Ɨ̀fàʼì 16 - Ikan feg

Timotì fɔ̀ti abɔ̀ʼ Pɔl tì Sayilàs

¹ Pɔl ya ghò pè a Debè fɔrɔ a Listrà. Mbaŋà mɔ̀ʼɔ ne ya bḛ Kristo ya yaʼ angu ne ikum məd ya Timotì. Ngɔb Timotì ya àyi Ju ne ya bḛ Kristo. Àsi mbaʼ ìwi Timotì ya wə̀d a Gris.

² Bəd mbe ne ya bḛ Kristo a Listrà fɔrɔ a Ìkonìyùm yaya ghà inug chɔm imbə̀ʼ Timotì.

³ Icheg ne Pɔl ya kɔ̀ŋi ni niŋ Timotì mbi se fɔrɔ yḛ̀, wì ya ŋwed aməd. Wì ya ŋwed aməd imbə̀ʼ icheg ne mə̀Ju məjìm mbe ne ya yaʼi inga asiŋi ze ya kyeri gha mbaʼ ìwi Timotì ya wə̀d a Gris.

⁴ Icheg ne mbi yaya yḛ̀ isiŋi isiŋi, mbi yaya nè mə̀tə̀ tikə te ne bədtɔm fɔrɔ itog bəd inga ifeti bəd Kristo we a Jèrusalèm ya niŋi isɔbi anug gha bəd Kristo nɔŋɔ. Mbɔb yaya ghà abə bəd gha mbe nɔŋɔ tikə te tijìm.

⁵ Ane, ibḛfiŋ abə bəd inga tifeti bəd Kristo te tijìm ya təm kà. Inun bəd ne yaya bḛ Kristo yaya yètè igun ineg.

Anatì njə̀m chè Pɔl a Truwàs

⁶ Pɔl tì Sayilàs fɔrɔ Timotì ya chè inga Fìrigìyà fɔrɔ inga aba aben ze Gàlesìyà imbə̀ʼ icheg ne chəyi Azwighi Ŋwiye ya bḛ gha mbe ghama Ìngam Ŋwiye inga Esìyà.

⁷ Anyumə̀ ne mbi ya pe ane ndò aben ni nyi inga Misìyà, mbi ya ŋa nyḭ̀yḛ inga Bìtinìyà, si ya gha, chəyi Azwighi Yeso ya bḛ gha mbe gho nyi inga aben ze.

⁸ Ane, mbi ya ghò che a Misìyà, swìʼi ghò a Truwàs.

⁹ Àsi izimi we, anatì njə̀m mɔ̀ʼɔ ya chè Pɔl. Wì ya bàd mbaŋà mɔ̀ʼɔ inga anatì njə̀m ze ne ya təmi se bòʼo ibo ghà ibo gha, “Bani yèʼe wètì awa a Màsèdonìyà.”

¹⁰ Ane, tì ya chuʼri nyɔd kwàʼ ati ati ghò a Màsèdonìyà imbə̀ʼ icheg ne tì ya kyeri gha à ya Ŋwiye we chà awa gha tì gho ghà ikən chɔm abə bəd mbe angu.

Lidiyà we a Fìlipì bə̀ŋì fìŋ bḛ Kristo

¹¹ Tì ya nyi abaŋ igyi a Truwàs, bàni chè a Sàmotràs ne chəyi tì nyi bə̀ghə̀. Sàmotràs ya akəmi asiŋi ne igyi che kad. Àsi isu abɔ̀ʼ, tì ya bàni ghò a Nìyapolìs.

¹² Tì ya nɔ̀ʼ angu ghò a Filipì, ne yaʼi aben kyen inga aba isəg ze a Màsèdonìyà. À ya Rom yaya tùmbə aben ze. Tì ya chughi angu ane ineg nɔʼ nɔʼ.

¹³ Igun aneg àzwètì mə̀Ju, tì ya dù inga ikye aben ghò iban igyi kyen imbə̀ʼ icheg ne tì ya kɔndi gha à ya asiŋi ne mə̀Ju mbe angu yaya ghò fète ni chàʼra Ŋwiye. Tì ya pè chùghi, si ko se mùghə̀ tì mə̀yi mbe ne ya fete angu.

¹⁴ Àyi mɔ̀ʼɔ abɔ̀ʼ mə̀yi mbe ne ya zughi inug mbe ne tì yaya ghà ya Lidiyà. Wì ya nɔ̀ʼ a Tìyàtirà. Wì yaya fḛ̀ ndwi àka inun. Wi yaya bə̀ ghùmnə Ŋwiye. Anɔŋisəg ya fìʼì fìŋ məd gha wì zìye atog ane anug ne Pɔl yaya ghà.

¹⁵ Anyumə̀ ne mbi ya fə nàʼi mənib ibo fɔrɔ abə bəd məjìm mbe ne ya yaʼi ibo inga nəb, wì ya boʼ ibo ina, ghà gha, “Mbə̰ mə̀ niŋ gha mo ya wə̀d ne fə nɔŋi fìŋ igun Anɔŋisəg Yeso, mbə̀ yeʼe chùghi inum inga achan.” Wì ya ghà ane, nyi aton ina anene tì gho chùghi ibo inga achan.

Itog bəd mbe a Fìlipì zì Pɔl tì Sayilàs a ndəŋ

¹⁶ Aneg mɔ̀ʼɔ ne tì yaya ghò a asiŋi ze ne mbi yaya chàʼrà Ŋwiye angu, ŋwan àyi mɔ̀ʼɔ ne ya àbòʼì ya yeʼe kɔ̀ti awa. Azwighi tibɔ̀ŋ ya yaʼ inga məd. Azwighi ze yaya ghìyə̀ wì ghì tikwab. Anjìm tikwab te, mə̀mbaʼ àfàʼì məd ya bèrì ikab nɔʼ nɔʼ.

¹⁷ Wì yaya bène abɔ̀ʼ Pɔl tì ina nè kyḛ ghà gha, “Bəd mbo̰ ya bəd ne fàʼà abə Ŋwiyekɔʼ. Mbɔb ya ghà inug imbə̀ʼ inɔnjì we ne tì bəd chè angu pum.”

¹⁸ Wì yaya ghìyə̀ anìŋ ane ineg nɔʼ nɔʼ. Aneg mɔ̀ʼɔ, Pɔl ya gaŋ, ghàbri ghà abə Azwighi tibɔ̀ŋ ze gha, “Mə ghà ine ane ikum Yeso Kristo, che du inga ŋwan gho̰!” Azwighi tibɔ̀ŋ ze ya chè dù kwàʼ ati.

¹⁹ Anyumə̀ ne mə̀mbaʼ àfàʼì àbòʼì ze ya bàri gha chəyi tì ŋwan àyi we ywìrì ghì mbɔb bèrì ikab, mbi ya gwì Pɔl tì Sayilàs, sìmì awɔb ghò a sàmi iywin. Mbi ya pè nɔ̀ŋì awɔb imbìghè abə itog bəd mbe ne sàʼa aben ze.

²⁰ Mbi ya niŋ awɔb ghò abə bəd ne sàʼa tisaʼi, pè ghà gha, “Bəd mbo̰ ya mə̀Ju. Mbɔb mbe bùrə̀ àza aben.

²¹ Mbɔb mbe chwìte məcheg aben mɔ̀ʼɔ ne mba məRom, chəyi ìmba mə̀nɔ̀ʼɔ̀ bḛ. À ya məcheg aben ne chəyi mba mbe bə̀ nɔ̀ŋɔ̀.”

²² Inɔ̰ bəd ya fɔti abɔ̀ʼ bəd mbe ne ya beri àbòʼì ze se zìyè isaʼi igun Pɔl tì Sayilàs. Bəd mbe ne sàʼa tisaʼi ya ghà abə mə̀sogyì gha mbe chi ndwi abə Pɔl tì Sayilàs ywìri awɔb ane ngwàn.

²³ Anyumə̀ ne mbi ya fə jə̰ awɔb kwàʼ icheg chɔm, mbi ya niŋ awɔb ghò zì inga nəb ndəŋ . Mbi ya ghà abə wə̀d we ne kyèʼrè nəb ndəŋ ze gha wì taŋ kyèʼrì awɔb.

²⁴ Wə̀d we ya zug ane, niŋ awɔb ghò zì kwàʼ inga atog nəb ze inga, bə̀ zì ìmbɔb ighog inga anuʼ, kɔd ane mə̀chen.

²⁵ Àsi icheg ane àngɔŋ tizimi, Pɔl tì Sayilàs yaya chàʼrà Ŋwiye, zə̀ʼə̀ tikyeg ghùmnə Ŋwiye. Mbin tì bəd ndəŋ ne ya yaʼi inga angu yaya zwère.

²⁶ Mbi ŋa zə̰, ìseg nɔ̀ʼ ghùd, chìʼrì ati nəb ndəŋ ze. Kwàʼ anyumə̀ we, tinuʼ nəb tijìm ya fìʼè. Mə̀chen mbe ne mbi ya kɔri ìmbɔb ighog angu ya təndə.

²⁷ Anyumə̀ ne mbaŋà ze ne yaya kyèʼrè nəb ndəŋ ze ya nɔ̀ʼi angwḛ, wì ya si bàd tinuʼ nəb ndəŋ ifìʼi. Wì ya bàd ane, chɔʼ ibeg ibid inga baʼ, se kə̀bə̀ ni zweti ìwi nyɔd imbə̀ʼ icheg ne wì ya kɔndi gha bəd ndəŋ mbe fə dù nòrò awɔb.

²⁸ Si ya gha, Pɔl ya kyen kwàʼ ane gì ka ka ghà ibo gha, “Imbə̀ʼ àghò ziye awe anə igun ìwe nyɔd! Tì we awa aŋa mba məjìm.”

²⁹ Ibɔ ya gwì wə̀d we ne yaya kyèʼrè nəb ndəŋ ze, wì se bìnde. Ane, wì ya ghà gha mbe yeʼe tì anam. Wì ya niŋ anam ze, nòrò ghò nyi inga nəb ndəŋ ze gɔ̀m itog inwḭ aseg imbìghè abə Pɔl tì Sayilàs.

³⁰ Wì ya ghì ane, niŋ awɔb mbi dù isəg pè bìri inɔb gha, “Ìmbum mə̀mbaʼ, mə̀ kə anìŋ ghənə bɔŋ pum?”

³¹ Mbi ya ywìtì ibo gha, “Nɔ̀ŋɔ fìŋ igun Anɔŋisəg Yeso, àghò biri pum, àghò tì bəd məjìm mbe ne yaʼi ine inga nəb.”

³² Mbi ya ghà ane, ghàm ìngam Anɔŋisəg ibo fɔrɔ abə bəd məjìm mbe ne ya yaʼi ibo inga nəb.

³³ Mbi ya nàʼ mənib ibo kwàʼ izimi we bə̀ nàʼ mənib abə bəd məjìm ne ya yaʼi ibo inga nəb. Wì ya bə̀ niŋ Pɔl tì Sayilàs ghò sò ìmbɔb ina̰.

³⁴ Wì ya ghì ane, niŋ awɔb mbi ghò inga nəb, pè nàʼ ighijəg inɔb. Məd tì bəd məjìm mbe ne ya yaʼi ibo inga nəb ya taŋ gyen icheg ne mbɔb fə bḛ Ŋwiye.

³⁵ Anyumə̀ ne ituʼ ya chəghi, itog bəd mbe ne yaya sàʼa asiŋi ze ya tɔm mə̀pùrusì abə wə̀d we ne yaya kyèʼrè nəb ndəŋ . Mbi ya pè ghà ibo gha, “Chìye mbaŋà te, sàŋì te gho awɔb.”

³⁶ Wə̀d we ne yaya kyèʼrè nəb ndəŋ ya ghà anug ne mbi ghà abə Pɔl gha, “Bəd mbe ne sàʼa tisaʼi fə chà ikən gha mə chìye awe, àghò tì Sayilàs, sàŋì mbə̀ gho awən. Mbə̀ si ghò ane àbɔrɔ̀bɔd.”

³⁷ Wì ya ghà ane, si ya gha, Pɔl ya ghà abə mə̀pùrusì mbe gha, “Mba ya məRom. Mbi fə sɔm awa inga bəd bə̀ zì awa inga nəb ndəŋ bəd bàd, ne chəyi tì gughi anug mɔ̀ʼɔ. Amad anìŋ, mbə kə se kə̀bə̀ ni chì awa sàŋì anjìm anjìm? Chəyi te bḛ! Mbe yeʼe chì awa mbɔb mbɔb.”

³⁸ Mə̀pùrusì mbe ya ghò ghà inug mbe ne Pɔl gha abə bəd mbe ne sàʼa tisaʼi. Anyumə̀ ne mbi ya zughi gha mbɔb ya bə̀ məRom, mbi ya bɔ.

³⁹ Ane, bəd mbe ne sàʼa tisaʼi ya ghò boʼ ibo inɔb, niŋ awɔb mbi dù inga nəb ndəŋ ze. Mbi ya si ghà inɔb gha mbe duwə inga asiŋi ze.

⁴⁰ Anyumə̀ ne Pɔl tì Sayilàs ya du inga nəb ndəŋ ze, mbi ya ghò inga achan Lidiyà. Mbi ya pè bàd bəd mbe ne ya bḛ Kristo, nə̀ri fìŋ inɔb, si nɔ̀ʼ ghò awɔb.