Efesùs 1 - Ikan feg

Ichaʼri

¹ À ya mo Pɔl ne Ŋwiye ya chɔʼi amə gha mə yaʼ wə̀dtɔm Kristo icheg ne məd Ŋwiye kə̀bi ŋwàʼri àŋwàʼrì azo̰. Mə ya ŋwàʼrà anìŋ abə bəd Ŋwiye mbe a Efesùs ne yaʼi ane ifɔti tì Yeso Kristo.

² Ŋwiye ne yaʼi ìwa Mbaʼ tì Yeso Kristo mbe ghiyə ìchɔ̀mì inən bə̀ ghì mbə̀ chughi ane àbɔrɔ̀bɔd.

Àbɔrɔ̀bɔd ne Azwighi ze nàʼà ina icheg ne tì yaʼi ane ifɔti tì Kristo

³ Tì ghumni Ŋwiye ne yaʼi Mbaʼ abə ìwa Anɔŋisəg Yeso Kristo. Icheg ne tì yaʼi ane ifɔti tì Yeso Kristo, Ŋwiye ghì ìchɔ̀mì ina bə̀ ghì Azwighi məd zì àbɔrɔ̀bɔd ne nɔ̀ʼi ikaŋ àbɔ̀ŋɔ igun ina.

⁴ Bɔŋ Ŋwiye ya se tànga isəg, wì ya fə chɔʼ awa gha tì zen bə̀ təm kòʼ ibo imbìghè icheg ne tì yaʼi ane ifɔti tì Kristo. Anjìm àkɔ̀ŋì,

⁵ Ŋwiye ya fə chɔʼ awa nɔ̀ŋì gha zìye biri niŋ awa ane ìmbi bɔn anjìm Yeso Kristo. Wì ya ghì ane icheg ne ze bɔŋi ibo bə̀ yaʼ icheg ne wì kɔŋi gha ze yaʼ.

⁶ Ane, tì ghumni Ŋwiye ane ìchɔ̀mì kyen məd we ne wì nàʼi ina abu abu anjìm Ŋwan məd we ne wì kɔ̀ŋi.

⁷ À ya anjìm anəm Yeso ne Ŋwiye ya zeri awa anyumə̀ ne wì ya waʼi ìmba inug tibɔ̀ŋ. Wì ya ghì ane anjìm ìchɔ̀mì kyen məd

⁸ ne wì ghì ina abu abu. Ŋwiye bèrì iwe ijìm bə̀ kyèri mənḭ ane inug ijìm.

⁹ Ane, Ŋwiye ya fàʼ icheg ne wì ya fə chuʼri nɔ̀ŋì. Wì ya ghì tì kyèri inug mbe ne ya yaʼi inə̀mbi ne wì ya fə nɔ̀ŋì ni fàʼ anjìm Kristo.

¹⁰ Wì ya chuʼri inug mbe nɔ̀ŋì ni ghì gha ane nyumə̀ kòʼi, Kristo biri yaʼ atog igun ighi ijìm ne Ŋwiye tàngi, kə̀ àkə ighi ne yaʼi ikaŋ àbɔ̀ŋɔ kə̀ ighi ne yaʼi igun isəg.

¹¹ Ŋwiye chɔʼ awa nɔ̀ŋì gha tì yaʼ bəd məd icheg ne tì yaʼi ane ifɔti tì Kristo. Wì ya fàʼà inug ijìm icheg ne wì ya fə chuʼri nɔ̀ŋì gha mbi biri yaʼ.

¹² Wì ya ghìyə̀ ane ni gha, mba mbe ne ya yaʼi bəd mbègtog ni nɔ̀ŋì ikɔndi igun Kristo tì ghumni Ŋwiye.

¹³ Mbə̰ ya bə̀ si yaʼ bəd Kristo anyumə̀ we ne mbə̀ ya zughi ikən tesiʼ, bḛ. À ya ikən chɔm we ghi mbə̰ pum. Mbə̰ ya bḛ Kristo, Ŋwiye bə̀ nàʼ àzi Azwighi inən icheg ne wì ya kàʼi ane aneni ne chwìye gha mbə̰ ya si bəd məd.

¹⁴ Azwighi Ŋwiye ze ya aneni ze ne chwìye gha tì biri jəg ighi mbe ne Ŋwiye kàʼi abə ìmbi bəd. Ane, tè kyèri gha Ŋwiye fə ghì bəd mbe ne yaʼi ìmbi məd mbi pum. Tè ghumni Ŋwiye.

Pɔl chàʼra Ŋwiye

¹⁵ Ni ko ane nyumə̀ ne mə̀ ya zughi gha mbə̰ fə nɔ̀ŋì ìwən ibḛfiŋ igun Anɔŋisəg Yeso Kristo, bə̀ zug gha mbə̰ mbe kɔ̀ŋɔ̀ bəd Ŋwiye məjìm,

¹⁶ chəyi mə̀ ya chughi wìtì ya nàʼà məyakà abə Ŋwiye imbə̀ʼ awən mà nyumə̀ ijìm ne mə chàʼrà Ŋwiye.

¹⁷ Mə ya chè imbìghè ni ya chàʼrà Ŋwiye gha, Ŋwiye ìwi ìwa Anɔŋisəg Yeso Kristo ne yaʼi Mbaʼ ne bèrì ighumni ijìm, wì naʼa Àzi Azwighi inən imbə̀ʼ Ze ghiyə awən mbə̀ bere iwe. Mə we bə̀ chàʼrà Ŋwiye gha wì chwi tesiʼ imbə̀ʼ Ŋwiye inən imbə̀ʼ mbə̀ kyere aməd icheg chɔm.

¹⁸ Mə we bə̀ chàʼrà Ŋwiye gha wì ghiyə ìmbən itog zen imbə̀ʼ mbə̀ kyere aghi ze ne wì kàri awa gha tì nɔŋɔ ikɔndi ghɔ̀m. À ya ìchɔ̀mì kyen we ne wì ya kàʼi abə bəd məd

¹⁹ fɔrɔ ika məd we ne fàʼà inga bəd mbe ne bḛ aməd ne chəyi tì mbi mə̀grì ane aghi mɔ̀ʼɔ. Aŋa ya ika kyen məd

²⁰ we ne ya ghi Kristo zwème ane iwu, si chùghi ikaŋ àbɔ̀ŋɔ aba abo jəghi Ŋwiye.

²¹ Kristo ya amad anìŋ se tùmbə̀ izwighi ijìm mbe ne yaʼi ikaŋ, ka bèyi mbe ne beri ika. Ikum məd chè tikum tijìm igun isəg fɔrɔ inga isəg we ne kiri yèʼe.

²² Ŋwiye ya ghì ighi ijìm se aton ighog məd, bə̀ chɔʼ aməd ane atog abə ifeti bəd Kristo.

²³ Ifeti we ya nyàmnyɔd Kristo. Kristo we swère inug ijìm imbə̀ʼ ifeti we, icheg we ne wì ya swère inug ijìm isiŋi ijìm.