Ɨ̀fàʼì 22 - Ikan feg

¹ Pɔl ya ghà abə inɔ̰ bəd we gha, “Ìmbum məfi fɔrɔ ìmbum mə̀mbaʼ, mbə̀ zug anug ne mə̀ biri ghà inən imbìghè ni chì inug igun àmə atog.”

² Anyumə̀ ne mbi ya zughi icheg ne wì ya ghàmi inɔb ane ìngam Hibrù, mbi ya ywìrì taŋ chim tizi. Ane, wì ya gha;

³ “Mo ya Ju. Mbi ya gwi amə a Tasɔ̀s inga Sìlisìyà. Mə ya kweg aŋa a Jèrusalèm bə̀ kwèmbi àŋwàʼrì aton Gàmalìyè. Mə ya kwembi mə̀nɔ̀ʼɔ̀ mbe ne mbi ya nàʼi abə ìmba mə̀mbaʼ aneg. Mə yaya bə̀ zìyè atog ane àfàʼì Ŋwiye icheg ne mbə̰ məjìm mbe bə̀ zìyè.

⁴ Mə yaya chɔ̀ʼɔ ibɔʼì ighog abə bəd mbe ne ya beni abɔ̀ʼ Inɔnjì gho̰ ne Kristo yaya chwìte. Mə yaya zwète ìmbi mɔ̀ʼɔ. Mə yaya gwìtè mbaŋà fɔrɔ mə̀yi kɔ̀rɔ ghò nàʼà gha mbe ziye inga nəb ndəŋ .

⁵ Atog wə̀d igun bəd mbàn Ŋwiye tì bəd mbe ne sàʼa aben məjìm, mbe kyèri gha anug azo̰ ne mə ghà inən ya anug tesiʼ. Mə ya niŋ ìŋwàʼrì inɔb ni ghò nàʼ abə mə̀Ju mbe ne yaʼi a Dàmaskòs. Ane, mə̀ ya ghò angu ni gwìtì bəd Kristo, si kɔd niŋ yèʼe a Jèrusalèm gha mbe chə awɔb.”

Pɔl ghà icheg ne Kristo ya bə̀ŋi məd ane ìwi wə̀d

⁶ Pɔl ya chè imbìghè gha, “À ya yaʼ icheg àngɔŋ tisi ne mə̀ ya se tìnde ni pè a Dàmaskòs ne ìzḛzḛ kyen ne ya nɔ̀ʼi ikaŋ ya saʼa zuʼ chè kad amə.

⁷ Mə ya bu igun nyam fen aseg, si zug gì ne ya biri inum gha, ‹Sɔl! Sɔl! Aton ne àghò we chɔ̀ʼɔ ìmbum ibɔʼì ighog àkə gha?›

⁸ Mə ya biri gha, ‹Anɔŋisəg, àghò kə we?› Wì ya ywìtì inum gha, ‹Mo ya Yeso we a Nazarèd, ne àghò we chɔ̀ʼɔ ìmbum ibɔʼì ighog.›

⁹ Mbaŋà te ne ya yaʼi tì inum, ya bàd ìzḛzḛ we. Si ya gha, chəyi mbi ya zughi gì ze ne ya ghàmi inum.

¹⁰ Mə ya biri gha, ‹Anɔŋisəg, mə ghənə?› Anɔŋisəg ya ghà inum gha, ‹Nɔ̀ʼɔ titighe, ghò nyi inga Dàmaskòs. Anyumə̀ ne àghò pè angu, wə̀d mɔ̀ʼɔ biri ghà inug mbe ne Ŋwiye chɔ̀ʼi awe gha àghò faʼa.›

¹¹ Chəyi tì mə̀ ya ywìrì bàd isiŋi anjìm ìzḛzḛ kyen we ne ya zuʼi igun inum. Ane, mbaŋà te ne yaya yḛ̀ tì inum ya si nyìmi àmə abo tì ghò nyi inga Dàmaskòs.

¹² Mbaŋà mɔ̀ʼɔ ya yaʼ a Dàmaskòs ne ikum məd ya Ànàniyàs. Məd ya nɔ̀ŋì ìzi fìŋ igun Ŋwiye. Məd yaya bə̀ nɔ̀ŋɔ̀ mə̀nɔ̀ʼɔ̀ Muse. Mə̀ju məjìm yaya ghà inug chɔm imbə̀ʼ aməd.

¹³ Wì ya yèʼe abɔ̀ʼ inum, pè təm iban inum, ghà inum gha, ‹Sɔl, ìmə ifi, àghò ywiri ko bàd isiŋi.› Kwàʼ ati ati, mə̀ ya ywìrì ko se bàrà isiŋi. Ane, mə̀ ya si bàd aməd.

¹⁴ Wì ya si ghà inum gha, ‹Ŋwiye ìmba mə̀mbaʼ aneg fə chɔʼ awe gha àghò kyeri inug mbe ne wì kə̀bi, bə̀ ghì gha àghò bàd Wə̀d we ne təmi kòʼ. Wì fə bə̀ ghì gha àghò zug ìngam kwàʼ ibo ichug.

¹⁵ Wì ghì ane imbə̀ʼ icheg ne àghò biri se ghà inug ijìm mbe ne àghò fə bàri bə̀ zug imbə̀ʼ aməd abə bəd məjìm.

¹⁶ Ane, àghò kə amad anìŋ ghɔ̀mɔ̀ aghə? Nɔ̀ʼɔ titighe, niŋ mənib, dèg abə Anɔŋisəg wì so ìmbe inug tibɔ̀ŋ.›

¹⁷ Mə ya bə̀ndì ghò a Jèrusalèm. Anyumə̀ ne mə̀ yaya chàʼrà Ŋwiye inga mbàn Ŋwiye, anatì njə̀m mɔ̀ʼɔ ya chè amə.

¹⁸ Mə ya bàd Anɔŋisəg inga anatì njə̀m ze, wì gha inum gha, ‹Zàmba ghì nɔ̀ʼ a Jèrusalèm amad amad imbə̀ʼ icheg ne chəyi bəd mbe aŋa biri bḛ inug mbe ne àghò we ghà imbə̀ʼ amə.›

¹⁹ Mə ya ywìtì gha, ‹Anɔŋisəg, mbɔb taŋ kyèri gha, mə yaya ghò inga məchamì Ŋwiye məjìm ni gwìtì bəd zì inga nəb ndəŋ bə̀ sɔm mbe ne bḛ awe.

²⁰ Anyumə̀ ne mbi yaya zwète Stifə̀n we ne yaya ghà inug imbə̀ʼ awe, mə̀ ya təm iban bḛ gha mbe zweti aməd. Mə yaya kyèʼrè ndwi abə bəd mbe ne ya zweti aməd.›

²¹ Anɔŋisəg ya ghà inum gha, ‹Ndò imbə̀ʼ icheg ne mə̀ biri chà awe a sà agha abə bəd mbe ne kayi mə̀Ju.› ”

²² Bəd mbe ya zweri ìngam ìwi Pɔl ghò pè ane nyumə̀ ne wì ya gha gha Anɔŋisəg fə chà aməd gha wì ghò ghà ikən chɔm abə bəd ne kayi mə̀Ju. Ane, mbi ya ko se kyḛ ane gì ka ka gha, “Mbə̀ nimni mbaŋà ìzo̰ chì inga isəg! Chəyi wì koʼi ni ywìrì yaʼ izɔm!”

²³ Anyumə̀ ne mbi yaya kyḛ ane, mbi ya se nwìndè ìtɔb ndwi ikaŋ bə̀ sàba agwi inga ifə.

²⁴ Ane, atog wə̀d kyen igun mə̀sogyì ya ghà gha mə̀sogyì niŋ aməd ghò inga ìwɔb ikam, pè te aməd ane ngwàn imbə̀ʼ taŋ nwendi aton ne bəd mbe yaya kyḛ igun atog abə Pɔl.

²⁵ Si ya gha, anyumə̀ ne mbi ya kɔd Pɔl ane məniʼ, wì ya ghà abə atog wə̀d igun mə̀sogyì iki ifibì ne ya təmi iban angu gha, “Mə̀nɔ̀ʼɔ̀ wa chwi gha mbə te wə̀d a Rom ane ngwàn ne chəyi mbi kiri sɔbi isaʼi gha wì fə gùg anug?”

²⁶ Anyumə̀ ne atog wə̀d kyen igun mə̀sogyì iki ifibì we ya zughi anug ze, wì ya ghò abə atog wə̀d igun mə̀sogyì we pè biri ibo gha, “Àkə aghə ne àghò we kə̀bə̀ ni ghì anìŋ? Kyeri gha mbaŋà ìzo̰ ya wə̀d a Rom.”

²⁷ Ane, atog wə̀d kyen igun mə̀sogyì ya ghò bìri abə Pɔl gha, “Gha inum, àghò kə wə̀d a Rom?” Pɔl ya ywìtì ibo gha, “E!”

²⁸ Atog wə̀d kyen ze igun mə̀sogyì ya ghà abə Pɔl gha, “Mə ya zon anug ne yaʼi wə̀d a Rom kwàʼ ane ikab nɔʼ nɔʼ.” Pɔl ya ywìtì ibo gha, “Mo ya kwàʼ wə̀d a Rom.”

²⁹ Ane, mbaŋà te ne yaya kə̀bə̀ ni nwendi inug imbə̀ʼ Pɔl ya ywìrì sùngì anjìm ati ati. Atog wə̀d kyen ze igun mə̀sogyì ya bə̀ bɔ imbə̀ʼ icheg ne wì ya bàd gha zìye fə kɔd Pɔl ne yaʼi wə̀d a Rom.

Pɔl təm imbìghè abə bəd ne sàʼa aben

³⁰ Atog wə̀d kyen igun mə̀sogyì ya kə̀b ni kyeri aton ne mə̀Ju mbe yaya zìyè isaʼi igun Pɔl. Ane, wì ya nɔ̀ʼ isu abɔ̀ʼ gha mbe za Pɔl. Wì ya bə̀ ghà abə itog bəd mbàn Ŋwiye fɔrɔ abə bəd ne sàʼa aben məjìm gha mbe yeʼe bɔ̀mbì. Ane, wì ya ghì Pɔl təm inɔb imbìghè.