¹ Anɔŋisəg ya ghà ibo gha, “Àghò chuʼri ìwe nyɔd ghò inga achan Judàs we ne chùghə Inɔnjì ne Təmi. Àghò mə pè angu, àghò bìri wə̀d mɔ̀ʼɔ we ne nɔ̀ʼi a Tasɔ̀s ne ikum məd ya Sɔl. Məd we chàʼrà Ŋwiye amad anìŋ.

¹² Məd fə bàd anatì njə̀m ne wì bàri wə̀d mɔ̀ʼɔ ne ikum məd ya Ànàniyàs ne yeʼe pè nɔ̀ŋì ìmbi ibo igun məd ni gha wì ywìrì bàd isiŋi.”

¹³ Ànàniyàs ya ywìtì gha, “Anɔŋisəg, bəd nɔʼ nɔʼ fə mə̀tì inug inum imbə̀ʼ wə̀d gho̰. Mbi fə mə̀tì icheg ne wì fə zi ngəʼ nɔʼ nɔʼ igun ìmbe bəd a Jèrusalèm.

¹⁴ Itog bəd mbàn Ŋwiye fə nàʼ ika ibo gha wì gwite bəd mbe ne ghùmnə awe. À ya aton ne wì yèʼe aŋa aze.”

¹⁵ Wì ya ghà ane, si ya gha, Anɔŋisəg ya ghà ibo gha, “Ndò imbə̀ʼ icheg ne mə fə chɔʼ aməd ane ìmə wə̀d àfàʼì inum. Wì biri chètì anug imbə̀ʼ amə abə bəd mbe ne kayi mə̀Ju, chètì abə məfɔn bə̀ chètì fɔrɔ abə mə̀Izre.

¹⁶ Mə biri chwi icheg ne məd biri zə̰ ngəʼ imbə̀ʼ amə ibo.”

¹⁷ Ane, Ànàniyàs ya ghò nyi inga nəb ze, pè nɔ̀ŋì ìmbi ibo igun Sɔl, si ghà ibo gha, “Sɔl, ìmə ifi, Anɔŋisəg Yeso we ne du ghàm ine inɔnjì icheg ne àghò we kə̀ yèʼe aŋa, wì fə chà amə ine ni ghì gha àghò ywirì bàd isiŋi, Azwighi Ŋwiye bə yèʼe igun ine.”

¹⁸ Kwàʼ ati ati, ighi mɔ̀ʼɔ icheg ijwa ya fendi ane aghə abə Sɔl, wì ko se bàrà isiŋi. Wì ya si nɔ̀ʼ niŋ mənib.

¹⁹ Anyumə̀ ne wì ya fə jəghi, wì ya ywìrì bèrì ika. Sɔl ya chughi a Dàmaskòs ineg nɔʼ nɔʼ. Wì yaya chùghə abɔ̀ʼ bəd ne ya bḛ Kristo.

Sɔl ghàm Ìngam Ŋwiye a Dàmaskòs

²⁰ Wì ya nɔ̀ʼ witì chìkì nyumə̀, ghò inga məchamì Ŋwiye mbe ne yaʼi inga asiŋi ze, pè ko se ghàmà Ìngam Ŋwiye imbə̀ʼ Kristo. Wì yaya ghà gha, “Yeso ya Ŋwan Ŋwiye.”

²¹ Bəd məjìm mbe ne ya zughi anug ne wì yaya ghà, ya yeti se bìre gha, “Àkə kayi wə̀d we ne yaya nàʼà ngəʼ abə bəd mbe a Jèrusalèm ne kàrà ikum gho̰? Imbə̀ʼ wì yèʼe aŋa anìŋ ni gwìtì bəd mbe ne ghùmnə wə̀d we ne mbe kàrà ane Yeso? Wì biri gwìti kɔd, si niŋ ghò nàʼ abə itog bəd mbàn Ŋwiye.”

²² Tesiʼ ya gha, aziŋ ìngam ne Sɔl yaya ghàmà yaya kà ghò gho imbìghè. Wì ya kubi məchug abə mə̀Ju mbe ne yaya chùghə a Dàmaskòs icheg ne wì yaya tòʼrò inga Àŋwàʼrì Ŋwiye ze dùwə̀ zḛ gha Yeso ya Wə̀d we ne Ŋwiye zɔ̀ʼi.

²³ Anyumə̀ ne inun ineg mɔ̀ʼɔ ya fə che, mə̀Ju nɔʼ nɔʼ ya taŋ mənaŋ gha mbe zweti Sɔl.

²⁴ Si ya gha, mbi ya jə ìsə imbə̀ʼ mənaŋ mbe abə Sɔl. Mə̀Ju mbe yaya ghɔ̀mɔ̀ aməd ane tinuʼ ikam aben ze tisi fɔrɔ tizimi ni zweti.

²⁵ Si ya gha, bəd mbe ne ya beni abɔ̀ʼ Sɔl ya niŋ aməd izimi, chà aməd ane ibighi ne yaʼi ane ikam aben, si swi aməd aseg inga fiko ni gha wì gho yi.

Sɔl ghò a Jèrusalèm

²⁶ Anyumə̀ ne Sɔl ya gho a Jèrusalèm, wì ya kə̀b ni fɔti abɔ̀ʼ mə̀mə̀nənùg. Si ya gha, mbɔb məjìm yaya bɔ aməd imbə̀ʼ icheg ne chəyi mbi ya kiri bḛ gha məd ya wə̀d mɔ̀ʼɔ abɔ̀ʼ bəd mbe ne bḛ Kristo.

²⁷ Bànabàs ya niŋ Sɔl mbi ghò abɔ̀ʼ bədtɔm mbe, pè tòʼrì icheg ne Anɔŋisəg ya du ghàm abə Sɔl igun inɔnjì anyumə̀ ne wì yaya ghò a Dàmaskòs. Wì ya bə̀ mə̀tì icheg ne Sɔl yaya ghàmà Ìngam Ŋwiye a Dàmaskòs ane ikum Yeso kwàʼ ne chəyi we bɔ.

²⁸ Sɔl ya chughi tì inɔb a Jèrusalèm, se yḛ̀ nè ghàmà Ìngam Ŋwiye ane ikum Anɔŋisəg ne chəyi we bɔ.

²⁹ Wì yaya ghàmà ane, tàŋà inug inga Ìngam Ŋwiye tì mə̀Ju mbe ne yaya ghàmà Grig. Si ya gha, mbi yaya kə̀bə̀ yaʼ ni zweti aməd.

³⁰ Anyumə̀ ne məfi mbe ne ya bḛ Kristo ya kyeri anug ze, mbi ya niŋ Sɔl swìʼi ghò a Kàserìyà, si chà aməd a Tasɔ̀s.

³¹ Anyumə̀ we, tifeti bəd Kristo tijìm te ne yaʼi a Jùdeyà fɔrɔ Galìli fɔrɔ Sàmarìyà ya yaʼ ane àbɔrɔ̀bɔd. Bəd mbe ne ya bḛ ikən chɔm yaya ghùmnə Anɔŋisəg. Azwighi Ŋwiye yaya wètè bəd mbe ne ya bḛ Kristo ni ghì gha mbe təm kà. Ìwɔb inɔ̰ yaya kwèghe ghò gho imbìghè.

Pità ghùyə Enìyàs a Lidà

³² Icheg ne Pità yaya yḛ̀ inga isiŋi mbe ijìm, wì ya bə̀ swìʼi ghò mùg tì bəd Ŋwiye mbe ne yaya chùghə a Lidà.

³³ Anyumə̀ ne wì ya pe angu, wì ya bàd mbaŋà mɔ̀ʼɔ ne ikum məd ya Enìyàs. Enìyàs ya buʼrə. Chəyi wì ya kweʼì nɔ̀ʼ igun abaʼ ane tituʼ ìfàmi.

³⁴ Pità ya ghà ibo gha, “Enìyàs! Yeso Kristo fə ghù awe. Nɔ̀ʼɔ titighe, kad àze abaʼ.” Enìyàs ya nɔ̀ʼ kwàʼ ati.

³⁵ Bəd məjìm mbe ne yaya chùghə a Lidà fɔrɔ a Saròn ya bàd icheg ne wì fə bɔti se ŋa yḛ̀ yi. Ane, mbi ya si bḛ Anɔŋisəg.

Pità zwèmni Tàbità iwu a Jopà

³⁶ Anyumə̀ we ne Pità ya yaʼi a Lidà, àyi mɔ̀ʼɔ ne ya bḛ Kristo yaya chùghə a Jopà. Ikum məd ya Tàbità. Ikum məd ane ìngam Grig ya Dòkas. Wì yaya ghìyə̀ inug chɔm bə̀ wètè bəd ne chəyi àzɔb.

³⁷ Tàbità ya gùg aghɔn, ku. Mbi ya sò awu məd niŋ ghò nɔ̀ŋì inga atog nəb mɔ̀ʼɔ ikaŋ.

³⁸ Lidà ya asiŋi ne yaʼi iban Jopà. Anyumə̀ ne bəd mbe ne ya bḛ Kristo ya zughi gha Pità we a Lidà, mbi ya tɔm mbaŋà mɔ̀ʼɔ tibe gha mbe gho abə Pità, pè boʼ ibo gha, “Ìwa ifi, zàmba yèʼe ina a Jopà.”

³⁹ Pità ya nɔ̀ʼ ghò abɔ̀ʼ inɔb. Anyumə̀ ne wì ya pe angu, mbi ya niŋ aməd kɔʼ ghò inga atog nəb ze ikaŋ. Məku àyi məjìm ya yaʼ itəmbi iban Pità. Mbi yaya dèghè mèʼè məchə, chwìye ndwi maʼi bə̀ chwìye ndwi ndəŋ ne Dòkas ya tangi nàʼ inɔb anyumə̀ ne wì yaya kiri izɔm.

⁴⁰ Pità ya chà awɔb mbɔb məjìm isəg, gɔ̀m itog inwḭ aseg, chàʼra Ŋwiye, si ghàbri nyɔd nèn awu wə̀d ze, ghà gha, “Tàbità, Nɔ̀ʼɔ titighe!” Tàbità ya fìʼì aghə. Anyumə̀ ne wì ya bàri Pità, wì ya nɔ̀ʼ chùghi.

⁴¹ Pità ya nyimi abo ibo, wètì aməd gha wì təm titighe. Anyumə̀ ne wì ya ghì ane, wì ya kàrì bəd mbe ne ya bḛ Kristo bə̀ kàrì məku àyi mbe, chwi Tàbità inɔb izɔm.

⁴² Bəd ya chètì anug ze inga isiŋi ijìm inga Jopà. Ane, bəd nɔʼ nɔʼ ya bḛ Anɔŋisəg.

⁴³ Pità ya chughi a Jopà ane iki nyumə̀ mɔ̀ʼɔ abɔ̀ʼ Sayimùn we ne yaya tànga gɔb fḛ̀.