Ɨ̀fàʼì 25 - Ikan feg

Pɔl kə̀b gha Kayisà saʼ aməd

¹ Anyumə̀ ne Gɔbnà Festùs ya pè inga aba aben ze a Jùdeyà chùghi ineg itad, wì ya nɔ̀ʼ a Kàserìyà kɔʼ ghò a Jèrusalèm.

² Itog bəd mbàn Ŋwiye tì itog bəd mə̀Ju ya ghò pùti inug imbə̀ʼ Pɔl ibo. Mbi ya puti ane, boʼ ibo ibo gha,

³ wì ghiyə ìchɔ̀mì inɔb, chà Pɔl a Jèrusalèm. Mbi ya ghà ane imbə̀ʼ icheg ne mbi ya fə chuʼri gha mbɔb biri nə̀mbì inɔnjì, ghɔ̀m Pɔl zwèti.

⁴ Festùs ya ywìtì inɔb gha, “Pɔl we inga nəb ndəŋ a Kàserìyà. Chəyi agha biri sà ne mo inum biri bə ghò angu.

⁵ Mbə̀ cha ìmbən itog bəd aben mɔ̀ʼɔ mbe swiʼi ghò angu tì inum. Wì mə gùg anug mɔ̀ʼɔ, mbi si saʼ aməd.”

⁶ Anyumə̀ ne wì ya fə chughi tì inɔb ane ineg mɔ̀ʼɔ icheg ìfàmi kə̀ ìghum, wì ya swiʼi ghò a Kàserìyà. Àsi aneg abɔ̀ʼ, wì ya ghò chughi inga nəb isaʼi, ghà gha mbe niŋ Pɔl yèʼe.

⁷ Anyumə̀ ne mbi ya niŋi Pɔl ghò abə Gɔbnà Festùs, mə̀Ju mbe ne ya nɔ̀ʼi a Jèrusalèm swìʼi ghò angu ya pè təm chè kad Pɔl. Mbi ya si ko se zìyè inug ka ka kwàʼ mbi nɔ̀ʼ nɔ̀ʼ igun məd. Chəyi tì mbi ya chwi gha inug mbe ya inug tesiʼ.

⁸ Pɔl ya ghàm ni chì inug igun àzi atog gha, “Chəyi mə̀ kweʼì ghà anug tibɔ̀ŋ mɔ̀ʼɔ imbə̀ʼ mə̀nɔ̀ʼɔ̀ mə̀Ju, kə̀ imbə̀ʼ mbàn Ŋwiye, kə̀ imbə̀ʼ Kayisà.”

⁹ Wì ya ghàm ane, si ya gha, Festùs ya kə̀b ni ghì gha mə̀Ju se kɔ̀ŋɔ̀ aməd. Ane, wì ya ghà abə Pɔl gha, “Àghò wa kə̀b ni kɔʼ ghò a Jèrusalèm gha mə saʼ awe angu imbə̀ʼ inug mbo̰ ne mbi puti awe inum anìŋ?”

¹⁰ Pɔl ya ywìtì gha, “Mə ya anìŋ inga nəb isaʼi Kayisà, ne ya asiŋi ne mbi koʼi ni saʼ amə angu. Àghò taŋ kyèri àze aghi gha chəyi mə̀ gùg anug mɔ̀ʼɔ abə mə̀Ju.

¹¹ Àmə yaʼ ne mə ghi anug tibɔ̀ŋ mɔ̀ʼɔ, kə̀ gùg anug mɔ̀ʼɔ ne tì mbi zweti amə, chəyi mə̀ to̰ ni ku. Si ya gha, icheg ne chəyi tesiʼ inga inug mbo̰ ne mbi zi igun inum, chəyi wə̀d mɔ̀ʼɔ ne tì wì nàʼ amə inɔb. Mə kə̀b gha Kayisà saʼ isaʼi gho̰.”

¹² Anyumə̀ ne Festùs ya fə chuʼri inug tì mbaŋà te ne yaya nàʼà ikə ibo, wì ya ywìtì abə Pɔl gha, “Àghò fə ghà gha Kayisà saʼ isaʼi gho̰. Ane, àghò biri ghò abə Kayisà!”

Pɔl təm imbìghè abə Ifɔn Agripà tì Bènis

¹³ Anyumə̀ ne ineg mɔ̀ʼɔ ya che, ifɔn Agripà tì Bènis ya ghò chàʼrì Gɔbnà Festùs a Kàserìyà.

¹⁴ Icheg ne mbi ya chughi angu ineg nɔʼ nɔʼ, Festùs ya ghà anug imbə̀ʼ isaʼi ìwi Pɔl abə ifɔn Agripà gha, “Mbaŋà mɔ̀ʼɔ ze aŋa ne Gɔbnà Feligs ya sàŋi inga nəb ndəŋ .

¹⁵ Anyumə̀ ne mə̀ ya gho a Jèrusalèm, itog bəd mbàn Ŋwiye tì itog bəd inga aben mə̀Ju ya ghà inug imbə̀ʼ isaʼi məd inum. Mbi ya kə̀b gha mə sɔb isaʼi gha mbe zweti aməd.

¹⁶ Mə ya ywìtì inɔb gha, kayi icheg aben məRom ni nyimi wə̀d ane isaʼi, nàʼ gha mbe zweti, ne chəyi tengàŋ beri apan ni təm adiŋi isaʼi tì bəd ne puti aməd ni tàŋì ìwi nyɔd. Mbi bèrì ni nàʼ apan ibo gha wì taŋa ìwi nyɔd.

¹⁷ Anyumə̀ ne mbi ya yeʼe fète aŋa, chəyi mə̀ ya chìkì nyumə̀. Kwàʼ isu abɔ̀ʼ, mə̀ ya ghò chùghi inga nəb isaʼi ghà inɔb gha mbe yeʼe tì mbaŋà ze.

¹⁸ Anyumə̀ ne bəd mbe ne ya zi isaʼi igun məd ya nɔ̀ʼi titighe, chəyi mbi ya mə̀tì tiku inug tibɔ̀ŋ mɔ̀ʼɔ igun məd icheg te ne mə̀ yaya kɔ̀ndɔ.

¹⁹ Inug ne mbi yaya tàŋà tì məd ya inug ne imbə̀ʼ àzɔb anug Ŋwiye fɔrɔ inug imbə̀ʼ mbaŋà mɔ̀ʼɔ ne ikum məd ya Yeso. Yeso we ya fə ku, si ya gha, Pɔl we ghà àzi gha, məd we izɔm.

²⁰ Chəyi mə̀ ya kyeri icheg ni nwendi tiku inug ìto̰. Ane, mə̀ ya biri abə Pɔl gha tì wì gho a Jèrusalèm gha mə saʼ aməd angu imbə̀ʼ inug mbo̰ ne mbi puti aməd?

²¹ Si ya gha, Pɔl ya ghà gha mbe nɔŋɔ yi inga nəb ndəŋ pè ane nyumə̀ ne Kayisà biri saʼ isaʼi we. Ane, mə̀ ya niŋ isɔbi anug gha mbe nɔŋɔ aməd pè ane nyumə̀ ne mə̀ biri chà aməd abɔ̀ʼ Kayisà.”

²² Ifɔn Agripà ya ghà abə Gɔbnà Festùs gha, “Mə biri kɔ̀ŋ ni zug inug abə mbaŋà ze mo mo.” Gɔbnà Festùs ya ywìtì ibo gha, “Àghò biri zug inug məd ibo ichug isu.”

²³ Àsi isu abɔ̀ʼ, ifɔn Agripà tì Bènis ya yèn inga ìwɔb kə̀tə̀d ifɔn ghò nyi inga ichamì. Wì ya ghò nyi tì itog bəd kyen igun mə̀sogyì fɔrɔ itog bəd kyen kyen inga ikye aben we. Anyumə̀ ne mbi ya nyi ane, Gɔbnà Festùs ya ghà gha mbe niŋ Pɔl yèʼe.

²⁴ Ane, Gɔbnà Festùs ya ghàm gha, “Ifɔn Agripà tì bəd məjìm mbe ne yaʼi aŋa abɔ̀ʼ ina, mbə bàd mbaŋà ìzo̰ ne mə̀Ju məjìm mbe a Jèrusalèm tì mbe a aŋa ya puti aməd, se kyḛ ghà gha chəyi wì koʼi ni ywiri chughi izɔm.

²⁵ Mə ya bàd gha chəyi wì ghi anug mɔ̀ʼɔ ne tì mbi zweti aməd. Si ya gha, məd zìye ya ghà gha Kayisà saʼ isaʼi we. Ane, mə̀ ya bḛ gha mə biri chà aməd a Rom.

²⁶ Chəyi mə̀ taŋ bèrì anug mɔ̀ʼɔ ne tì mə ŋwàʼrì abə ifɔn kyen imbə̀ʼ aməd. Ane, mə fə niŋ aməd yèʼe inən imbìghè tèchɔ̀ŋ. Mə niŋ aməd yèʼe ako ako ine imbìghè àghò ifɔn Agripà, ni gha tì mə fə nwendi isaʼi məd, mə we tì mə bèrì anug mɔ̀ʼɔ ni ŋwàʼrì imbə̀ʼ aməd.

²⁷ Ze biri yaʼ kwàʼ anug anen gha mə chà wə̀d ndəŋ abə ifɔn kyen ne chəyi mə̀ ŋwàʼri isaʼi ne mbi puti aməd igun.”