Ɨ̀fàʼì 8 - Ikan feg

¹ Sɔl ya bḛ gha mbe zweti Stifə̀n. Kwàʼ igun aneg ze ne mbi ya zweti Stifə̀n, bəd ya taŋ zì atog ane anug ni chɔʼ ibɔʼì ighog abə bəd Kristo a Jèrusalèm. Bəd Kristo mbe məjìm ya sàkà ghò inga iba iben mbe a Jùdeyà fɔrɔ a Sàmarìyà. À ya məyi bədtɔm Kristo ya si tèn a Jèrusalèm.

Sɔl chɔʼ ibɔʼì ighog abə bəd Kristo

² Bəd ne ya nɔŋi fìŋ igun Ŋwiye ya niŋ awu Stifə̀n ghò twə̀ŋi. Mbi ya taŋ dèg aməd.

³ Sɔl ya ko anug ni nimni bəd Kristo. Ane, wì ya ko se nyḭ̀yḛ anəb anəb nè chìyè bəd mbe ne ya bḛ Kristo, mbaŋà fɔrɔ mə̀yi, ghò zìyè inga nəb ndəŋ .

Filip ghà ikən chɔm a Sàmarìyà

⁴ Bəd Kristo mbe ne ya sàka yaya yḛ̀ nè ghàmà Ìngam Ŋwiye isiŋi ijìm.

⁵ Filip ya swiʼi ghò inga asiŋi mɔ̀ʼɔ inga aba aben ze a Sàmarìyà. Wì ya pè ko ghà anug imbə̀ʼ Wə̀d we ne Ŋwiye zɔ̀ʼi abə bəd mbe ne ya yaʼi inga asiŋi ze.

⁶ Anyumə̀ ne tinɔ̰ bəd ya zughi bə̀ bàd inug yeti yeti ne Filip yaya ghìyə̀, mbi ya zì atog ni zweri inug mbe ne wì yaya ghà.

⁷ Izwighi tibɔ̀ŋ yaya kyḛ chè dùwə̀ inga bəd nɔʼ nɔʼ. Bəd ne ya buʼrə fɔrɔ bəd ne ighog ya swèʼe ya bɔti.

⁸ Àze ya ghì bəd mbe inga asiŋi ze se taŋ gyènde.

Anug imbə̀ʼ Sayimùn we ne yaya ghìyə̀ tikaŋì

⁹ Mbaŋà mɔ̀ʼɔ ya yaʼ a Sàmarìyà ne ikum məd ya Sayimùn. Wì yaya ghìyə̀ tikaŋì, wə̀d ijìm a Sàmarìyà nḛ yète. Məd yaya nìŋə ìwi nyɔd gha zìye ya mbaŋà ndəŋ ne beri ika.

¹⁰ Bəd məjìm, bɔn kwa kwa fɔrɔ bəd kyen yaya zìyè atog ane inug ne Sayimùn yaya ghà. Ane, mbi yaya se yète gha, “Ŋwiye fə nàʼ ngɔri ika ni ghì iyeti inug abə wə̀d gho̰.”

¹¹ Bəd yaya zìyè atog ni zug inug ne wì yaya ghà imbə̀ʼ icheg ne agha ya fə sà ne wì yaya ghìyə̀ tikaŋì bəd nḛ̀ yète.

¹² Si ya gha, anyumə̀ ne mbi ya zughi ikən chɔm imbə̀ʼ anug ìfɔ̀n Ŋwiye bə̀ zug ikən chɔm imbə̀ʼ Yeso Kristo ne Filip yaya ghà, mbaŋà fɔrɔ mə̀yi ya bḛ bə̀ niŋ mənib.

¹³ Sayimùn zìye ya bḛ Kristo bə̀ niŋ mənib. Anyumə̀ ne mbi ya fə nàʼi mənib ibo, wì ya ko se bène abɔ̀ʼ Filip. Anug ya chè aməd ane ineni inug fɔrɔ iyeti inug ne wì ya bàri Filip we ghìyə̀.

¹⁴ Anyumə̀ ne bədtɔm mbe a Jèrusalèm ya zughi gha bəd mbe a Sàmarìyà fə bḛ Ìngam Ŋwiye, mbi ya tɔm Pità tì Jɔn inɔb.

¹⁵ Pità tì Jɔn ya pè angu chàʼra Ŋwiye inɔb ni gha Azwighi Ŋwiye yeʼe igun inɔb.

¹⁶ Aton ya gha, chəyi Azwighi Ŋwiye ya kiri yeʼe igun inɔb. Mbɔb ya kiri niŋ məyi mənib ane ikum Anɔŋisəg Yeso.

¹⁷ Anyumə̀ ne Pità tì Jɔn ya nɔŋi ìmbɔb ibo igun inɔb, Azwighi Ŋwiye ya yeʼe igun inɔb.

¹⁸ Icheg ne Sayimùn ya bàri gha, Azwighi Ŋwiye ya yèʼe igun bəd icheg ne bədtɔm yaya nɔ̀ŋɔ̀ ìmbɔb ibo igun bəd, wì ya nàʼ ikab abə Pità tì Jɔn,

¹⁹ ghà inɔb gha, “Mbə̀ naʼa ika gho̰ inum ni gha mə mə̀ nɔ̀ŋì ìmbum ibo igun wə̀d, Azwighi Ŋwiye yeʼe igun tengàŋ.”

²⁰ Si ya gha, Pità ya ywìtì ibo gha, “Àghò nim tì ìwe ikab icheg ne àghò kɔ̀ndi gha àghò we tì àghò zon ineʼi ne Ŋwiye we nàʼà abə bəd ane ikab!

²¹ Chəyi àghò beri ati kə̀ aba ane àfàʼì azo̰ imbə̀ʼ icheg ne chəyi ìze fìŋ tə̀mi kòʼ imbìghè abə Ŋwiye.

²² Ane, bə̀ŋə ìze fìŋ chì ane anug tibɔ̀ŋ azo̰, chàʼra Ŋwiye dèg abə Anɔŋisəg. Ighəm mɔ̀ʼɔ wì biri waʼ inug tibɔ̀ŋ mbe ne àghò kɔ̀ndi ine inga fìŋ.

²³ Mə bàd gha àdeg sweg ine inga fìŋ. Mə fə bə̀ bàd gha àghò fə nàʼ ìze fìŋ icheg ifeg, inug tibɔ̀ŋ nyimi.”

²⁴ Sayimùn ya ywìtì gha, “Mbə̀ chaʼra Ŋwiye dèg abə Anɔŋisəg imbə̀ʼ amə gha imbə̀ʼ anug mɔ̀ʼɔ abɔ̀ʼ inug mbo̰ ne mbə̀ gha anìŋ si nɔ̀ʼ dù igun inum.”

²⁵ Anyumə̀ ne Pità tì Jɔn ya fə mə̀ti inug mbe ne mbɔb ya kyeri imbə̀ʼ anug ìfɔ̀n Ŋwiye, bə̀ ghà ìngam Anɔŋisəg, mbi ya nɔ̀ʼ bə̀ndì ko ghò a Jèrusalèm. Mbi yaya yḛ̀ nè ghà ikən chɔm inga isiŋi nɔʼ nɔʼ a Sàmarìyà.

Filip tì wə̀d kyen we a Ìtopìyà

²⁶ Angirə̀ Anɔŋisəg ya ghà abə Filip gha, “Àghò chuʼri ìwe nyɔd ghò aba ze a achɔŋɔ, igun inɔnjì we ne nɔʼi a Jèrusalèm se swìʼe ghò a Gazà.” Inɔnjì ghò ya inɔnjì we ne chè inga ibad zɔbi.

²⁷ Filip ya zug ane, nɔ̀ʼ ghò pè bàd mbaŋà mɔ̀ʼɔ a Ìtopìyà. À ya wə̀d ne mbi ya fə zaʼi. Mbaŋà ze ya wə̀d kyen ne yaya nɔ̀ŋɔ̀ ikab abə ifɔn àyi we a Ìtopìyà ne ikum məd ya Kandès. Mbaŋà ze ya ghò ghùmni Ŋwiye a Jèrusalèm, se bə̀ndə̀.

²⁸ Filip ya bàd aməd ne wì yaya se bə̀ndə̀ a Jèrusalèm inga iku mətwə̀ we ne ya nyam mə̀kara te sìmè. Wì yaya fɔ̀ŋɔ àŋwàʼrì ze ne wə̀dkə̀n Ŋwiye Àzayà ya ŋwàʼri.

²⁹ Azwighi Ŋwiye ya ghà abə Filip gha, “Ndò se yḛ̀ iban mətwə̀ iywin.”

³⁰ Ane, Filip ya nòrò ghò iban mətwə̀ we, pè zug icheg ne wə̀d kyen we yaya fɔ̀ŋɔ àŋwàʼrì ze ne wə̀dkə̀n Ŋwiye Àzayà ya ŋwàʼri. Wì ya zug ane bìri ibo gha, “Àghò fɔŋ ìngam we ane, àze atog zen inga?”

³¹ Wə̀d kyen we ya ywìtì gha, “Mə̀ kə yi kyeri iye ne chəyi wə̀d mɔ̀ʼɔ tòʼri inum?” Anyumə̀ ne wì ya biri ane, wì ya ghà abə Filip gha wì kɔʼ nyi chùghi inga mətwə̀ abɔ̀ʼ məd.

³² Asiŋi Àŋwàʼrì Ŋwiye ze ne wì yaya fɔ̀ŋɔ ya asiŋi ze ne gha: “Məd ya icheg njə̀g ne mbe nìŋə ghò ni kyemi, bə̀ yaʼ icheg ŋwan njə̀g ne chughi yi inyèʼ anyumə̀ ne mbe sère nyɔ̀ŋì məd. Ane, chəyi wì ya fìʼì ichug.

³³ Mbi ya zì tìnìrètog igun məd. Chəyi mbi ya saʼi isaʼi məd ane icheg ne koʼi. Chəyi wə̀d mɔ̀ʼɔ ne tì wì gha anug mɔ̀ʼɔ imbə̀ʼ aghaŋ inəbi məd. À ya ane imbə̀ʼ icheg ne ìtḛ̀ məd igun isəg fə mèg yi.”

³⁴ Wə̀d kyen we ya fɔŋ ane, si bìri abə Filip gha, “Mə boʼ ibo ine, àghò gha inum! Wə̀d we ne wə̀dkə̀n gho̰ ya gha anug azo̰ imbə̀ʼ aməd, àkə we? Wì kə ghà anìŋ imbə̀ʼ ìwi nyɔd kə̀ imbə̀ʼ wə̀d ndəŋ?”

³⁵ Filip ya ko ni tòʼrì Ìngam Ŋwiye ibo ane asiŋi àŋwàʼrì azo̰, si ghà ikən chɔm imbə̀ʼ Yeso ibo.

³⁶ Icheg ne mbi yaya yḛ̀ ghò igun inɔnjì we, mbi ya pè ane asiŋi mɔ̀ʼɔ ne igyi ya yaʼi angu. Ane, wə̀d kyen we ya ghà abə Filip gha, “Nḛ! Mənib mbo̰. Aghi ne tì ze ghì gha imbə̀ʼ àghò naʼa awe mənib inum àkə aghə?” [

³⁷ Filip ya ghà ibo gha, “Àghò mə bḛ gha Yeso Kristo ya Ŋwan Ŋwiye, mə we tì mə nàʼ mənib ine.” Wə̀d kyen we ya ywìtì gha, “E! Mə bḛ gha Yeso Kristo ya Ŋwan Ŋwiye.”]

³⁸ Wə̀d kyen we ya ghì mbi təmni mətwə̀ we. Mbɔb mbe məbe ya swiʼi ghò nyi inga igyi we, Filip nàʼ mənib ibo.

³⁹ Kwàʼ anyumə̀ ne mbi ya kɔʼi dù inga igyi we, Azwighi Ŋwiye ya niŋ Filip ghò tì məd. Chəyi wə̀d kyen we ya ywirì bàd aməd. Ane, wì ya se ghò nè gyènde.

⁴⁰ Azwighi Ŋwiye ya niŋ Filip ane wi si dù yaʼ a Àzotùs, se yḛ̀ nè ghà ikən chɔm inga isiŋi ijìm. Wì yaya yḛ̀ nè ghà ikən chɔm we ane anene ghò pè a Kàserìyà.