Ɨ̀fàʼì 24 - Ikan feg

Gɔbnà Feligs saʼ Pɔl

¹ Anyumə̀ ne ineg ya che ita̰, atog wə̀d igun bəd mbàn Ŋwiye ne ikum məd ya Ànàniyàs tì bəd kyen mɔ̀ʼɔ inga aben mə̀Ju fɔrɔ Tetulùs wə̀d ne yaya sàʼa tisaʼi, ya swiʼi ghò a Kàserìyà. Mbi ya swiʼi ghò ane, pè zì isaʼi igun Pɔl imbìghè abə Gɔbnà Feligs.

² Anyumə̀ ne mbi ya kàri Pɔl wì yèʼe, Tetulùs ya ko mə̀tì isaʼi we ne mbɔb beri tì Pɔl abə Feligs. Wì ya gha, “Gɔbnà Feligs! Tì fə chughi aton ine ane àbɔrɔ̀bɔd agha sà. Anjìm ìwe iwe, àghò ghì inug nɔʼ nɔʼ kɔpɔ inga aben aŋa ni tangi aben azo̰.

³ Mà nyumə̀ ijìm fɔrɔ inga isiŋi ijìm, tè bḛ inug ijìm mbe ne àghò we ghìyə̀. Tì we nàʼà məyakà ine, àghò Gɔbnà Feligs ane ìza fìŋ ijìm.

⁴ Chəyi mə̀ kəbi ni chìkì ìwe nyumə̀. Mə biri sɔpi ìngam sɔpi. Ane, mə we bòʼo ibo ine gha, niŋ ìze fìŋ chɔm ze ne àghò beri zug anug azo̰ ne mə̀ biri ghà ine.

⁵ Tè fə bàd gha mbaŋà ìzo̰ ya wə̀d ne kə̀bə̀ isaʼi. Məd we ghìyə̀ gha mə̀Ju inga isiŋi ijìm se gwìye achɔb tàra aben. Mbaŋà ìzo̰ ya atog wə̀d igun ifeti məNazàren.

⁶ Wì yaya kə̀bə̀ gha nji tè chìkì mbàn Ŋwiye, si ya gha, tì ya gwì aməd. [Tì ya kə̀b ni saʼ aməd icheg ne ìmba mə̀nɔ̀ʼɔ̀ chwi.

⁷ Si ya gha, Lisìyàs ne ya atog wə̀d kyen igun mə̀sogyì ya yeʼe chì aməd ina ikye abo.

⁸ Wì ya chì aməd ane si gha bəd ne beri isaʼi, mbe yeʼe pùti ine.] Àghò mə nwèndi aməd, àghò biri kyeri tesiʼ ne yaʼi imbə̀ʼ inug mbo̰ ne te ghà imbə̀ʼ aməd.”

⁹ Mə̀Ju ya fɔti ichug bḛ gha inug mbe ne Tetulùs we ghà ya tesiʼ.

Pɔl chì inug igun àzi atog imbìghè abə Gɔbnà Feligs

¹⁰ Anyumə̀ ne gɔbnà Feligs ya mə̀ʼri abo abə Pɔl gha wì ghama, Pɔl ya gha, “Mə kyèri gha àghò fə saʼ aben azo̰ ane tituʼ nɔʼ nɔʼ. Ane, mə gyen kwa ako ni təm ine imbìghè ni chì inug mbo̰ ne mbe zìyè inum igun atog.

¹¹ Àghò mə nwèndi icheg chɔm, àghò biri kyeri gha chəyi ineg kiri che ìghum chɔ̀b ibe ne mə̀ ya kɔʼi ghò a Jèrusalèm ni ghumni Ŋwiye.

¹² Chəyi bəd mbo̰ ne zìyè isaʼi igun inum ya bàri amə ne mə taŋi anug mɔ̀ʼɔ tì wə̀d, kə̀ gwì achɔb tì wə̀d mɔ̀ʼɔ inga mbàn Ŋwiye, kə̀ inga məchamì Ŋwiye, kə̀ inga asiŋi mɔ̀ʼɔ ndəŋ inga Jèrusalèm.

¹³ Chəyi tì mbɔb chwi ine gha inug mbo̰ ne mbɔb mbe zìyè inum igun atog ya inug tesiʼ.

¹⁴ Anug ne mə bḛ ine ya gha, mə we ghùmnə Ŋwiye we ne ìmba mə̀mbaʼ mbe aneg yaya ghùmnə. Mə bə̀ bḛ ikuchèg we ne Kristo yaya chwìte ne bəd mbo̰ mbe se kàrà gha à ya Inɔnjì ako. Mə bə̀ bḛ inug ijìm mbe ne Muse ya ŋwàʼri inga mə̀nɔ̀ʼɔ̀ fɔrɔ inug mbe ne bədkə̀n Ŋwiye ya ŋwàʼri.

¹⁵ Mə nɔ̀ŋì ìmə ikɔndi se ghɔ̀mɔ̀ Wə̀d we ne Ŋwiye ya kàʼi icheg ne mbɔb mbe bə̀ ghɔ̀mɔ̀. Ikɔndi we ya gha, bəd ne təmi kòʼ imbìghè abə Ŋwiye fɔrɔ bəd mbe ne chəyi mbi təm kòʼ, mbi biri ghum zweme ane iwu.

¹⁶ Mə kirə ika ijìm ni ghì gha ìmə fìŋ zen imbìghè abə Ŋwiye fɔrɔ imbìghè abə bəd.

¹⁷ Ane tituʼ nɔʼ nɔʼ ya che, mə̀ ya ywìrì ghò a Jèrusalèm ni nàʼ ighi abə ìmbum bəd aben mbe ne chəyi àzɔb, bə̀ nàʼ ighi àfàtì abə Ŋwiye.

¹⁸ Ane, à ya anyumə̀ ne mə̀ yaya ghìyə̀ inug mbo̰ fə bə̀ sò ìmə nyɔd icheg mə̀nɔ̀ʼɔ̀ chwi, ne mbi ya bàri amə inga mbàn Ŋwiye. Chəyi inɔ̰ bəd mɔ̀ʼɔ ya yaʼi abɔ̀ʼ inum. Chəyi achɔb mɔ̀ʼɔ ya bə dù.

¹⁹ À yaya məyi mə̀Ju mɔ̀ʼɔ ne ya nɔ̀ʼi a Esìyà ya yaʼi angu. Àkə aghi ne mbɔb beri anug tì inum, nji mbɔb kə yèʼe pùti amə ine.

²⁰ Icheg ne chəyi mbɔb yeʼe, bəd mbo̰ gha anug tibɔ̀ŋ ze ne mə̀ ya ghi anyumə̀ ne itog bəd ne sàʼa aben ya saʼi amə.

²¹ À ya məyi anug azo̰ amɔʼ ne mə̀ ya gha abə bəd ne sàʼa aben ane gì ka ka. Mə ya gha, ‹Mbə̰ ya anìŋ sàʼa mə imbə̀ʼ icheg ne mə bḛ gha bəd biri ghum zweme ane iwu!›”

²² Gɔbnà Feligs ne ya taŋ kyèri Inɔnjì we ne Yeso yaya chwìte, ya chà isaʼi we imbìghè, si gha, “Anyumə̀ ne Lisìyàs ne yaʼi atog wə̀d kyen igun mə̀sogyì biri yeʼe, mə biri sɔb isaʼi gho̰.”

²³ Wì ya ghà ane, si ghà abə atog wə̀d igun mə̀sogyì iki ifibì gha wì niŋ Pɔl ghò ghùbì. Wì ya ghà ane, si ya gha, wi ya nàʼ apan abə Pɔl ni ya fàʼà inug ne wì kə̀bi. Wì ya bə̀ sàŋì gha mə̀sə̀ʼ ìmbi Pɔl ya yèʼe nàʼà ighi mbe ne wì kòʼi ni bèrì ibo.

Pɔl ghàm abə Gɔbnà Feligs tì Drùsilà

²⁴ Ane ineg mɔ̀ʼɔ ya chè, Gɔbnà Feligs tì iweg məd ne ikum məd ya Drùsilà ya yeʼe. Drùsilà ya yaʼ Ju. Wì ya yeʼe pè chà bəd, mbi ghò kàrì Pɔl imbə̀ʼ icheg ne wì yaya kə̀bə̀ ni zug inug mbe ne Pɔl yaya ghàmà imbə̀ʼ anug ni nɔ̀ŋì ibḛfiŋ igun Yeso Kristo.

²⁵ Pɔl ya chè imbìghè ghàm imbə̀ʼ anug ni təm kòʼ, anug ni nyimbi nyɔd fɔrɔ anug imbə̀ʼ aneg ze ne yèʼe ne Ŋwiye biri saʼ bəd. Gɔbnà Feligs ya bɔ si ghà abə Pɔl gha, “Àghò saŋa awe ane, ghò awe. Anyumə̀ ne mə̀ biri bèrì apan chɔm, mə biri kàrì awe.”

²⁶ Wì yaya bə̀ kɔ̀ndɔ gha Pɔl biri nàʼ ikab mɔ̀ʼɔ ibo anjìm anjìm. Àze ya ghì wì ywirì kə chà bəd gha mbe kara Pɔl wì yeʼe mbɔb mughə.

²⁷ Tituʼ ya chè tibe, Posìyòs Festùs jəg atən abə Feligs icheg gɔbnà. Icheg ne Gɔbnà Feligs yaya kə̀bə̀ ni ghì ìchɔ̀mì abə mə̀Ju, wì ya sàŋì Pɔl inga nəb ndəŋ .