Ɨ̀fàʼì 19 - Ikan feg

Pɔl ghàm Ìngam Ŋwiye a Efesùs

¹ Anyumə̀ ne Àpolòs ya yaʼi a Kɔrèn, Pɔl ya chè atog atog inga isiŋi mbe inga aba aben ze ne ghò a Efesùs. Wì ya pè a Efesùs, bàd bəd mɔ̀ʼɔ ne ya bḛ Kristo.

² Wì ya biri inɔb gha, “Azwighi Ŋwiye ya fə yeʼe igun inən anyumə̀ we ne mbə̰ ya bḛ Yeso?” Mbi ya ywìtì gha, “Indèʼ ka, chəyi tì bi kweʼì zug gha Azwighi Ŋwiye ze angu.”

³ Wì ya biri inɔb gha, “Àkə mənib mbeg ne mbə̀ ya niŋi?” Mbi ya ywìtì gha, “À ya mənib mbe ne Jɔn we ne yaya nàʼà mənib yaya ghàmà imbə̀ʼ mbiwən.”

⁴ Pɔl ya ghà inɔb gha, “Jɔn yaya nàʼà mənib abə bəd mbe ne bəŋi ìtɔb fìŋ sìkì inug tibɔ̀ŋ, nɔ̀ŋì ibḛfiŋ igun Ŋwiye. Wì ya ghà abə bəd gha mbe nɔŋi ibḛfiŋ igun wə̀d we ne yèʼe ibo anjìm. Wə̀d we ya Yeso.”

⁵ Anyumə̀ ne mbi ya zughi ane, mbi ya niŋ mənib ane ikum Anɔŋisəg Yeso.

⁶ Anyumə̀ ne Pɔl ya nɔŋi ìmbi ibo igun inɔb, Azwighi Ŋwiye ya yeʼe igun inɔb, mbi ko se ghàmà tìngam iben ndəŋ bə̀ ko se ghà ikən Ŋwiye.

⁷ Mbaŋà ne ya yaʼi angu ya yaʼ icheg ìghum chɔ̀b ibe.

⁸ Pɔl ya ghò nyi inga ichamì Ŋwiye se ghàmà abə bəd kwàʼ ane fìŋ ka ka. Wì yaya ghàmà ane ane aməg atad. Wì yaya tòʼrò inug mbi taŋ zḛ ghìyə̀ gha mbe kyeri gha anug ìfɔ̀n Ŋwiye ya anug tesiʼ.

⁹ Si ya gha, bəd mɔ̀ʼɔ abɔ̀ʼ inɔb ya ghùbì ìtɔb fìŋ. Chəyi mbi ya bḛ anug ne Pɔl yaya ghà. Bəd ya ko se ghàmà inug tibɔ̀ŋ imbə̀ʼ Ikuchèg we ne Anɔŋisəg Yeso yaya chwìte. Ane, Pɔl ya sàŋì awɔb, nɔ̀ʼ yi. Wì ya niŋ mə̀mə̀nənùg Yeso se mùghə̀ tì inɔb tòʼrò inug inɔb ineg ijìm inga ichamì we abə Tayiranùs.

¹⁰ Wì ya chwiti inug inɔb ane tituʼ tibe. Ane, mə̀Ju məjìm fɔrɔ bəd məjìm ne kayi mə̀Ju ne yaya chùghə inga aba aben Esìyà ya zug ìngam Anɔŋisəg.

Bɔn ìmbi Sefà ya kə̀b ni kamni izwighi tibɔ̀ŋ

¹¹ Ŋwiye ya chè anjìm Pɔl ghì inug yeti yeti ne chəyi bəd ya kə kweʼì bàd.

¹² Wì ya ghì gha, asiŋi ndwi ne Pɔl yaya fùghə nìme tì ndwigun ze ne wì yaya zìyè fàʼà te beri ika. Ane, bəd yaya nìŋə ndwi te ghò bètè bəd ne ghɔ̰ inga, ighɔn mèghè. Ndwi te yaya bə̀ ghìyə̀ izwighi tibɔ̀ŋ dùwə̀ inga bəd.

¹³ Mə̀Ju mɔ̀ʼɔ ne yaya yḛ̀ nè chìyè izwighi tibɔ̀ŋ inga bəd, ya kə̀b ni chì izwighi tibɔ̀ŋ igun bəd ane ikum Anɔŋisəg Yeso. Mbi yaya ghà abə izwighi tibɔ̀ŋ gha, “Ane ikum Yeso we ne Pɔl we ghàmà imbə̀ʼ aməd, tì gha, mbə̀ che dù inga wə̀d gho̰!”

¹⁴ Bɔn mbaŋà mɔ̀ʼɔ isàmbe ne yaʼi bɔn ìmbi Sefà yaya ghìyə̀ anug azo̰. Sefà gho̰ ya Ju ne yaʼi atog wə̀d mbàn Ŋwiye.

¹⁵ Aneg mɔ̀ʼɔ, azwighi tibɔ̀ŋ ya ghà inɔb gha, “Mə kyèri Yeso bə̀ kyèri Pɔl. Àsi awən, mbə̰ kə mə̀we?”

¹⁶ Azwighi tibɔ̀ŋ ze ya ghàm ane, mbaŋà ze ne azwighi ze ya yaʼi inga məd ya fen igun inɔb, sɔmɔ awɔb mbɔb mbe ìsàmbe məjìm. Wì ya sètì ndwi abə bɔn mbaŋà mbe, ghì mbi si dù inga nəb ze se nòrò tì ibəm zɔbi tì ina̰ ane nyɔd.

¹⁷ Mə̀Ju məjìm fɔrɔ bəd ne kayi mə̀Ju ne yaya chùghə a Efesùs ya zug anug azo̰, ibɔ gwì awɔb. Mbɔb yaya se taŋà ghùmnə Anɔŋisəg Yeso.

¹⁸ Bəd nɔʼ nɔʼ inga bəd mbe ne ya bḛ Yeso ya yeʼe se bḛ ìmbɔb inug tibɔ̀ŋ kwàʼ asaŋ asaŋ.

¹⁹ Bəd mɔ̀ʼɔ abɔ̀ʼ inɔb ne yaya ghìyə̀ tikwab ya feti ìmbɔb ighi fɔrɔ ìŋwàʼrì tikwab tòn imbìghè abə bəd məjìm. Inun ane ìŋwàʼrì mbe ya pè ane chuʼ ìghum ita̰ ane ikab sibà.

²⁰ Anug azo̰ ya ghì ìngam Anɔŋisəg chè imbìghè ghò agha sà, bə̀ ghì inun bəd ne bḛ Yeso taŋ yètè.

Achɔb ka ka dù a Efesùs

²¹ Anyumə̀ ne anug imbə̀ʼ bɔn ìmbi Sefà ya fə che, Pɔl ya nɔ̀ŋì inga ìzi fìŋ ni chè a Màsèdonìyà bə̀ chè a Akìyà ghò a Jèrusalèm. Wì ya gha, “Mə mə̀ pè angu, mə mənyìʼ ghò pè a Rom.”

²² Wì ya chà Timotì tì Èrastùs ne ya mbaŋà te tibe ne yaya wètè aməd gha mbe gho a Màsèdonìyà. Àsi məd, wì ya si chùghi yi a Esìyà ane ineg mɔ̀ʼɔ.

²³ Anyumə̀ we, achɔb ka ka ya gwid a Efesùs imbə̀ʼ Ikuchèg we ne Anɔŋisəg yaya chwìte.

²⁴ Mbaŋà mɔ̀ʼɔ ne ikum məd ya Dèmitrùs yaya twìye ighi ane siribà. Wì yaya bə̀ bɔ̀mɔ iti mə̀ŋwiye fèndè. Iti mə̀ŋwiye mbe ya yaʼ kwàʼ icheg mbàn ŋwiye àyi we ne mbe kàrà ane Atemìs. Bəd àfàʼì məd yaya bèrè kwàʼ ikab nɔʼ nɔʼ ane ighi mbo̰.

²⁵ Wì ya feti ìmbi bəd àfàʼì fɔrɔ bəd ndəŋ ne yaya bə̀ fàʼà iku àfàʼì we, ghà inɔb gha, “Məmbon, mbə̰ kyèri àzən aghi gha tì we bèrè kwàʼ inun ikab nɔʼ nɔʼ ane àfàʼì azo̰.

²⁶ Àfàʼì azo̰ ne wə̀d Pɔl we fàʼà, mbə fə bàd bə̀ zug àzən aghi. Məd we ghà gha mə̀ŋwiye mbe ne mbi tangi ane ibo ya aghi ako. Ane, wì fə ghì bəd nɔʼ nɔʼ inga Efesùs aŋa fɔrɔ a Esìyà, mbi bḛ anug ze ne məd we ghà.

²⁷ Anug ne biri bə ya gha, àfàʼì azo̰ ina biri bèrì ikum tibɔ̀ŋ. Anug mbàn ŋwiye Atemìs biri buʼə. Mbi biri swi Atemìs chì igun ati kyen məd. Məd ya ŋwiye àyi we ne bəd məjìm a Esìyà fɔrɔ inga isəg ijìm mbe ghùmnə!”

²⁸ Anyumə̀ ne bəd mbe ya zughi anug ze ane, mbi ya taŋ gaŋ, se kyḛ ane gì ka ka gha, “Atemìs we abə mə̀Efesùs ya ŋwiye ne ka!”

²⁹ Kwàʼ ati, àbùrì kyen ya ko inga asiŋi ze ajìm. Mbi ya gwì Gayòs tì Àristakùs. À ya mbɔb mbe ne ya nɔ̀ʼi a Màsèdonìyà ne yaya yḛ̀ tì Pɔl. Mbi ya sìmì awɔb ghò igun ìsàmi kyen ze inga aben ze.

³⁰ Pɔl ya kə̀b ni dù ghò kɔti inɔ̰ bəd we, si ya gha, chəyi mə̀mə̀nənùg Kristo ya bḛ ka.

³¹ Itog bəd mɔ̀ʼɔ inga aba aben ze ne ya yaʼi mə̀sə̀ʼ ìmbi Pɔl ya pati aməd gha imbə̀ʼ wì tìnde yi iban ìsàmi kyen ze.

³² Àbùrì ya nyi inga ifeti we. Bəd mɔ̀ʼɔ yaya kyḛ ghà anug amɔʼ, mə̀mbin se kyḛ ghà àzi ndəŋ. Ze ya yaʼ ane imbə̀ʼ icheg ne, chəyi bəd nɔʼ nɔʼ ya bi kyèri aton ne bəd ya fete.

³³ Mə̀Ju ya chà mbaŋà mɔ̀ʼɔ ne ikum məd ya Àlèzandà gha wì toʼro aton ne bəd ya fete abə bəd. Wì ya mə̀ʼ abo gha bəd chim tizi wì toʼro anug ze inɔb.

³⁴ Anyumə̀ ne mbi ya bàri gha məd ya Ju, mbɔb məjìm ya fɔti kyen ane gì ka ka anene mbè awà məbe. Mbi yaya kyḛ gha, “Atemìs we abə mə̀Efesùs ya ŋwiye ne ka!”

³⁵ Wə̀d we ne yaya ŋwàʼrà inug inga aben ya ghì inɔ̰ bəd we chim tizi. Wì ya ghà inɔb gha, “Mə̀Efesùs, wə̀d mɔ̀ʼɔ we wa angu ne chəyi wì kyèri gha à ya mə̀Efesùs mbe nḛ̀ mbàn Atemìs we ne ka bə̀ nḛ̀ aghi-ŋwiye məd ze ne ya nɔ̀ʼi ikaŋ àbɔ̀ŋɔ fen aseg?

³⁶ Chəyi wə̀d mɔ̀ʼɔ angu ne tì wì ton anug azo̰. Mbə̀ bɔti nyɔd. Imbə̀ʼ mbə̰ ghiyə awən anug ne chəyi iwe inga.

³⁷ Bəd mbo̰ ne mbə̀ niŋi yèʼe aŋa, chəyi mbi ji aghi mɔ̀ʼɔ inga mbàn mɔ̀ʼɔ kə̀ bì zɔ̀mbì ìwa ŋwiye àyi.

³⁸ Dèmitrùs tì bəd mbe ne mbɔb mbe fɔrɔ fàʼà ni to ighi mə̀ bèrì isaʼi tì wə̀d mɔ̀ʼɔ, wì gho pùti a nəb isaʼi. Bəd ne sàʼa tisaʼi mbe awɔb angu ne biri saʼ.

³⁹ Mbə̰ mə̀ ywìrì kə̀b ni kyeri anug ndəŋ, nji mbi biri si nwèndi àze anyumə̀ ne itog bəd biri fete.

⁴⁰ Anug ne tì beri ni bɔ ya gha itog bəd a Rom biri zì isaʼi igun ina gha tè bùg achɔb aŋa tèchɔ̀ŋ. Chəyi tì biri bèrì aton mɔ̀ʼɔ ni nàʼ ane àbùrì azo̰ ne kə du.”

⁴¹ Anyumə̀ ne wì ya ghàmi ane, wì ya ghà abə bəd ne ya feti gha mbe duwə ghò awɔb.