Ɨ̀fàʼì 13 - Ikan feg

Bəd Kristo chà Bànabàs tì Sɔl mbi ghò chètì ikən chɔm

¹ Bədkə̀n Ŋwiye tì mə̀chwitinùg ya yaʼ inga ifeti bəd Kristo we a Antìyɔ̀g. Mbɔb yaya: Bànabàs tì Sɔl tì Simìyòn we ne mbi yaya bə̀ kàrà ane Nayijà tì Lusìyùs ne ya nɔ̀ʼi a Sayirèn fɔrɔ Manìyàn ne ya kweghi tì Erɔ̀d we ne yaʼi gɔbnà.

² Anyumə̀ ne mbi yaya ghùmnə Anɔŋisəg bə̀ chùghə njèg bə̀ chàʼrà Ŋwiye, Azwighi Ŋwiye ya ghà inɔb gha, “Mbə̀ chiye Bànabàs tì Sɔl icha, nɔ̀ŋì awɔb ane àfàʼì ze ne mə̀ kari awɔb gha mbe faʼa.”

³ Anyumə̀ ne mbi ya fə chughi njèg bə̀ chàʼra Ŋwiye mànì, mbi ya nɔ̀ŋì ìmbɔb ibo igun inɔb, chà awɔb gha mbe gho ane àfàʼì ze.

Bànabàs tì Sɔl fàʼ a Sayiprùs

⁴ Azwighi Ŋwiye ya tɔmɔ Bànabàs tì Sɔl. Ane, mbi ya swiʼi ghò a Sèlusìyà. Mbi ya nɔ̀ʼ angu nyi abaŋ igyi ghò a Sayiprùs.

⁵ Anyumə̀ ne mbi ya pe a Sàlamìs, mbi ya ghàm Ìngam Ŋwiye inga məchamì Ŋwiye mə̀Ju. Mbi ya yaʼ angu tì Jɔn Mag ne yaya wètè awɔb.

⁶ Anyumə̀ ne mbi ya fə yḛ inga Sayiprùs ijìm, ghò pè a Pafòs, mbi bɔ̀mbì tì Ju mɔ̀ʼɔ angu ne ya wə̀dkə̀n ne ghà inug ako bə̀ ghìyə̀ tikaŋì ne ikum məd ya Bà-Yeso.

⁷ Bà-Yeso we yaya kà yàʼa yi tì Sègìyos Pòlos ne ya yaʼi Gɔbnà a Pafòs. Sègìyos Pòlos we yaya kwàʼ wə̀d iwe. Wì ya kàrì Bànabàs tì Sɔl gha mbe yeʼe abɔ̀ʼ məd imbə̀ʼ icheg ne wì yaya kə̀bə̀ gha mbe ghama Ìngam Ŋwiye ibo.

⁸ Si ya gha, chəyi wə̀d tikaŋì we ne mbi yaya bə̀ kàrà ane Èlayimàs ane ìngam məGrig ya bḛ. Chəyi məd ya bə kə̀b gha Sègìyos Pòlos we bḛ Ìngam Ŋwiye.

⁹ Azwighi Ŋwiye ya sweg inga Sɔl ne mbi yaya bə̀ kàrà ane Pɔl. Ane, wì ya nèn Èlayimàs kwàʼ igun ìfe ghà ibo gha,

¹⁰ “Àghò ya kwàʼ ŋwan Debrə̀! Àghò bàn inug mbe ne koʼi ijìm. Àghò ya ghìyə̀ aku anug ajìm ni tambi bəd. Inug tibɔ̀ŋ bə̀ sweg ine inga fìŋ. Àghò wa kə anìŋ, chəyi aneg ne àghò biri sàŋì anug ni niŋ inug chɔm mbe ne Anɔŋisəg ghìyə̀ bə̀ŋì ane inug ako?

¹¹ Nḛ! Amad anìŋ, Anɔŋisəg biri zì ngəʼ igun ine. Àghò biri fə̀ghə̀. Chəyi àghò biri ywiri bàd isiŋi ane nyumə̀ mɔ̀ʼɔ.” Kwàʼ ati, aghə abə Èlayimàs ya fin wì si fə̀ghə̀. Wì ya se kə̀bə̀ gha wə̀d mɔ̀ʼɔ nyimi abo ibo, ghò chà aməd.

¹² Anyumə̀ ne Sègìyos Pòlos ya bàri anug ne ya du, wì ya bḛ Ìngam Ŋwiye imbə̀ʼ icheg ne inug mbe ne mbi yaya chwìte imbə̀ʼ Anɔŋisəg Yeso ya chè aməd.

Bànabàs tì Pɔl fàʼ a Antìyɔ̀g inga aba aben ze a Pìsidìyà

¹³ Pɔl tì bəd mbe ne ya yaʼi abɔ̀ʼ məd ya nyi inga abaŋ igyi, nɔ̀ʼ a Pafòs ghò a Pegà ne yaʼi inga aba aben ze a Pàmfilìyà. Anyumə̀ ne mbi ya pe angu, Jɔn Mag ya sàŋì awɔb bə̀ndì ghò yi a Jèrusalèm.

¹⁴ Mbi ya nɔ̀ʼ a Pegà ghò a Antìyɔ̀g we ne yaʼi inga aba aben ze a Pìsidìyà. Ane aneg àzwètì mə̀Ju ya pe, mbi ya ghò nyi inga ichamì Ŋwiye mə̀Ju chùghi aseg.

¹⁵ Anyumə̀ ne bəd mbe angu ya fə fɔŋi Ìngam Ŋwiye inga àŋwàʼrì mə̀nɔ̀ʼɔ̀ Muse, bə̀ fɔŋ inga àŋwàʼrì bədkə̀n Ŋwiye, itog bəd mbe inga ichamì Ŋwiye we ya chà ikən abə Pɔl tì Bànabàs gha, “Ìmba məfi, mbə̰ mə̀ bèrì ìngam mɔ̀ʼɔ ni nəri awa, mbə ghà ina.”

¹⁶ Pɔl ya zug ane, nɔ̀ʼ təm titighe, mə̀ʼ ane abo gha bəd chim tizi. Anyumə̀ ne bəd ya chimi tizi, wì ya ghà gha: “Ìmba məfi mə̀Izre fɔrɔ mbə̰ mbe ne kayi mə̀Ju ne ghùmnə Ŋwiye, mbə̀ zug.

¹⁷ Ŋwiye ya chɔʼ ìmba mə̀mbaʼ kyen, mba mə̀Izre, ghì awɔb mbi bə̀ŋə̀ ane aben kyen anyumə̀ we ne mbi yaya chùghə a Ijìb icheg bəd tìsɔ̀ʼ. Wì ya chì awɔb inga aben ze ane ìwi ika kyen.

¹⁸ Wì ya nyìʼ fìŋ tì ìwɔb ikuchèg tibɔ̀ŋ ane tituʼ ìghum ikwè inga ibad zɔbi.

¹⁹ Wì ya bə̀ nìmni iben ìsàmbe inga Kanàn, si wèrì mə̀Izre ane ìtɔb ìseg.

²⁰ Inug mbo̰ ya niŋ tituʼ aki akwè tì ìghum ita̰ ni dù. Wì ya bə̀ nàʼ itog bəd ne sàʼa awɔb ghò pè ane nyumə̀ we abə Samùwè, wə̀dkə̀n Ŋwiye.

²¹ À ya yaʼ anyumə̀ we, mə̀Izre ya ghà abə Ŋwiye gha wì naʼa ifɔn inɔb. Ane, Ŋwiye ya nàʼ Sɔl inɔb. Sɔl ya yaʼ ŋwan Kis inga inəbi Benjàmen. Sɔl ya tùmbì mə̀Izre ane tituʼ ìghum ikwè.

²² Anyumə̀ ne Ŋwiye ya swi Sɔl chì igun atən, wì ya nɔ̀ŋì Dèvid ane ifɔn. Wì ya ghà imbə̀ʼ Dèvid gha, ‹Mə fə bàd gha Dèvid, ŋwan Jesè, ya wə̀d we ne mə̀ taŋ kɔ̀ŋ. Wì biri ghì inug ijìm mbe ne mə̀ kəbi.›

²³ Abɔ̀ʼ bɔn ane aghaŋ inəbi Dèvid gho̰, Ŋwiye fə chɔʼ Yeso ane Wə̀d ne pùmnə mə̀Izre, icheg ne wì ya fə kàʼi.

²⁴ Bɔŋ Yeso ya se ko àze àfàʼì, Jɔn we ne yaya nàʼà mənib yaya ghà abə mə̀Izre məjìm gha mbe bəŋə fìŋ sìkì inug tibɔ̀ŋ, niŋ mənib.

²⁵ Anyumə̀ ne Jɔn ya se zàmbì mànì àzi àfàʼì, wì ya biri abə bəd gha, ‹Mbə̀ kə kɔ̀ndɔ gha mo ya we? Mo ya kayi wə̀d we ne mbə̰ mbe ghɔ̀mɔ̀. Indèʼ ka! Si ya gha, mbə̀ kyeri gha wə̀d mɔ̀ʼɔ we yèʼe inum anjìm, ne chəyi mə̀ bi kòʼ ane wə̀d ne tì mə chì itami məd.›”

²⁶ Sɔl ya chè imbìghè si gha, “Ìmbum məfi, bɔn ane aghaŋ inəbi Abràham tì mbə̰ mbe ne kayi mə̀Ju ne ghùmnə Ŋwiye, ikən we ne ghà imbə̀ʼ icheg ne Ŋwiye we pùmnə bəd fə yeʼe ina.

²⁷ Chəyi bəd a Jèrusalèm tì ìmbɔb itog bəd ya kyere Yeso icheg wə̀d ne pùmnə bəd. Mbɔb ya zì yaʼ isaʼi wən igun məd, niŋ isɔbi anug zwèti aməd. Ane, inug mbe ne bədkə̀n Ŋwiye ya ghum ghà, ne mbɔb yaya fɔ̀ŋɔ mà ineg àzwètì ijìm, ya dù ane tesiʼ.

²⁸ Ka chəyi mbi ya bi bàd aton mɔ̀ʼɔ ne tì mbi zweti aməd, mbi ya kiri gha abə Payilèd gha wì ghiyə mə̀sogyì zweti aməd.

²⁹ Anyumə̀ ne mbi ya fə ghi inug ijìm mbe ne bədkə̀n Ŋwiye ya gha imbə̀ʼ Yeso mbi dù ane tesiʼ, mbi ya swi awu məd ikaŋ azed abaʼri ghò bɔ̀ŋi inga iseg.

³⁰ Mbi ya jiʼì ghì ane, si ya gha, Ŋwiye ya zwemni aməd ane iwu.

³¹ Wì ya dù ìwi ìfe yèn bəd bàd aməd ane ineg nɔʼ nɔʼ. Bəd ne ya bàri aməd ya mbɔb mbe ne yaya yḛ̀ abɔ̀ʼ məd ni ko a Galìli ghò pè a Jèrusalèm. À ya mbɔb mbe se yḛ̀ ghà inug ne mbɔb ya bàri abə mə̀Izre amad anìŋ.

³² Ane, tì fə yeʼe tì ikən chɔm inən gha, anug ze ne Ŋwiye ya kàʼi abə ìmba mə̀mbaʼ aneg,

³³ wì fə ghì ze dù ane tesiʼ ina mba mbe ne yaʼi bɔn ane àzɔb aghaŋ inəbi. Wì fə ghì ane icheg ne wì zwèmne Yeso ane iwu. Ŋwiye ghà imbə̀ʼ Yeso inga Àŋwàʼrì mə̀Sam akwiri kyen kyen abe gha, ‹Àghò ya ìmə Ŋwan; tèchɔ̀ŋ, mo fə si ìwe Mbaʼ.›

³⁴ Ŋwiye ya ghà imbə̀ʼ icheg ne wì zwèmni aməd gha chəyi wì biri nɔ̀ʼ bɔb. Wì ya gha: ‹Mə biri mənyìʼ zì àmə àbɔrɔ̀bɔd ze ne mə̀ ya kàʼi abə ifɔn Dèvid igun ine.›

³⁵ A ze bə̀ inga àŋwàʼrì mə̀Sam ndəŋ gha: ‹Chəyi àghò Ŋwiye biri sàŋì gha ìwe Wə̀d Ìzḛzḛ bɔb.›

³⁶ Anyumə̀ ne ifɔn Dèvid yaya kiri izɔm, wì ya ghì inug mbe ne Ŋwiye ya kə̀bi gha wì ghiyə. Wì ya ku mbi twəŋi aməd abɔ̀ʼ ìmba mə̀mbaʼ aneg. Ane, wì ya bɔb.

³⁷ Àsi məd we ne Ŋwiye ya zwemni, chəyi wì ya bɔbi.

³⁸ Ìmbum məfi fɔrɔ ìtum njàbi, icheg ne ze yaʼi anìŋ, anug ne mə̀ kəbi gha mbə̀ kyeri ya gha, Ŋwiye we chè anjìm Yeso wàʼa inug tibɔ̀ŋ bəd.

³⁹ Ane, Ŋwiye fə ghì wə̀d imɔʼ imɔʼ we ne bḛ Kristo wì təm kòʼ, ne chəyi tì mə̀nɔ̀ʼɔ̀ Muse ya ghì wə̀d təm kòʼ.

⁴⁰ Ane, mbə̀ we awən nji anug ze ne bədkə̀n Ŋwiye ya gha biri dù igun inən. Anug ze ya gha,

⁴¹ ‹Mbə̰ mbe ne chàpà Ŋwiye, mbə̰ biri bàd anug ne Ŋwiye biri ghì, yèti, bə̀ kiri ku, imbə̀ʼ icheg ne mə̀ biri ghì anug mɔ̀ʼɔ inga ineg mbe ne mbə̀ yaʼi izɔm, ne wə̀d mɔ̀ʼɔ mə̀ ghà inən, chəyi mbə biri nɔʼ bḛ.›”

⁴² Anyumə̀ ne Pɔl tì Bànabàs yaya dùwə̀ inga ichamì we, bəd mbe ya boʼ ibo inɔb gha mbe ywirì bə̀ndì yèʼe igun aneg àzwètì mə̀Ju ze abɔ̀ʼ imbə̀ʼ ghà inug ndəŋ ne yaʼi icheg mbo̰ inɔb.

⁴³ Anyumə̀ ne bəd məjìm inga ichamì Ŋwiye we ya fə sàka, mə̀Ju nɔʼ nɔʼ tì bəd ndəŋ abɔ̀ʼ bəd mbe ne ya bə̀ŋi fìŋ bèni abɔ̀ʼ anug Ŋwiye mə̀Ju ya beni abɔ̀ʼ Pɔl tì Bànabàs. Ane, Pɔl tì Bànabàs ya ghàm tì inɔb bə̀ nə̀ri awɔb gha mbe che imbìghè ni nɔ̀ŋì fìŋ igun Ŋwiye we ne ghìyə̀ ìchɔ̀mì inɔb.

⁴⁴ Igun aneg àzwètì mə̀Ju ze abɔ̀ʼ, bəd nɔʼ nɔʼ inga asiŋi ze ya fete inga ichamì Ŋwiye we ni zug ìngam Anɔŋisəg.

⁴⁵ Si ya gha, anyumə̀ ne mə̀Ju ya bàri tinɔ̰ bəd te, àdeg ya sweg inɔb inga fìŋ. Ane, mbi ya ko se zɔ̀mbɔ̀ Pɔl gha anug ze ne wì ya ghà ya anug ako.

⁴⁶ Anyumə̀ ne mbi ya gha ane, Pɔl tì Bànabàs ya ywìtì inɔb ane fìŋ ka ka gha, “Ze kə̀ kòʼ gha tì bi ghà Ìngam Ŋwiye gho̰ inən. Icheg ne mbə̀ to̰ awən ìngam gho̰ bə̀ niŋ ìwən nyɔd ane bəd ne chəyi mbi koʼi ni jəg ìtḛ̀ ighə̀m imɔʼ, tè fə sàŋì awən se ghò ni ghà abə bəd mbe ne kayi mə̀Ju.

⁴⁷ À ya ane imbə̀ʼ icheg ne Anɔŋisəg ya ghà ina gha: ‹Mə fə nɔ̀ŋì awe gha àghò yaʼ ìzḛzḛ abə bəd mbe ne kayi mə̀Ju, ni gha bəd inga tibug isəg ijìm biri pum.›”

⁴⁸ Anyumə̀ ne bəd mbe ne kayi mə̀Ju ya zughi anug azo̰, mbi ya gyendi bə̀ ghùmni Ŋwiye imbə̀ʼ ìngam Anɔŋisəg we ne wì ghàmi imbə̀ʼ awɔb. Bəd məjìm mbe ne Ŋwiye ya fə chɔʼi gha mbi biri jəg ìtḛ̀ ighə̀m imɔʼ ya bḛ anug ze ne mbi yaya ghà imbə̀ʼ Kristo.

⁴⁹ Bəd ya chètì ìngam Anɔŋisəg isiŋi ijìm inga aba isəg ze.

⁵⁰ Si ya gha, itog bəd mə̀Ju mbe ya to atog abə mə̀yi kyen kyen mbe ne ya nɔŋi fìŋ igun Ŋwiye bə̀ to atog abə bəd kyen kyen mbe inga asiŋi ze. Ane, mbi ya nɔ̀ʼ ko se chɔ̀ʼɔ ibɔʼì ighog abə Pɔl tì Bànabàs, kàmni awɔb chì inga aba isəg ze.

⁵¹ Bɔŋ Pɔl tì Bànabàs ya se dùwə̀ ghò mbɔb ya kùtì agwi ane ìmbɔb ighog ni pati awɔb gha mbe bəŋi fìŋ. Anyumə̀ ne mbi ya ghi ane, mbi ya nɔ̀ʼ ghò a Ìkonìyùm.

⁵² Si ya gha, bəd mbe a Antìyɔ̀g ne ya zi ibḛfiŋ igun Kristo ya taŋ gyen. Azwighi Ŋwiye ya bə̀ taŋ swe awɔb.