Ɨ̀fàʼì 21 - Ikan feg

Pɔl ghò a Jèrusalèm.

¹ Anyumə̀ ne tì ya fə nàʼri tì itog bəd Kristo mbe a Efesùs, tì si nyi inga abaŋ igyi bàni ghò a Kòs. Àsi isu abɔ̀ʼ, tì ya si ghò a Rodès. Tì ya nɔ̀ʼ angu ghò a Pàtarà.

² Tì ya bàd abaŋ igyi ne bàna ghò a Fònisìyà, tì si nyi inga se ghò.

³ Anyumə̀ ne tì ya təmi bàd Sayiprùs, tì si chè aton aton bàni ghò a Sirìyà pè təm a Tayì. Tayì ya asiŋi ne mbi ya beri ni chì ighi mbe ne abaŋ igyi ya bèʼi nɔ̀ŋì angu.

⁴ Tì ya pè angu bàd bəd mɔ̀ʼɔ ne yaʼi mə̀mə̀nənùg Kristo. Tì ya chughi angu abɔ̀ʼ inɔb ane ineg ìsàmbe. Azwighi Ŋwiye ya ghì mə̀mə̀nənùg mbe ghà abə Pɔl gha imbə̀ʼ wì gho yi a Jèrusalèm ka.

⁵ Si ya gha, ane ìwa nyumə̀ ni ghò ya kòʼi, tì ya sàŋì awɔb ghò awa. Mə̀mə̀nənùg məjìm tì ìmbɔb mə̀yi fɔrɔ ìmbɔb bɔn ya niŋ awa ni ghò chà. Mbɔb ya beni abɔ̀ʼ ina anene dù ikye aben yèʼe pè iban igyi tìbà. Tì ya pè angu chìmbì itog inwḭ aseg chàʼra Ŋwiye.

⁶ Tì ya si nàʼrì tì inɔb, nyi inga abaŋ igyi. Mbɔb ya bə̀ si bə̀ndì ghò awɔb inga ìmbɔb ichan.

⁷ Tì ya nɔ̀ʼ a Tayì chè imbìghè ghò a Tòlemè. Anyumə̀ ne tì ya pè angu, tì ya chàʼrì ìmba məfi mbe ne tì yaʼi ane ifɔti tì Kristo. Tì ya bə̀ chùghi abɔ̀ʼ inɔb ane aneg afibì.

⁸ Tì ya nɔ̀ʼ isu abɔ̀ʼ ghò a Kàserìyà. Tì ya pè angu chùghi abɔ̀ʼ Filip we ne yaya chètè ikən chɔm. Məd ya yaʼ wə̀d mɔ̀ʼɔ abɔ̀ʼ mbaŋà ìsàmbe te ne Azwighi Ŋwiye ya chɔʼi gha mbe wete ni ghàpì ighijəg.

⁹ Məd ya bèrì bɔn àyi məkwè ne chəyi mbi ya kiri nami. Bɔn àyi mbe yaya ghà ikən Ŋwiye.

¹⁰ Anyumə̀ ne tì ya fə chughi angu ane inṵ ineg mɔ̀ʼɔ, wə̀dkə̀n Ŋwiye mɔ̀ʼɔ ne ikum məd ya Àgabùs ya nɔ̀ʼ a Jùdeyà swìʼi yèʼe a Kàserìyà.

¹¹ Wì ya yèʼe abɔ̀ʼ ina, pè niŋ ìkɔ̀bì ìwi Pɔl, kɔd ìmbi ighog fɔrɔ ìmbi ibo inga, si ghà gha, “Azwighi Ŋwiye gha, ‹Aŋa ya icheg ne mə̀Ju mbe ne yaʼi a Jèrusalèm biri niŋ wə̀d ne beri ìkɔ̀bì gho̰ kɔd nàʼ abə bəd ne kayi mə̀Ju.›”

¹² Anyumə̀ ne tì ya zughi ane, mba tì bəd ndəŋ ne ya yaʼi abɔ̀ʼ ina ya boʼ ibo abə Pɔl gha imbə̀ʼ wì kɔ̀ʼɔ yi ghò a Jèrusalèm.

¹³ Pɔl ya ywìtì gha, “Aton ne mbə dèghè anìŋ, chìkə̀ ìmə fìŋ àkə gha? Mə fə chuʼri ìmə nyɔd ni nyi ndəŋ fɔrɔ bèyi ni ku a Jèrusalèm imbə̀ʼ ikum Anɔŋisəg Yeso.”

¹⁴ Icheg ne chəyi tì ya beri ika ni kɔpi fìŋ məd, tì ya sàŋì aməd, si gha, “Anɔŋisəg fàʼà anug ne wì kɔ̀ŋi.”

¹⁵ Tì ya chughi angu ane iki nyumə̀ mɔ̀ʼɔ, chùʼri nyɔd nɔ̀ʼ kɔʼ ghò a Jèrusalèm.

¹⁶ Mə̀mə̀nənùg Yeso mɔ̀ʼɔ abɔ̀ʼ mbe ne ya nɔ̀ʼi a Kàserìyà yèʼe abɔ̀ʼ ina, ya niŋ awa ghò inga achan Nasòn. Nasòn gho̰ ya wə̀d a Sayiprùs ne ya yaʼi wə̀d mɔ̀ʼɔ abɔ̀ʼ mə̀mə̀nənùg mbègtog ìmbi Yeso. À ya ibo inga achan ne tì ya beri ni chughi.

Pɔl ghò zən itog bəd inga ifeti bəd Kristo we a Jèrusalèm

¹⁷ Anyumə̀ ne tì ya pe a Jèrusalèm, ìmba məfi mbe ne tì yaʼi ane ifɔti tì Kristo, ya niŋ awa kwàʼ ane igyendi.

¹⁸ Àsi aneg abɔ̀ʼ, mba məjìm tì Pɔl ya ghò ni zən Jem. Tì ya pè zən Jem tì itog bəd inga ifeti bəd Kristo ne ya yaʼi angu.

¹⁹ Pɔl ya pè chàʼrì awɔb bə̀ mə̀tì inug mbe ne Ŋwiye che anjìm məd fàʼ abə bəd mbe ne kayi mə̀Ju.

²⁰ Anyumə̀ ne mbi ya zughi inug mbe ne Pɔl ya gha inɔb, mbi ya ghumni Ŋwiye, si ghà abə Pɔl gha, “Ìwa ifi, àghò bàd icheg ne mə̀Ju ka chuʼ sə̀ʼə fə bḛ Kristo bə̀ zì atog ni nɔ̀ŋì mə̀nɔ̀ʼɔ̀ Muse.

²¹ Mbɔb fə zug gha, àghò we se ghà abə mə̀Ju mbe ne chùghə inga iben ndəŋ gha mbe waʼ mə̀nɔ̀ʼɔ̀ Muse. Mbɔb fə bə̀ zug gha àghò we bə̀ ghà abə bəd mbe gha imbə̀ʼ mbi ŋwed awɔb ìmbɔb bɔn kə̀ bə̀ ywìrì zùgri ìwa ikuchèg aben, mba mə̀Ju.

²² Mbɔb mənyìʼ zug gha àghò fə yeʼe. Tì kə anìŋ si ghə̀nə?

²³ Aŋa ya aghi ne tì biri kə̀b gha àghò ghiyə. Bəd mɔ̀ʼɔ məkwè mbe abɔ̀ʼ ina aŋa ne fə kàʼi anug zɔ̀m imbìghè abə Ŋwiye.

²⁴ Àghò niŋ bəd mbo̰, mbə̀ gho sò nyɔd icheg ne mə̀nɔ̀ʼɔ̀ Muse chwi. Àghò nàʼ ighi àfàtì mbe ne mbə̀ beri ni nàʼ. Àghò mə ghì ane, mbi biri seri ìmbɔb itog. Ane, bəd məjìm biri kyeri gha, inug ijìm mbe ne mbi gha imbə̀ʼ awe ya kwàʼ mbe ako. Ze biri chwi gha àghò we nɔ̀ŋɔ̀ mə̀nɔ̀ʼɔ̀ Muse.

²⁵ Àsi bəd mbe ne kayi mə̀Ju ne bḛ Kristo, tì fə ŋwàʼrì àŋwàʼrì chà inɔb, mə̀tì isɔbi anug ne tì niŋi gha; imbə̀ʼ mbɔb jəg awɔb ane ighijəg mbe ne bəd jə mə̀ŋwiye, kə̀ jəg anəm, kə̀ kud nyam ne mbi swḛni zì ku. Tì bə̀ ŋwàʼrì gha, mbɔb sikə anug ni nɔ̀kì mə̀yi kə̀ nɔ̀kì mbaŋà abu abu.”

²⁶ Àsi isu abɔ̀ʼ, Pɔl ya niŋ bəd mbe, mbɔb fɔrɔ ghò sò ìwɔb nyɔd icheg ne mə̀nɔ̀ʼɔ̀ Muse chwi. Pɔl ya si nɔ̀ʼ ghò inga mbàn Ŋwiye ghò mə̀tì aneg ne mbi biri mànì ni sò nyɔd icheg ne mə̀nɔ̀ʼɔ̀ Muse chwi. Wì ya bə̀ nàʼ aneg ne wì biri nàʼ ighi àfàtì atog inɔb mbɔb məjìm.

Mə̀Ju gwì Pɔl inga mbàn Ŋwiye

²⁷ Icheg ne ineg ìsàmbe mbe ne Pɔl tì mbaŋà te ya beri ni sò nyɔd icheg ne mə̀nɔ̀ʼɔ̀ chwi yaya se nḛ̀ ni mèg, mə̀Ju mɔ̀ʼɔ ne ya nɔ̀ʼi a aba aben Esìyà ya bàd Pɔl inga mbàn Ŋwiye, bùg ndum, nyi gwìye aməd.

²⁸ Mbi yaya se kyḛ tɔ̀ŋɔ bəd gha, “Mə̀Izre! Mbə̀ ziye abo wètì awa. Aŋa ya wə̀d we ne yḛ̀ nè chwìte inug abə bəd isiŋi ijìm gha, bəd se bà̰ mə̀Izre bə̀ bà̰ mə̀nɔ̀ʼɔ̀ Muse bə̀ bà̰ fɔrɔ mbàn Ŋwiye izo̰. Məd bə̀ ywìrì niŋ bəd ne kayi mə̀Ju nyi inga mbàn Ŋwiye, chìkì asiŋi ìzḛzḛ azo̰.”

²⁹ Mbi yaya ghà ane imbə̀ʼ icheg ne mbɔb ya zən Tròfimùs, wə̀d inga aben Efesùs ne yaya yḛ̀ abɔ̀ʼ Pɔl inga Jèrusalèm, mbɔb kɔndi gha, ighəm mɔ̀ʼɔ Pɔl fə niŋ aməd nyi inga mbàn Ŋwiye.

³⁰ Ze ya ghì àbùrì nyi a Jèrusalèm. Bəd ya si chùʼri nyɔd yèʼe gwì Pɔl, sùŋì aseg, chì inga mbàn Ŋwiye, wùpì tinuʼ ikam tijìm.

³¹ Icheg ne mbi yaya kə̀bə̀ ni zweti Pɔl, ikən ya ghò pè abə wə̀d kyen mə̀sogyì məRom gha àbùrì ze inga ikye aben Jèrusalèm ajìm.

³² Kwàʼ ati ati, wə̀d kyen mə̀sogyì we ya niŋ itog bəd mɔ̀ʼɔ ne sàʼa aben tì mə̀sogyì swìʼi ghò inga inɔ̰ bəd we. Anyumə̀ ne bəd àbùrì mbe ya bàri icheg ne wə̀d kyen mə̀sogyì we ya yèʼe tì mə̀sogyì nɔʼ nɔʼ, mbi ya sɔb ni sɔm Pɔl.

³³ Wə̀d kyen mə̀sogyì we ya swiʼi ghò gwì Pɔl, si ghà gha, mbe kɔd aməd ane mə̀chen məbe. Wì ya ghà ane, si bìri abə inɔ̰ bəd we gha, “Wə̀d gho̰ kə we? Wì kə gùg anug iye?”

³⁴ Bəd mɔ̀ʼɔ inga inɔ̰ bəd we yaya ghà anug afibì, mə̀mbin ghà àzɔb. Isiŋi yaya se bùrì buri. Anug ze ya chè wə̀d kyen mə̀sogyì we. Chəyi yaya icheg ibo ni kyeri tesiʼ ne inga. Ane, wì ya ghà abə mə̀sogyì məd gha mbe niŋ Pɔl ghò inɔb inga ikam.

³⁵ Mbi ya niŋ Pɔl ghò pè ane adiŋi ze ne mbi ya bɔmi ne kɔʼ nyi inga ikam, àbùrì yètè, inɔ̰ bəd we se kə̀bə̀ ni zweti Pɔl. Mə̀sogyì mbe ya si ŋam Pɔl ikaŋ ikaŋ.

³⁶ Inɔ̰ bəd we ne yaya yḛ̀ anjìm yaya se kyḛ ghà gha, “Mbə̀ zweti aməd!”

Pɔl ghàm abə inɔ̰ bəd

³⁷ Anyumə̀ ne mə̀sogyì mbe ya se nìŋə Pɔl ni nyi inga ikam, wì ya ghà abə wə̀d kyen mə̀sogyì we gha, “Mə boʼ ibo, si mə̀ gha anug mɔ̀ʼɔ ine.” Wə̀d kyen mə̀sogyì we ya biri abə Pɔl gha, “Àghò kə ghàmà ìngam Grig?

³⁸ Àghò kə kayi wə̀d Ijìb we ne ya ghum yèʼe chìkì aben, nè zwète bəd, bə̀ niŋ bəd chuʼ tikwè ghò inga tibad zɔbi tì inɔb?”

³⁹ Pɔl ya ywìtì ibo gha, “Mo ya Ju ne mbi gwi a Tasɔ̀s inga aben Sìlisìyà. Mo ya wə̀d inga aben kyen. Mə boʼ ibo, àghò naʼa apan mə̀ ghama abə bəd mbo̰.”

⁴⁰ Wə̀d kyen mə̀sogyì we ya zug ane, sàŋì gha wì ghama. Pɔl ya təm igun adiŋi ze ne mbi bɔmi, mə̀ʼ abo abə bəd gha mbe chim tizi. Anyumə̀ ne bəd ya chimi tizi, wì ya ghàm inɔb ane ìngam Hibrù.