Ɨ̀fàʼì 17 - Ikan feg

Pɔl tì Sayilàs ghò a Tèsàlonikà

¹ Pɔl tì Sayilàs ya nɔ̀ʼ a Fìlipì chè inga Àmfipolìs bə̀ chè inga Àpòlonìyà ghò pè a Tèsàlonikà ne ichamì Ŋwiye mə̀Ju ya yaʼi angu.

² Pɔl ya ghò nyi inga ichamì Ŋwiye we icheg ne wì yaya nḛ ghò aghəm ijìm. Wì yaya tòʼrò Ìngam Ŋwiye abə mə̀Ju mbe ne ya yaʼi angu igun ineg àzwètì mə̀Ju ane ìkàb itad.

³ Wì ya tòʼrì Ìngam Ŋwiye inɔb chwi icheg ne Wə̀d we ne Ŋwiye zɔ̀ʼi biri zə̰ ngəʼ, ku, Ŋwiye zwèmni aməd ane iwu. Pɔl ya chè imbìghè ni ghà inɔb gha, “Yeso gho̰ ne mə ghàmà inən imbə̀ʼ aməd anìŋ ya Wə̀d we ne Ŋwiye zɔ̀ʼi.”

⁴ Bəd mɔ̀ʼɔ abɔ̀ʼ mə̀Ju mbe ne ya zughi ìngam we bḛ, ya beni abɔ̀ʼ Pɔl tì Sayilàs. Bəd nɔʼ nɔʼ mɔ̀ʼɔ a Gris ne ghùmnə Ŋwiye fɔrɔ mə̀yi kyen kyen mɔ̀ʼɔ ya bə̀ bèni abɔ̀ʼ inɔb.

⁵ Si ya gha, mə̀Ju mɔ̀ʼɔ ne ya bàri icheg ne bəd nɔʼ nɔʼ fə beni abɔ̀ʼ Pɔl tì Sayilàs ya ghì ìdɔ̀b. Mbi ya ghò ane itog izib, fèti itəd bɔn mɔ̀ʼɔ, to awɔb, mbi yèʼe bùg ndum inga asiŋi ze. Ndum zè ya tḭyḛ anene ghò nyi inga achan Jasòn. Mbi yaya kə̀bə̀ gha mbi mə̀ bàd Pɔl tì Sayilàs angu, mbi gwì awɔb chà isəg abə inɔ̰ bəd we.

⁶ Si ya gha, chəyi mbi ya bàri awɔb. Icheg ne chəyi mbi ya bàri awɔb, mbi ya gwì Jasòn fɔrɔ bəd mɔ̀ʼɔ ne ya nɔŋi ìwɔb ibḛfiŋ igun Kristo niŋ nè sìmè ghò abə itog bəd mbe ne sàʼa aben. Anyumə̀ ne mbi pè angu, mbi ya kyen kwàʼ ane gì ka ka gha, “Bəd mbo̰ ne tɔ̀bɔ̀ isiŋi inga iben ijìm, mbɔb mbo̰ fə se aŋa.

⁷ Jasòn fə niŋ awɔb nɔ̀ŋì ibo inga nəb. Chəyi mbɔb mbe kə̀bə ni nɔ̀ŋì tikə ìti Kayisà. Mbɔb mbe bə̀ nè ghà gha ifɔn ndəŋ we angu ne mbe kàrà ane Yeso.”

⁸ Anyumə̀ ne bəd mbe inga aben ze fɔrɔ itog bəd mbe ne sàʼa aben ya zughi anug ze, ze ya taŋ nàʼ ngəʼ inɔb.

⁹ Ane, mbi ya gha Jasòn fɔrɔ bəd mbe ne ya bḛ Kristo nàʼ ikab we ne bəd mbe nàʼà bɔŋ mbi chiye awɔb a nəb ndəŋ . Mbi ya nàʼ. Ane, mbi ya chì awɔb sàŋì, mbi ghò.

Pɔl tì Sayilàs ghò a Bèriyà

¹⁰ Àsi tizimi, bəd Tèsàlonikà mbe ne ya bḛ Kristo ya niŋ Pɔl tì Sayilàs chà a Bèriyà. Anyumə̀ ne mbi ya pè angu, mbi ya ghò inga ichamì Ŋwiye mə̀Ju.

¹¹ Mə̀Ju mbe a Bèriyà ya bèrì fìŋ chɔm chè mbe a Tèsàlonikà imbə̀ʼ icheg ne mbi yaya nìŋə Ìngam Ŋwiye kwàʼ ane fìŋ ijìm. Mbi yaya taŋ zìyè fìŋ ni zug Ìngam Ŋwiye. Mbɔb yaya kàrà Ìngam Ŋwiye ineg ijìm ni nèn gha inug mbe ne Pɔl yaya chwìte kə kwàʼ mbe tesiʼ.

¹² Ane, mbɔb nɔʼ nɔʼ ya bḛ Kristo. Mə̀yi kyen kyen ne kayi mə̀Ju fɔrɔ mbaŋà mɔ̀ʼɔ ne kayi mə̀Ju ya bə̀ bḛ Kristo.

¹³ Anyumə̀ ne mə̀Ju mbe a Tèsàlonikà ne chəyi mbi ya bḛ Kristo ya zughi gha Pɔl we se ghàmà Ìngam Ŋwiye a Bèriyà, mbi ya ghò angu pè ko se chìkə̀ fìŋ abə bəd bə̀ to bəd gha mbe bughə ndum.

¹⁴ Kwàʼ ati ati, bəd mbe ne ya bḛ Kristo inga Bèriyà ya chà bəd gha mbe niŋ Pɔl ghò chà aməd iban igyi tìbà. Si ya gha, Sayilàs tì Timotì ya si tèn a Bèriyà.

¹⁵ Mbaŋà te ne ya niŋ Pɔl ya ghò tì məd anene ghò pè a Atèns. Mbɔb ya ywìrì bə̀ndì ghò awɔb a Bèriyà tì ikən ne Pɔl ya chà inɔb gha mbe gho ghà abə Sayilàs tì Timotì mbe zamba yèʼe kɔ̀ti aməd.

Pɔl ghàm Ìngam Ŋwiye a Atèns

¹⁶ Icheg ne Pɔl yaya ghɔ̀mɔ̀ Sayilàs tì Timotì a Atèns, wì ya bàd icheg ne mə̀ŋwiye ako ya sweghi inga ikye aben we. Ane, fìŋ məd ya bə inga.

¹⁷ Ane, wì ya nɔ̀ʼ ghò inga ichamì Ŋwiye mə̀Ju. Wì ya pè se tòʼrò Ìngam Ŋwiye abə mə̀Ju fɔrɔ abə bəd mbe ne kayi mə̀Ju ne ghùmnə Ŋwiye, gha mbe taŋ kyèri anug ne we ghà. Ineg ijìm, məd yaya bə̀ ghò chùghə aseg inga isiŋi iywin tòʼrò Ìngam Ŋwiye abə bəd ne wì kɔ̀ti angu.

¹⁸ Bəd iwe mɔ̀ʼɔ ne mbi yaya kàrà ane Èpìkurìyà fɔrɔ mbe ne mbi yaya kàrà ane Stoyìg ya ghò kɔ̀ti aməd, ko se tàŋà Ìngam Ŋwiye tì məd. Mbi mɔ̀ʼɔ abɔ̀ʼ inɔb ya ko se chàpà aməd gha, “Anen azo̰ kə ghà àzi aghə?” Mbi mɔ̀ʼɔ ya ghà àzɔb gha, “Wì ya ghàmà imbə̀ʼ iku mə̀ŋwiye mɔ̀ʼɔ.” Mbi yaya chàpà ane imbə̀ʼ icheg ne Pɔl yaya ghàmà inug imbə̀ʼ Yeso, bə̀ ghàmà inug imbə̀ʼ icheg ne bəd biri zweme ane iwu.

¹⁹ Ane, mbi ya niŋ Pɔl ghò a Àrìyopagùs. Àrìyopagùs ya asiŋi ne itog bəd inga aben ze yaya ghò nyḭ̀yḛ tifeti angu. Anyumə̀ ne mbi pe angu, mbi ya ghà abə Pɔl gha, “Tì kə̀b ni kyeri anug feg azo̰ ne àghò ya chwìte.

²⁰ Tì kə̀b ni kyeri inug mbo̰ ne àghò ya ghà. À ya kwàʼ inug tìsɔ̀ʼ ne chəyi tì kweʼì zug. Tì kə̀b gha àghò toʼro ina.”

²¹ Mbi ya ghì ane imbə̀ʼ icheg ne bəd a Atèns məjìm fɔrɔ bəd inga iben ndəŋ ne ya yaʼi angu yaya nḛ ni ya chìkə̀ nyùmə̀ məyi ni mùg bə̀ zug inug feg ne yaya dùwə̀.

²² Ane, Pɔl ya nɔ̀ʼ təm titighe inga ifeti Àrìyopagùs we ghà gha, “Mə bàd gha, inga inug ijìm, mbə̰ bəd a Atèns, mbə̰ zì atog ane anug mə̀ŋwiye.

²³ Icheg ne mə̀ kə̀ ŋa yḛ̀ inga àzən aben, mə bàd isiŋi mbe ne mbə̰ mbe ghùmnə mə̀ŋwiye. Mə bə̀ bàd ati ŋwiye mɔ̀ʼɔ ne mbi ŋwaʼri angu gha, ‹Abə Ŋwiye we ne chəyi tì kyeri.› Ane, Ŋwiye we ne mbə̰ mbe ghùmnə ne chəyi mbə̀ kyeri, à ya ìwiwən ne mə yeʼe ni ghà inug imbə̀ʼ aməd inən.

²⁴ Məd ya Ŋwiye we ne ya tangi isəg fɔrɔ ighi ijìm mbe ne yaʼi inga. Məd ya Anɔŋisəg ne tùmbə̀ ikaŋ àbɔ̀ŋɔ fɔrɔ isəg. Chəyi məd we chùghə inga mbàn te ne bəd kɔri.

²⁵ Chəyi tì məd cheʼi aghi mɔ̀ʼɔ ne mba biri nàʼ ibo icheg ne tì ya fàʼà ibo. À ya ane imbə̀ʼ icheg ne à ya məd ya nàʼà ìtḛ̀ fɔrɔ azwighi bə̀ nàʼà ighi ijìm abə bəd məjìm.

²⁶ Wì ya ko ane wə̀d imɔʼ tàngi bəd məjìm inga iben ijìm mbe ne yaʼi inga isəg gho̰. À ya məd ghì bəd yaʼ inga iben ijìm igun isəg. Məd ya fə bì nɔ̀ŋì nyumə̀ abə bəd məjìm fɔrɔ isiŋi ne bəd biri chughi.

²⁷ Wì ya ghì ane imbə̀ʼ bəd se kə̀bə̀ aməd, ni gha ighəm mɔ̀ʼɔ mbi tindi iban məd kyèri aməd. Si ya gha, chəyi agha sa abə wə̀d imɔʼ imɔʼ abɔ̀ʼ ina ni ghò pè abɔʼ Ŋwiye.

²⁸ À ya kwàʼ icheg ne wə̀d mɔ̀ʼɔ ya gha, ‹Tì we awa ika bə̀ yḛ̀ bə̀ yaʼ izɔm ane ika ne nɔʼi ibo.› À ya bə̀ kwàʼ icheg ne ìmbən bəd mɔ̀ʼɔ ne ŋwaʼri inug ya bə ghà gha, ‹À ya kwàʼ tesiʼ gha mba ya bɔn məd.›

²⁹ Icheg ne tì yaʼi bɔn Ŋwiye, imbə̀ʼ tì ya kɔ̀ndɔ awa gha, Ŋwiye ya icheg aghi bɔmi mɔ̀ʼɔ ne mbi tangi ane gol kə̀ ane silibà kə̀ ane iteg, kə aghi ne wə̀d kɔ̀ndi inga àzi atog si tàngi ane ibo.

³⁰ A mbègtog, chəyi Ŋwiye ya nɔŋi atog ane inug mbe ne bəd yaya ghìyə̀ abəŋ. Si ya gha, inga nyùmə̀ isəg gho̰, wì fə ghà gha bəd məjìm inga isiŋi ijìm mbe bəŋi ìtɔb fìŋ sìkì inug tibɔ̀ŋ.

³¹ Wì ya nɔ̀ŋì aneg ne wì biri chè anjìm Wə̀d we ne wì ya chɔʼi, saʼ wə̀d ijìm inga isəg gho̰ ane icheg ne koʼi. Wì fə chwi aneni abə bəd məjìm gha zìye biri ghì ane icheg ne wì zwemni wə̀d we ne wì ya chɔʼi ane iwu.”

³² Anyumə̀ ne mbi ya zughi icheg ne Pɔl ya ghàmi imbə̀ʼ anug ni zweme ane iwu, bəd mɔ̀ʼɔ ya chàtì aməd. Si ya gha, mbi mɔ̀ʼɔ ya gha, “Tì kə̀b ni ywìri zug anug azo̰ ighəm ndəŋ.”

³³ Anyumə̀ ne mbi ya gha ane, Pɔl ya si dù yi inga ifeti we.

³⁴ Bəd mɔ̀ʼɔ abɔ̀ʼ bəd mbe ya bḛ Kristo. Wə̀d mɔ̀ʼɔ abɔ̀ʼ bəd mbo̰ yaya Dìyònisùs ne ya yaʼi wə̀d inga ifeti Àrìyopagùs. Àyi mɔ̀ʼɔ ne ikum məd ya Dàmàris fɔrɔ bəd ndəŋ ya bə̀ bḛ Kristo.