2 Pità 2 - Ikan feg

Pità pàti bəd Kristo imbə̀ʼ mə̀chwitinùg ako

¹ Bədkə̀n ne ghà inug ako ya yaʼ abɔ̀ʼ bəd Ŋwiye a mbègtog. À ya ane ne mə̀chwitinùg ako biri bə̀ yaʼ abɔ̀ʼ inən. Mbɔb biri chì tiwe chwìti inug ako ne chìkə̀ bəd Kristo. Mbɔb biri ton awɔb fɔrɔ Anɔŋisəg we ne zeri awɔb. Mbi biri ghì ane, ngəʼ kyen nyi igun inɔb.

² Bəd nɔʼ nɔʼ biri ko se fàʼà tiku inug bə bə te ne mbɔb mbe fàʼà, bə̀ se ghà inug bə bə imbə̀ʼ ikuchèg tesiʼ we bəd koʼi ni bèrì.

³ Icheg ne mbɔb mbe ghə̀ʼrə̀ ighi, mbi biri tangi tìmùghì se ghà inən imbə̀ʼ jəg awən. Ŋwiye ya fə ghùm sɔb isaʼi igun inɔb. Ane, Ŋwiye biri zì ngəʼ kyen igun inɔb.

⁴ Chəyi Ŋwiye ya waʼi inug tibɔ̀ŋ ìmbi mbè angirə̀ anyumə̀ ne mbi ya ghi tìzughə ibo. Wì ya kɔd awɔb màʼ inga asiŋi ichə ne fḭ̀yḛ kyìm gha mbe chughi se ghɔ̀mɔ̀ aneg ze ne Ŋwiye biri saʼ isəg.

⁵ Chəyi Ŋwiye ya bə waʼ inug tibɔ̀ŋ ìmbi bəd mbe te aneg. Wì ya chà mənib igun bəd ne chəyi mbe zùgrə Ŋwiye, si kə̀ndi Nwa̰ wə̀d ne yaya chètè gha bəd təm kòʼ imbìghè abə Ŋwiye. Ŋwiye ya bə̀ kə̀ndi bəd ndəŋ ìsàmbe abɔ̀ʼ Nwa̰.

⁶ Ŋwiye ya bə̀ chìkì bəd mbe a Sodòm tì Gòmorà ane iywid. Inug mbo̰ ya wì yaya chwìye icheg ne ze biri yaʼ abə bəd mbe ne chəyi mbe zùgrə Ŋwiye.

⁷ Wì ya pumni Lɔd ne ya yaʼi wə̀d ne təmi kòʼ bə̀ yaʼ wə̀d ne inug tibɔ̀ŋ ìmbi bəd mbe ne chəyi mbe nɔ̀ŋɔ̀ mə̀nɔ̀ʼɔ̀ yaya se aməd.

⁸ Wə̀d inug chɔm gho̰ yaya chùghə abɔ̀ʼ inɔb ineg ijìm bàrà bə̀ zùghə ìmbɔb inug tibɔ̀ŋ. Ìmbɔb inug tibɔ̀ŋ yaya nàʼà ngəʼ ibo.

⁹ Ane, Anɔŋisəg kyèri icheg ni pumni bəd mbe ne zùgrə aməd bə̀ chì awɔb inga àkwàʼrì. Wì bə̀ kyèri icheg ni nyimi bəd mbe ne ghìyə̀ tìzughə̀, nɔ̀ŋì awɔb inga ngəʼ ni si saʼ awɔb igun aneg ze ne məd biri saʼ isəg.

¹⁰ Ze biri taŋ yaʼ anìŋ abə bəd mbe ne ghìyə̀ inug icheg ne ìtɔb nyàmnyɔd te ghə̀ʼrə̀ bə̀ wèghè ika Ŋwiye. Bəd mbo̰ ne chwìte inug ako ya bèrè fìŋ ka ka bə̀ dùwə̀ ichug. Chəyi mbɔb mbe bɔ ni ghàm inug tibɔ̀ŋ imbə̀ʼ izwighi mbe ne yaʼi ikaŋ àbɔ̀ŋɔ.

¹¹ Ka à ya bì mbè angirə̀ ne taŋ bèrì ika chè mə̀chwitinùg ako mbe, chəyi mbɔb ya ghàmi inug tibɔ̀ŋ zɔ̀mbì izwighi mbe imbìghè abə Anɔŋisəg.

¹² Bəd mbo̰ ya ghàmà chàpà inug ne chəyi mbɔb kyeri. Mbɔb ya icheg nyam ne chəyi iwe, ne fàʼà məyi inug ne kɔ̀ʼɔ inɔb inga fìŋ. Mbɔb ya icheg nyam ne kweghe məyi ni gha bəd ghum gwì awɔb zwèti. Bəd mbo̰ biri bə ghum ku nim icheg nyam.

¹³ Ŋwiye biri ghum chə awɔb imbə̀ʼ ìmbɔb inug tibɔ̀ŋ mbe ne mbɔb mbe fàʼà. Mbɔb ya kɔ̀ŋɔ̀ ni ghì inug mbe ne ìtɔb nyàmnyɔd kɔŋi kwàʼ tisi. Mbɔb ya kwàʼ apabi tibɔ̀ŋ ne abɔ̀ʼ inən ne zìyè tìnìrètog igun inən icheg ne mbɔb mbe fɔ̀tɔ abɔ̀ʼ inən ni jəg bə̀ kiri ghìyə̀ ìmbɔb inug tibɔ̀ŋ.

¹⁴ Mbɔb ya kɔ̀ŋɔ̀ anug ni ya nɔ̀kɔ̀ mə̀yi. Chəyi mbɔb mbe bɔ̀rɔ ni ghì inug tibɔ̀ŋ. Mbɔb ya sìmè bəd ne fìŋ bɔri zìye inga inug tibɔ̀ŋ. Mbɔb fə kà ka inga anug ni ghə̀ʼrə̀ ighi. Ndɔ̀n Ŋwiye ze igun inɔb.

¹⁵ Mbɔb fə waʼ ikuchèg chɔm, fèbè, si niŋ yaʼ ikuchèg tibɔ̀ŋ we abə Balàm, ŋwan Beyò. Balàm ya wə̀d ne ya kɔ̀ŋi ikab we ne wì yaya ghìyə̀ inug tibɔ̀ŋ bèrè.

¹⁶ Si ya gha, Ŋwiye ya chè inga nyam jàkas gaŋ məd ane inug tibɔ̀ŋ məd. Nyam jàkas ze ya ghàm ane gì wə̀d, ghì wə̀dkə̀n Ŋwiye we sàŋì atəd məd ze ne wì yaya be.

¹⁷ Bəd mbo̰ ya icheg àdùrì ne fə zɔmi. Mbɔb ya icheg pàʼ ne afim che bèʼì. Ŋwiye fə nɔ̀ŋì afub ne fḭ̀yḛ kyìm ane àzɔb asiŋi ngəʼ.

¹⁸ Mbɔb ya ghàmà inug ako məyi ni kɔ̀m igo bə̀ ghìyə̀ məyi inug ne ìtɔb nyàmnyɔd te ghə̀ʼrə̀. Mbɔb ya nə̀rə bəd mbe ne chìyè ìfɔb ìfeg ane bəd inug tibɔ̀ŋ ni ghì gha mbe febe.

¹⁹ Mbɔb ya ghà abə bəd ne fèbè gha mbi biri dù inga ngəʼ, ne mbɔb inɔb ya kiri məfeg abə inug tibɔ̀ŋ mbe ne ìtɔb nyàmnyɔd te ghə̀ʼrə̀. Wə̀d ya ifeg abə aghi ne beri ika igun məd.

²⁰ Àmə yaʼ aghi ne mbɔb ya du inga tika inug tibɔ̀ŋ te inga isəg icheg ne mbɔb ya bḛ ìwa Anɔŋisəg Yeso Kristo ne pùmnə awa, ywìrì kiri gho nyi inga inug mbe, nji inug tibɔ̀ŋ biri fə chìkì awɔb mbi bə chè icheg ne mbi ya bi yaʼ a mbègtog.

²¹ Ze ya bì bɔ̀ŋ gha nji chəyi mbɔb ya bì kyèri icheg ne wə̀d beri ni təm kòʼ, sɔ̀m ni kyeri ywìrì ton ni nɔ̀ŋì mə̀nɔ̀ʼɔ̀ ìzḛzḛ mbe ne mbi ya nàʼi inɔb.

²² Anug ne du inɔb fə chwi gha tìngam tumi te fə dù ane tesiʼ. Tìngam te ya gha: “Bog ya ywìrè jə̀ghə ìmbi məzen,” tì, “Àkuŋə ne mbi so ya ywìrè bə̀ndə̀ ghò inga tìchaʼ.”