2 Kɔrèn 9 - Ikan feg

¹ Chəyi ywìrè jiʼe aton mɔ̀ʼɔ inum ni chà àŋwàʼrì inən ni ghàm imbə̀ʼ anug ne nàʼ àwètì abə bəd Ŋwiye mbe a Jèrusalèm.

² Mə kyèri gha mbə fə chuʼri ìwən nyɔd ni nàʼ àwètì. Mə ya fə kɔ̀m igo abə bəd Kristo mbe aba aben ze a Màsèdonìyà imbə̀ʼ awən. Mə fə ghà inɔb gha, ze fə ghì fituʼ ifibì ni mbə̰ mbe ne yaʼi inga aba aben ze a Akìyà fə chuʼri ìwən nyɔd ni nàʼ àwètì. Icheg ne mbə̰ fə gyendi ni nàʼ àwètì, ze fə ghì gha bəd Kristo mbe inga Màsèdonìyà, mbe ko ni nàʼ ìmbɔb tì ighi ni wètì.

³ Mə ya anìŋ chà ìmba məfi mbo̰ ne tì yaʼi ane ifɔti tì Kristo inən, ni gha mbɔb yèʼe pè ghì mbə chuʼri ìwən nyɔd icheg ne mə̀ ya gha. Àmə chəyi ane, nji ighəm mɔ̀ʼɔ ìmə ikɔmi igo imbə̀ʼ awən biri chè ako.

⁴ Bəd Kristo mɔ̀ʼɔ mə̀ nɔ̀ʼ a Màsèdonìyà yèʼe pè bàd gha chəyi mbə kiri chuʼri ìwən nyɔd, ze biri yàʼ tìnìrètog ina imbə̀ʼ icheg ne tì fə nɔŋi ìta fìŋ ijìm igun inən. Chəyi mə̀ kə̀bi ni ghàm imbə̀ʼ tìnìrètog ni mbə̰ inən biri bə bèrì.

⁵ À ya aton ne mə̀ ya beri ikɔndi gha, ze kòʼ ni chà məfi mbo̰ gha mbe ko ghò imbìghè pè ghì mbə̀ chuʼri ìwən nyɔd ni nàʼ ighi mbe ne mbə̀ ya fə kàʼi. Mə mə̀ pe ne mbə̀ fə nàʼi ighi mbe, ze biri chwi gha, mbə nàʼ imbə̀ʼ icheg ne mbə kɔ̀ŋi ni nàʼ, kayi mbə̀ nàʼi nè zḭ̀ʼḛ̀.

⁶ Tesiʼ ya gha, wə̀d ne nyɔ̀ʼi ighi màʼrì maʼri, wì biri bə fòʼ ighi məyi iki piʼì. Wə̀d ne nyɔ̀ʼi ighi nɔʼ nɔʼ, wì biri bə fòʼ ighi nɔʼ nɔʼ.

⁷ Wə̀d imɔʼ imɔʼ naʼa aghi ze ne wì fə niŋi isɔbi anug ibo inga fìŋ ni nàʼ. Imbə̀ʼ wə̀d mɔ̀ʼɔ naʼa yi aghi nè zḭ̀ʼḛ̀ kə̀ nàʼ aghi mɔ̀ʼɔ icheg wə̀d ne mbi fari fari. Ŋwiye ya kɔ̀ŋɔ̀ wə̀d ne nàʼà nè gyènde.

⁸ Ŋwiye we tì wì nàʼ ighi inən abu abu ne che mbe ne mbə̀ kòʼi ni bèrì ni ghì gha mbə biri se ghàpà ighi abə bəd ndəŋ.

⁹ Àze inga Àŋwàʼrì Ŋwiye gha, “Wì ya nàʼà ighi abu abu abə bəd ne chəyi àzɔb, Chəyi bəd biri nɔ̀ʼ nèbì inug chɔm məd ne we ghìyə̀.”

¹⁰ À ya Ŋwiye we nàʼà ngwèd abə wə̀d mben bə̀ nàʼà tijəg abə bəd. À ya ane ne wì biri bə yètì izən ngwèd, bə̀ yètì ighi mbe ne mbə̀ beri ni ghì gha mbə biri se nàʼà ighi nɔʼ nɔʼ abə bəd ne chəyi àzɔb.

¹¹ E! À ya ane! Ŋwiye biri ghì mbə bèrì ighi ijìm ne mbə̀ koʼi ni bèrì ni gha mbə biri ya ghàpà abə bəd mà nyumə̀ ijìm. Anyumə̀ ne tì biri niŋ ighi mbe ne mbə̀ nàʼi ghò nàʼ abə bəd ne chəyi mbi beri, mbi biri se nàʼà məyakà abə Ŋwiye.

¹² Ane, ighi ne mbə biri nàʼ biri fàʼ inug ibe: Mbi biri ghì bəd ne chəyi mbi kə beri mbi bèrì, bə̀ ghì bəd se nàʼà məyakà abə Ŋwiye ane igyendi.

¹³ Icheg ne mbə̀ nàʼi ighi abə bəd Kristo fɔrɔ abə bəd ndəŋ ni chwi gha mbə̰ mbe zùgrə ikən chɔm imbə̀ʼ Kristo, bəd nɔʼ nɔʼ biri se ghùmnə Ŋwiye.

¹⁴ Ane, mbi biri se gyènde ni chàʼra Ŋwiye inən bə̀ ya kɔ̀ŋɔ̀ awən imbə̀ʼ ìchɔ̀mì kyen ne Ŋwiye fə ghi inən.

¹⁵ Tè naʼa məyakà abə Ŋwiye imbə̀ʼ ineʼi àka inun we ne wì nàʼi ina.