Ɨ̀fàʼì 7 - Ikan feg

Stifə̀n ya ghàm abə itog bəd ne sàʼa aben

¹ Atog wə̀d igun bəd mbàn Ŋwiye ya biri abə Stifə̀n gha, “Inug mbo̰ ne mə zùghə anìŋ imbə̀ʼ awe wa kə tesiʼ?”

² Stifə̀n ya ywìtì gha, “Ìmbum məfi fɔrɔ ìmbum mə̀mbaʼ, mbə̀ zug! Ŋwiye we ne mba mbe ghùmnə ya dù imbìghè abə Abràham anyumə̀ ne wì ya kiri biri a Mèsòpòtemìyà, bɔŋ wì ya gho se chùghə a Haràn.

³ Ŋwiye ya dù ane, ghà ibo gha, ‹Saŋa àze aben fɔrɔ ìmbe bəd, ghò ane asiŋi ne mə̀ biri chwi ine.›

⁴ Ane, Abràham ya nɔ̀ʼ yi inga aben məChàdin ghò se chùghə a Haràn. Anyumə̀ ne mbaʼ məd ya ku, Ŋwiye ya chà aməd inga asiŋi azo̰ ne mbə̰ mbe chùghə inga amad anìŋ.

⁵ Chəyi Ŋwiye ya nàʼi ati ibo inga asiŋi azo̰, ka bèyi atog ibon. Si ya gha, ka chəyi Abràham ya kiri beri ŋwan anyumə̀ we, Ŋwiye ya kàʼ anug ibo, ghà ibo gha, məd tì bɔn ane aghaŋ inəbi məd biri jəg asiŋi azo̰.

⁶ Ŋwiye ya ghà abə Abràham gha, ‹Bɔn ane àze aghaŋ inəbi biri yaʼ bəd tìsɔ̀ʼ inga aben tìsɔ̀ʼ ane tituʼ aki akwè. Bəd inga aben ze biri chə awɔb, ghì mbɔb yaʼ məfeg.

⁷ Si ya gha, mə biri chə aben ze ne biri ghì mbɔb yaʼ məfeg. Nyùmə̀ we mə̀ chè, bɔn ìmbi Abràham biri dù ane anug ìfèg, yèʼe ghùmni amə aŋa asiŋi.›

⁸ Ŋwiye ya ghà ane wàd ikan tì Abràham gha wì ŋwed bɔn mbaŋà. Anyumə̀ ne Abràham ya gwiye Azìg, ineg ya chè ìfàmi, wì ŋwed aməd. Anyumə̀ ne Azìg ya gwi Jàkɔb, ineg ya chè ìfàmi wì bə ŋwed aməd. Jàkɔb yaya bə̀ gwìye ìmbi tì bɔn ŋwère ane ineg chè ìfàmi. À ya Jàkɔb ya si gwi mə̀mbaʼ mə̀Izre mbe ìghum chɔ̀b ibe.

⁹ Mə̀mbaʼ mə̀Izre ya nḛ Jòseb ìwɔb ifi, ghì ìdɔ̀b. Ane, mbi ya fèn aməd abə bəd mɔ̀ʼɔ ne ya niŋi aməd ghò fèn ane ifeg a Ijìb. Si ya gha, Ŋwiye ya yaʼ tì məd.

¹⁰ Ane, Ŋwiye ya chì aməd inga iku ngəʼ ijìm ne wì ya nyi inga. Ŋwiye ya ghì gha Ferò, ifɔn we a Ijìb, wì ghiyə ìchɔ̀mì ibo. Ŋwiye ya bə̀ nàʼ iwe abə Jòseb. Wì ya ghì Ferò chɔʼ Jòseb ane gɔbnà a Ijìb bə̀ yaʼ atog wə̀d inga ìtɔʼ.

¹¹ Njèg ka ka mɔ̀ʼɔ ya nɔ̀ʼ nyi inga aben Ijìb ajìm fɔrɔ inga Kanàn ijìm. Zì ya ghì ngəʼ kyen nyi igun bəd. Chəyi ìmba mə̀mbaʼ aneg ya beri tijəg.

¹² Jàkɔb ya zug gha, kyì kiri biri a Ijìb, wì cha ìmbi bɔn, ne ya ìmba mə̀mbaʼ aneg gha mbe gho zon tijəg. À ya yaʼ ìwɔb ighəm mbègtog ni ghò.

¹³ Ighəm ndəŋ ne mbi ya ywirì ghò a Ijìb, Jòseb ya tòʼrì ìwi nyɔd inɔb gha zìye ya ìwɔb ifi. Wì ya bə̀ tòʼrì awɔb abə Ferò.

¹⁴ Jòseb ya si chà awɔb gha mbe gho niŋ Jàkɔb mbaʼ məd fɔrɔ inəbi ijìm yèʼe a Ijìb. Inəbi we ijìm ya yaʼ bəd ìghum ìsàmbe chɔ̀b ita̰.

¹⁵ Ane, Jàkɔb ya swiʼi ghò a Ijìb. Wì ya ku angu. Ìmba mə̀mbaʼ aneg mbe ya bə̀ ku angu.

¹⁶ Mbi ya niŋ ìmbɔb iwu bə̀ndì ghò twə̀ŋi a Sekèm inga iseg ne mbi to inga igho. Iseg we ya Abràham ya zon abə inəbi Hamò ane inun ikab mɔ̀ʼɔ.

¹⁷ Anyumə̀ ne nyùmə̀ ya fə se kòʼò abə Ŋwiye ni fàʼ anug ne wì ya kàʼi abə Abràham, inun ìmba bəd ne ya yaʼi a Ijìb ya taŋ kweg.

¹⁸ Chəyi ifɔn feg we ne yaya tùmbə̀ aben Ijìb ya kyeri anug mɔ̀ʼɔ imbə̀ʼ Jòseb.

¹⁹ Ifɔn feg gho̰ ya nyə̀ʼ ìmba bəd, chə ìmba mə̀mbaʼ aneg, ghì bəd ne beri bɔn bɔd se wàʼa ìmbɔb bɔn gha mbe ku.

²⁰ À ya anyumə̀ we ne mbi ya gwiye Muse. Wì ya yaʼ kwàʼ ŋwan ne bɔ̀ŋi abə Ŋwiye. Mə̀mbaʼ məd ya nèg məd ane aməg atad inɔb inga nəb.

²¹ Anyumə̀ ne mbi chì Muse inga nəb ghò nɔ̀ŋì iban igyi kyen, ŋwan Ferò ne yaʼi ŋwan àyi ya nyì bàd niŋ ghò nèg icheg ìwi ŋwan.

²² Mbi ya chwiti inug mbe Ijìb ijìm abə Muse, wì beri iwe bəd Ijìb ijìm. Ìngam məd fɔrɔ tìghinùg məd ya bèrì ika.

²³ Anyumə̀ ne Muse ya fə si tituʼ ìghum ikwè, wì ya niŋ isɔbi anug ni ghò mùg mə̀Izre ne ya məfi məd.

²⁴ Wì ya pè bàd wə̀d Ijìb mɔ̀ʼɔ ne we chə wə̀d Izre. Ane, wì tàŋì wə̀d Izre, si sɔm wə̀d Ijìb we zwèti.

²⁵ Muse ya ghì ane gha ìmbi məfi mə̀Izre biri bàd kyèri gha à ya Ŋwiye chà aməd gha wì gho pùmni awɔb. Si ya gha, chəyi mbi ya kyeri.

²⁶ Àsi isu abɔ̀ʼ, wì ywirì ghò ni mùg awɔb pè bàd mə̀Izre mɔ̀ʼɔ məbe ne mbe zɔ̀ŋɔ̀. Wì ya kə̀b ni ghì gha mbe chughi ane àbɔrɔ̀bɔd. Ane, wì ghà inɔb gha, ‹Mbə̀ nḛ! Mbə̰ ya məfi. Mbə̀ kə zɔ̀ŋɔ̀ aghə?›

²⁷ Wì ya jiʼì bìri ane, si ya gha, mbaŋà ze ne ya gùg anug ya tḭ Muse, bìri ibo gha, ‹Àkə we chɔʼi awe ane wə̀d ne sàʼa awa?

²⁸ Àghò kə anìŋ kə̀bə̀ ni zweti amə icheg ne àghò kə̀ zwèti wə̀d Ijìb we igho?›

²⁹ Anyumə̀ ne Muse ya zughi ane, wì ya nòrò dù inga aben ghò se chùghə icheg wə̀d tìsɔ̀ʼ a Midìyàn. Wì ya chughi angu ane, nam, gwi ìmbi bɔn mbaŋà məbe.

³⁰ Anyumə̀ ne Muse ya fə chughi angu ane tituʼ ìghum ikwè, angirə̀ Ŋwiye ya dù ibo imbìghè. Wì ya dù ane inga ajuŋi agyen mɔ̀ʼɔ ne yaʼi icheg ìtḭ ichiʼi, inga ibad zɔbi, iban Iwum Sanàyì. Angirə̀ we ya dù icheg inemi iywid.

³¹ Muse ya bàd ane, anug chè aməd. Anyumə̀ ne wì ya tindi ghò iban taŋ nèn, wì ya zug gì Anɔŋisəg zì kàri aməd, ghà ibo gha,

³² ‹Mo ya Ŋwiye ìmbe mə̀mbaʼ kyen. Ŋwiye ìwi Abràham tì Azìg fɔrɔ Jàkɔb.› Muse ya zug ane, bìnde. Chəyi wì ya ywirì nyìmi fìŋ ni nèn inemi iywid we.

³³ Anɔŋisəg ya si ghà ibo gha, ‹Chìye ìmbe itami imbə̀ʼ icheg ne asiŋi ze ne àghò tə̀mi igun ya ìseg ìzḛzḛ.

³⁴ Mə fə bàd icheg ne mbe chə ìmbum bəd mbe ne yaʼi a Ijìb. Mə fə zug icheg ne mbɔb mbe chwèmè. Ane, mə fə swiʼi yèʼe ni chì awɔb inga ngəʼ. Mə biri tɔm awe a Ijìb.›

³⁵ Aŋa ya Muse we ne mbi ya to̰ awɔb məd, bìri ibo gha, ‹Àkə we chɔʼi awe ane wə̀d ne sàʼa awa?› Ŋwiye ya tɔm aməd gha wì yaʼ wə̀d ne sàʼa mə̀Izre, bə̀ yaʼ wə̀d ne Ŋwiye nìŋi ni chì awɔb inga ngəʼ anjìm angirə̀ we ne ya du ibo inga ajuŋi agyen ze.

³⁶ Wì ya chì awɔb a Ijìb anyumə̀ ne wì ya fə ghi iyeti inug a Ijìb. Wì ya ghì mbi bani inga Igyi Tìbà Bàghi, bə̀ ghì mbi yèn inga ibad zɔbi ane tituʼ ìghum ikwè.

³⁷ À ya Muse gho̰ ne ya ghà abə mə̀Izre gha, ‹Ŋwiye biri chɔʼ wə̀dkə̀n inga ìmbən bəd icheg ne wì ya chɔʼi amə.›

³⁸ Muse ya yaʼ abɔ̀ʼ mə̀Izre inga ibad zɔbi. Wì ya yaʼ tì angirə̀ we ne ya ghàmi ibo ikaŋ Iwum Sanàyì. À ya angirə̀ we ne ya bə̀ yaʼ tì ìmba mə̀mbaʼ aneg. Wì ya niŋ ikən we ne ghìyə̀ gha bəd jəg ìtḛ̀, yèʼe nàʼ ina.

³⁹ Tesiʼ ya gha, ìmba mə̀mbaʼ aneg ya ton awɔb ni zugri aməd. Mbi ya tḭ aməd chà iban, se kə̀bə̀ ni ywiri bə̀ndi ghò awɔb a Ijìb.

⁴⁰ Ane, mbi ya ghà abə Eròn gha, ‹Tangi mə̀ŋwiye nàʼ ina ne biri chè imbìghè ghò chà awa. Àsi Muse gho̰ ne chi awa a Ijìb, chəyi tì kyeri anug ne fə du tì məd.›

⁴¹ Ane, mbi ya tangi ŋwiye ako mɔ̀ʼɔ ne ya yaʼi icheg ŋwan pɔ̀ŋ bə̀ se nàʼà ighi ni jə ŋwiye we. Mbi ya ghì ane se gyènde imbə̀ʼ aghi ne mbɔb ya tangi kwàʼ ane ìmbɔb ibo.

⁴² Si ya gha, Ŋwiye ya ghabri ìzi njìm igun inɔb. Wì ya sàŋì gha mbe se ghùmnə achwi tì iməg tì titəm iməg icheg ne mbi ya ŋwàʼri inga àŋwàʼrì bədkə̀n Ŋwiye gha: ‹Mə̀Izre, anyumə̀ ne mbə̀ ya yaʼi inga ibad zɔbi ane tituʼ ìghum ikwè, mbə̰ ya nàʼ ka nyam imɔʼ ane aghi àfàtì inum kə̀ bì nàʼ aghi mɔ̀ʼɔ ane ituti inum?

⁴³ Mbə yaya bèʼè yaʼ azuŋ abə ìwən ŋwiye we ne mbe kàrà ane Molèg, bə̀ bèʼè fitəm ìwən ŋwiye we ne mbe kàrà ane Refàn. À ya mə̀ŋwiye mbe ne mbə̀ ya tangi nɔ̀ŋì se ghùmnə. Ane, mə biri ghì mbi kamni awən chì awən inən inga aben chà mbə ghò chè che a Babilɔ̀n.›

⁴⁴ Ìmba mə̀mbaʼ aneg yaya bèʼè Azuŋ Ŋwiye anyumə̀ ne mbi ya yaʼi inga ibad zɔbi. Mbi ya kɔd azuŋ ze kwàʼ igun aməgrì icheg ne Ŋwiye ya chwi abə Muse gha wì kɔd.

⁴⁵ Anyumə̀ ne agha ya sàri, ìmba mə̀mbaʼ aneg ne ya yaʼi tì Joswà ya bèʼì Azuŋ Ŋwiye ze yèʼe nyi inga aben azo̰. Mbi ya bèʼì yèʼe nyi anyumə̀ ne mbi ya fə niŋi iben mbe ni Ŋwiye ya ghi mbi kamni bəd chì inga. Azuŋ Ŋwiye ze ya chughi inga aben ze pè ane nyumə̀ ne Dèvid ya yaʼi ifɔn.

⁴⁶ Ŋwiye ya kɔ̀ŋ Dèvid. Ane, Dèvid ya boʼ ibo gha wì saŋa zìye bɔm asiŋi chughi ibo, məd Ŋwiye we ne Jàkɔb yaya ghùmnə.

⁴⁷ Wì ya boʼ ibo ane, si ya gha, à ya Solomùn ya bɔmi nəb Ŋwiye ze atog ibo.

⁴⁸ Si ya gha, chəyi Ŋwiyekɔʼ we chùghə inga nəb ne bəd bɔmi. À ya icheg ne wə̀dkə̀n Ŋwiye Àzayà ya gha gha:

⁴⁹ Anɔŋisəg ghà gha, ‹Ikaŋ àbɔ̀ŋɔ ya àmə atən ifɔn. Àsi isəg ya aghi ne mə nɔ̀ŋɔ̀ àmə aghog igun. Àkə iku nəb weg ne àghò biri bɔm inum? Kə̀ àkə asiŋi zeg ne tì mə ya chùghə zwètè angu?

⁵⁰ Imbə̀ʼ à ya mo tangi ighi mbo̰ ijìm?›

⁵¹ Mbə̰ ya bəd ne kà atog! Ìtən fìŋ fɔrɔ ìmbən ìtɔ̀ŋi ya icheg ìmbi bəd mbe ne kayi mə̀Ju: Mbə̰ ya ghìyə̀ inug kwàʼ icheg ìmbən mə̀mbaʼ aneg. Chəyi mbə̰ mbe zùgrə Azwighi Ŋwiye mà nyumə̀ ijìm!

⁵² Wə̀dkə̀n Ŋwiye mɔ̀ʼɔ we wa angu ne chəyi ìmbən mə̀mbaʼ aneg ya chɔʼi ibɔʼì ighog məd? Mbɔb ya bì zwèti bədkə̀n mbe ne ya gha gha, Wə̀d we ne təmi kòʼ biri yeʼe. Mbə̀ mbo̰ fə fèn Wə̀d we ne təmi kòʼ, ghì mbi zweti.

⁵³ À ya mbə̰ ne ya niŋi mə̀nɔ̀ʼɔ̀ mbe ne mbè angirə̀ ya nàʼi. Si ya gha, chəyi mbə̰ mbe bə̀ nɔ̀ŋɔ̀ mə̀nɔ̀ʼɔ̀ mbe.”

Bəd ne sàʼa aben tùmbi Stifə̀n ane ateg zwèti

⁵⁴ Anyumə̀ ne bəd mbe ne sàʼa aben ya zughi inug mbe ne Stifə̀n yaya ghà, mbi ya taŋ gaŋ se kùrə asɔŋ imbə̀ʼ aməd.

⁵⁵ Si ya gha, Stifə̀n ne Azwighi Ŋwiye ya sweghi inga məd ya nɔ̀rì atog nèn ikaŋ, bàd ìzḛzḛ njandi njandi Ŋwiye bə̀ bàra Yeso ne wì yaʼi itəmi aba abo jəghi Ŋwiye.

⁵⁶ Wì ya bàd ane si ghà gha, “Mbə̀ nḛ! Mə we bàrà icheg ne ikaŋ àbɔ̀ŋɔ fiʼe bə̀ bàrà icheg ne Ŋwan Wə̀d tə̀mi aba abo jəghi Ŋwiye.”

⁵⁷ Bəd mbe ne sàʼa aben ya zug ane, kyen ane gì ka ka, niŋ ìmbɔb ibo kùbri ìmbɔb ìtɔ̀ŋi, si nɔ̀ʼ sùyə̀ igun məd mbɔb məjìm.

⁵⁸ Mbi ya niŋ aməd sùŋì aseg, dù inga ikye aben, ghò màʼ anjìm isəg, tùmbi ane ateg, wì ku. Bəd mbe ne yaya tùmbə aməd ane ateg ya chì ìtɔb ndwigun nɔ̀ŋì iban ighog abə ajɔŋ mɔ̀ʼɔ ne ikum məd ya Sɔl.

⁵⁹ Anyumə̀ ne mbi yaya tùmbə məd, wì ya chàʼra Ŋwiye gha, “Anɔŋisəg Yeso, niŋ àmə azwighi.”

⁶⁰ Anyumə̀ ne wì ya gha ane, wì ya chìndì itog inwḭ aseg, kyen ane gì ka ka gha, “Anɔŋisəg, imbə̀ʼ àghò nyìme awe awɔb anjìm anug tibɔ̀ŋ azo̰ ne mbi ghi anìŋ.” Wì ya ghà ane si sàŋì isəg.