2 Pità 3 - Ikan feg

Anɔŋisəg we ywìrè yèʼe

¹ Ìmbum məfi fɔrɔ ìtum njàbi ne mə̀ taŋ kɔ̀ŋ, àŋwàʼrì azo̰ ne mə̀ ŋwàʼri inən anìŋ ya àŋwàʼrì ne pè ane ibe. Inga ìŋwàʼrì mbo̰ ibe, mə fə kirə ika ni nɔ̀rì ìwən ikɔndi ni ghì gha mbə̀ wendi inug ijìm mbe ne mbə̀ ya fə bi kyèri ane fìŋ zḛ zḛ.

² Mə kə̀b gha mbə̀ wendi ìngam we ne bədkə̀n Ŋwiye ìzḛzḛ mbe te aneg ya ghàmi. Mə bə̀ kə̀b gha mbə̀ bə wèndi mə̀nɔ̀ʼɔ̀ mbe ne Anɔŋisəg ne pùmnə bəd ya ghi ìmbən bədtɔm nàʼ inən.

³ Anug mbègtog ne mbə̀ beri ni wendi ya gha, inga ineg mbe ne se nwìyḛ̀, bəd ne chwìte inug ako biri yeʼe se chàpà inug tesiʼ mbe be mbə̀ nɔŋi ibḛfiŋ igun. Mbɔb biri se bène yaʼi abɔ̀ʼ inug mbe ne ìtɔb nyàmnyɔd te ghə̀ʼrə̀.

⁴ Mbi biri gha, “Imbə̀ʼ Yeso ya kàʼ gha ziye biri ywiri yeʼe? Məd weg? Ìmba mə̀mbaʼ mbe te aneg ya fə sàŋì isəg. Si ya gha, nɔ̀ʼ ane Ŋwiye ya tangi isəg, inug ijìm mbe kiri yi kwàʼ icheg ne mbi ya yaʼi!”

⁵ Mbɔb taŋ kyèri àzɔb aghi bɔŋ se to̰ gha, à yaya te aneg, Ŋwiye ya tangi ikaŋ àbɔ̀ŋɔ bə̀ tangi isəg məyi ane ìwi ìngam. Wì ya ghàpì ìseg chì ane mənib. Ane, ìseg ya dù inga mənib.

⁶ À ya bə̀ ane mənib mbe ne ya kùbri isəg ne Ŋwiye ya nimni isəg we te aneg.

⁷ Ŋwiye fə ghà inga ìwi ìngam gha zìye biri nimni ikaŋ àbɔ̀ŋɔ gho̰ ne yaʼi amad anìŋ bə̀ nìmni isəg gho̰ ne yaʼi amad anìŋ ane iywid. Ŋwiye fə nɔ̀ŋì gha ikaŋ àbɔ̀ŋɔ tì isəg biri chughi ghò pè ane aneg ze ne wì biri saʼ awɔb, nìmni bə̀ saʼ bəd mbe ne chəyi mbe zùgrə aməd, nìmni.

⁸ Ìmbum məfi fɔrɔ ìtum njàbi ne mə̀ taŋ kɔ̀ŋ, imbə̀ʼ mbə̰ si to̰ awən anug azo̰ afibì. Anug angu ya gha, abə Anɔŋisəg, aneg amɔʼ ya icheg tituʼ chuʼ ifibì, tituʼ chuʼ ifibì ya bə̀ icheg aneg amɔʼ.

⁹ Chəyi Anɔŋisəg we chìkə̀ nyùmə̀ bɔŋ ghì inug mbe ne wì kàʼi, icheg ne bəd mɔ̀ʼɔ mbe kɔ̀ndɔ gha məd we chìkə̀ nyùmə̀. Məd we nyìme fìŋ tì inən imbə̀ʼ icheg ne chəyi wì kə̀bi gha wə̀d mɔ̀ʼɔ nim. Wì kə̀b yaʼ gha wə̀d ijìm bəŋi ìzi fìŋ sìkì inug tibɔ̀ŋ.

¹⁰ Si ya gha, aneg ze ne Anɔŋisəg biri ywiri yeʼe biri yaʼ icheg aneg ne iji we yeʼe. Igun aneg ze; ikaŋ àbɔ̀ŋɔ biri jòʼ ane gì ka ka chè nim. Iywid biri tɔ̀n ighi ijìm mbe ne yaʼi ikaŋ àbɔ̀ŋɔ. Iywid biri bə tɔ̀n isəg bə̀ tɔ̀n ighi ijìm mbe ne yaʼi igun isəg, ghì igun isəg si yaʼ ìwi zɔbi.

¹¹ Icheg ne Ŋwiye biri nimni ighi mbo̰ ijìm anìŋ, mbə̀ kə kòʼi ni yaʼ iku bəd mbeg? Mbə̰ bèrì ni chughi inga ìzḛzḛ bə̀ zì atog ni ya zùgrə Ŋwiye.

¹² Icheg ne mbə̰ mbe ghɔ̀mɔ̀ aneg ze ne Ŋwiye biri ywiri yeʼe, mbə̀ kirə ika ghì gha aneg ze zàmbà yèʼe. Igun aneg ze, iywid biri tɔ̀n ikaŋ àbɔ̀ŋɔ, wi nim. Azuʼ ane iywid we biri ghì gha ighi mbe ne yaʼi ikaŋ àbɔ̀ŋɔ mbe sam.

¹³ Àsi awa, tì ya ghɔ̀mɔ̀ ikaŋ àbɔ̀ŋɔ feg tì isəg feg we ne Ŋwiye kàʼi ina, ne yaʼi asiŋi ze ne wə̀d ijìm biri chughi ane ikuchèg ne koʼi.

¹⁴ Ane, ìmbum məfi fɔrɔ ìtum njàbi ne mə̀ taŋ kɔ̀ŋ, icheg ne mbə̰ mbe ghɔ̀mɔ̀ inug mbo̰, mbə̀ kirə ika ni chughi inga ìzḛzḛ. Mbə̀ ghiyə gha imbə̀ʼ Ŋwiye bad yi anug tibɔ̀ŋ mɔ̀ʼɔ igun inən. Mbə̀ bə chughi ane àbɔrɔ̀bɔd tì Ŋwiye.

¹⁵ Mbə̀ niŋ icheg ne Anɔŋisəg we nyìme fìŋ tì inən, ane apan ne wì nàʼi inən gha mbə̀ pum. Ìwa ifi Pɔl, ne tì taŋ kɔ̀ŋ, ya bə̀ ŋwàʼrì anug azo̰ inən icheg ne Ŋwiye ya nàʼ iwe ibo gha wì ŋwaʼra.

¹⁶ Wì ŋwàʼrì inug mbo̰ kwàʼ məyi ane ikuchèg ifibì inga ìŋwàʼrì məd ijìm. Inug mɔ̀ʼɔ mbe inga ìŋwàʼrì mbe ne wì ŋwàʼri ne chəyi tì itog bəd zàmbì zen imbə̀ʼ mbiwən. Bəd mbe ne chəyi mbi kyeri inug, ne ìwɔb ibḛfiŋ kiri bɔri, mbɔb biri tòʼrì inug mbo̰ ane ikuchèg ndəŋ. Bəd mbe kɔ̀pɔ inug inga ìŋwàʼrì mbo̰ kwàʼ icheg ne mbɔb mbe bə̀ kɔ̀pɔ inga ìŋwàʼrì Ŋwiye ndəŋ. Icheg ne mbɔb mbe ghìyə̀ ane, mbi ya zìye yaʼ ngəʼ igun ìmbɔb itog.

¹⁷ Ane, ìmbum məfi fɔrɔ ìtum njàbi ne mə̀ taŋ kɔ̀ŋ, mbə̰ fə bì kyèri awən anug azo̰. Mbə̀ we awən imbə̀ʼ icheg ne bəd mbe ne chəyi mbi kyeri mə̀nɔ̀ʼɔ̀ mbe kə̀bə̀ ni fèbrì awən. Àmə chəyi mbə̀ we awən nji mbə̰ biri fèbè, nim bə̀ sam àzən asiŋi ze ne mbə̀ kə fə təmi kà igun.

¹⁸ Mbə̀ che imbìghè kweg inga ìchɔ̀mì fɔrɔ inga anug ni kyeri ìwa Anɔŋisəg Yeso Kristo ne pùmnə bəd. Bəd məjìm ghùmnə aməd ni ko amad anìŋ se ghò imbìghè ane ighə̀m imɔʼ! À ya ane.