Ɨ̀fàʼì 15 - Ikan feg

Bədtɔm Kristo nyìmi ifeti a Jèrusalèm

¹ Bəd mɔ̀ʼɔ ya nɔ̀ʼ a Jùdeyà swìʼi ghò a Antìyɔ̀g. Mbi ya pè se chwìte inug abə bəd Kristo gha, “Àmə chəyi mbi ŋwed awən icheg ne mə̀nɔ̀ʼɔ̀ Muse gha, chəyi mbə̀ biri pum.”

² Ane, Pɔl tì Bànabàs ya gwì achɔb ka ka se tàŋà inug mbe tì bəd mbe. Achɔb ze ya ghì mbi chɔʼ Pɔl tì Bànabàs fɔrɔ bəd Kristo ndəŋ tɔm awɔb gha mbe kɔʼ ghò a Jèrusalèm ghò nwèndi anug ze abə bədtɔm Kristo fɔrɔ abə itog bəd inga ifeti bəd Kristo.

³ Ifeti bəd Kristo ya chà awɔb ane, mbi nɔ̀ʼ ko ghò. Mbi ya chè inga Fònisìyà fɔrɔ inga Sàmarìyà. Mbi ya chè angu ane, nè ghà inɔb gha, bəd ne kayi mə̀Ju fə bḛ Kristo. Anug azo̰ ya ghì bəd Kristo məjìm se taŋ gyènde.

⁴ Anyumə̀ ne mbi ya gho pè a Jèrusalèm, ifeti bəd Kristo tì bədtɔm Kristo fɔrɔ itog bəd inga ifeti bəd Kristo ya niŋ awɔb kwàʼ icheg chɔm. Pɔl tì Bànabàs ya mə̀tì inug ijìm ne Ŋwiye ya che inga inɔb fàʼ.

⁵ Icheg ne mbi ya mə̀ti inɔb ane, bəd mɔ̀ʼɔ abɔ̀ʼ mə̀Farìsi ne ya bḛ Kristo ya nɔ̀ʼ təm titighe ghà gha, “Mbi mənyìʼ ŋwed bəd mbe ne kayi mə̀Ju icheg ne mə̀nɔ̀ʼɔ̀ Muse chwi bə̀ ghì gha mbi mənyìʼ zùgri mə̀nɔ̀ʼɔ̀ Muse.”

⁶ Ane, Bədtɔm Kristo tì itog bəd inga ifeti bəd Kristo ya bɔ̀mbì ni nèn anug ze kwàʼ icheg chɔm.

⁷ Anyumə̀ ne mbi ya fə ghàmi ghò agha sà, Pità ya nɔ̀ʼ təm titighe, ghà inɔb gha, “Ìmbum məfi, mbə̰ kyèri àzən aghi gha, inga ineg mbe ne anug Kristo ya ko, Ŋwiye ya chɔʼ amə inga inən, chà amə gha mə gho ghà ikən chɔm gho̰ abə bəd ne kayi mə̀Ju, mbe zug bḛ.

⁸ Ane, Ŋwiye ne kyeri fìŋ abə bəd məjìm fə chwi gha zìye fə bə̀ chɔʼ awɔb icheg ne we bə̀ nàʼà àzi Azwighi inɔb kwàʼ icheg ne wì ya bə nàʼ ina.

⁹ Chəyi wì ghi gha icha yaʼ igun ina tì inɔb. À ya imbə̀ʼ icheg ne mbi bḛ Yeso ne wì sò ìtɔb fìŋ.

¹⁰ Mbə̰ ya anìŋ zìyè mbèʼ igun bəd Kristo ne ka bèyi mba kə̀ ìmba mə̀mbaʼ aneg chəyi tì tì bèʼì. Aton ne mbə̰ kwàʼrà Ŋwiye anìŋ àkə gha?

¹¹ Tesiʼ ya gha, tè bḛ gha mba fə dù inga ngəʼ anjìm ìchɔ̀mì we ne Anɔŋisəg Yeso ghi ina. Tè bə̀ bḛ gha à ya anjìm ìchɔ̀mì we ne mbɔb bə dù inga ngəʼ.”

¹² Anyumə̀ ne Pɔl tì Bànabàs ya ko ni ghà iyeti inug mbe ne Ŋwiye chè inga inɔb fàʼ abə bəd ne kayi mə̀Ju, bəd məjìm ne ya yaʼi inga ifeti we ya chim tizi.

¹³ Anyumə̀ ne mbi ya ghàmi mànì, Jem ya gha, “Ìmbum məfi, mbə̀ təm mə̀ ghama.

¹⁴ Sayimùn fə tòʼrì icheg ne Ŋwiye ya fə bi chwi gha zìye bèrì fìŋ igun bəd ne kayi mə̀Ju. Ŋwiye ghì ane icheg ne wì chɔ̀ʼi bəd nɔʼ nɔʼ abɔ̀ʼ inɔb niŋ ane ìmbi bəd.

¹⁵ Inug mbe ne bədkə̀n Ŋwiye ya gha fə kòʼ koʼi tì anug azo̰. A ze inga Àŋwàʼrì Ŋwiye gha:

¹⁶ ‹Anug azo̰ mə̀ chè, mə biri ywiri yeʼe nɔ̀rì anug ìfɔ̀n Dèvid ze ne ya buʼə. Mə biri ywiri tangi isiŋi mbe ne ya buʼə ghì mbi təm kà.

¹⁷ Mə biri ghì ane ni gha àbùʼì bəd ajìm ze se kə̀bə̀ ni ghumni Anɔŋisəg, bəd məjìm mbe ne kayi mə̀Ju biri si yaʼ ìmbum bəd. À ya inug mbe ne Anɔŋisəg ghi

¹⁸ bəd kyeri kwàʼ aneg aneg.› ”

¹⁹ Jems ya chè imbìghè gha, “Ane, anug ne mə̀ kɔndi ya gha, imbə̀ʼ tì chə awa bəd mbe ne kayi mə̀Ju ne bḛ Ŋwiye.

²⁰ Tè ŋwaʼra yaʼ àŋwàʼrì chà inɔb gha: Imbə̀ʼ mbi jəg awɔb ighijəg ne mbi naʼi ni jə mə̀ŋwiye. Imbə̀ʼ mbi ghiyə awɔb anug ni nɔ̀kì mə̀yi kə̀ nɔ̀kì mbaŋà abu abu. Imbə̀ʼ mbi kud awɔb nyam ne swḛni swḛni.

²¹ Tè ghiyə ane imbə̀ʼ icheg ne bəd ya fə ko ni zug mə̀nɔ̀ʼɔ̀ Muse nɔ̀ʼ ane nyùmə̀ we abə ìmba mə̀mbaʼ aneg. Mbi ya bə̀ fɔ̀ŋɔ mə̀nɔ̀ʼɔ̀ mbe igun ineg àzwètì ijìm inga məchamì Ŋwiye məjìm.”

Àŋwàʼrì ne bədtɔm cha abə bəd Kristo ne kayi mə̀Ju

²² Bədtɔm Kristo tì itog bəd inga ifeti bəd Kristo we a Jèrusalèm tì bəd Kristo məjìm ya chuʼri chɔʼ mbaŋà tibe inga inɔb chà gha mbe gho a Antìyɔ̀g tì Pɔl fɔrɔ Bànabàs. Mbaŋà te ya Sayilàs tì Judàs we ne mbi yaya bə̀ kàrà aməd ane Basabàs. Mbɔb ya yaʼ itog bəd inga ifeti bəd Kristo we a Jèrusalèm.

²³ Aŋa ya anug ne yaʼi inga àŋwàʼrì ze ne mbi ya cha gha mbe gho tì àzewən: “Ìmba məfi ne tì yaʼi ane anug amɔʼ inga Kristo, À ya mba bədtɔm Kristo tì itog bəd inga ifeti bəd Kristo ŋwaʼri àŋwàʼrì azo̰. Tì we chàʼrà awən, mbə̰ bəd Kristo mbe ne kayi mə̀Ju ne mbə̰ mbe chùghə a Antìyɔ̀g tì a Sirìyà fɔrɔ a Sìlisìyà.

²⁴ Tè fə zug gha bəd mɔ̀ʼɔ nɔ̀ʼ abɔ̀ʼ ina yèʼe kɔ̀ti awən se nàʼà ngəʼ inən, chə ìmbən itog ane inug ne mbe ghà, ne chəyi tì cha awɔb.

²⁵ Ane, tè chùghi aseg chɔʼ mbaŋà mɔ̀ʼɔ chà inən tì Bànabàs fɔrɔ Pɔl ne ya ìmba mə̀sə̀ʼ ne tì taŋ kɔ̀ŋ.

²⁶ Mbɔb fə sɔ̀ŋ ìwɔb ìtḛ̀ ni ghàm abə bəd imbə̀ʼ anug ìwa Anɔŋisəg Yeso Kristo.

²⁷ Ane, mbaŋà te ya Judàs tì Sayilàs ne tè chà inən. Mbɔb biri ywiri ghà inug mbe ne tì ŋwaʼri gha mbə̀ faʼa.

²⁸ Azwighi Ŋwiye fə ghì tì taŋ kyèri gha, ze bɔ̀ŋ gha imbə̀ʼ tì ziye awa inug ndəŋ igun inən chèyi ane mbo̰ ne mbə̀ beri ni fàʼ.

²⁹ Inug mbe ya gha: Imbə̀ʼ mbə̰ jəg awən ighijəg ne mbi naʼi ni jə mə̀ŋwiye. Imbə̀ʼ mbə̰ kud awən nyam ne mbi swḛni swḛni. Imbə̀ʼ mbə̰ jəg awɔb anəm. Imbə̀ʼ mbə̰ bə ghiyə awən anug ni nɔ̀kì mə̀yi kə̀ nɔ̀kì mbaŋà abu abu. Ze biri yaʼ anug chɔm inən anyumə̀ ne chəyi mbə̰ mbe ghìyə̀ inug mbo̰. Ane, mbə̀ si chùghi icheg chɔm.”

³⁰ Mbi ya tɔm bəd mbe mbi swiʼi ghò a Antìyɔ̀g. Mbi ya pè angu, fèti bəd Kristo məjìm a asiŋi afibì, nàʼ àŋwàʼrì ze inɔb.

³¹ Anyumə̀ ne mbi ya fɔŋi àŋwàʼrì ze, mbi ya taŋ gyèndi imbə̀ʼ icheg ne anug ne ya yaʼi inga ya nəri ìtɔb fìŋ.

³² Judàs tì Sayilàs ne ya yaʼi bədkə̀n Ŋwiye yaya ghà inug nɔʼ nɔʼ ne nə̀rə fìŋ bə̀ ghìyə̀ gha ibḛfiŋ abə bəd Kristo mbe təm kà.

³³ Anyumə̀ ne mbi ya fə chughi angu ane nyumə̀ mɔ̀ʼɔ, bəd Kristo mbe ya ywìrì chà awɔb ane àbɔrɔ̀bɔd abə ìmbɔb məfi mbe ne ya tɔmi awɔb.

³⁴ [Si ya gha, Sayilàs ya ywìrì chùghi angu.]

³⁵ Pɔl tì Bànabàs ya tèn a Antìyɔ̀g. Mbɔb tì bəd nɔʼ nɔʼ ndəŋ yaya chwìte inug nɔʼ nɔʼ bə̀ chètè ìngam Anɔŋisəg abə bəd.

Pɔl tì Bànabàs ghàpà

³⁶ Nyumə̀ mɔ̀ʼɔ ya chè, Pɔl ghà abə Bànabàs gha, “Tì bəndə ghò mùg tì ìmba məfi mbe ne yaʼi inga isiŋi mbe ne tì ya ghàmi ìngam Anɔŋisəg angu, bə̀ pè nḛ gha mbɔb mbe iye.”

³⁷ Bànabàs ya kə̀b gha nji mbɔb niŋ Jɔn Mag ghò tì məd.

³⁸ Si ya gha, chəyi Pɔl ya kɔndi gha à ya anug chɔm ni niŋ Jɔn Mag imbə̀ʼ icheg ne wì ya sàŋì àfàʼì akwiri, waʼ awɔb a Pàmfilìyà ghò yi.

³⁹ Pɔl ya tàŋ anug azo̰ tì Bànabàs anene ze ghì mbi ghàpà. Bànabàs ya niŋ Jɔn Mag mbi nyi abaŋ igyi bàni igyi ghò a Sayiprùs.

⁴⁰ Àsi Pɔl, wì ya niŋ yaʼ Sayilàs mbi fɔrɔ ghò. Bɔŋ mbi ya se nɔ̀ʼɔ̀, bəd Kristo ya chàʼra Ŋwiye igun inɔb gha Anɔŋisəg ghiyə ìchɔ̀mì inɔb.

⁴¹ Pɔl ya ghò pè a Sirìyà fɔrɔ a Sìlisìyà. Wì yaya yḛ̀ inga tifeti ijìm nè ghìyə̀ gha ibḛfiŋ abə bəd Kristo təm kà.