Ɨ̀fàʼì 10 - Ikan feg

Kònilìyùs bàd anatì njə̀m si tɔm bəd gha mbe gho kàrì Pità

¹ Mbaŋà mɔ̀ʼɔ ya yaʼ a Kàserìyà ne ikum məd ya Kònilìyùs. Məd ya atog wə̀d igun mə̀sogyì iki ifibì ane ifeti mə̀sogyì mbe ne nɔʼi a Italì.

² Wì ya nɔ̀ŋì fìŋ igun Ŋwiye. Məd tì inəbi məd ijìm yaya ghùmnə Ŋwiye. Wì yaya nàʼà ighi abu abu abə bəd ne chəyi àzɔb bə̀ chàʼrà Ŋwiye mà nyumə̀ ijìm.

³ À ya yaʼ aneg mɔ̀ʼɔ, icheg ane mə̀nyùmə̀ mətad tisi, anatì njə̀m mɔ̀ʼɔ ya chè aməd ne wì ya bàri angirə̀ Ŋwiye ne ya ghò ibo pè kàrì aməd gha, “Kònilìyùs!”

⁴ Kònilìyùs ya nèn angirə̀ we, kəm, ibɔ gwì, wì si bìri ibo gha, “Masà, àkə aghə?” Angirə̀ we ya ywìtì ibo gha, “Ŋwiye we taŋ gyènde imbə̀ʼ awe imbə̀ʼ icheg ne àghò we chàʼrà Ŋwiye fɔrɔ imbə̀ʼ àwètì ze ne àghò we nàʼà abə bəd ne chəyi àzɔb. Ane, wì biri nàʼ iywiti ichug ine ane ìwe ichaʼri Ŋwiye.

⁵ Kwàʼ amad anìŋ, tɔm bəd a Jopà ghà inɔb gha mbe ghò kàrì wə̀d mɔ̀ʼɔ ne ikum məd ya Sayimùn ne mbe kàrà ane Pità.

⁶ Wì ya chùghə abɔ̀ʼ Sayimùn we ne tànga gɔb fḛ, ne achan məd yaʼi iban igyi tìbà.”

⁷ Anyumə̀ ne angirə̀ we ne ya ghàmi abə Kònilìyùs ya fə nɔ̀ʼi ghò yi, Kònilìyùs ya kàrì ìmbi bəd àfàʼì məbe bə̀ kàrì sogyì imɔʼ inga mə̀sogyì mbe ne ya yaʼi aton aməd. Sogyì we ya bə̀ taŋ nɔ̀ŋì fìŋ igun Ŋwiye.

⁸ Wì ya mə̀tì inug ne ya dù tì məd inɔb, si tɔm awɔb a Jopà gha mbe gho kàra Pità.

Pità bàd anatì njə̀m ne Ŋwiye cha aməd abə Kònilìyùs

⁹ Àsi isu abɔ̀ʼ icheg ane mə̀nyùmə̀ ìghum chɔ̀b ibe tisi, ne Pità ya kɔʼi ghò chùghi igun idɔm nəb se chàʼrà Ŋwiye, mbaŋà te titad yaya se tìnde iban Jopà.

¹⁰ Njèg yaya zàŋa məd, wì se kə̀bə̀ gha nji zìye jəg aghi mɔ̀ʼɔ. Icheg ne mbi yaya kiri tanga tijəg, anatì njə̀m mɔ̀ʼɔ ya chè aməd.

¹¹ Wì ya bàd icheg ne ikaŋ àbɔ̀ŋɔ fiʼe, bə̀ bàd aghi mɔ̀ʼɔ icheg abo ndwi kyen ne ya swiʼi ikaŋ yèʼe igun isəg. Abo ndwi ze yaya swìʼe yèʼe aseg icheg ze ne mbi nyimi ane tibug tikwè.

¹² Tiku nyam ijìm ya yaʼ igun abo ndwi ze: nyam ighog ikwè, tì nyam te ne swàrì swari aseg fɔrɔ tìnən.

¹³ Gì mɔ̀ʼɔ ya ghà ibo gha, “Pità, nɔ̀ʼɔ zwèti nyam mɔ̀ʼɔ kud.”

¹⁴ Gì ze ya ghà ane, si ya gha, Pità ya ywìtì gha, “Anɔŋisəg! Indèʼ ka! Chəyi mə̀ kə kweʼì zwèʼi aghi ne chəyi ze zḛ icheg mə̀nɔ̀ʼɔ̀ chwi, kə̀ aghi ne chəyi mə̀nɔ̀ʼɔ̀ bḛ gha bəd kud.”

¹⁵ Gì ze ya ywìrì ghà ibo gha, “Imbə̀ʼ àghò kàra awe aghi ne Ŋwiye fə so ane aghi ne chəyi ze zḛ.”

¹⁶ Gì ze ya bə̀ ghàm məyi anug amɔʼ aghəm atad. Kwàʼ ati, abo ndwi ze ya bə̀ndì ghò ikaŋ àbɔ̀ŋɔ.

¹⁷ Anyumə̀ ne Pità yaya kiri kɔndɔ aton ane anatì njə̀m ze, mbaŋà te ne Kònilìyùs ya tɔmi awɔb ya bàd achan Sayimùn, si təm inuʼ ikam.

¹⁸ Mbi ya kàrì bìri ane gì ka ka gha, “Sayimùn we ne mbe kàrà ane Pità wa kə chùghə aŋa.”

¹⁹ Icheg ne Pità yaya kiri kɔndɔ aton imbə̀ʼ anatì njə̀m ze, Azwighi Ŋwiye ya ghà ibo gha, “Nḛ, bəd mətad mbe kə̀bə̀ awe.

²⁰ Nɔ̀ʼɔ swìʼi ghò aseg. Imbə̀ʼ aghog nìrè yi ine ni ghò abɔ̀ʼ inɔb imbə̀ʼ icheg ne à ya mo tɔmi awɔb ine.”

²¹ Pità ya zug ane, swìʼi ghò aseg abɔ̀ʼ mbaŋà te, pè ghà inɔb gha, “À ya mo ne mbə̰ mbe kə̀bə̀. Aton ne mbə yeʼe aŋa àkə gha?”

²² Mbaŋà te ya ywìtì ibo gha, “À ya Kònilìyùs we ne yaʼi atog wə̀d igun mə̀sogyì iki ifibì tɔmi awa ine. Məd ya wə̀d ne ghìyə̀ inug ne təmi kòʼ bə̀ ghùmnə Ŋwiye. Mə̀Ju məjìm mbe ghàmà inug chɔm imbə̀ʼ aməd. Angirə̀ Ŋwiye kə̀ ghà ibo gha, wì tɔm bəd ine mbe kara awe àghò yeʼe, imbə̀ʼ wì zug anug ze ne àghò beri ni ghà ibo.”

²³ Pità ya zug ane, niŋ mbaŋà te mbɔb fɔrɔ neg. Àsi isu abɔ̀ʼ, Pità ya nɔ̀ʼ ghò abɔ̀ʼ inɔb. Bəd mɔ̀ʼɔ abɔ̀ʼ bəd mbe ne ya bḛ Kristo a Jopà ya ghò tì Pità.

Pità ghò inga nəb Kònilìyùs

²⁴ Mbi ya ghò pè nyi inga Kàserìyà igun aneg abɔ̀ʼ. Kònilìyùs yaya ghɔ̀mɔ̀ awɔb. Wì ya kàrì ìwi inəbi ijìm tì ìmbi mə̀sə̀ʼ mbi fete ibo inga nəb.

²⁵ Anyumə̀ ne Pità ya se tìnde ni nyi inga nəb, Kònilìyùs ya nɔ̀ʼ ghò bɔ̀mbì tì məd, gɔ̀m itog inwḭ aseg ibo imbìghè, ghùmni aməd.

²⁶ Pità ya ton, nɔ̀ aməd titighe, ghà ibo gha, “Təm titighe, mo ya wə̀d-aku icheg ine.”

²⁷ Pità yaya se yḛ̀ nè mùghə̀ tì Kònilìyùs. Mbɔb ya ghò pè nyi inga nəb, Pità si bàd inɔ̰ bəd ne ya fete angu.

²⁸ Wì ya ghà inɔb gha, “Mbə̰ taŋ kyèri àzən aghi gha chəyi ìmba mə̀nɔ̀ʼɔ̀ chwi gha Ju jəgri kə̀ bì mùg tì wə̀d ne kayi Ju. Si ya gha, Ŋwiye fə chwi inum gha imbə̀ʼ mə kara amə wə̀d mɔ̀ʼɔ gha chəyi wì zḛ, kə̀ gha à ya wə̀d ne chəyi bəd beri ni jəgri tì məd.

²⁹ Ane, anyumə̀ ne mbə̀ kə tɔmi bəd inum, chəyi mə̀ kə to̰ ni yeʼe. Si mə biri inən, aton ne mbə̀ kàri amə aŋa àkə gha?”

³⁰ Kònilìyùs ya ghà ibo gha, “À ya kə̀ icheg anyumə̀ anìŋ, ne ineg ikwè fə che, ne mə̀ kə̀ chàʼrà Ŋwiye ane mə̀nyùmə̀ mətad tisi inum inga nəb. Mə ŋa zə̰, mbaŋà mɔ̀ʼɔ ne ndwi məd te njàndi njandi, wì du inum imbìghè.

³¹ Wì ya təm inum imbìghè ghà inum gha, ‹Kònilìyùs! Ŋwiye fə zug àze àdìghì. Wì fə bə̀ bàd ighi mbe ne àghò we nàʼà abə bəd ne chəyi àzɔb.

³² Ane, tɔm bəd a Jopà gha mbe gho kə̀b Sayimùn we ne mbe kàrà ane Pità. Məd ya chùghə inga achan Sayimùn we ne tànga gɔb fḛ, ne nəb məd yaʼi iban igyi tìbà.›

³³ Mə ya zug ane, tɔm bəd kwàʼ ati ati gha mbe yeʼe kàrì awe. Àghò fə ghì anug ne bɔŋi icheg ne àghò yèʼe. Tì ya anìŋ imbìghè abə Ŋwiye mba məjìm ni zug anug ze ne Anɔŋisəg gha ine gha àghò gha ina.”

Pità ghà ikən chɔm abə bəd ne kayi mə̀Ju

³⁴ Pità ya ko ghàm abə bəd mbe inga nəb Kònilìyùs gha, “Amad anìŋ, mə kyèri kwàʼ tesiʼ gha chəyi Ŋwiye we ghìyə̀ ighə.

³⁵ Məd we nìŋə bəd inga iben ijìm ne ghùmnə aməd bə̀ ghìyə̀ inug ne koʼi.

³⁶ Mbə̰ kyèri ìngam we ne Ŋwiye ya gha abə mə̀Izre. Ìngam we ya mə̀tì ikən chɔm imbə̀ʼ icheg ne tì che anjìm Yeso Kristo si chùghi ane àbɔrɔ̀bɔd tì Ŋwiye. Yeso Kristo ya Anɔŋisəg igun bəd məjìm.

³⁷ Mbə̰ kyèri anug kyen ze ne ya du inga isiŋi ijìm inga Jùdeyà. Anug ze ya ko a Galìli ne Jɔn yaya ghà gha bəd bəŋə ìtɔb fìŋ chì ane inug tibɔ̀ŋ, niŋ mənib.

³⁸ Mbə̰ kyèri icheg ne Ŋwiye ya nàʼi àzi Azwighi bə̀ nàʼ ika abə Yeso we a Nazarèd. Mbə̰ bə̀ kyèri icheg ne Yeso yaya yḛ̀ isiŋi ijìm, nè ghìyə̀ inug chɔm abə bəd məjìm bə̀ nè ghùyə̀ bəd məjìm mbe ne Debrə̀ yaya chə awɔb. Wì yaya ghìyə̀ ane imbə̀ʼ icheg ne Ŋwiye ya yaʼ tì məd.

³⁹ Mba ya bəd ne ya bàri ati ane inug ijìm mbe ne wì yaya ghìyə̀ inga Izre fɔrɔ inga Jèrusalèm. Mbi ya kɔ̀mbì aməd igun azed abaʼri, zwèti.

⁴⁰ Si ya gha, ane ineg ya pe ane itad, Ŋwiye ya zwemni aməd, wì du, bəd bàd.

⁴¹ Kayi bəd məjìm ya bàri aməd. Wì ya dù ina mba mbe ne Ŋwiye ya fə chɔʼi gha tì yaʼ bəd ne biri bàd ati ane inug məd. Tì yaya jə̀ghə bə̀ no tì məd anyumə̀ ne wì ya zweme ane iwu.

⁴² Wì ya ghà ina gha tì gha Ìngam Ŋwiye abə bəd bə̀ ghì bəd kyeri gha məd ya Wə̀d we ne Ŋwiye chɔ̀ʼi nɔ̀ŋì gha wì saʼ bəd ne yaʼi izɔm tì bəd ne fə ku.

⁴³ Bədkə̀n Ŋwiye məjìm yaya ghà inug imbə̀ʼ aməd gha Ŋwiye biri chè anjìm məd waʼ inug tibɔ̀ŋ abə wə̀d ijìm ne nɔŋi fìŋ igun məd.”

Azwighi Ŋwiye yèʼe igun bəd ne kayi mə̀Ju

⁴⁴ Icheg ne Pità yaya kiri ghamà, Azwighi Ŋwiye ya yeʼe igun bəd məjìm mbe ne yaya zùghə ikən chɔm.

⁴⁵ Anug ze ya chè mə̀Ju mbe ne ya bḛ Kristo, ne ya bə nɔ̀ʼ a Jopà bèni abɔ̀ʼ Pità. Mbi ya yeti imbə̀ʼ icheg ne mbi ya bàd gha Ŋwiye fə bə̀ nàʼ ineʼi we ne yaʼi Azwighi Ŋwiye abə bəd mbe ne kayi mə̀Ju.

⁴⁶ Anug ya chè awɔb imbə̀ʼ icheg ne mbi ya zug icheg ne bəd mbe yaya ghàmà tìngam iben ndəŋ bə̀ ghùmnə Ŋwiye. Pità ya si ghà gha,

⁴⁷ “Wə̀d ne tì wì ton gha imbə̀ʼ tì naʼa awa mənib abə bəd mbo̰ ne Azwighi Ŋwiye fə yeʼe igun inɔb kwàʼ icheg ne ze ya bə yeʼe igun ina, àkə we?”

⁴⁸ Ane, wì ya gha mbe naʼa mənib abə bəd mbe ane ikum Yeso Kristo. Anyumə̀ ne bəd mbe ya fə niŋi mənib mbe, mbi ya ghà abə Pità gha wì chughi abɔ̀ʼ inɔb ane inun ineg mɔ̀ʼɔ bɔŋ nɔ̀ʼ.