2 Tès 3 - Ikan feg

Pɔl boʼ ibo gha mbe chaʼra Ŋwiye inɔb

¹ Ìmbum məfi fɔrɔ ìtum njàbi, atog anug ne mə̀ biri nwìyḛ̀ ni ghà inən ya gha, mbə̀ chaʼra Ŋwiye ina gha wì ghiyə tì chete ikən imbə̀ʼ Anɔŋisəg ghò isiŋi isiŋi, bəd zug, bḛ bə̀ ghùmni, kwàʼ icheg ne mbə̰ ya bə zug, bḛ bə̀ ghùmni.

² Mbə̀ chaʼra Ŋwiye gha wì chiye awa ikye ibo abə bəd inug izəg fɔrɔ ikye abo abə bəd inug tibɔ̀ŋ imbə̀ʼ icheg ne kayi bəd məjìm mbe bḛ ikən chɔm we ne te chètè.

³ Anug ne angu ya gha, Anɔŋisəg ya fàʼà inug mbe ne wì kàʼi. Wì biri nàʼ ika inən bə̀ kyèʼrì awən ni ghì gha imbə̀ʼ mbə̰ nyi awən ikye abo abə Wə̀d Tibɔ̀ŋ.

⁴ Anɔŋisəg fə ghì tì kyèri kwàʼ tesiʼ gha, mbə̰ mbe ghìyə̀ inug ne tì ya kə awən. Tè bə̀ kyèri kwàʼ tesiʼ gha mbə̰ biri chè imbìghè ni taŋ ghì inug mbe.

⁵ Tì we bə̀ chàʼrà Ŋwiye gha, Anɔŋisəg chè inən imbìghè ghì mbə̀ taŋ kyèri icheg ne Ŋwiye kɔ̀ŋi awən bə̀ kyèri icheg ni nyìʼ anyumə̀ ne mbə̀ yaʼi inga ngəʼ icheg ne Kristo ya bə nyìʼ.

Pɔl pàti məgwed

⁶ Ìmba məfi fɔrɔ ìta njàbi, tì ya ghà inən ane ikum Anɔŋisəg Yeso Kristo gha, imbə̀ʼ mbə̰ ya jə̀grə̀ awən tì bəd Kristo mbe ne ghìyə̀ igwed, ne chəyi mbe bə̀ zùgrə tikə te ne tì ya nàʼi inən.

⁷ Mbə̀ fə kyeri kwàʼ icheg chɔm gha, mbə bèrì ni fàʼ kwàʼ məyi icheg ne tì yaya fàʼà. Anyumə̀ ne tì ya yaʼi abɔ̀ʼ inən, chəyi tì yaya ghìyə̀ igwed.

⁸ Chəyi tì yaya jə̀ghə tijəg wə̀d mɔ̀ʼɔ witì nàʼ ikab. Tì yaya kìrə ika fàʼà tisi fɔrɔ tizimi ni ghì gha imbə̀ʼ tì nɔ̀ʼ zì yaʼ mbèʼ wən igun wə̀d mɔ̀ʼɔ abɔ̀ʼ inən.

⁹ Kayi gha chəyi tì ya kòʼi ni biri àwètì inən. Tì yaya ghìyə̀ ane ni gha mbə̀ bara bə̀ se fàʼà icheg ne te fàʼà.

¹⁰ Anyumə̀ ne tì ya yaʼi abɔ̀ʼ inən, tì ya ghà inən gha, “Àmə chəyi wə̀d kə̀bi ni fàʼ, imbə̀ʼ mbə̰ naʼa awən tijəg ibo.”

¹¹ Tì ya ghà anìŋ imbə̀ʼ icheg ne tì we zùghə gha bəd mɔ̀ʼɔ mbe abɔ̀ʼ inən ne ghìyə̀ igwed. Chəyi mbe fàʼà aghi mɔ̀ʼɔ. Àzɔb àfàʼì ya məyi ni ŋa nyḭ̀yḛ inga inug bəd.

¹² Tì ya anìŋ ghàmà pàta tiku bəd te ane ikum Anɔŋisəg Yeso Kristo gha, mbe chughi asiŋi afibì, fàʼ yaʼ aghi ne mbɔb biri jəg bə̀ nèg ìwɔb nyɔd angu.

¹³ Àsi awən, ìmba məfi fɔrɔ ìta njàbi, imbə̀ʼ mbə̰ si bɔd awən ni ya fàʼà inug ne koʼi.

¹⁴ Wə̀d mɔ̀ʼɔ mə̀ yaʼ abɔ̀ʼ inən ne chəyi we zùgrə tikə ìto̰ ne tì ŋwàʼri inga àŋwàʼrì azo̰, mbə̀ nɔŋɔ ighə igun tengàŋ. Mbə̀ kye awən ane iku wə̀d we ni ghì gha wì bere tìnìrètog.

¹⁵ Si ya gha, imbə̀ʼ mbə̰ si nḛ awən iku wə̀d we icheg wə̀d ìpàb. Mbə̀ pati aməd icheg ìwa ifi mba bəd Kristo.

Ichaʼri ne si nwìyḛ̀

¹⁶ Tì we chàʼrà Ŋwiye inən gha, Anɔŋisəg ne zìyè àbɔrɔ̀bɔd igun bəd, wì ghiyə mbə̀ chughi ane àbɔrɔ̀bɔd mà nyumə̀ ijìm fɔrɔ inga inug ijìm. Anɔŋisəg yaʼ tì inən mbə̰ məjìm.

¹⁷ À ya mo Pɔl ŋwàʼri ichaʼri gho̰ ane àmə abo. Aŋa ya aneni ne mə zìyè ane ìmbum ìŋwàʼrì ijìm ne mə ŋwaʼri. Aŋa ya icheg ne mə ŋwàʼrà ìmbum ìŋwàʼrì.

¹⁸ Ìwa Anɔŋisəg Yeso Kristo ghiyə ìchɔ̀mì inən mbə̰ məjìm.