Ɨ̀fàʼì 23 - Ikan feg

¹ Anyumə̀ ne Pɔl təmi imbìghè abə itog bəd mbe ne yaya sàʼa aben, wì ya nèn awɔb kwàʼ igun ìfe, ghà inɔb gha, “Məmbon, mə yaya fàʼà àmə àfàʼì abə Ŋwiye kwàʼ ane fìŋ zḛ zḛ kə̀ bèyi amad anìŋ.”

² Atog wə̀d igun bəd mbàn Ŋwiye ne ikum məd ya Ànàniyàs ya ghà abə bəd mbe ne ya tindi iban Pɔl gha, “Mbə̀ twi ichug məd we!”

³ Pɔl ya ywìtì abə wə̀d kyen we gha, “Àghò, àbèmni inug! Ŋwiye biri twi awe. Àghò chùghi aghɔ ni saʼ amə icheg ne mə̀nɔ̀ʼɔ̀ chwi, ywìrì gha, mbe twi ichug inum. Àkə icheg ne mə̀nɔ̀ʼɔ̀ bə chwi gha tè faʼa?”

⁴ Bəd mbe ne ya tindi iban Pɔl ya ywìtì abə Pɔl gha, “Chim tizi! Àghò ya anìŋ chàpà atog wə̀d igun bəd mbàn Ŋwiye.”

⁵ Pɔl ya ywìtì inɔb gha, “Ìmbum məfi, chəyi mə̀ kə kyèri gha məd ya atog wə̀d igun bəd mbàn Ŋwiye. Mbe ŋwàʼrì inga Àŋwàʼrì Ŋwiye gha, ‹Imbə̀ʼ àghò ghama awe ìngam tibɔ̀ŋ imbə̀ʼ wə̀d we ne sàʼa bəd.› ”

⁶ Anyumə̀ ne Pɔl ya bàri gha, inga ifeti itog bəd ne yaya sàʼa aben, bəd mɔ̀ʼɔ ya mə̀Sadùsi, mə̀mbin ya mə̀Farìsi, wì ya gha, “Ìmbum məfi, mo ya Farìsi. Ìmə mbaʼ ya Farìsi. Mə ya itəmi adiŋi isaʼi aŋa anìŋ mbi saʼà mə imbə̀ʼ icheg ne mə bḛ gha, iwu bəd biri ghum zweme ane iwu.”

⁷ Icheg ne Pɔl ya gha ane, mə̀Farìsi tì mə̀Sadùsi ya zug, nɔ̀ʼ ko se tàŋà inug mbɔb mbɔb. Bəd mbe ne kə̀ sàʼa Pɔl si yaʼ ichug ichug.

⁸ Mə̀Sadùsi yaya ghà àzɔb gha: Chəyi bəd biri ghum zweme ane iwu ka! Chəyi bə̀ yi mbè angirə̀ mɔ̀ʼɔ angu ka! Chəyi bə̀ yi izwighi mɔ̀ʼɔ angu ka! Àsi mə̀Farìsi ya bəd ne yaya bḛ inug mbo̰ ijìm.

⁹ Ìngam ya dù kwàʼ ìwi ka ka icheg ne mbi yaya tàŋà inug ane. Ane, mə̀chwitì mə̀nɔ̀ʼɔ̀ mɔ̀ʼɔ ne ya yaʼi mə̀Farìsi ya təm titighe ghàm kwàʼ ane gì ka ka gha, “Chəyi tì zə̰ anug tibɔ̀ŋ mɔ̀ʼɔ ne wə̀d gho̰ ghi ka. Ighəm mɔ̀ʼɔ, à ya azwighi mɔ̀ʼɔ kə̀ angirə̀ mɔ̀ʼɔ ghàmi ibo.”

¹⁰ Achɔb ze ya kà anene, wə̀d kyen abə mə̀sogyì se bɔ gha mbi biri sètì Pɔl anyam anyam. Ane, wì ya chà mə̀sogyì gha mbe swiʼi ghò niŋ Pɔl nyi ghò inga ikam.

¹¹ Àsi izimi we, Anɔŋisəg ya dù təm iban Pɔl ghà ibo gha, “Imbə̀ʼ àghò bɔ awe ka. Kwàʼ icheg ne àghò ghàmi imbə̀ʼ amə a Jèrusalèm aŋa, àghò biri bə ghàm imbə̀ʼ amə a Rom.”

Inug imbə̀ʼ icheg ne mbi ya chuʼri ni zweti Pɔl

¹² Àsi isusu abɔ̀ʼ, mə̀Ju mɔ̀ʼɔ ya sìb gha chəyi mbɔb biri jəg kə̀ no aghi mɔ̀ʼɔ ne chəyi mbɔb kiri zweti Pɔl.

¹³ Bəd ne ya sìbi anug azo̰ ya chè che ane ìghum ikwè.

¹⁴ Mbɔb ya nɔ̀ʼ ghò kɔ̀ti itog bəd mbàn Ŋwiye fɔrɔ itog bəd ne sàʼa aben, ghà inɔb gha, “Tè fə sìb gha chəyi tì biri jəg aghi mɔ̀ʼɔ ne chəyi tì kiri zweti Pɔl.

¹⁵ Ane, mbə̰ tì ifeti bəd mbe ne sàʼa aben, mbə̀ tɔm ikən abə wə̀d kyen mə̀sogyì gha mbe niŋ Pɔl yèʼe. Mbə̀ ghiyə icheg bəd ne kə̀bə̀ ni taŋ nwendi inug mɔ̀ʼɔ ibo. Ane, tì biri ghɔ̀m aməd inɔ̀njì, zwèti aməd bɔŋ wì se pè aŋa.”

¹⁶ Ŋwan njàbi Pɔl ne yaʼi ŋwan mbaŋà ya zug mənaŋ mbo̰, nɔ̀ʼ ghò inga ikam ndəŋ ghò jə ìsə abə Pɔl.

¹⁷ Anyumə̀ ne Pɔl ya zughi ane, wì ya kàrì atog wə̀d igun mə̀sogyì iki we, ghà ibo gha, “Niŋ ŋwan ajɔŋ gho̰ ghò abə wə̀d kyen mə̀sogyì imbə̀ʼ icheg ne wè bèrì anug mɔ̀ʼɔ ni ghà ibo.”

¹⁸ Sogyì we ya niŋ ŋwan ajɔŋ we ghò abə wə̀d kyen mə̀sogyì, pè ghà ibo gha, “À ya Pɔl we ne yaʼi inga ikam ndəŋ tɔ̀mi amə gha mə niŋ ŋwan ajɔŋ yèʼe ine. Wì bèrì anug mɔ̀ʼɔ ni ghà ine.”

¹⁹ Wə̀d kyen mə̀sogyì we ya nyimi abo abə ŋwan ajɔŋ we sùngì ghò iban, si biri ibo gha, “Anug ne àghò beri ni ghà inum àkə gha?”

²⁰ Ŋwan ajɔŋ we ya ghà ibo gha, “Mə̀Ju fə taŋ mənaŋ gha isu, mbɔb biri yeʼe ghà ine gha àghò niŋ Pɔl yèʼe asiŋi isaʼi. Mbɔb biri ghì icheg ni gha mbɔb ya kə̀bə̀ ni ywìri taŋ nwendi inug mɔ̀ʼɔ ibo.

²¹ Imbə̀ʼ àghò bḛ awe anug ne mbɔb biri ghà. Bəd chè che ane ìghum ikwè ne chuʼri nyɔd ni nə̀mbì awɔb inga agyen bè ghɔ̀mɔ̀ Pɔl. Mbɔb fə sìb gha, chəyi mbi biri jəg kə̀ no aghi mɔ̀ʼɔ ne chəyi mbi kiri zweti Pɔl. Mbɔb fə chuʼri ìwɔb nyɔd se ghɔ̀mɔ̀ gha àghò bḛ anug ne mbɔb mbe kə̀bə̀.”

²² Anyumə̀ ne wə̀d kyen mə̀sogyì we ya zughi ane, wì ya pati ŋwan ajɔŋ we ghà ibo gha, “Imbə̀ʼ àghò gha awe abə wə̀d mɔ̀ʼɔ gha àghò ghà anug mɔ̀ʼɔ inum. Àghò zug?”

Wə̀d kyen mə̀sogyì chà Pɔl abə gɔbnà Feligs

²³ Wə̀d kyen mə̀sogyì we ya kàri mə̀sogyì məbe ne wə̀d ifibì abɔ̀ʼ inɔb we sàʼa mə̀sogyì iki, ghà inɔb gha, “Mbə̀ chɔʼ mə̀sogyì aki abe ne mbi biri ghò a Kàserìyà. Mbə̀ bə̀ chɔʼ bəd nyam mə̀kara ìghum ìsàmbe tì bəd ighɔŋ aki abe yètì abɔ̀ʼ. Mbə̀ chuʼri ìwən nyɔd ni nɔ̀ʼ aŋa ane mə̀nyùmə̀ àbɔg izimi tèchɔ̀ŋ.

²⁴ Mbə̀ bə kə̀b ìti mɔ̀ʼɔ tì nyam mə̀kara ne Pɔl biri kɔʼ igun. Mbə̀ kyeʼre aməd kwàʼ icheg chɔm ghò nàʼ aməd abə gɔbnà Feligs.”

²⁵ Ane, wə̀d kyen mə̀sogyì we ya chà àŋwàʼrì abə gɔbnà Feligs ne wì ya ŋwàʼri inga gha,

²⁶ “À ya mo Klodìyòs Lisìyàs ŋwàʼri àŋwàʼrì azo̰. Mə ŋwàʼrì anìŋ ine, àghò wə̀d kyen, Gɔbnà Feligs. Mə chàʼrì awe.

²⁷ Mə̀Ju ya gwì wə̀d gho̰ se kə̀bə̀ ni niŋ aməd gho zweti. Mə ya si zug gha məd ya wə̀d a Rom. Ane, mə̀ ya niŋ ìmbum mə̀sogyì ghò pàŋì aməd abə bəd mə̀Ju mbe.

²⁸ Mə ya kə̀b ni taŋ kyeri anug ze ne wì gùghi ne mbi yaya se kə̀bə̀ ni zweti aməd. Ane, mə̀ ya niŋ aməd ghò inga ìzɔb nəb isaʼi.

²⁹ Mə ya nwendi kwàʼ icheg chɔm, si ya gha, chəyi mə̀ ya zə̰ anug tibɔ̀ŋ mɔ̀ʼɔ ne wì ghi ni gha mbe zweti aməd kə̀ chà aməd inga nəb ndəŋ . Isaʼi ne bəd mbe yaya zìyè igun məd ya inug imbə̀ʼ ìmbɔb mə̀nɔ̀ʼɔ̀.

³⁰ Icheg ne mə̀ ya zughi mənaŋ ne bəd mə̀Ju mbe ya taŋi ni zweti aməd, mə̀ ya bàd gha, ze bɔ̀ŋ gha, mə cha aməd ine kwàʼ ati ati. Mə fə bə̀ ghà abə bəd mbe ne beri isaʼi tì məd gha mbe yèʼe pùti ìmbɔb inug ijìm ine.”

³¹ Mə̀sogyì mbe ya zug ane bə̀ fàʼ àzɔb àfàʼì. Mbɔb ya niŋ Pɔl kwàʼ izimi we yḛ̀ tì məd anene ghò pè a Àntipatrìs.

³² Àsi isu abɔ̀ʼ, mə̀sogyì mbe ne yaya yḛ̀ ighog ya bə̀ndì ghò inga ikam. Mə̀sogyì mbe ne ya yaʼi igun nyam mə̀kara ya si chè imbìghè ni ghò tì Pɔl.

³³ Anyumə̀ ne mbɔb ya pe a Kàserìyà, mbi ya nàʼ àŋwàʼrì ze abə Gɔbnà Feligs, bə̀ zì Pɔl ibo ikye abo.

³⁴ Gɔbnà ya kàrì àŋwàʼrì ze si bìri abə Pɔl gha, “Àghò kə wə̀d aben azeg?” Anyumə̀ ne wì ya kyeri gha Pɔl ya wə̀d a Sìlisìyà, wì ya ghà ibo gha,

³⁵ “Mə biri taŋ zug ìwe isaʼi anyumə̀ ne bəd mbe ne puti awe pe aŋa.” Ane, wì ya si ghà gha mbe niŋ Pɔl ghò nɔ̀ŋì inga ìtɔʼ Erɔ̀d, kyeʼri aməd kwàʼ icheg chɔm.