Ɨ̀fàʼì 2 - Ikan feg

Azwighi Ŋwiye yèʼe igun bəd Kristo

¹ Anyumə̀ ne aneg Pentekɔ̀d ya kòʼi, bəd Kristo mbe məjìm ne yaya chùghə inga atog nəb ze igun ya yaʼ ane asiŋi afibì.

² Mbi ŋa zə̰, gì mɔ̀ʼɔ ghàm ikaŋ àbɔ̀ŋɔ icheg afim ka ka. Zì ya yeʼe nyi inga nəb ze ne mbɔb ya chughi inga. Wə̀d ijìm ne ya yaʼi inga atog nəb ze ya zug gì ze.

³ Mbi ya bàd ighi mɔ̀ʼɔ ne yaʼi icheg tinemi iywid. Ti ya ghàpà ghò nàŋa igun wə̀d imɔʼ imɔʼ abɔ̀ʼ inɔb.

⁴ Azwighi Ŋwiye ya sweg inga inɔb mbɔb məjìm. Ane, mbi ya si ko se ghàmà tìngam iben ndəŋ icheg ne Azwighi Ŋwiye yaya nàʼà ika inɔb.

⁵ Anyumə̀ we, mə̀Ju ne yaya ghùmnə Ŋwiye, ya nɔ̀ʼ inga iben ijìm igun isəg ghò se chùghə a Jèrusalèm.

⁶ Anyumə̀ ne mbi ya zughi gì ze, inɔ̰ bəd ya fete. Anug ya chè awɔb imbə̀ʼ icheg ne wə̀d imɔʼ imɔʼ abɔ̀ʼ inɔb ya zug icheg ne bəd Kristo mbe yaya ghàmà ìwi ìngam aben.

⁷ Icheg ne anug azo̰ ya che awɔb ane, mbi ya biri gha, “Bəd mbo̰ ne ghàmà ìta tìngam anìŋ, àkə kayi məGalìli?

⁸ Ze kə si chè iye, gha wə̀d imɔʼ imɔʼ abɔ̀ʼ ina we zùghə icheg ne mbɔb mbe ghàmà ìwi ìngam aben?

⁹ Abɔ̀ʼ ina aŋa ya məPatìyà tì məMedìyà, tì mə̀Elàm; fɔrɔ məMèsòpòtemìyà, tì məJùdeyà tì məKàpàdosìyà, fɔrɔ məPontùs tì məEsìyà,

¹⁰ məFìrigìyà tì məPàmfilìyà, tì mə̀Ijìb fɔrɔ bəd inga iba iben mbe a Libìyà iban Sayirèn. Mba mɔ̀ʼɔ nɔ̀ʼ a Rom.

¹¹ Mba ya mə̀Ju fɔrɔ bəd ne bəŋi ìtɔb fìŋ bḛ anug Ŋwiye mə̀Ju. Mba mɔ̀ʼɔ ya bə̀ məKred tì məÀrabìyà. Mba məjìm mbe zùghə icheg ne bəd Kristo mbo̰ mbe ghàmà inga ìta tìngam aben, mə̀tə̀ iyeti inùg ne Ŋwiye fàʼi!”

¹² Anug ya chè awɔb, atog inɔb bə̀ bùrə̀. Bəd mɔ̀ʼɔ yaya se bìre abə mə̀mbin gha, “Azo̰ kə chwìye gha?”

¹³ Icheg ne mbi yaya bìre ane, bəd mɔ̀ʼɔ inga inɔb ya chəʼ bəd Kristo gha, “Mbɔb fə no be.”

Pità ghàm abə inɔ̰ bəd

¹⁴ Pità tì bədtɔm mbin ìghum chɔ̀b imɔʼ ya nɔ̀ʼ təm titighe, nɔ̀rì ìzi gì ikaŋ, ghàm abə inɔ̰ bəd we gha, “Ìmbum məfi ne yaʼi mə̀Ju fɔrɔ wə̀d ijìm we ne chùghə inga Jèrusalèm, mbə̀ taŋ zug anug ne mə ghà.

¹⁵ Chəyi bəd mbo̰ no be icheg ne mbə̰ mbe kɔ̀ndɔ. À ya kiri məyi mə̀nyùmə̀ àbɔg isusu.

¹⁶ Aŋa ya anug ze ne wə̀dkə̀n Ŋwiye Jùwe ya ghum ghà.

¹⁷ Wì ya gha, ‹Ŋwiye gha, inga ineg mbe ne se nwḭ̀yḛ̀, mə biri chà àmə Azwighi igun bəd məjìm. Ìmbən bɔn mbaŋà fɔrɔ bɔn àyi biri se ghà ikən Ŋwiye. Ìmbən bɔn ijɔŋ biri se bàrà inati njə̀m. Ìmbən inṵ bəd biri bə se bèrè njə̀m.

¹⁸ Mə biri chà àmə Azwighi igun ìmbum bəd àfàʼì məjìm; Kə̀ àkə mə̀yi kə̀ àkə mbaŋà. Inga ineg mbe, mbi biri se ghà ìmə ikən.

¹⁹ Mə biri ghì inug yeti yeti ikaŋ àbɔ̀ŋɔ fɔrɔ igun isəg. Isiŋi biri bàŋ icheg anəm. Mbə̰ biri bàd iywid fɔrɔ ndiʼ nɔʼ nɔʼ.

²⁰ Nyùmə̀ biri bə̀ŋə̀ se fḭ̀yḛ, iməg bə̀ bə̀ŋə̀ se bàŋà icheg anəm. Iyeti inug mbo̰ ijìm biri dù bɔŋ aneg kyen ze ne Anɔŋisəg biri yeʼe ni sɔb isaʼi igun bəd.

²¹ Ane, wə̀d ne nɔŋi ìwi ibḛfiŋ igun Anɔŋisəg kàrì aməd, tengàŋ biri pum.›

²² Mə̀Izre! mbə̀ taŋ zug ìngam gho̰: Yeso we a Nazarèd ya wə̀d ne Ŋwiye ya chɔʼi. Mbə̰ kyèri àzən aghi gha Ŋwiye ya chè anjìm məd ghì iyeti inug kyen kyen mbə̰ bàd.

²³ Ŋwiye ya fə kyeri àzi aghi, ane, wi ya fə nɔ̀ŋì gha mbi biri gwì Yeso gho̰ nàʼ inən. Mbə̰ biri ghì gha bəd mbe ne ghìyə̀ inug tibɔ̀ŋ mbe kɔmbɔ məd igun azed abaʼri, zwèti.

²⁴ Si ya gha, Ŋwiye ya zwemni aməd ane iwu, chì aməd ane ika we ne iwu beri imbə̀ʼ icheg ne chəyi iwu ya beri ika ni nyimi aməd.

²⁵ Ifɔn Dèvid ya ghà inga Àŋwàʼrì Ŋwiye imbə̀ʼ Yeso gha: ‹Mə yaya bàrà Anɔŋisəg inum imbìghè aghəm ajìm. Chəyi anug mɔ̀ʼɔ biri nàʼ ngəʼ inum ka imbə̀ʼ icheg ne məd we yi ane àmə aba abo jəghi.

²⁶ Ane, igyendi sweg inum inga fìŋ. Mə ya bə ghàmà gyènde. Ìmə nyàmnyɔd biri ghɔ̀m ighi mbe ne Ŋwiye kàʼi.

²⁷ À ya ane imbə̀ʼ icheg ne chəyi àghò biri waʼ amə inga iseg. Chəyi àghò biri bə sàŋì gha ìwe Wə̀d ìzḛzḛ wì bɔb inga iseg.

²⁸ Àghò fə chwi inɔnjì inum ne tì mə chè angu jəg ìtḛ̀. Igyendi biri sweg inga ìmə fìŋ anyumə̀ ne mə̀ biri yaʼ tì ine.› ”

²⁹ Pità ya chè imbìghè tòʼrì inɔb gha, “Ìmbum məfi fɔrɔ ìtum njàbi, mə we tì mə gha tesiʼ ne mə̀ kyeri inən gha: Ifɔn Dèvid ne yaʼi ìwa mbaʼ kyen ya ku mbi twəŋi. Iseg məd gho̰ kiri biri pè tèchɔ̀ŋ.

³⁰ Icheg ne ifɔn Dèvid ya yaʼi wə̀dkə̀n Ŋwiye, wì ya kyeri gha, Ŋwiye ya fə kàʼ bə̀ zɔ̀m ane ìwi ikum gha zìye biri nɔ̀ŋì ŋwan ane aghaŋ inəbi Dèvid gha wì jəg atən ifɔn Dèvid.

³¹ Icheg ne wì ya bàri anug ne biri ghum dù, wì ya ghà icheg ne Ŋwiye biri ghum zwemni Wə̀d ne wì zɔ̀ʼi ane iwu. Wì ya bə̀ gha: ‹Chəyi Ŋwiye ya waʼi aməd inga iseg. Chəyi Ŋwiye ya bə sàŋì gha nyàmnyɔd məd bɔb.›

³² Ane, Ŋwiye ya zwemi Yeso gho̰ ane iwu. Mba mbo̰ məjìm ya bəd ne ya bàri ati.

³³ Ŋwiye fə nɔ̀ aməd ikaŋ nɔ̀ŋì wì chùghi ibo aba abo jəghi. Wì fə niŋ Azwighi Ŋwiye abə Mbaʼ nàʼ ina icheg ne Mbaʼ məd ya kàʼi. À ya àzewən ne mbə̰ mbe zùghə bə̀ bàrà anìŋ.

³⁴ Ane, chəyi ifɔn Dèvid ya gho ikaŋ. Si ya gha, wì ya gha: ‹Anɔŋisəg ghà abə ìmə Anɔŋisəg gha: Chughi inum aba abo jəghi.

³⁵ Chughi anene pè ane nyumə̀ ne mə̀ biri ghì ìmbe bəd ìpàb si yaʼ aghi ne àghò we nɔ̀ŋɔ̀ ighog igun.›

³⁶ Ane, mə̀Izre məjìm kyeri gha, à ya kwàʼ tesiʼ gha Ŋwiye fə nɔ̀ŋì Yeso gho̰ ne mbə̰ ya kɔ̀mbi igun azed abaʼri ane Anɔŋisəg bə̀ fɔrɔ ane Wə̀d ne wì zɔ̀ʼi.”

³⁷ Anyumə̀ ne bəd mbe ya zughi anug ze, ze ya nàʼ ngəʼ inɔb inga fìŋ, mbi si bìri abə Pità fɔrɔ abə mbin tì bədtɔm gha, “Ìmba məfi, ze kə anìŋ tì ghənə?”

³⁸ Pità ya ywìtì gha, “Wə̀d imɔʼ imɔʼ abɔ̀ʼ inən bəŋə ìzi fìŋ chì ane inug tibɔ̀ŋ bə̀ niŋ mənib ane ikum Yeso Kristo ni chwi gha Ŋwiye fə waʼ inug tibɔ̀ŋ məd. Mbə̰ mə̀ ghì ane, Ŋwiye biri nèʼ awən nàʼ àzi Azwighi inən.

³⁹ Anug ze ne Ŋwiye ya kàʼi ya inən fɔrɔ abə ìmbən bɔn, bə̀ fɔrɔ abə bəd məjìm mbe ne yaʼi asà agha. À ya abə bəd mbe ne Anɔŋisəg, ìwa Ŋwiye kàri awɔb gha mbe yaʼ ìmbi bəd.”

⁴⁰ Pità ya ghàm inug nɔʼ nɔʼ inɔb pàti awɔb bə̀ boʼ ibo inɔb gha, “Mbə̀ duwə awən inga ngəʼ ze ne biri nyi igun ikəri bəd gho̰ ne ghìyə̀ inug tibɔ̀ŋ.”

⁴¹ Bəd mbe ya zug ìngam we ne Pità ya ghàmi, bḛ. Ane, mbi ya niŋ mənib. Bəd ne ya yète abɔ̀ʼ bəd Kristo ya yaʼ ka bəd chuʼ titad.

Icheg ne bəd Kristo yaya chùghə

⁴² Bəd Kristo mbe ne ya zi atog ane inug ne bədtɔm yaya chwìte ya yaʼ ane ifɔti. Ane, mbi yaya fɔ̀tɔ jə̀ghə itari bə̀ fɔ̀tɔ chàʼrà Ŋwiye.

⁴³ Bədtɔm Kristo yaya ghìyə̀ iyeti inug nɔʼ nɔʼ. Ane, ibɔ Ŋwiye ya sweg inga fìŋ abə bəd məjìm.

⁴⁴ Bəd Kristo məjìm ya yaʼ ane anug amɔʼ. Ìmbɔb ighi ya bə̀ yaʼ ane ìmbi imɔʼ.

⁴⁵ Mbi yaya fèndè ìmbɔb ighi fɔrɔ ìmbɔb isiŋi iseg wètè bəd ne chəyi àzɔb.

⁴⁶ Ineg ijìm, mbi yaya chè imbìghè ni ya fète inga ikam mbàn Ŋwiye. Mbi yaya jə̀ghə itari anəb anəb ane igyendi fɔrɔ ane fìŋ ifibì.

⁴⁷ Mbi yaya fɔ̀tɔ ghùmnə Ŋwiye. Wə̀d ijìm yaya kɔ̀ŋɔ̀ awɔb. Ineg ijìm, Anɔŋisəg yaya yètè bəd inga ìwɔb inɔn. Bəd mbo̰ ya bəd mbe ne Ŋwiye yaya pùmnə anjìm icheg ne mbi bḛ Yeso Kristo.