Ɨ̀fàʼì 18 - Ikan feg

Pɔl ghàm Ìngam Ŋwiye a Kɔrèn

¹ Anyumə̀ ne Pɔl ya fə ghàmi tì ifeti Àrìyopagùs we, wì ya nɔ̀ʼ a Atèns ghò à Kɔrèn.

² Wì ya pè angu bàd wə̀d Ju mɔ̀ʼɔ ne ikum məd ya Àkwilà ne ya nɔ̀ʼi à Pontùs. Ikum iweg məd ya Prìsilà. Mbi ya cherè nɔ̀ʼɔ̀ a Italì yèʼe a Kɔrèn. Mbi ya nɔ̀ʼ à Italì imbə̀ʼ icheg ne ifɔn Klodìyòs ya niŋ isɔbi anug gha mə̀Ju məjìm duwə à Rom. Pɔl ya ghò bàd awɔb.

³ Àzɔb atog àfàʼì yaya ni tangi gɔb bə̀ kɔd izuŋ. Pɔl ya pè chùghi tì inɔb imbə̀ʼ icheg ne wì ya bə̀ kyèri icheg tangi gɔb bə̀ kɔd izuŋ. Ane, wì yaya se fàʼà tì inɔb.

⁴ Wì yaya tòʼrò inug abə mə̀Ju inga ichamì Ŋwiye igun ineg àzwètì mə̀Ju ijìm. Wì ya ghì ane fìʼì itog abə mə̀Ju fɔrɔ abə bəd mbe ne ya bḛ Kristo ne mbɔb kayi mə̀Ju.

⁵ Anyumə̀ ne Sayilàs tì Timotì ya nɔ̀ʼi à Màsèdonìyà yèʼe a Kɔrèn, Pɔl ya si zì atog məyi ni ghàm Ìngam Ŋwiye bə̀ fɔrɔ ni tòʼrì abə mə̀Ju gha Yeso ya Wə̀d we ne Ŋwiye zɔ̀ʼi.

⁶ Si ya gha, mbi yaya to̰ awɔb ìngam we ne wì yaya ghà, bə̀ ko se zɔ̀mbɔ̀ aməd. Wì ya kùd ìzi njìm ghà inɔb gha, “Ndɔ̀n biri nyi məyi igun inən! Ìmbum ibo fə zen. Nɔ̀ʼ tèchɔ̀ŋ, mə biri ghò abə bəd mbe ne kayi mə̀Ju”.

⁷ Wì ya ghàm ane, sàŋì awɔb nɔ̀ʼ ghò yi inga nəb mbaŋà mɔ̀ʼɔ ne ikum məd ya Tìtiyòs Jostùs. Jostùs gho̰ yaya bə̀ ghùmnə Ŋwiye. Nəb məd ya yaʼ iban ichamì Ŋwiye mə̀Ju.

⁸ Krispòs ne ya yaʼi atog wə̀d inga ichamì Ŋwiye we fɔrɔ bəd məjìm mbe ne ya yaʼi ibo inga nəb ya bḛ Anɔŋisəg Yeso. Bəd nɔʼ nɔʼ a Kɔrèn ya zug anug ze ne Pɔl yaya ghà. Ane, mbi ya bḛ Anɔŋisəg Yeso bə̀ niŋ mənib.

⁹ Izimi mɔ̀ʼɔ, Anɔŋisəg Yeso ya ghàm abə Pɔl inga anatì njə̀m gha, “Imbə̀ʼ àghò bɔ awe! Chè imbìghè ni ne ghàmà awe ghami. Imbə̀ʼ àghò chim awe tizi.

¹⁰ Mə biri yaʼ tì ine. Ane, chəyi wə̀d mɔ̀ʼɔ ne tì wì ghi isaʼi mɔ̀ʼɔ tì ine, kə̀ ne tì wì zì anə igun ine imbə̀ʼ icheg ne ìmbum bəd nɔʼ inga ikye aben gho̰.”

¹¹ Pɔl ya zug ane, chùghi angu fituʼ ifibì tì aməg tìfughə. Wì ya chughi ane, bə̀ se ghàmà Ìngam Ŋwiye abə bəd mbe angu.

¹² Anyumə̀ ne Gàliyò ya yaʼi gɔbnà inga aba aben ze à Akìyà, mə̀Ju mɔ̀ʼɔ angu ya fɔtɔ ghò gwì Pɔl niŋ ghò a nəb isaʼi.

¹³ Mbi ya pè angu, pùti aməd gha, “Mbaŋà ìzo̰ ze to itog abə bəd gha mbe se ghùmnə Ŋwiye ane ikuchèg ne chəyi ìmba mə̀nɔ̀ʼɔ̀ chwi.”

¹⁴ Anyumə̀ ne Pɔl ya kə̀bi ni ghàm, Gàliyò ya ghà abə mə̀Ju mbe gha, “Mə̀Ju, mbə̀ zug! Àkə aghi ne mbə̀ kə pùti isaʼi igun mbaŋà ìzo̰ gha wè gùg nɔ̀ʼɔ̀ mɔ̀ʼɔ, kə̀ gha wè ghì anug tibɔ̀ŋ kyen mɔ̀ʼɔ, nji mə bèrì aton ni zug anug ze ne mbə̰ mbe ghà.

¹⁵ Icheg ne à ya anug imbə̀ʼ tìngam tì tikum fɔrɔ ìmbən mə̀nɔ̀ʼɔ̀, mbə̀ tangi àzən anug mbə̰ mbə̰. Chəyi mə̀ biri bḛ ni saʼ inug icheg mbo̰.”

¹⁶ Wì ya ghà ane, kàmni awɔb chì inga nəb isaʼi ze.

¹⁷ Mə̀Ju mbe ya gwì Sostenès we ne ya yaʼi atog wə̀d inga ichamì Ŋwiye, niŋ ghò imbìghè nəb isaʼi ze, sɔmɔ aməd. Si ya gha, chəyi Gàliyò ya niŋ àze ane anug mɔ̀ʼɔ.

Pɔl bə̀ndi ghò à Antìyɔ̀g

¹⁸ Pɔl ya ywìrì chùghi à Kɔrèn ane ineg mɔ̀ʼɔ. Anyumə̀ ne wì ya màni a angu, wì ya sàŋì bəd mbe ne ya bḛ Kristo, niŋ Prìsilà tì Àkwilà mbi nyi inga abaŋ igyi bàni ghò à Sirìyà. Bɔŋ mbi ya se nɔ̀ʼɔ̀ à Sènkreyà, wì ya fə seri atog icheg ne wì ya fə bḛ abə Ŋwiye.

¹⁹ Anyumə̀ ne mbi ya pè à Efesùs, wì ya sàŋì Prìsilà tì Àkwilà angu. Wì ya ghò yi tèzìʼì ghò nyi inga ichamì Ŋwiye, pè ko se tòʼrò inug tì mə̀Ju.

²⁰ Mə̀Ju mbe angu ya boʼ ibo ibo gha wì chughi abɔ̀ʼ inɔb ane inun nyumə̀ mɔ̀ʼɔ, wì to̰ yi .

²¹ Si ya gha, anyumə̀ ne wì ya nɔ̀ʼi se ghò yi, wì ya kàʼ awɔb gha, “Ŋwiye mə bḛ, mə biri ywiri yeʼe mùg awən.” Anyumə̀ ne wì ya gha ane, wì ya nyi inga abaŋ igyi nɔ̀ʼ a Efesùs.

²² Anyumə̀ ne wì ya pe a Kàserìyà, wì ya dù inga abaŋ igyi ze ghò chàʼrì bəd inga ifeti bəd Kristo we a Jèrusalèm. Wì ya ghì ane, nɔ̀ʼ swìʼi ghò a Antìyɔ̀g.

²³ Anyumə̀ ne wì ya chughi angu ane iki nyumə̀ mɔ̀ʼɔ, wì ya nɔ̀ʼ ghò ŋa yḛ̀ isiŋi isiŋi inga aba aben ze a Gàlesìyà fɔrɔ a Fìrigìyà. Wì yaya yḛ ane nè nə̀rə fìŋ abə bəd məjìm mbe ne ya bḛ Kristo.

Àpolòs ghàm Ìngam Ŋwiye a Efesùs fɔrɔ a Kɔrèn

²⁴ Anyumə̀ we ne Pɔl ya yaʼi a Gàlesìyà fɔrɔ a Fìrigìyà, Ju mɔ̀ʼɔ ne ikum məd ya Àpolòs ya ghò a Efesùs. Mbi ya gwi aməd a Àlèzandrìyà. Wì ya kyeri icheg ni ghàm abə bəd kwàʼ icheg chɔm bə̀ kyèri Ìngam Ŋwiye kwàʼ icheg chɔm.

²⁵ Wì ya fə mə̀nì inug imbə̀ʼ inɔnjì we ne Anɔŋisəg Yeso yaya chwìte. Wì yaya ghàmà Ìngam Ŋwiye bə̀ chwìte inug imbə̀ʼ Yeso kwàʼ icheg chɔm, ka wì ya kyeri məyi anug imbə̀ʼ mənib mbe ne Jɔn yaya nàʼà.

²⁶ Wì ya ko se ghàmà Ìngam Ŋwiye inga ichamì Ŋwiye kwàʼ ane fìŋ ka ka. Si ya gha, anyumə̀ ne Prìsilà tì Àkwilà ya zughi icheg ne wì yaya ghàmà, mbi ya niŋ aməd ghò, taŋ tòʼrì inɔnjì we ne Ŋwiye ya chwìye gha bəd kyeri aməd.

²⁷ Anyumə̀ ne Àpolòs ya kə̀bi ni ghò a Akìyà, bəd Kristo mbe a Efesùs ya nəri aməd. Mbi ya ŋwàʼrì àŋwàʼrì mɔ̀ʼɔ chà abə bəd Kristo mbe a Akìyà gha mbe niŋ aməd kwàʼ icheg chɔm. Anyumə̀ ne wì ya pè angu, wì ya taŋ wètì bəd mbe ne Ŋwiye ya ghi ìchɔ̀mì inɔb ni gha mbe bḛ Kristo.

²⁸ Wì ya tàŋ inug mbe ne mə̀Ju yaya ghà imbìghè abə inɔ̰ bəd. Wì ya tàŋ ane, chwi inɔb inga Àŋwàʼrì Ŋwiye gha, Yeso ya Wə̀d we ne Ŋwiye zɔ̀ʼi.