Ɨ̀fàʼì 26 - Ikan feg

Pɔl ghàm imbìghè abə Ifɔn Agripà ni tàŋì ìwi nyɔd

¹ Ifɔn Agripà ya ghà abə Pɔl gha, “Niŋ apan azo̰ gha inug mbe ne àghò beri ni ghà.” Anyumə̀ ne wì ya ghà ane, Pɔl ya təm titighe boʼ ibo, ko ghàm ni tàŋì ìwi nyɔd. Wì ya ghàm gha:

² “Ifɔn Agripà, mə kyèri gha àmə isi zen imbə̀ʼ icheg ne à ya ine imbìghè ne mə̀ biri ghàm tèchɔ̀ŋ ni tàŋì ìmə nyɔd ane inug ijìm mbe ne mə̀Ju zi igun inum.

³ À ya ane imbə̀ʼ icheg ne mə̀ kyèri gha àghò taŋ kyèri məcheg aben mə̀Ju məjìm bə̀ kyèri inug mbe ne mə̀Ju mbe tàŋà. Ane, mə boʼ ibo ine gha àghò nyimi fìŋ zwèri anug ne mə̀ biri ghà.

⁴ Mə̀ju məjìm taŋ kyèri icheg ne mə̀ yaya chùghə inga àmə aben bə̀ fɔrɔ a Jèrusalèm nɔ̀ʼ ane nyùmə̀ ne mə̀ ya yaʼi ŋwan kwa.

⁵ Mbɔb mə̀ kə̀b ni ghà tesiʼ, nji mbɔb fə kyèri aghi gha mo ya Farìsi ne bə ghìyə̀ inug mə̀Farìsi. Mə̀Farìsi ya ifeti ne taŋ kà inga àza anug Ŋwiye.

⁶ Mə təm aŋa tèchɔ̀ŋ gha mbe saʼ amə imbə̀ʼ icheg ne mə̀ nɔŋi ikɔndi ni ghɔ̀m anug ze ne Ŋwiye ya kàʼi abə ìmba mə̀mbaʼ aneg.

⁷ Ìta tinəbi te ìghum chɔ̀b ibe te ghùmnə Ŋwiye ane fìŋ ijìm tisi fɔrɔ tizimi icheg ne mbɔb mbe ghɔ̀mɔ̀ anug ze ne wì ya kàʼi. Mbè! À ya imbə̀ʼ anug azo̰ ne mə̀Ju zi isaʼi igun inum.

⁸ Aton ne ze chè awən mbə̰ məjìm ni bḛ gha Ŋwiye we zwèmne iwu bəd àkə gha?

⁹ Mo inum ya kɔndi gha mə we tì mə ghì inug nɔʼ nɔʼ ni chìkì anug Yeso we a Nazarèd.

¹⁰ Mə yaya ghìyə̀ ane inga Jèrusalèm. Itog bəd mbàn Ŋwiye ya nàʼ ika inum gha mə wupə bəd Kristo nɔʼ nɔʼ inga nəb ndəŋ . Anyumə̀ ne mbi ya niŋi isɔbi anug gha mbe zweti awɔb, mə̀ ya bə̀ bḛ.

¹¹ Mə yaya chə awɔb ane mənɔnjì nɔʼ nɔʼ inga məchamì Ŋwiye məjìm. Mə yaya kə̀bə̀ ni gha mbe zɔ̀mbɔ Yeso. Mə ya taŋ gaŋ abɔ̀ʼ inɔb. Ane, mə̀ ya ghò inga isiŋi tìsɔ̀ʼ ni chɔʼ ìmbɔb ibɔʼì ighog.”

Pɔl ghà icheg ne Kristo bə̀ŋi məd

¹² Pɔl ya chè imbìghè gha, “À ya imbə̀ʼ anug azo̰ ne itog bəd mbàn Ŋwiye ya nàʼi ika inum bə̀ tɔm amə a Dàmaskòs.

¹³ Mbè, à yaya àngɔŋ tisi aneg ze ne mə̀ yaya ghò, ne mə̀ ya bàri ìzḛzḛ ne ya nɔ̀ʼi ikaŋ ne ya zuʼi chè nyùmə̀. Ìzḛzḛ we ya zuʼ kad mə bə̀ kad mbaŋà te ne ya yaʼi abɔ̀ʼ inum.

¹⁴ Tì ya bu igun nyam fèndi aseg mba məjìm, mə si zug gì ne ya ghàmi inum ane ìngam Hibrù gha, ‹Sɔl, Sɔl, aton ne àghò we chɔ̀ʼɔ ìmbum ibɔʼì ighog àkə gha? À ya anug anen ni zɔ̀ŋ Ŋwiye?›

¹⁵ Mə ya biri gha, ‹Masà, àghò kə we?› Anɔŋisəg ya ywìtì inum gha, ‹Mo ya Yeso we ne àghò we chɔ̀ʼɔ ìmbum ibɔʼì ighog.

¹⁶ Nɔ̀ʼɔ təm titighe. Mə fə dù ìmə ìfe ine, ni chɔʼ awe gha àghò yaʼ ìmə wə̀d àfàʼì. Àghò biri se chètè inug mbe ne àghò bàri imbə̀ʼ amə bə̀ chètè inug mbe ne mə̀ biri chwi ine.

¹⁷ Mə biri chì awe inga tikye ibo abə mə̀Ju bə̀ chì awe inga tikye ibo abə bəd mbe ne kayi mə̀Ju. À ya inɔb ne mə tɔmi awe.

¹⁸ Àghò biri ghò fìʼì àzɔb aghə ni gha mbe duwə inga isəg afub nyi inga ìzḛzḛ, bə̀ dù ane Sàtàn ghò abə Ŋwiye. Mbi mə̀ ghì ane, Ŋwiye biri waʼ ìmbɔb inug tibɔ̀ŋ bə̀ nɔ̀ŋì awɔb abɔ̀ʼ bəd mbe ne wì fə zeni imbə̀ʼ icheg ne mbi nɔŋi ìtɔb fìŋ igun inum.›

¹⁹ Ane, ifɔn Agripà, chəyi mə̀ ya to̰ ni fàʼ anug ne Anɔŋisəg ya ghà inum inga anatì njə̀m.

²⁰ Mə ya bì ko ghà Ìngam Ŋwiye a Dàmaskòs, nɔ̀ʼ angu ghà a Jèrusalèm, nɔ̀ʼ angu ghà inga isiŋi ijìm inga Jùdeyà bə̀ fɔrɔ inga iben mbe ne kayi mə̀Ju. Mə yaya ghà gha bəd bəŋə ìtɔb fìŋ sìkì inug tibɔ̀ŋ bèni abɔ̀ʼ Ŋwiye. Mə yaya bə̀ ghà gha bəd se ghìyə̀ inug mbe ne chwìye gha mbi fə bə̀ŋì ìtɔb fìŋ sìkì inug tibɔ̀ŋ.

²¹ À ya imbə̀ʼ anug azo̰ ne mə̀Ju ya gwi amə inga mbàn Ŋwiye se kə̀bə̀ ni zweti.

²² Nɔ̀ʼ pè tèchɔ̀ŋ, à ya Ŋwiye we wètè amə. Ane, mə təm aŋa ni ghà inug imbə̀ʼ Kristo abə bəd məjìm, kə̀ àkə bəd kwa kwa, kə̀ bəd kyen. Mə ya ghà kwàʼ inug mbe ne bədkə̀n Ŋwiye tì Muse ya bə̀ ghà gha mbi biri dù.

²³ Mbɔb ya ghà gha Wə̀d we ne Ŋwiye zɔ̀ʼi bèrì ni zən ngəʼ. Mbi ya bə̀ ghà gha, icheg ne məd ya wə̀d mbègtog ni zweme ane iwu, wì biri ghà inug imbə̀ʼ ìzḛzḛ abə mə̀Ju bə̀ ghà abə bəd ne kayi mə̀Ju.”

²⁴ Icheg ne Pɔl yaya ghàmà ni tàŋì ìwi nyɔd, Gɔbnà Festùs ya ghà ane gì ka ka gha, “Pɔl, àghò we be! Àŋwàʼrì ze ne àghò kwèmbi ako fə ghì àghò se be!”

²⁵ Wì ya ghà ane, si ya gha, Pɔl ya ywìtì ibo gha, “Wə̀d kyen Festùs, chəyi mə̀ be. Mə ya ghà yaʼ inug tesiʼ.

²⁶ Mbè, aton ne mə ghà inug mbo̰ ine anìŋ ne chəyi mə̀ bɔ ya gha, àghò fə kyeri inug mbo̰ ijìm imbə̀ʼ icheg ne chəyi inug mbo̰ ya du inə̀mbi.

²⁷ Ifɔn Agripà, àghò bḛ inug mbe ne bədkə̀n Ŋwiye ya ŋwàʼri? Mə kyèri gha àghò bḛ!”

²⁸ Ifɔn Agripà ya biri abə Pɔl gha, “Àghò kɔ̀ndi gha àghò we tì àghò niŋ məyi iki nyumə̀ ghì mə bə̀ŋə̀ ane wə̀d Kristo?”

²⁹ Pɔl ya ywìtì gha, “Ìmə ichaʼri Ŋwiye ya gha àghò tì bəd mbo̰ ne zùghə inug mbo̰ ne mə ghà amad anìŋ, mbə̀ yaʼ icheg inum. Mə kə̀b gha, kə̀ àkə ane iki nyumə̀ kə̀ ane nyumə̀ ne sa, mbə̀ yaʼ icheg inum. Si ya gha, imbə̀ʼ mbə̰ yaʼ awən bəd ndə̀ŋ icheg inum.”

³⁰ Anyumə̀ ne wì ya gha ane, ifɔn Agripà tì Gɔbnà Festùs tì Bènis fɔrɔ bəd məjìm mbe ne ya yaʼi ichughi angu ya gàd nɔ̀ʼ təm titighe.

³¹ Anyumə̀ ne mbi yaya dùwə̀, mbi ya ghàm mbɔb mbɔb gha, “Chəyi mbaŋà ìzo̰ ghì anug mɔ̀ʼɔ ne chwi gha mbe zweti aməd kə̀ wì nyi ndə̀ŋ.”

³² Ifɔn Agripà ya ghà abə Gɔbnà Festùs gha, “Àkə aghi ne chəyi mbaŋà ìzo̰ fə chà ìwi isaʼi abə Kayisà, nji àghò chì aməd sàŋì.”