Ɨ̀fàʼì 28 - Ikan feg

Anug ne ya dù a Maltà

¹ Anyumə̀ ne tì ya fə du inga igyi pè asaŋ ne chəyi wə̀d mɔ̀ʼɔ ya beri anə̰, mbi ya ghà ina gha ikum asiŋi ze ya Maltà. Maltà ya akəmi asiŋi ìseg ne igyi che kad.

² Bəd aben ze ya ghì iku ìchɔ̀mì mɔ̀ʼɔ ina ne chəyi tì kweʼì bàd. Mbi ya niŋ awa mba məjìm kwàʼ icheg chɔm. Mbi ya bə̀ zì iywid ina imbə̀ʼ icheg ne mbə̀ŋ yaya no, ifə ko.

³ Pɔl ya feti tìtab iŋwen mɔ̀ʼɔ ni zì ijəŋ. Anyumə̀ ne wì yaya zìyè, iywid ya nɔ̀m ghì afighi dù inga iŋwen we nɔm abo ibo nàŋa angu.

⁴ Anyumə̀ ne bəd inga aben ze ya bàri afighi ze ne yaya nə̀ŋə ane abo abə Pɔl, mbi ya ghà mbɔb mbɔb gha, “Wə̀d gho̰ mənyìʼ yaʼ wə̀d ne zwète bəd! Ka wì fə jiʼì nòrò iwu inga tìbà, chəyi ŋwiye àyi we ne beri ikuchèg tesiʼ ni sàʼ bəd biri bḛ gha wì chughi izɔm.”

⁵ Si ya gha, Pɔl ya nwḭ̀ afighi ze inga iywid. Chəyi aghi mɔ̀ʼɔ ya ghi aməd.

⁶ Bəd mbe ya ghɔ̀m ni bàd icheg ne wì biri mòd kə̀ ne wì biri si nɔ̀ʼ gùg aseg ku. Si ya gha, anyumə̀ ne mbi ya ghɔ̀mi agha sà, mbi ya bàd gha chəyi aghi mɔ̀ʼɔ ghi aməd. Ane, mbi ya si bə̀ŋì ìtɔb fìŋ se ghà gha Pɔl ya ŋwiye mɔ̀ʼɔ.

⁷ Wə̀d we ne yaya tùmbə̀ Maltà, ne ikum məd ya Poblìyùs, ya bèrì mben iban asiŋi ze. Ane, wì ya niŋ awa ibo achan, nə̀ngi awa ane ineg itad.

⁸ Mbaʼ Poblìyùs we ya yaʼ igun abaʼ tì ifə fɔrɔ nṵ. Pɔl ya ghò ni kyèʼì aməd, pè chàʼrà Ŋwiye, nɔ̀ŋì ìmbi ibo igun məd, ghù aməd.

⁹ Anyumə̀ ne wì ya ghi ane, àbùʼì bəd aghɔn mbe inga asiŋi ze yaya yèʼe abə Pɔl, wì ghuyə awɔb.

¹⁰ Mbi ya nàʼ ighi nɔʼ nɔʼ ina. Anyumə̀ ne tì ya se kə̀bə̀ ni ghò, mbi ya zì ighi mbe ne chəyi tì ya beri inga abaŋ igyi.

Pɔl nɔ̀ʼ a Maltà ghò a Rom

¹¹ Anyumə̀ ne aməg ya che atad, tì ya ghò nyi inga abaŋ igyi ne ya chughi inga akəmi asiŋi ìseg ze ane nyùmə̀ we ne ifə yaya taŋ ko. Abaŋ igyi ze ya nɔ̀ʼ a Àlèzandrìyà. Mbi ya ŋwàʼrì ane abaŋ igyi ze gha “Mə̀ŋwiye Ànjiŋə”.

¹² Tì ya pè təm a Sìrakùs, chughi angu ineg itad.

¹³ Tì ya nɔ̀ʼ angu ghò a Regìyùm. Àsi isu abɔ̀ʼ, afim ze ne nɔ̀ʼɔ̀ aba ze achɔŋɔ chè kɔ̀ʼɔ ya ko se chè. Àsi igun aneg ne pè ane ibe, tì ya ghò a Pùtìyolì.

¹⁴ Tì ya pè angu, bàd bəd ne ya bḛ Kristo. Mbi ya kàrì awa gha tì chughi tì inɔb ineg ìsàmbe. Aŋa ya icheg ne tì ya gho pè a Rom.

¹⁵ Anyumə̀ ne bəd mbe ne ya bḛ Kristo a Rom ya zughi gha tì we yèʼe, mbi ya nɔ̀ʼ inga iben Forùm a Apìyùs bə̀ nɔ̀ʼ inga Nəb Àwètì te Titad yèʼe kɔ̀ti awa. Anyumə̀ ne Pɔl ya bàri awɔb, wì ya nàʼ məyakà abə Ŋwiye. Ane, fìŋ məd ya ywìrì zùtì.

¹⁶ Anyumə̀ ne tì ya pe a Rom, mbi ya sàŋì Pɔl gha wì chughi yi ane ìwi ighəm. Wì yaya chùghə tì sogyì we ne yaya nə̀ngə aməd.

Pɔl ghà ikən chɔm a Rom

¹⁷ Anyumə̀ ne ineg ya che itad, Pɔl ya kàrì itog bəd mə̀Ju. Anyumə̀ ne mbi ya fete, wì ya ghà inɔb gha, “Ìmbum məfi, ka chəyi mə̀ ya bi ghì anug tibɔ̀ŋ mɔ̀ʼɔ abə ìmba bəd, kə̀ bì ghà anug tibɔ̀ŋ mɔ̀ʼɔ imbə̀ʼ məcheg aben ìmba mə̀mbaʼ aneg, mbi ya gwì amə a Jèrusalèm zì inga tikye ibo abə məRom.

¹⁸ Anyumə̀ ne mbi ya nwendi inug imbə̀ʼ amə, mbi ya kə̀b ni sàŋì amə imbə̀ʼ icheg ne mbi ya bàd gha chəyi mə̀ ya gùghi anug mɔ̀ʼɔ ne tì mbi zweti amə.

¹⁹ Si ya gha, icheg ne mə̀Ju ya to̰ ni zug anug ne məRom yaya ghà, mə̀ ya bèrì ni ghà gha mbe chà isaʼi we abə Kayisà. Mə ya anìŋ, chəyi mə̀ bi bèrì isaʼi mɔ̀ʼɔ ni zì igun mə̀Ju.

²⁰ À ya aton ne mə ghà gha mbə̀ yeʼe mə̀ bàd awən, bə̀ ghàmbì tì inən imbə̀ʼ icheg ne à ya imbə̀ʼ Wə̀d we ne mə̀Izre nɔŋi ikɔndi ni ghɔ̀m, ne mbi kɔri amə ane mə̀chen mbo̰.”

²¹ Mbi ya ywìtì ibo gha, “Chəyi tì bari àŋwàʼrì mɔ̀ʼɔ ne nɔʼi a Jùdeyà imbə̀ʼ awe. Chəyi ìmba məfi mbe ne nɔʼi angu bə pùti anug mɔ̀ʼɔ ina imbə̀ʼ awe, kə̀ bì ghà anug tibɔ̀ŋ mɔ̀ʼɔ imbə̀ʼ awe.

²² Tì biri kiri kɔ̀ŋ ni zug ìte tikɔndi imbə̀ʼ icheg ne mba kyèri gha bəd mbe to̰ ifɔti feg gho̰ isiŋi ijìm.”

²³ Mbi ya nɔ̀ŋì aneg ne mbi biri ywiri ghò bàd Pɔl. Anyumə̀ ne aneg ze ya kòʼi, mbi ya dù kwàʼ mbɔb nɔʼ nɔʼ ghò a asiŋi ze ne Pɔl yaya chùghə. Wì ya ko tòʼrì anug imbə̀ʼ anug ìfɔ̀n Ŋwiye ni ko isusu ghò pè ikwikwiri. Wì ya tòʼrì inug inga àŋwàʼrì mə̀nɔ̀ʼɔ̀ Muse bə̀ tòʼrì inug inga ìŋwàʼrì mbe ne bədkə̀n Ŋwiye ya ŋwàʼri ghì mbi kyeri gha inug mbe ne te ghà imbə̀ʼ Yeso ya tesiʼ.

²⁴ Bəd mɔ̀ʼɔ ya bḛ anug ne wì yaya ghà, si ya gha, chəyi mbi mɔ̀ʼɔ ya bḛ.

²⁵ Icheg ne chəyi mbɔb məjìm ya yaʼi ane ichug imɔʼ, mbi ya dù inga nəb Pɔl. Mbi ya dù anyumə̀ ne wì ya gha anug azo̰ amɔʼ inɔb gha, “Azwighi Ŋwiye ya kòʼ icheg ne ze ya che anjìm wə̀dkə̀n Ŋwiye Àzayà ghà abə ìmbən mə̀mbaʼ mbe aneg gha,

²⁶ ‹Àghò gho abə bəd mbo̰, ghà inɔb gha; Mbə̰ biri taŋ zweri ywìrì zweri, si ya gha, chəyi mbə̀ biri kyeri. Mbə̰ biri taŋ nèn ywìrì nèn, si ya gha, chəyi mbə̀ biri bàd kyeri.

²⁷ À ya ane imbə̀ʼ icheg ne fìŋ abə bəd mbo̰ fə tu. Chəyi ìmbɔb ìtɔ̀ŋi mbe bə̀ ywìrè taŋ zùghə inug. Mbi fə bə̀ fə̀ghì àzɔb aghə; nji mbi biri bàd isiŋi ane àzɔb aghə, bə̀ zug inug ane ìmbɔb ìtɔ̀ŋi, bə̀ kyèri inug, mbi zen inga ìtɔb fìŋ, si bə̀ŋə̀ yèʼe abɔ̀ʼ inum ni gha mə ghuyə awɔb.›

²⁸ Ane, mə we kə̀bə̀ gha mbə̀ kyeri gha Ŋwiye fə chà ikən imbə̀ʼ icheg ne we pùmnə bəd abə bəd mbe ne kayi mə̀Ju. Mbi biri zug.” [

²⁹ Anyumə̀ ne Pɔl ya fə gha inug mbo̰, mə̀Ju mbe ya dù nè tàŋà mbɔb mbɔb kwàʼ ane gì ka ka.]

³⁰ Pɔl ya chughi angu ane tituʼ ibe inga nəb ne wì ya niŋi se chùghə nàʼà ikab. Məd yaya nìŋə bəd məjìm mbe ne yaya ghò ibo inga nəb kwàʼ icheg chɔm.

³¹ Wì yaya ghàmà imbə̀ʼ anug ìfɔ̀n Ŋwiye, bə̀ chwìte inug imbə̀ʼ Anɔŋisəg Yeso Kristo asaŋ asaŋ ne chəyi we bɔ. Chəyi wə̀d mɔ̀ʼɔ ne ya gha ibo gha imbə̀ʼ wì ghàmà yi.