Ɨ̀fàʼì 12 - Ikan feg

Erɔ̀d zwète Jem

¹ Inga ineg mbe ne Bànabàs tì Sɔl ya yaʼi a Antìyɔ̀g, ifɔn Erɔ̀d ya gwìtì bəd Kristo mɔ̀ʼɔ ni chə awɔb.

² Wì ya ghì mə̀sogyì məd zwète Jem we ne ya ifi Jɔn ane ibeg ibid.

³ Icheg ne wì ya bàri gha itog bəd mə̀Ju kɔ̀ŋ aghi ne wì ya ghi, wì ya chè imbìghè bə̀ gwìye Pità. Ifɔn Erɔ̀d ya ghì anug azo̰ anyumə̀ ne mbi yaya jə̀ghə Iteri ngə̀ŋ ze ne chəyi àfòrì inga.

⁴ Wì ya ghì mbi gwì Pità ane zì a ndəŋ. Wì ya ghì akoʼi mə̀sogyì akwè yaʼ ni kyèʼrì nəb ndəŋ gha imbə̀ʼ Pità nɔʼ dù. Ikoʼi ifibì ya mə̀sogyì məkwè. Erɔ̀d yaya ghɔ̀mɔ̀ gha Iteri Chègun meghe bɔŋ wì saʼ Pità imbìghè abə inɔ̰ bəd.

⁵ Ane, mbi ya nɔ̀ŋì Pità a ndəŋ. Si ya gha, ifeti bəd Kristo yaya chàʼrà Ŋwiye ibo ane ìzɔb fìŋ ijìm.

Angirə̀ ghì Pità du a ndəŋ

⁶ Izimi we ne nàʼà abə aneg ze ne Erɔ̀d ya beri ni saʼ Pità, Pità yaya gwḛ yi inga ìsàn mə̀sogyì məbe ne kyèʼrè aməd. Mbi ya kɔd aməd ane mə̀chen məbe. Mə̀sogyì ya bə̀ chùghi inuʼ ikam se kyèʼrè nəb ndəŋ ze.

⁷ Angirə̀ Anɔŋisəg mɔ̀ʼɔ ya sàʼà dù inga atog nəb ndəŋ ze, isiŋi zen inga ndəŋ ze. Wì nipe Pità, ghà ibo gha, “Zàmba nɔ̀ʼ.” Wì ya nɔ̀ʼ a ngwḛ, mə̀chen mbe təndə ibo ane ibo fèndi kwàʼ ati.

⁸ Angirə̀ we ya si ghà ibo gha, “Zìye ìte ndwi fɔrɔ ìmbe itami.” Pità ya zì, wi si ghà ibo gha, “Zìye ìze ndwigun bène abɔ̀ʼ inum.”

⁹ Pità ya zì ìzi ndwigun, bene abɔ̀ʼ məd, mbi dù inga nəb ndəŋ ze. Anug ze ya yaʼ abə Pità icheg njə̀m. Chəyi wì ya kyeri gha anug ne angirə̀ we ghìyə̀ ya kwàʼ anug tesiʼ ne dùwə̀.

¹⁰ Anyumə̀ ne mbi ya fə che iwaŋ mə̀sogyì mbègtog bə̀ chè iwaŋ we abɔ̀ʼ, mbi ya pè ane inuʼ ikam atə̰ we ne nyḭ̀yḛ inga ikye aben. Inuʼ ikam we ya fìʼè inɔb kwàʼ zìye zìye, mbi chè awɔb. Anyumə̀ ne mbi ya fə gho anene chè inɔnjì ifibì, Pità ŋa zə̰, angirə̀ we sàŋì aməd nim yi.

¹¹ Ane, anug ze ya dù zen abə Pità gha kayi njə̀m. Wì ya gha, “Mə kyèri kwàʼ tesiʼ amad anìŋ gha Anɔŋisəg fə tɔmɔ angirə̀ gha wì yeʼe chì amə ikye abo abə ifɔn Erɔ̀d fɔrɔ ane anug ne itog bəd mə̀Ju yaya ghɔ̀mɔ̀ ni ghì inum.”

¹² Anyumə̀ ne atog məd ya zḛ ane, wì ya ghò inga achan Mèri, ngɔb Jɔn Mag. Bəd Kristo nɔʼ nɔʼ ya fete angu se chàʼrà Ŋwiye.

¹³ Pità ya pè gɔ̀ngi inuʼ ikam, ŋwan àyi mɔ̀ʼɔ ne ya yaʼi wə̀d àfàʼì inga achan angu ne ikum məd ya Rodà ya ghò bìri wə̀d ne gɔ̀ngɔ inuʼ ikam.

¹⁴ Anyumə̀ ne wì ya zughi gha à ya Pità we ghàmà, wì ya taŋ gyen nòrò bə̀ndi ne chəyi wì kiri fiʼi inug ikam. Wì ya ghò ghà abə bəd ne yaʼi inga nəb gha, à ya Pità yaʼi inuʼ ikam.

¹⁵ Mbi ya ywìtì ibo gha, “Chəyi àze atog koʼi inga.” Anyumə̀ ne wì ya ywirì ghà kɔ̀mbì gha à ya Pità, mbi ya si ghà ibo gha, “À biri yaʼ angirə̀ məd, kayi məd.”

¹⁶ Pità ya chè imbìghè ni gɔ̀ngi inuʼ ikam anene mbi fìʼì. Anyumə̀ ne mbi ya fìʼì bàd gha à ya kwàʼ Pità, anug ya chè awɔb.

¹⁷ Anyumə̀ ne mbi ya bàri aməd ane, Pità məʼ abo inɔb gha mbe chim tizi. Wì ya si mə̀tì icheg ne Anɔŋisəg ya cha angirə̀ wì chi aməd a ndəŋ. Wì ya ghà inɔb gha, “Mbə̀ mətə anug azo̰ abə Jem fɔrɔ abə mbin tì bəd Kristo.” Wì ya ghàm ane, si nɔ̀ʼ ghò yi a asiŋi ndəŋ.

¹⁸ Anyumə̀ ne ituʼ ya chəghi, atog ya bùrə̀ abə mə̀sogyì mbe. Mbi yaya se chè kɔ̀ʼɔ chè swìʼe sɔ̀mɔ nyɔd imbə̀ʼ icheg ne chəyi mbi ya kyeri aghi ne ghi tì Pità.

¹⁹ Anyumə̀ ne ifɔn Erɔ̀d ya ghi mbi kə̀b Pità tèkan, wi ya ghì mbi saʼ mə̀sogyì mbe bə̀ niŋ isɔbi anug ghì mbi zweti awɔb. Ifɔn Erɔ̀d ya si nɔ̀ʼ a Jùdeyà ghò chùghi yaʼ a Kàserìyà ane nyumə̀ mɔ̀ʼɔ.

Ifɔn Erɔ̀d ku

²⁰ Ifɔn Erɔ̀d ya bèrì achɔb tì bəd a Tayì fɔrɔ bəd a Sidòn. Bəd mbo̰ ya ghò ane inɔ̰ ni bàd aməd. Mbi ya boʼ ibo abə Blatùs ne ya yaʼi wə̀d àfàʼì ne ifɔn Erɔ̀d ya zi ìzi fiŋ igun məd ako. Mbi ya nyi aton Blatùs ghàm ibo anene wì bḛ, wètì awɔb, ghàm abə Ifɔn Erɔ̀d. Mbi ya ghò abə ifɔn Erɔ̀d pè boʼ ibo ibo gha wì ghiyə mbɔb chughi ane àbɔrɔ̀bɔd. Bəd mbo̰ ya ghi ane imbə̀ʼ icheg ne tijəg inga ìmbɔb iben yaya nɔ̀ʼɔ̀ inga aben Ifɔn Erɔ̀d.

²¹ Igun aneg ze ne mbi ya nɔŋi ni mànì achɔb ze, Erɔ̀d ya zì ìti ndwi ìfɔ̀n, chùghi igun atən ìfɔ̀n, si ghàm abə bəd mbe.

²² Anyumə̀ ne Erɔ̀d ya ghàmi ane, bəd mbe ya ghumni aməd se kwìtì ane gì ka ka gha, “Aŋa ya gì Ŋwiye, kayi gì wə̀d!”

²³ Kwàʼ ati ati, angirə̀ Anɔŋisəg ya zì aghɔn ka ka igun Erɔ̀d imbə̀ʼ icheg ne wì ya niŋ ighumni ne nji wì ya nàʼ ighumni we yaʼ abə Ŋwiye. Mənɔb ya kud aməd anjìm inga, wì ku.

²⁴ Bəd Kristo ya chè imbìghè ni chètì Ìngam Ŋwiye. Bəd nɔʼ nɔʼ ya zug bə̀ bḛ.

²⁵ Anyumə̀ ne Bànabàs tì Sɔl ya màni àfàʼì ze ne mbi ya cha awɔb gha mbe gho fàʼ a Jèrusalèm, mbi ya bə̀ndì ghò a Antìyɔ̀g. Anyumə̀ ne mbi yaya bə̀ndə̀, mbi ya niŋ Jɔn Mag ghò tì məd.