Ɨ̀fàʼì 14 - Ikan feg

Pɔl tì Bànabàs zə̰ ngəʼ a Ìkonìyùm

¹ Pɔl tì Bànabàs ya ghò a Ìkonìyùm, chè ghò nyi inga ichamì Ŋwiye mə̀Ju we ne yaʼi angu icheg ne mbi yaya nḛ ghò. Mbi ya ghàm Ìngam Ŋwiye inga ichamì Ŋwiye we ane icheg ne ya ghì gha mə̀Ju nɔʼ nɔʼ tì bəd nɔʼ nɔʼ ne kayi mə̀Ju mbe bḛ Kristo.

² Si ya gha, mə̀Ju mbe ne chəyi mbi ya bḛ Kristo ya to atog abə bəd mbe ne kayi mə̀Ju, chìkì ìtɔb fìŋ, mbi ko se pàbà bəd mbe ne ya bḛ Kristo.

³ Pɔl tì Bànabàs ya chughi angu ane nyumə̀ mɔ̀ʼɔ se ghàmà ìngam Anɔŋisəg ane fìŋ ka ka. Ane, Anɔŋisəg ya chwi gha ìngam we ne mbɔb yaya ghàmà imbə̀ʼ ìchɔ̀mì məd ya anug tesiʼ icheg ne wì ya ghi gha mbe faʼa inug yeti yeti.

⁴ Bəd mbe inga asiŋi ze ya ghàpà ane iba ibe. Mbi mɔ̀ʼɔ ya bḛ inug mbe ne mə̀Ju yaya ghà. Mə̀mbin ya bḛ yaʼ inug mbe ne bədtɔm Kristo yaya ghà.

⁵ Bəd mbe ne kayi mə̀Ju tì mə̀Ju fɔrɔ itog bəd inga aben mə̀Ju ya kə̀b gha nji mbe chə bədtɔm mbe bə̀ tùmbi awɔb ane ateg, zwèti.

⁶ Ane, anyumə̀ ne bədtɔm mbe ya zughi anug ne mbi yaya chùʼrə imbə̀ʼ awɔb, mbi ya nòrò ghò a Listrà fɔrɔ a Debè, ne ya isiŋi inga aba aben ze a Làyìkonìyà. Mbi ya bə̀ nòrò ghò fɔrɔ inga isiŋi mbe ne yaʼi iban iban.

⁷ Mbi ya pè angu chètì ikən chɔm imbə̀ʼ Anɔŋisəg Yeso.

Anug ne bəd mbe a Listrà tì bəd mbe a Debè ya ghi abə Pɔl tì Bànabàs

⁸ Mbaŋà mɔ̀ʼɔ ya yaʼ Listrà ne ya buʼrə. Nɔ̀ʼ ane nyumə̀ ne mbi ya gwi aməd, chəyi wì ya kə kweʼì yèn.

⁹ Mbaŋà ze ya chughi aseg, bè zùghə anug ne Pɔl yaya ghà. Pɔl ya nèn aməd kwàʼ igun ife, kyèri gha wè bèrì ibḛfiŋ ne tì Yeso ghù aməd.

¹⁰ Ane, Pɔl ya kàrì aməd ghà ibo ane gì ka ka gha, “Nɔʼɔ təm!” Kwàʼ ati, Mbaŋà ze ya nɔ̀ʼ təm ko se yḛ̀.

¹¹ Anyumə̀ ne tinɔ̰ bəd te ne ya yaʼ angu ya bàri anug ne Pɔl ya ghi, mbi ya ko se kyḛ ane gì ka ka inga ìngam aben Làyìkonìyà gha, “Mə̀ŋwiye fə bə̀ŋə̀ ane bəd, swìʼi yèʼe abɔ̀ʼ ina!”

¹² Mbɔb ya nàʼ ikum abə Bànabàs ane Ziyòs, bə̀ nàʼ ikum abə Pɔl ane Hemès, imbə̀ʼ icheg ne à ya Pɔl yaya ghàmà.

¹³ Wə̀d mbàn Ŋwiye Ziyòs, ne mbàn Ŋwiye məd ya yaʼi məyi imbìghè inuʼ ikam we ane asiŋi ze, ya ghò niŋ inɔm pɔ̀ŋ bə̀ niŋ mə̀tewàrà ghò tì mbiwən inuʼ ikam we. Wì ya ghì ane imbə̀ʼ icheg ne məd tì inɔ̰ bəd we yaya kə̀bə̀ ni nàʼ ighi àfàtì abə bədtɔm mbe.

¹⁴ Si ya gha, anyumə̀ ne bədtɔm mbe ne ya Bànabàs tì Pɔl, ya zughi anug ze, mbi ya sètì ìtɔb ndwi imbə̀ʼ icheg ne chəyi mbi ya kɔ̀ŋi. Ane, mbi ya nòrò ghò inga inɔ̰ bəd we, se yḛ̀ nè kyḛ gha,

¹⁵ “Bəd mbo̰! Aton ne mbə̰ mbe ghìyə̀ inug mbo̰ ina anìŋ àkə gha? Mba ya bəd-aku icheg inən. Tì fə yèʼe tì ikən chɔm inən gha mbə̀ saŋa ighi ako mbo̰ bèni abɔ̀ʼ Ŋwiye we ne yaʼi izɔm. À ya məd ya tangi ikaŋ fɔrɔ ìseg bə̀ tàngi tìbà bə̀ tàngi fɔrɔ ighi ijìm mbe ne yaʼi inga inɔb.

¹⁶ À ya yaʼ inga tiwaŋ bəd te ne ya fə chè, Ŋwiye ya sàŋì bəd inga iben ijìm gha mbe chughi icheg ne mbi kɔŋi.

¹⁷ Si ya gha, məd Ŋwiye fə chwi ineni gha zìye we angu icheg ne we ghìyə̀ ìchɔ̀mì abə bəd. Məd we fìʼè ikaŋ àbɔ̀ŋɔ ghìyə̀ gha mbə̀ŋ no ane nyumə̀ ne zì kòʼi ni no. Məd we bə̀ ghìyə̀ gha mbə̀ bere tijəg ane nyùmə̀ we ne mbə̰ mbe nìŋə ighi aben. Məd we nàʼà ighijəg inən. Məd we bə̀ ghìyə̀ gha mbə̰ ya taŋ gyènde.”

¹⁸ Mbi ya ghàm ìngam gho̰, si ya gha, ze ya taŋ ka ako ni təmni bəd mbe gha imbə̀ʼ mbi naʼa awɔb ighi àfàtì mbe inɔb.

¹⁹ Mə̀ju mɔ̀ʼɔ ya nɔ̀ʼ a Antìyɔ̀g, mə̀mbin nɔ̀ʼ a Ìkonìyùm, mbi yeʼe a Listrà. Mbi ya pè to atog abə tinɔ̰ bəd te gha mbe beni abɔ̀ʼ inɔb. Ane, mbi ya tumbi Pɔl ane ateg. Mbi ya kɔndi gha wì fə ku, mbi sùŋì aməd inga ikye aben Listrà chà isəg.

²⁰ Si ya gha, anyumə̀ ne bəd mbe ne ya bḛ Kristo ya ghò təm chè kad aməd, wì ya nɔ̀ʼ, bə̀ndì ghò nyi inga Listrà. Àsi isu abɔ̀ʼ, məd tì Bànabàs ya nɔ̀ʼ ghò a Debè.

Pɔl tì Bànabàs bə̀ndì ghò a Antìyɔ̀g we inga aba aben ze a Sirìyà

²¹ Anyumə̀ ne Pɔl tì Bànabàs yaya gha ikən chɔm we a Debè, mbi ya ghì bəd nɔʼ nɔʼ bə̀ŋə̀ si yaʼ bəd Kristo. Mbi ya ghì ane, bə̀ndì ghò a Listrà fɔrɔ a Ìkonìyùm bə̀ fɔrɔ a Antìyɔ̀g.

²² Mbi yaya yḛ̀ nè nə̀rə fìŋ abə bəd mbe ne ya bḛ Kristo, bə̀ yḛ̀ nè ghà inɔb gha mbe chè imbìghè nyìmi ìwɔb ibḛfiŋ igun Kristo we taŋ kà. Mbi ya bə̀ ghà inɔb gha, “Tì bèrì ni chè inga ngəʼ nɔʼ nɔʼ bɔŋ nyi inga anug ìfɔ̀n Ŋwiye.”

²³ Anyumə̀ ne mbi ya fə chɔʼi itog bəd inga tifeti bəd Kristo te tijìm, mbi ya chughi njèg chàʼra Ŋwiye, zì awɔb inga tikye ibo abə Anɔŋisəg we ne mbi nɔŋi ìtɔb fìŋ igun.

²⁴ Mbi ya nɔ̀ʼ angu chè a Pìsidìyà ghò a Pàmfilìyà.

²⁵ Anyumə̀ ne mbi ya fə ghàmi Ìngam Ŋwiye a Pegà, mbi ya nɔ̀ʼ angu swìʼi ghò a Àtalìyà.

²⁶ Mbi ya nɔ̀ʼ a Àtalìyà ghò nyi abaŋ igyi bàni bə̀ndì ghò a Antìyɔ̀g. Antìyɔ̀g ya asiŋi ze ne mbi ya bì chàʼra Ŋwiye igun inɔb gha wì ghiyə ìchɔ̀mì inɔb mbɔb gho chètì ikən chɔm. À ya àfàʼì ze ne mbi nɔ̀ʼi angu anìŋ ni mànì.

²⁷ Anyumə̀ ne mbi ya pe a Antìyɔ̀g, mbi ya feti bəd Kristo məjìm, ghà inug ijìm mbe ne Ŋwiye ya ghi anjìm inɔb bə̀ ghà icheg ne wì ya fìʼì inɔnjì abə bəd mbe ne kayi mə̀Ju gha mbe nɔŋi ibḛfiŋ igun Kristo.

²⁸ Mbi ya chughi angu agha sà abɔ̀ʼ bəd mbe ne ya nɔŋi ibḛfiŋ igun Kristo.