Gàlesìyà 3 - Ikan feg

Anug imbə̀ʼ Mə̀nɔ̀ʼɔ̀ kə̀ igun Ibḛfiŋ

¹ Mə ya anìŋ ghà inən gha, mbə̰ məGàlesìyà ya kwàʼ inen. Wə̀d ne nùʼi awən àkə we? Mbi ya tòʼrì inən ze dù zen gha Yeso Kristo ya mbi ya kɔ̀mbi igun azed abaʼri!

² Mə biri kɔ̀ŋ ni kyeri anug amɔʼ inən; Ŋwiye kə̀ ya nàʼ àzi Azwighi inən imbə̀ʼ icheg ne mbə̀ ya nɔŋi mə̀nɔ̀ʼɔ̀ kə̀ imbə̀ʼ icheg ne mbə̀ ya zughi ikən chɔm imbə̀ʼ Kristo, bḛ?

³ Mbə̰ kə kwàʼ inen anìŋ imbə̀ʼ aghə? À ya Azwighi Ŋwiye ya ghi mbə̰ ko anug ni nɔ̀ŋì ìwən ibḛfiŋ igun Kristo. Mbə kə se kə̀bə̀ ni mànì anug Kristo amad anìŋ yaʼ ane ìwən ika?

⁴ Mbə̰ kə nìŋə inug nɔʼ nɔʼ mbe ne mbə̀ che inga ane ati ako? Tesiʼ ya gha, inug nɔʼ nɔʼ mbe ne mbə̀ che inga, mbe nyìʼ wètì awən.

⁵ Ŋwiye kə nàʼà àzi Azwighi inən bə̀ ghìyə̀ iyeti inug inən imbə̀ʼ icheg ne mbə̀ ya nɔ̀ŋɔ̀ mə̀nɔ̀ʼɔ̀ kə̀ imbə̀ʼ icheg ne mbə̀ zùghə ikən chɔm, bḛ?

⁶ Mbə̀ nḛ Abràham; “Məd ya bḛ Ŋwiye kwàʼ icheg chɔm. À ya ibḛfiŋ məd ya ghi Ŋwiye niŋ aməd gha wì təm kòʼ.”

⁷ Mbə̀ kyeri gha, bəd mbe ne bḛ Ŋwiye ya kwàʼ bɔn ìmbi Abràham.

⁸ Ìngam Ŋwiye ya fə bì ghum ghà gha, Ŋwiye biri ghì bəd mbe ne kayi mə̀Ju mbi si bəd Ŋwiye anjìm ìwɔb ibḛfiŋ. À ya aton ne, Ŋwiye ya fə bi ghà ikən chɔm gho̰ abə Abràham gha, “Ŋwiye biri chè ine anjìm zì àbɔrɔ̀bɔd igun iben ijìm.”

⁹ Ane, Ŋwiye zì àbɔrɔ̀bɔd igun bəd mbe ne nɔŋi ìwɔb ibḛfiŋ igun Kristo icheg ne wì ya zi àbɔrɔ̀bɔd igun Abràham ne ya nɔ̀ŋì ibḛfiŋ igun Ŋwiye.

¹⁰ Tesiʼ ya gha, bəd mbe ne nɔŋi ìtɔb fìŋ ni təm kòʼ imbìghè abə Ŋwiye məyi anjìm mə̀nɔ̀ʼɔ̀, ndɔ̀n ze igun inɔb. À ya ane imbə̀ʼ icheg ne, mbi ya fə bì ŋwàʼrì inga Àŋwàʼrì Ŋwiye gha, “Wə̀d ne chəyi wì nɔŋi inug ijìm mbe ne yaʼi inga mə̀nɔ̀ʼɔ̀ Muse, Ŋwiye biri zì ndɔ̀n igun məd.”

¹¹ Ze fə bì dù zen gha, kayi mə̀nɔ̀ʼɔ̀ biri ghì wə̀d təm kòʼ imbìghè abə Ŋwiye imbə̀ʼ icheg ne Ìngam Ŋwiye ya fə bì ghà gha, “Bəd mbe ne təmi kòʼ biri jəg ìtḛ̀ ighə̀m imɔʼ anjìm icheg ne mbi nɔŋi ìwɔb ibḛfiŋ igun Ŋwiye.”

¹² Chəyi anug ni nɔ̀ŋì ibḛfiŋ igun Ŋwiye beri aghi mɔ̀ʼɔ ni ghì tì mə̀nɔ̀ʼɔ̀ ka. Si ya gha, Ìngam Ŋwiye ghà gha, “Wə̀d ne nɔŋi inug ijìm mbe ne mə̀nɔ̀ʼɔ̀ gha, tengàŋ biri chughi izɔm anjìm inug mbe.”

¹³ Kristo ya zeri awa abə ndɔ̀n ze ne mə̀nɔ̀ʼɔ̀ ya zi igun ina. Wì ya ghì ane icheg ne məd ya bèʼi ìza ndɔ̀n igun àzi atog kwàʼ zìye zìye. A ze inga Àŋwàʼrì Ŋwiye gha, “Ndɔ̀n Ŋwiye ze igun wə̀d ne mbi swḛ aməd, wì ku ikaŋ azed abaʼri.”

¹⁴ Kristo ya ghì ane ni gha àbɔrɔ̀bɔd ze ne Ŋwiye ya kàʼi abə Abràham, ze biri bə yeʼe abə bəd mbe ne kayi mə̀Ju anjìm ibḛfiŋ igun Yeso Kristo. Àzo̰ ghì gha mba ina bə bèrì Azwighi Ŋwiye ze ne Ŋwiye ya kàʼi gha tì biri bèrì anjìm ibḛfiŋ igun Yeso Kristo.

Mə̀nɔ̀ʼɔ̀ tì anug ze ne Ŋwiye ya kàʼi

¹⁵ Ìmbum məfi fɔrɔ ìtum njàbi, mə biri niŋ aneni ane inug ne dùwə̀ ineg ijìm tì barà. Bəd məbe mə̀ nɔ̀ŋì anug mɔ̀ʼɔ bḛ, tangi àŋwàʼrì, san, chəyi wə̀d mɔ̀ʼɔ beri ni kɔpi kə̀ ywìrì yètì aghi mɔ̀ʼɔ igun ka.

¹⁶ Anug ze ne Ŋwiye ya ghum kàʼ ya abə Abràham tì ŋwan ne biri ghum yaʼ ane aghaŋ inəbi məd. Chəyi Ìngam Ŋwiye gha à ya abə bɔn ane aghaŋ inəbi məd. Anug ze ya kayi abə bɔn nɔʼ nɔʼ. Ane ya gha, à ya abə wə̀d imɔʼ. Wə̀d we ya Kristo.

¹⁷ Anug ne mə̀ kə̀bə̀ gha mbə̀ kyeri ya gha, Ŋwiye ya ghùm wàd ikan tì Abràham bə̀ bḛ gha zìye mənyìʼ fàʼ anug ze. Ŋwiye ya ghùm si nàʼ mə̀nɔ̀ʼɔ̀ ane tituʼ 430 ya fə che. Chəyi tì mə̀nɔ̀ʼɔ̀ kɔpi ikan we kə̀ chìkì anug ze ne Ŋwiye ya fə bi kàʼ ni fàʼ.

¹⁸ Tì mə ne niŋ gha, Ŋwiye ya nèʼè bəd anjìm icheg ne mbe nɔ̀ŋɔ̀ mə̀nɔ̀ʼɔ̀, nji kayi ywìrè yi anjìm anug ze ne wì ya kàʼi ni fàʼ. Tesiʼ ya gha, Ŋwiye ya ghì ìchɔ̀mì abə Abràham anjìm anug ze ne məd Ŋwiye ya fə kàʼi.

¹⁹ Icheg ne ze yaʼi ane, àfàʼì mə̀nɔ̀ʼɔ̀ kə ywìrè aghə? Ŋwiye ya yètì mə̀nɔ̀ʼɔ̀ imbə̀ʼ inug tibɔ̀ŋ ne bəd yaya ghìyə̀. Mə̀nɔ̀ʼɔ̀ biri yaʼ ane anene ghò pè ane aneg ne ŋwan we inga aghaŋ inəbi ze Abràham ne Ŋwiye ya kàʼi ibo biri yeʼe. Ŋwiye ya chà mbè angirə̀ gha mbe yeʼe zì mə̀nɔ̀ʼɔ̀ ikye abo abə wə̀d we ne tə̀mə inga ìsàn abə bəd tì Ŋwiye, se dèghè inug bəd abə Ŋwiye.

²⁰ Wə̀d ne tə̀mə inga ìsàn ya yàʼa anyumə̀ ne bəd yaʼi məbe. Chəyi Ŋwiye ya nɔŋi wə̀d mɔ̀ʼɔ gha wì təm inga ìsàn anyumə̀ ne wì ya kàʼi anug ze. Ŋwiye ya ghàm zìye zìye imbə̀ʼ icheg ne Ŋwiye ya məyi imɔʼ.

Àfàʼì Mə̀nɔ̀ʼɔ̀

²¹ Ze wa chwi anìŋ gha mə̀nɔ̀ʼɔ̀ mbe tì mbi chìkì anug ze ne Ŋwiye ya kàʼi? Indèʼ! Kayi ane ka. Àkə aghi ne nɔ̀ʼɔ̀ mɔ̀ʼɔ yaʼi angu ne nàʼà ìtḛ̀, nji bəd məjìm mbe tì mbi təm kòʼ imbìghè abə Ŋwiye anjìm icheg ne mbi zugri nɔ̀ʼɔ̀ we.

²² Si ya gha, Ìngam Ŋwiye ghà gha, inug tibɔ̀ŋ mbe kɔ̀rɔ bəd məjìm inga isəg. Ìngam Ŋwiye ghà ane ni ghì gha bəd kyeri gha, aghi ze ne mbi ya kàʼi ni nàʼ abə bəd anjìm ìwɔb ibḛfiŋ igun Ŋwiye ze tì mbi nàʼ məyi abə bəd mbe ne bḛ Yeso Kristo.

²³ Anug ne angu ya gha, bɔŋ anug ni nɔ̀ŋì ibḛfiŋ igun Yeso Kristo ya se yèʼe, mə̀nɔ̀ʼɔ̀ ya fə bì kɔd awa icheg bəd ndəŋ ghò pè ane nyùmə̀ ne Ŋwiye ya ghi gha bəd kyeri Yeso Kristo bə̀ nɔ̀ŋì ibḛfiŋ igun məd.

²⁴ Ŋwiye ya nàʼ mə̀nɔ̀ʼɔ̀ gha mbe kyeʼre awa ghò pè ane nyùmə̀ ne Yeso Kristo ya yeʼe. À ya Kristo ghì tì təm kòʼ imbìghè abə Ŋwiye anjìm ibḛfiŋ ne tì nɔŋi igun məd.

²⁵ Icheg ne anug ni nɔ̀ŋì ibḛfiŋ igun Yeso Kristo fə yeʼe, chəyi mə̀nɔ̀ʼɔ̀ mbe ywìrè kyèʼrè awa ka.

Bɔn Ŋwiye anjìm ibḛfiŋ

²⁶ Mbə bàd amad anìŋ gha, mbə̰ məjìm ya fə si bɔn Ŋwiye anjìm ibḛfiŋ we ne mbə̀ nɔŋi igun Yeso Kristo.

²⁷ Mbə̰ məjìm ne ya yaʼi ane ifɔti tì Kristo anyumə̀ ne mbə̀ ya niŋi mənib, mbə̰ fə si icheg məd.

²⁸ Ane, chəyi ywìrè yi ikɔpi mɔ̀ʼɔ ane mə̀Ju tì bəd ne kayi mə̀Ju; Kə̀ ifeg tì wə̀d ne kayi ifeg. Chəyi ikɔpi mɔ̀ʼɔ ane mbaŋà kə̀ mə̀yi. Mbə̰ məjìm ya si bəd imɔʼ icheg ne mbə fə se ane anug amɔʼ tì Yeso Kristo.

²⁹ Icheg ne mbə̀ yaʼi ane anug amɔʼ tì Kristo, ane ya gha, mbə̰ ya inəbi ìwi Abràham. Ane, ineʼi we ne Ŋwiye ya kàʼi ni nàʼ abə aghaŋ inəbi Abràham ya bə̀ ìwən.