Ɨ̀fàʼì 20 - Ikan feg

Pɔl ghò inga iben Màsèdonìyà fɔrɔ iben Gris

¹ Anyumə̀ ne ndum ze ya mèghi, Pɔl ya tɔŋɔ mə̀mə̀nənùg Yeso, nə̀ri fìŋ inɔb, bə̀ nàʼrì tì inɔb, si nɔ̀ʼ ghò a Màsèdonìyà.

² Anyumə̀ ne Pɔl ya yaʼi a Màsèdonìyà, wì yaya yḛ̀ iben iben nè nə̀rə fìŋ abə bəd mbe ne ya nɔŋi ìwɔb ibḛfiŋ igun Yeso Kristo. Wì ya si ghò pè a Gris.

³ Wì ya chughi angu ane ameg atad. Mə̀Ju ya taŋ mənaŋ ni zweti aməd anyumə̀ ne wì yaya chùʼri nyɔd ni bani ghò a Sirìyà. Ane, wì ya bə̀ndì ghò chè a Màsèdonìyà bɔŋ si pè a Sirìyà.

⁴ Bəd ne yaya yḛ̀ tì Pɔl yaya: Sopatà ŋwan ìwi Pirùs ne ya wə̀d inga Bèriyà fɔrɔ Àristakùs tì Sèkundùs ne ya bəd inga aben Tèsàlonikà fɔrɔ Gayòs ne ya wə̀d inga aben Debè fɔrɔ Timotì fɔrɔ Tichikùs tì Tròfimùs ne ya bəd inga aben Esìyà.

⁵ Mbaŋà ìto̰ ya ghò imbìghè pè ghɔ̀m awa a Truwàs.

⁶ Anyumə̀ ne nyùmə̀ Iteri Chègun ya fə che, tì ya nɔ̀ʼ a Filipì yèn inga abaŋ igyi, niŋ ineg ita̰, kɔ̀ti awɔb a Truwàs. Tì ya chughi angu ane ineg ìsàmbe.

Pɔl zwemne Utikùs ane iwu

⁷ Igun aneg Sɔndè, tì ya fete ni jəg itari. Pɔl yaya chùʼrə nyɔd ni ghò yi isu abɔ̀ʼ. Ane, wì ya nɔ̀ʼ təm ni ghàm inɔb, ghàm anene ghò pè ane àngɔŋ tizimi.

⁸ Inam nɔʼ nɔʼ yaya bère inga atog nəb ze ikaŋ ne tì ya fete inga.

⁹ Ŋwan ajɔŋ mɔ̀ʼɔ ne ikum məd ya Utikùs ya chughi igun windò. Icheg ne Pɔl ya ghàmi tàn, ŋwan we ya fèn a ngwḛ. Wì ya gwḛ nə̀d si bu fen ikaŋ nəb ne yaʼi awaŋ atad. Mbi ya si swìʼi gwe məd ne wì fə ku.

¹⁰ Pɔl ya swiʼi ghò aseg, pè gùndi igun məd, nyimi aməd, si ghà abə bəd gha, “Imbə̀ʼ mbə̰ nwìʼe awən nyɔd. Məd we se yi izɔm.”

¹¹ Anyumə̀ ne Pɔl ya bə̀ndi kɔʼ ghò inga atog nəb ze ikaŋ, pè jəg itari bə̀ chùghi aseg jəg tì inɔb, wì ya ghàm inɔb anene ituʼ chəg. Wì ya si nɔ̀ʼ ghò yi.

¹² Bəd mbe ya niŋ ŋwan ajɔŋ we izɔm se nè gyènde.

Pɔl nɔ̀ʼ a Truwàs ghò a Mìletùs

¹³ Tì ya chè imbìghè yèn inga abaŋ igyi ghò a Asòs. Asòs ya asiŋi ne tì ya beri ni chè niŋ Pɔl angu inga abaŋ. Pɔl ya chuʼri gha tì che niŋ aməd a Asòs imbə̀ʼ icheg ne məd yaya yḛ̀ aseg.

¹⁴ Anyumə̀ ne Pɔl ya kɔ̀ti awa a Asòs, tì ya niŋ aməd inga abaŋ igyi ghò a Mìtìlen.

¹⁵ Isu abɔ̀ʼ, tì ya nɔ̀ʼ a Mìtìlen bàni inga abaŋ igyi ghò a Kìyos. Ane aneg ne ya beni abɔ̀ʼ, tì ya bani pè a Samòs. Ane aneg ne ya ywirì bèni abɔ̀ʼ, tì ya pè a Mìletùs.

¹⁶ Pɔl ya dèb ni chè yi a Efesùs imbə̀ʼ icheg ne chəyi məd ya kə̀bi ni chìkì nyumə̀ inga aba aben ze a Esìyà. Wì ya dèb ane imbə̀ʼ icheg ne məd ya kə̀b ni zàmbì pè a Jèrusalèm bɔŋ aneg Pentekɔ̀d se kòʼò.

Pɔl nàʼrì abə itog bəd inga ifeti bəd Kristo we a Efesùs

¹⁷ Anyumə̀ ne Pɔl ya yaʼi a Mìletùs, wì ya chà wə̀d gha wì ghò ghà abə itog bəd inga ifeti bəd Kristo we a Efesùs gha mbe yèʼe kɔ̀ti aməd.

¹⁸ Anyumə̀ ne itog bəd mbe ya pe, wì ya ghà inɔb ghà, “Mbə̰ kyèri icheg ne mə̀ ya chughi tì inən nɔ̀ʼ ane aneg mbègtog ne mə̀ ya nyi inga Esìyà.

¹⁹ Mə ya swi ìmə nyɔd icheg wə̀d àfàʼì Anɔŋisəg, fàʼ tì məsi aghə. Mə ya bə̀ nyìʼ ìkwàʼrì nɔʼ nɔʼ ne mə̀Ju mɔ̀ʼɔ ya taŋi mənaŋ igun inum.

²⁰ Mbə̰ kyèri gha chəyi mə̀ ya to̰ ni chwiti inug mbe ne tì mbi wètì awən inən. Mə ya chwiti inug inən inga bəd fɔrɔ a nəb a nəb.

²¹ Mə ya fə ghàm abə mə̀Ju fɔrɔ mə̀Grig gha mbe bəŋi fìŋ sìkì inug tibɔ̀ŋ, bə̀ndì yèʼe abɔ̀ʼ Ŋwiye, bə̀ nɔ̀ŋì ibḛfiŋ igun Anɔŋisəg Yeso.

²² Amad anìŋ, Azwighi Ŋwiye fə ghì gha mə mə̀nyìʼ ghò a Jèrusalèm. Si ya gha, chəyi mə̀ kyeri anug ne biri ghì amə angu.

²³ Anug ne Azwighi Ŋwiye ghi mə kyeri ya gha, nəb ndəŋ fɔrɔ ngəʼ te ghɔ̀mɔ̀ amə inga tikye aben ijìm ne mə ghò.

²⁴ Ane, chəyi mə̀ nìŋə ìmə ìtḛ̀ ane aghi mɔ̀ʼɔ. Mə ya kə̀bə̀ ni màni àfàʼì ze ne Anɔŋisəg Yeso nàʼi inum. Àfàʼì ze ya ni ghà ikən chɔm imbə̀ʼ ìchɔ̀mì we ne Ŋwiye we fàʼà.

²⁵ Amad anìŋ, mə kyèri gha chəyi wə̀d mɔ̀ʼɔ abɔ̀ʼ inən biri ywìri bàd amə. Mə ya ghà mbə̰ mbe ne mə̀ yaya yḛ̀ nè ghàmà anug ìfɔ̀n Ŋwiye inən.

²⁶ Ane, mə̀ ya anìŋ ghàmà inən tèchɔ̀ŋ pàta awən gha, wə̀d abɔ̀ʼ inən mə si sam anug ìfɔ̀n Ŋwiye, chəyi àmə abo inga.

²⁷ À ya ane imbə̀ʼ icheg ne chəyi mə̀ ya to̰ ni mə̀tì inug ijìm mbe ne Ŋwiye kàʼi ni fàʼ inən.

²⁸ Mbə̀ se kyèʼrè ìtən nyàmnyɔd mbə̰ mbə̰. Mbə̀ bə se kyèʼrè bəd Kristo məjìm mbe ne Azwighi Ŋwiye chɔʼi awən ane itog bəd ne fàʼà inɔb. Mbə̀ kyeʼre ifeti bəd Ŋwiye mbe ne məd ya zo̰ ane anəm Ŋwan məd.

²⁹ Mə kyèri gha anyumə̀ ne mə̀ biri nɔ̀ʼ abɔ̀ʼ inən, bəd tɔ tɔ mɔ̀ʼɔ biri yeʼe abɔ̀ʼ inən se kə̀bə ni nimni bəd Ŋwiye icheg ne ìfɔn tɔ tɔ mbe nìmne njə̀g.

³⁰ Bəd biri dù fɔrɔ inga inən ne biri kɔpi tesiʼ imbə̀ʼ icheg ne mbe kə̀bə̀ gha mə̀mə̀nənùg beni inɔb anjìm.

³¹ Mbə̀ we awən imbə̀ʼ tiku bəd te, bə̀ kɔ̀ndi gha, ane tituʼ titad, mə yaya pàta awən imɔʼ imɔʼ tì məsi aghə.

³² Amad anìŋ, mə zì awən ikye abo abə Ŋwiye bə̀ nàʼ awən abə ikən we ne ghàmà imbə̀ʼ ìchɔ̀mì Ŋwiye. À ya ikən we ne tì wì ghì mbə kweg bə̀ bèrì ighi mbe ne Ŋwiye nɔŋi abə bəd məjìm mbe ne Ŋwiye ghi mbi zen.

³³ Chəyi mə̀ ya ghə̀ʼri aghi ikab wə̀d kə̀ ndwi wə̀d.

³⁴ Mbə̰ kyèri àzən aghi gha mə ya fàʼ kwàʼ ane ìmbum ibo ni nèg ìmə nyɔd bə̀ nèg bəd mbe ne yaya yḛ̀ tì inum.

³⁵ Ikuchèg gho̰ ne mə̀ yaya fàʼà inug ijìm angu, ya mə̀ yaya chwìte inən gha ze bɔ̀ŋ ni taŋ fàʼ imbə̀ʼ wètì bəd ne chəyi àzɔb. Mə yaya fàʼà ane nè kɔ̀ndɔ ìngam we ne Anɔŋisəg Yeso ya ghàmi məd məd gha, ‹Ŋwiye ya zìyè àbɔrɔ̀bɔd ze igun wə̀d ne nàʼà chè wə̀d ne nìŋə.›”

³⁶ Anyumə̀ ne Pɔl ya màni ni ghàm, mbɔb məjìm ya chìmbì itog inwḭ aseg chàʼra Ŋwiye.

³⁷ Mbɔb məjìm ya chwḛ məsi, nyìmbi nyɔd tì Pɔl si nàʼrì tì məd.

³⁸ Aghi ne ya ghi mbɔb taŋ dèg ya ìngam we ne Pɔl ya ghàmi gha chəyi mbɔb biri ywìri nɔ̀ʼ bàd aməd. Mbɔb ya si ghò chà aməd inga abaŋ igyi.