Ɨ̀fàʼì 11 - Ikan feg

Pità tòʼrì anug ne du inga achan Kònilìyùs

¹ Bədtɔm ìmbi Yeso tì bəd mbe a Jùdeyà ne ya nɔŋi ìwɔb ibḛfiŋ igun Yeso ya zug gha bəd ne kayi mə̀Ju fə bə̀ bḛ Ìngam Ŋwiye.

² Anyumə̀ ne Pità ya kɔʼi ghò a Jèrusalèm, mə̀Ju mɔ̀ʼɔ abɔ̀ʼ mbe ne ya nɔŋi ibḛfiŋ igun Yeso, ne ya bə nɔ̀ŋì atog ane anug ni gha mbi ya mənyìʼ ŋwed bəd mbe ne kayi mə̀Ju, mbi ya nɔ̀ʼ chàtì aməd.

³ Mbi ya ghà ibo gha, “Àghò ghò inga nəb abə bəd ne kayi mə̀Ju, pè chughi aseg jəg tì inɔb.”

⁴ Pità ya ko tòʼrì inug ijìm inɔb kwàʼ icheg ne mbi ya che.

⁵ Wì ya ghà inɔb gha, “Mə ya yaʼ amə ikye aben Jopà chàʼrà Ŋwiye. Iki anatì ngwḛ mɔ̀ʼɔ ya chìŋ amə. Mə ya si bàd anatì njə̀m ne chwi aghi mɔ̀ʼɔ icheg abo ndwi kyen. Abo ndwi ze yaya swìʼè tikaŋ àbɔ̀ŋɔ icheg ni gha mbe nyìmi ane tibɔg tikwè. Ze ya swiʼi yèʼe pè təm inum imbìghè.

⁶ Mə ya taŋ nèn inga abo ndwi kyen ze bàd aku aghi: nyam ighog ikwè tì nyam inab tɔ tɔ tì nyam te ne swàrì swari aseg fɔrɔ tìnən aku aku.

⁷ Gì mɔ̀ʼɔ ya si ghàm inum gha, ‹Pità, nɔ̀ʼɔ zwèti nyam mɔ̀ʼɔ kud.›

⁸ Mə ya ywìtì gha, ‹Anɔŋisəg, Indèʼ ka! Chəyi mə̀ kə kweʼì zwèʼi aghi ne chəyi ze zḛ icheg mə̀nɔ̀ʼɔ̀ chwi, kə̀ aghi ne chəyi mə̀nɔ̀ʼɔ̀ bḛ gha bəd kud.›

⁹ Gì ze ya ywìrì ghàm ikaŋ àbɔ̀ŋɔ ighəm ndəŋ gha, ‹Imbə̀ʼ àghò kara awe aghi ne Ŋwiye fə so ane aghi ne chəyi ze zḛ.›

¹⁰ Gì ze ya ghà ane aghəm atad, mbi si sìmì abo ndwi kyen ze tì nyam te igun bə̀ndì ghò ikaŋ àbɔ̀ŋɔ.

¹¹ Kwàʼ anyumə̀ ne anatì ngwḛ ze ya mèghi, bəd mɔ̀ʼɔ mətad ne nɔʼi a Kàserìyà ya yèʼe pè təm inga achan ze ne mə̀ ya yaʼi angu. À ya bəd ne mbi ya tɔmi awɔb inum.

¹² Azwighi Ŋwiye ya ghà inum gha imbə̀ʼ mə si nɔ̀ʼ ndàrà ni ghò abɔ̀ʼ inɔb. Məfi mbo̰ tìfughə ya bə̀ fɔrɔ ghò tì inum. Tì ya pè nyi inga nəb ìzi wə̀d we ne ya tɔmi bəd mbe.

¹³ Wə̀d we ya mə̀tì icheg ne wì ya bàri angirə̀ Ŋwiye ne ya du ibo imbìghè, ibo inga nəb, si ghà ibo gha, ‹Tɔm bəd mbe gho a Jopà, ghò gha abə Sayimùn we ne mbe kàrà ane Pità gha wì yeʼe.

¹⁴ Wì biri mə̀tì ikən mɔ̀ʼɔ ine. Ikən we biri ghì mbə̰ məjìm pum, àghò tì bəd mbe ne yaʼi inga ìze nəb.›

¹⁵ Icheg ne wì ya ghàmi ane, mə̀ ya ko ni ghàm, Azwighi Ŋwiye yeʼe igun inɔb kwàʼ icheg ne ze ya bə yèʼe igun ina igun aneg Pentekɔ̀d.

¹⁶ Mə ya si wèndi anug ne Anɔŋisəg ya gha gha, ‹Jɔn yaya nàʼà mənib inən, si ya gha, Ŋwiye biri nàʼ àzi Azwighi inən.›

¹⁷ Icheg ne Ŋwiye fə nàʼi ineʼi we ne ya Azwighi məd inɔb kwàʼ icheg ne wì ya bə nàʼ ina, mba mbe ne ya nɔŋi ibḛfiŋ igun Anɔŋisəg Yeso Kristo, mo kayi wə̀d ne tì mə kɔndi gha mə təm ni kən àfàʼì ne Ŋwiye we fàʼà.”

¹⁸ Anyumə̀ ne mə̀Ju mbe ya zughi ane, chəyi mbi ya ywirì bìri anug mɔ̀ʼɔ abə Pità. Mbi ya se ghùmnə Ŋwiye gha, “Ane, à ya kwàʼ tesiʼ gha Ŋwiye fə nàʼ apan abə bəd ne kayi mə̀Ju gha mbe bəŋə fìŋ sìkì inug tibɔ̀ŋ, jəg ìtḛ̀.”

Bəd mbe a Antìyɔ̀g bḛ ikən chɔm

¹⁹ Anyumə̀ ne mbi ya zweti Stifə̀n, bəd Kristo mbe ne ya sàka imbə̀ʼ icheg ne mbi yaya chɔ̀ʼɔ ìmbɔb ibɔʼì ighog ya nòrò anene mbi mɔ̀ʼɔ ghò pè a Fònisìyà. Mə̀mbin ya ghò pè a Sayiprùs. Mə̀mbin ghò pè a Antìyɔ̀g. Mbi yaya yḛ̀ nè chètè ikən chɔm we məyi abə mə̀Ju.

²⁰ Bəd mɔ̀ʼɔ abɔ̀ʼ inɔb ne ya yaʼi bəd a Sayiprùs tì bəd a Sayirèn ya ghò a Antìyɔ̀g pè se ghàmà abə bəd ne kayi mə̀Ju bə. Mbi yaya chètè ikən chɔm imbə̀ʼ Anɔŋisəg Yeso.

²¹ Anɔŋisəg ya nàʼ ika inɔb mbi ghì iyeti inug bəd bàd. Ane, bəd nɔʼ nɔʼ a Antìyɔ̀g ya bḛ ikən chɔm we si nɔ̀ŋì fìŋ igun Anɔŋisəg Yeso.

²² Bəd Kristo mbe a Jèrusalèm ya zug icheg ne bəd a Antìyɔ̀g fə bḛ ikən chɔm bə̀ nɔ̀ŋì fìŋ igun Anɔŋisəg. Ane, mbi ya chà Bànabàs a Antìyɔ̀g.

²³ Anyumə̀ ne wì ya pe bàd ineni ne chwìye gha Ŋwiye fə ghì ìchɔ̀mì abə bəd a Antìyɔ̀g, wì ya gyen. Wì ya nəri awɔb mbɔb məjìm, ghà inɔb gha, “Mbə̀ fə taŋ nɔ̀ŋì ìtən fìŋ ijìm ni yaʼ ane anug amɔʼ tì Anɔŋisəg Yeso.”

²⁴ Bànabàs yaya kwàʼ wə̀d chɔ̀m ne ya taŋ nɔ̀ŋì ibḛfiŋ igun Ŋwiye. Azwighi Ŋwiye ya bə̀ sweg inga məd. Ane, bəd nɔʼ nɔʼ ne ya zughi anug ne wì yaya ghà ya nɔ̀ŋì ìwɔb ibḛfiŋ igun Anɔŋisəg Yeso, ìwɔb inɔ̰ ywìrì taŋ yètè.

²⁵ Bànabàs ya si nɔ̀ʼ ghò a Tasɔ̀s ni kə̀b Sɔl.

²⁶ Anyumə̀ ne wì ya bàri aməd, wì ya niŋ aməd yèʼe a Antìyɔ̀g. Ane, Bànabàs tì Sɔl yaya nyìme ifeti tì inɔ̰ bəd Kristo we, chwìte inug inɔb anene fituʼ ifibì chuʼ. À ya a Antìyɔ̀g ne mbi ya ko ni kàrì mə̀mə̀nənùg ane bəd Kristo.

²⁷ À ya inga nyùmə̀ gho̰ ne bəd mɔ̀ʼɔ ne yaʼi bədkə̀n Ŋwiye ya nɔ̀ʼi a Jèrusalèm swìʼi ghò a Antìyɔ̀g.

²⁸ Àgabùs ya wə̀d mɔ̀ʼɔ abɔ̀ʼ inɔb. Wì ya təm titighe ni ghàm, Azwighi Ŋwiye nàʼ ika ibo wì ghàm gha, nyùmə̀ njèg ze yèʼe inga isəg ijìm. (Nyùmə̀ njèg ze ya yaʼ inga ineg mbe ne Klodìyòs ya yaʼi ifɔn məRom.)

²⁹ Mə̀mə̀nənùg ya niŋ isɔbi anug ni nàʼ àwètì abə bəd mbe ne yaya chùghə a Jùdeyà ne ya nɔŋi ìwɔb ibḛfiŋ igun Yeso Kristo. Wə̀d imɔʼ imɔʼ ya nàʼ ighi icheg ne wì ya bèri.

³⁰ Mbi ya chɔ̀pì ighi mbe ane, nàʼ abə Bànabàs tì Sɔl gha mbe niŋ ghò zì ikye abo abə itog bəd Kristo mbe a Jùdeyà.