Gàlesìyà 6 - Ikan feg

Anug ni wètì wə̀d ne yaʼi inga ngəʼ

¹ Ìmbum məfi fɔrɔ ìtum njàbi, wə̀d mɔ̀ʼɔ abɔ̀ʼ inən mə ghì anug tibɔ̀ŋ, mbə̰ mbe ne ghìyə̀ inug icheg ne Azwighi Ŋwiye ze kə̀bə̀, mbə̀ wete aməd ghi wì təm. Mbə̀ ya ghìyə̀ ane kwàʼ ane àbɔrɔ̀bɔd, nè we awən imbə̀ʼ àkwàʼrì nɔ̀ʼ nyi igun inən bə.

² Wə̀d mɔ̀ʼɔ abɔ̀ʼ inən mə̀ yaʼ inga ngəʼ, mbə̀ wete aməd. Mbə̰ mə̀ ya ghìyə̀ ane, nji mbə fə nɔ̀ŋì nɔ̀ʼɔ̀ we ne Kristo ya nàʼi inən.

³ Wə̀d mɔ̀ʼɔ abɔ̀ʼ inən mə̀ niŋ ìwi nyɔd gha zìye ya ijiʼi wə̀d ne kayi ane, ane ya gha, tengàŋ ya tàmba ìwi nyɔd.

⁴ Wə̀d imɔʼ imɔʼ abɔ̀ʼ inən kyeʼre ìwi ikuchèg. Ikuchèg wə̀d mə̀ bɔ̀ŋ, məd we tì wì kɔ̀m igo anjìm ìmbi inug chɔm ne chəyi wì ya mə̀grə̀ ìwi ikuchèg tì ikuchèg wə̀d ndəŋ.

⁵ Ane, wə̀d imɔʼ imɔʼ bèrì ni fàʼ yaʼ àzi àfàʼì.

⁶ Mbə̀ bə kyèri gha, wə̀d we ne mbe chwìte Ìngam Ŋwiye ibo, wì bèrì ni ghàpì ighi chɔm chɔm məd ijìm tì wə̀d we ne chwìte Ìngam Ŋwiye ibo.

⁷ Imbə̀ʼ mbə̰ si tamba awən ìwən nyɔd. Chəyi tì wə̀d niŋ Ŋwiye ane anen. Aghi ze ne wə̀d nyɔ̀ʼi, à ya àzewən ne wì biri kab.

⁸ Wə̀d mə nyɔ̀ʼ aghi ze ne nyàmnyɔd məd ze ghə̀ʼrə̀, aghi ne nyàmnyɔd ze biri nàʼ ibo ya iwu. Wə̀d mə nyɔ̀ʼ yaʼ aghi ze ne Azwighi Ŋwiye ze kə̀bə̀, aghi ne Azwighi Ŋwiye biri nàʼ ibo ya ìtḛ̀ ighə̀m imɔʼ.

⁹ Ane, imbə̀ʼ tì bɔd awa ni ghì inug chɔm. Àmə chəyi tì bɔri, nyùmə̀ we yèʼe ne tì biri jəg chùd.

¹⁰ Ane, tì mə bèrì apan, tì ghiyə inug chɔm abə bəd məjìm. Tè taŋ zì atog ni ghì ane yaʼi abə ìmba bəd Kristo.

Ipati ne si nwḭ̀yḛ̀ tì ichaʼri

¹¹ Mbə̀ nḛ icheg ne mə̀ niŋi àmə abo ŋwàʼrì tighə àŋwàʼrì kyen kyen ìto̰ chà inən.

¹² Bəd mbe ne kə̀bə̀ gha mbi mənyìʼ ŋwed bəd ya bəd ne kə̀bə̀ ni chwi asaŋ asaŋ gha mbɔb bɔ̀ŋ. Mbɔb ya ghìyə̀ ane məyi imbə̀ʼ icheg ne chəyi mbi kəbi gha bəd chɔʼ ìmbɔb ibɔʼì ighog anjìm icheg ne mbɔb bḛ gha à ya məyi iwu Kristo igun azed abaʼri we ghìyə̀ bəd pumə̀.

¹³ Ka bèyi bəd ne mbi fə ŋwed awɔb, chəyi mbɔb mbe nɔ̀ŋɔ̀ mə̀nɔ̀ʼɔ̀ Muse. Mbɔb ya kə̀bə̀ gha mbe ŋwed awən imbə̀ʼ mbɔb se kɔ̀mɔ̀ igo gha, mbɔb fə ghì mbə̰ bḛ, mbi ŋwed awən.

¹⁴ Àsi mo, chəyi anug mɔ̀ʼɔ ne mə̀ biri nɔʼ kɔ̀m igo igun chèyi ane anug ze ne iwu Anɔŋisəg Yeso Kristo igun azed abaʼri ya ghi. Icheg ne Yeso Kristo ya ku igun azed abaʼri, chəyi ighi inga isəg beri aghi mɔ̀ʼɔ ni ghì tì inum. Chəyi mə̀ bə bèrì aghi mɔ̀ʼɔ ni ghì tì ighi inga isəg.

¹⁵ Kə̀ mbe ŋwed wə̀d kə̀ chəyi, àze kayi anug mɔ̀ʼɔ ze. Anug kyen ne angu ya gha, ikuchèg wə̀d si yaʼ ìwi feg anjìm ibḛfiŋ məd igun Kristo.

¹⁶ Ŋwiye ziye àbɔrɔ̀bɔd bə̀ dìgrì igun bəd mbe ne nɔ̀ŋɔ̀ ikə gho̰ inga ìwɔb ìtḛ̀. Wì bə ghì ane igun mə̀Izre ne yaʼi bəd Ŋwiye məjìm.

¹⁷ Anug ne mə se nwḭ̀yḛ̀ ni ghà inən ya gha, nɔ̀ʼ tèchɔ̀ŋ, imbə̀ʼ wə̀d mɔ̀ʼɔ ywiri chə yi awum imbə̀ʼ icheg ne ineni mbe inum igun nyɔd ni chwi gha mo ya àbòʼì abə Yeso Kristo.

¹⁸ Ìmbum məfi fɔrɔ ìtum njàbi, ìwa Anɔŋisəg Yeso Kristo ghiyə ìchɔ̀mì inən mbə̰ məjìm. À ya ane.